Mu Filed Ban’en Rok e Pi Profet—Nahum
1. Mang e gad ra fil ko fare babyor rok Nahum?
1 Pi n’en ni ke magey u Nineveh e be dag e mich riy ni cham Jehovah nge gel ko pi toogor Rok, ma ki mada’ ko tin th’abi kireb e toogor rok nde yag ni ngar gelgad Ngak ni bod rogon ni yiiynag Nahum. (Nah. 1:2, 6) Gad ra fal’eg i yaliy e re yiiy rok Nahum nem, ma bay boch ban’en ni gad ra fil riy nra ayuwegdad u nap’an e machib.
2. Uw rogon ni ngad weliyed fare thin nib fel’ ni nge fal’eg laniyan’ e girdi’?
2 Mu Fal’eg Lanin’rad Mag Pi’ e Athap Ngorad: Som’on ni yira guy e thin ni bay u tabolngin fare babyor rok Nahum, mab ga’ ni yigoo thin nib togopuluw ngak piyu Nineveh e bay riy. Nineveh e aram e tochuch nu Assyria kakrom. (Nah. 1:1; 3:7) Machane, pi thin ney ni yog Got nib togopuluw ko girdi’ u rom e k’aring e felfelan’ ko girdi’ rok Jehovah. Fare ngachal ni Nahum e be yip’ fan “Be’ ni Ma Fal’eg Lanin’uy.” Ma ir e micheg ngak e pi Jew ndab ki n’uw nap’an ma yira thang e pi toogor rorad! Ki yog Nahum ni Jehovah e ir e ma “yoror ko girdi’ rok u ngal’an e gafgow.” (Nah. 1:7, BT) Nap’an ni gad ra machib, ma aram e ku gad be wereg e thin nib fel’ ma gad be pi’ e athamgil nga laniyan’ boch e girdi’ ni ngar nabgad ngak Jehovah.—Nah. 1:15.
3. Uw rogon nrayog ni ngad folwokgad rok Nahum u rogon ni ngad fanayed boch ban’en ni buch rok boch e girdi’ nge boch e fanathin u nap’an ni gad be machibnag be’?
3 Mu Fanay Boch Ban’en ni Buch rok Boch e Girdi’ nge Boch e Fanathin: I thagthagnag Jehovah nga laniyan’ Nahum ni nge taareb rogonnag e magothgoth ni yira tay ko fare mach nu Nineveh ko mogothgoth nni tay ko fare mach nu Egypt ni gothey piyu Assyria u m’on riy ni ka nog yu Thebes (No-amon) ngay. (Nah. 3:8-10) Nap’an ni gad be weliy ko girdi’ murung’agen e ngiyal’ ni yira thang e re m’ag nib kireb ney, ma rayog ni ngad tamilangnaged boch e yiiy u Bible ni be micheg ni ma lebguy Jehovah urngin ban’en ni ma yiiynag. Bod ni rofen ni yib piyu Babylon nge piyu Medes ni ngar chamgad ko fare mach nu Nineveh ko duw ni 632 B.C.E., me aw e n’uw nrib gel nge sugubur fare Lul’ nu Tigris me yib e ran riy nga daken e binaw nge buthug e yoror ko re mach nem. Nap’an ni puth e yoror ko fare mach me mom ko pi toogor rorad ni ngar chamgad ngorad ni bod rogon ni yiiynag Jehovah.—Nah. 1:8; 2:6.
4. Uw rogon ni ngad machibgad u reb e kanawo’ nib tamilang mab mom ni ngan nang fan?
4 Mu Weliy Ban’en nib Tamilang Mab Mom ni Ngan Nang Fan: Ba mom ni ngan lemnag rarogon e pi n’en ni yoloy Nahum murung’agen, mab tamilang. (Nah. 1:14; 3:1) Ere, ku arrogodad ni susun e nga u dogned e thin nib mom ni nge nang e girdi’ fan. (1 Kor. 14:9) Nap’an ni gad ra mada’nag be’ ko yay ni som’on, ma gad tamilangnag ngak fan ni ka darod nga tafen. Maku nap’an ni gad be fil e Bible ko girdi’, ma gad ayuwegrad ni nge mich Jehovah nge Thin rok u wan’rad, me ga’ fan u wan’rad angin e thin rok ngorad.—Rom. 10:14.
5. Mang e be ayuwegdad fare yiiy rok Nahum ni nge pagan’dad ngay?
5 Gad ra beeg fare babyor rok Nahum ma gad ra guy riy nrib pagan’ ngak Jehovah nra lebguy e n’en ni ke micheg. Nap’an ni gad be chugur nga tungun e re m’ag rok Satan ney, ma rayog ni nge pagan’dad ko n’en ni ke yog Got ni gaar: “Dariy be’ nra togopuluw ngak nib yoor ko taab yay.”—Nah. 1:9, BT.