Deer

◼ Susun u n’umngin nap’an ni nge un be’ ko muulung nge machib u mit e tabinaw i yan mfini bung rogon ni nge un ko taufe?

N’en nth’abi ga’ fan ni nge dugliy be’ e aram e nge un ko taufe. Ere, u m’on ni nga nog ngak be’ nrayog ni nge un ko taufe, ma susun ni ke tamilang u wan’ e n’en ni baadag Got ni nge rin’. Maku susun ke m’ay i dugliy u wan’ ni baadag ni nge fol ko pi motochiyel rok Got.

Kan tay chilen ngak e piin Kristiano ndab ra paged e muulung, ere reb e publisher ni dawori taufe e susun ni be athamgil ni nge un ko urngin e muulung ni yima tay ni gubin e wik. (Heb. 10:24, 25) Ma susun ni nge un i pi’ e fulweg. Ba ga’ ni ir be’ ni be un ko fare Theocratic Ministry Skul, machane gathi ban’en ni thingari rin’ e re n’ey.

Bochan ni kan tay chilen ngak e piin Kristiano ni ngar machibnaged fare thin nib fel’, ma ngar ayuweged e girdi’ ni ngar manged pi gachalpen Jesus, ere u m’on ni nge un reb e publisher ko taufe ma thingari un ko machib ni gubin e ngiyal’. (Matt. 24:14; 28:19, 20) Susun in e pul ni nge un be’ ko machib u m’on ni nge un ko taufe? Ba puluw ni ngan pi’ e tayim ngak ni nge dag nriyul’ ni baadag ni nge un ko machib u gubin e pul. (Ps. 78:37) Machane de t’uf ni nge un ko machib nrib n’uw nap’an mfini bung rogon ni nge un ko taufe. Susun uw n’umngin nap’an ni nge pi’ e report rok? Dariy e motochiyel u rogon ni ngan rin’ e re n’ey. Thingari lemnag e piin piilal rarogon reb e publisher nge reb, ya ba thilthil rarogon e girdi’.​—Luke 21:1-4.

Piin piilal (ara pi ministerial servant ko pi ulung ni kemus ni in e piin piilal ni bay riy) ni yad ma mada’ e piin ni ngar uned ko taufe e thingar ra fal’eged i lemnag nib thilthil rarogon e pi girdi’ ney, ma susun ni ngar gonopiyed ko ra bung rogorad ni ngar uned ko taufe. Ma yad baadag ni ngar guyed nriyul’ ni baadag ni nge mang reb Pi Mich Rok Jehovah, ma ke felfelan’ ni be un ko ulung rok Jehovah, ma kub felfelan’ ni be un ko machib. Ke nang e piin piilal fan ndawori ilal ko tirok Got ban’en ara dawori salap ko machib. Faanra yad be lemnag ni faen ni nge un ko taufe e dawori bung rogon ni nge un ngay, ma susun ni ngar beeged boch e thin nu Bible ngak u fithik’ e sumunguy nra tamilangnag fan ndawori bung rogon ni nge un ko taufe mar pied e ayuw ngak ni nge mon’og ko tirok Got ban’en.