Ba T’uf ko Pi Kristiano ni Ngar Meybilgad
1. Mang e ba t’uf ni ngad rin’ed ya nge yog nda mu’naged e machib ni gad be tay?
1 Dabiyog ni ngad uned ko machib u gelngidad. Ma pi’ Jehovah gelngidad ni ngad rin’ed. (Fil. 4:13) Ma ayuwegdad u daken e pi engel rok ni ngad pirieged e piin ni yad bod e saf. (Rev. 14:6, 7) Jehovah e ir e ma ayuweg awochngin e thin nriyul’ ni kad yunged ma gad be puog e ran ngay be ga’. (1 Kor. 3:6, 9) Rib ga’ fan ko pi tamachib ni Kristiano ni ngar taga’gad nga daken e Chitamangidad nu tharmiy u fithik’ e meybil!
2. Mang boch ban’en nrayog ni ngad yibilayed?
2 Fan Ngodad: Thingar da meybilgad u gubin ngiyal’ ni gad ma un ko machib. (Efe. 6:18) Mang boch ban’en ni ngad yibilayed? Rayog ni ngad meybilgad ngak Jehovah ni nge ayuwegdad nguud pared nib fel’ lanin’dad ma dabda rusgad ni demtrug e re binaw ni gad be machib riy. (Acts 4:29) Rayog ni ngad ninged ku Jehovah ni nge pow’iydad ngak e piin nib fel’ lanin’rad ma yad ba adag ni ngar filed e Bible. Faanra fith be’ e deer ngodad ma rayog ni ngad meybilgad u lanin’dad ni nge ayuwegdad Jehovah ngad pied e fulweg nib puluw. (Neh. 2:4) Rayog ni ngad ninged ni nge pi’ e gonop ngodad ni ngad mon’eged e machib. (Jas. 1:5) Maku, ma felfelan’ Jehovah u nap’an ni gad ma pining e magar ngak ya gad ba taw’ath nrayog ni ngad wereged e thin rok.—Kol. 3:15.
3. Uw rogon nra ayuweg e meybil rodad pi walagdad nge yog nra ululgad ko machib?
3 Fan Ngak Yugu Boch e Girdi’: Susun nra “bagadad me pi’ e meybil rok bagadad,” ngak Got ma nga dogned fithingan e pi walag ni faanra ba puluw. (Jas. 5:16; Acts 12:5) Kam m’ar ma ke buchuuw e tayim ni ngam un machib? Ma ngam meybil ni fan ko pi walag nib fel’ fithik’ i dowrad. Dabmu lemnag ni dariy gelngin e meybil rom ni fan ngorad! Maku ba fel’ ni ngad meybilgad ni nge fel’ laniyan’ e pi tayugang ko am ni rayog ni nge par e pi walagdad “u fithik’ e mocha’ nge gapas.”—1 Tim. 2:1, 2.
4. Mang fan ni ngan tiyan’uy ko meybil?
4 Reb e maruwel nib gel e ngan machibnag fare thin nib fel’ u gubin yang u fayleng. Faanra “nguuda meybilgad” ma Jehovah e ra ayuwegdad ni ngad lebguyed e re maruwel ney.—Rom. 12:12.