Woldug ni Bay Riy e Ke El ni Ke Taw Nga Nap’an ni Ngan T’ar
1. Mang maruwel ni baga’ fan e yibe rin’?
1 I machibnag Jesus be’ ni ppin nu Samaria nge mu’ me yog ngak pi gachalpen ni gaar: “Ngam fal’eged i yaliy e yungi woldug: ya woldug ni bay riy e ke el ni ke taw nga nap’an ni ngan t’ar.” (John 4:35, 36) Kan tabab ko mokun woldug ni fan ko tirok Got ma ke guy Jesus u m’on e ngiyal’ nra wer e machib nga ga’ngin yang u fayleng. Bay Jesus u tagil’ u tharmiy, machane ba l’ag ko re mokun woldug ney. (Matt. 28:19, 20) Mang e be dag ni be gel iyan e re maruwel ney ni be mon’og iyan nge mada’ ko ngiyal’ nra mus?
2. Mang e be dag ni be gel iyan e maruwel ko mokun woldug u ga’ngin yang e fayleng?
2 Ba Mokun Woldug u Ga’ngin e Fayleng: Nap’an e duw ni 2009 ma ke mun 3.2 e pasent ko pi tamachib u ga’ngin yang e fayleng. Ma pi binaw ni kan togopuluw ko machib riy e ke yoor ko 14 pasent e tamachib ni bay riy. Ke yoor ko 7,619,000 e piin ni ma fil e Bible u gubin e pul—ni aram e boor ko urngin e tamachib, ma ke yoor ko baley e milyon ko urngin e piin ni ma fil e Bible ko fa binem e duw. Ba papey ni be wer iyan fare maruwel u lan boor e binaw, ma ba t’uf e pi missionary ni kar uned ko skul u Gilead. Be yoor e girdi’ ni be un ko machib u lan e pi binaw u yugu boch e nam. Be m’ug riy ni be gurnag Jehovah e maruwel ko machib ko ngiyal’ ney ni ke chugur nga tomren fare mokun woldug. (Isa. 60:22) Aram rogon u wan’um e “pi binaw” ni ga be machib riy, fa?
3. Mang e ma lemnag boch e girdi’ u murung’agen e mokun woldug ni gad be tay?
3 Mokun Woldug ani Gimed Be Tay: Boch e girdi’ e ma gaar: “Pi binaw ni gu ma machib riy e gathi ri boor e girdi’ riy ni ba adag e machib.” Riyul’ ni boch e binaw e be m’ug riy ni gathi ri boor e girdi’ ni ba adag e machib ni bod boch e binaw. Ma boch e binaw e kafram e boor e girdi’ riy ni ba adag e machib machane ke thil e chiney. Ere boch e Pi Mich e ma lemnag ni ke mus rogon e machib ni rayog ni ngar ted u rom ma ke mus ni n’en ni ngan rin’ e ngan kunuy e chuuw ni ka bay e girdi’ ni yad ba adag e machib. Rriyul’ ni aram rogon, fa?
4. Susun ni uw rogon u wan’dad e machib ni gad ma tay, ma mang fan?
4 U tabolngin nge mada’ ko ngiyal’ ni kan mu’, ma ngan rin’ e re maruwel ko mokun woldug ney u fithik’ e pasig. Mu lemnag rogon e thin rok Jesus ni gaar: “Woldug ni ngan kunuy ngan tay nga naun e ba ga’ ni ba ga’ yang, machane pi’in ngar muruwliyed nge thap nga naun e ba lich. Mu meybilgad ngak e en ni ir e suwon e re woldug nem ngki pi’ boch girdien e maruwel ngar maruweliyed e re woldug rok nem nge thap nga naun.” (Matt. 9:37, 38) Jehovah ni ani Ga’ ko fare maruwel ko mokun woldug e ra turguy e ngiyal’ nge gin nra yib wom’engin riy. (John 6:44; 1 Kor. 3:6-8) Mang e maruwel rodad? Be pi’ e Bible e fulweg riy ni gaar: “Mu yung e woldug rom ni kakadbul nge blayal’.” (Ekl. 11:4-6) Arrogon, nap’an ni ke chugur ni nge mus fare maruwel ko mokun woldug ma gathi aram e ngiyal’ ni ngan toffan!
5. Mang fan ni susun ni ngad ul’ul’gad i wereg e machib u fithik’ e pasig ni yugu aram rogon ni gathi ri ba adag e girdi’ u lan e binaw?
5 Nguun T’ar Wom’engin: Mus ni kan wereg e machib u lan e binaw boor yay ma be m’ug riy ni gathi ri ba adag e girdi’ e machib, machane bay fan ni ngad pasiggad ko machib. (2 Tim. 4:2) Pi n’en ni be buch u fayleng e ma n’igin ni nge thil e lem ko girdi’ mi yad lemnag e gabul nge langleth. Ma nap’an ni be ilal iyan e piin fel’ yangaren ma yad ra tabab i gay rogon ni nge gapas lanin’rad. Arrogon, sana piin ni dar motoyilgad faram e yad ra adag e machib. Mus koi piin ni dubrad e machib rodad nib t’uf ni ngan ginangrad.—Ezek. 2:4, 5; 3:19.
6. Faanra ba mo’maw e machib u lan e binaw rodad, ma mang e ra ayuwegdad ngad pasiggad?
6 Faanra ba mo’maw e machib u lan e binaw rodad, ma mang e ra ayuwegdad ngad rin’ed u fithik’ e pasig? Sana rayog ni ngad uned nga yugu ba mit e machib ni gathi machib u mit e tabinaw, ni bod e machib ko gin ni yima fol chuway’ riy ngu telefon. Fa rayog ni ngad thiliyeged e n’en ni gad ma weliy ko machib. Fa rayog ni ngad thiliyeged e schedule rodad ko machib ngad uned ko machib ko balayal’ ara yugu ba ngiyal’ ni bay e girdi’ u tabinaw. Ku rayog ni ngad filed e thin nu bang ya nge yog nda machibnaged e girdi’ u boch e nam. Maku rayog ni ngad uned ko regular pioneer nge yoor e tayim rodad ko machib. Fa rayog ni nga darod nga bang ni buchuw e ta machib riy. Faanra ba puluw e lem rodad u murung’agen e re maruwel ko mokun woldug ney ma gad ra athamgil ni ngad uned ko re maruwel ney nib ga’ fan nge mus rogon.
7. Wuin e ra mus e re maruwel ney?
7 Pi ta milay’ e ba mudugil nap’an ni ngar kunuy e woldug rorad riy, ere darur toffangad fa ra sagaalgad ko maruwel nge mada’ ko ngiyal’ ni ke m’ay e maruwel. Aram rogon e maruwel ko mokun woldug ni gad be tay. Ere uw n’umngin nap’an ni ngad maruwelgad? Gad ra maruwel nge yan i mada’ ko “tomur” ko re m’ag nib kireb ney. (Matt. 24:14; 28:20) Gad ba adag ni ngad mu’naged fare maruwel ni kan tay chilen ngodad ni ngad rin’ed ni bod e n’en ni rin’ e bin th’abi ga’ e Tamachib rok Jehovah. (John 4:34; 17:4) Ere nguud uned ko machib u fithik’ e pasig nge falfalan’ nge mada’ ko tomur. (Matt. 24:13) Ya dawori m’ay e re mokun woldug ney!
[Caption on page 2]
Nap’an nra tabab e mokun woldug nge yan i mada’ ko ngiyal’ ni kan mu’ mab gel e maruwel ni yira tay