Mu Ayuweg e Piin nib Malmit ni Ngar Nanged Murung’agen Jehovah
1. Uw rogon ni dag Jesus ni be runguy e piin ni yad ba malmit?
1 In e rran ni ka bay mfin li’ Jesus nge yim’. Ma be yan ni nge chuw ko fare mach nu Jeriko me tolul l’agruw e pumoon ni yow ba malmit ngak ni lungurow: “Fak David! Mu runguymow!” Yugu aram rogon ni boor ban’en ni be magafan’ Jesus ngay ni bochan ni dabi n’uw nap’an ma yira gafgownag, machane me tal nge piningrow ma aram me golnagrow. (Matt. 20:29-34) Uw rogon nrayog ni ngad folwokgad rok Jesus u rogon ni dag e runguy ngak e piin ni yad ba malmit?
2. Uw rogon ni ngad machibnaged be’ ni kad mada’niged u fithik’ e girdi’ ni yoor nib malmit?
2 Ngan Pi’ e Ayuw: Faan ga ra mada’nag be’ nib malmit u fithik’ e girdi’ ni yoor, ma rayog ni nga mog fithingam ngak ma gog ngak nrayog ni ngam ayuweg. Miti girdi’ ney e ba ga’ ni yima darifannagrad, ere ga ra yog ni ngam ayuweg bagayad ma rayog ni nge dag nder pagan’ ngom. Machane, ga ra gol ngak mag dag nriyul’ ni ga baadag ni ngam ayuweg ma dabisiy nra felfelan’ ngay. Dab mu pagtalin ni pi girdi’ ney e ba thilthil rarogorad, ya boch i yad e ri dabiyog ni nge guy ban’en, ma boch i yad e ma guy ban’en ni gathi rib fel’ rogon, ere bochan e re n’ey ma ga ra nang rogon e ayuw ni ngam pi’. Tomuren ni kam pi’ e ayuw ngak bagayad, ma sana rayog ni nga mog ngak ni ga be ayuweg e girdi’ ni ngar filed murung’agen e Bible. Mog ngak nrayog ni ngam beeg reb e thin ni bay ko Psalm 146:8 ara Isaiah 35:5, 6. Ma faanra rayog ni nge beeg e babyor ni kan fal’eg ni fan ko piin nib malmit, mag fith ngak ko baadag ni nge yag ba ken ngak nra ayuweg ngki nang boch murung’agen e Bible. Ku rayog ni ngam ayuweg ni nge yag e pi audio file ngak ni bay ko jw.org. Faanra bay e screen reader program ko computer rok ma sana ra adag ni nge downloadnag boch e article ara pi babyor rodad ni kan fal’eg ni RTF (Rich Text Format) ni bay ko jw.org nrayog ni nge motoyil ngay.—Mu guy fare kahol ni kenggin e “Nap’an ni Gad Ra Ayuweg e Piin nib Malmit . . . ”
3. Uw rogon ni ngad gayed e piin nib malmit ko yungi n’en ni gad ma machib riy?
3 Mu Gay e Piin nib Malmit: Gathi ban’en ni gad ma mada’nag e piin nib malmit u nap’an ni gad be machib u mit e tabinaw ya bochan ni yooren i yad e dabun ni nge non ko girdi’ nder nanged owcherad. Aram fan nib t’uf ni ngan fal’eg i ‘gay’ e pi girdi’ ney ya nge yag ni ngan machibnagrad. (Matt. 10:11) Bay be’ nib malmit ni gimew nga maruwel ara skul? Faanra bay mag guy rogon ni ngam non ngak. Faanra bay e skul ni fan ko piin nib malmit ko binaw rom, mab fel’ ni ngam pi’ boch e pi babyor rodad ni kan fal’eg ni fan ngorad ni ngar ted ko library rorad. Ga manang be’ ni bay reb i girdien e tabinaw rok nib malmit? Bay boch e ulung ko binaw rom ni yad ma pi’ e ayuw ko piin nib malmit ara bay e naun ni yad ma pi’ ni nge par e pi girdi’ ney riy? Rayog ni ngam weliy ngak faen ni bay reb e girdien e tabinaw rok nib malmit, ara faen ni ma ayuweg e girdi’ ni yad ma yan ngaram nge girdi’ ni yad ma call ngaram ara faen nib ga’ ko re ulung nem ni Pi Mich Rok Jehovah e ri yad baadag ni ngar ayuweged e pi girdi’ nem ni yad ba malmit, ma gog nrayog ni ngam pi’ boch e babyor ngorad maku rayog ni ngam pi’ e audio recording ni bay e thin ko Bible riy ni ngar motoyilgad ngay. Mag dag fare n’en ni ke micheg e Bible ni dabki n’uw nap’an me chuweg Got e biney e magawon ni manemus. Sana ku rayog ni ngam pag fare video ko jw.org ni kenggin e “Without It, I Would Feel Lost,” ni bay murung’agen be’ nib pumoon riy nib malmit ni ke yib angin fare Bible ni kan fal’eg ni fan ko piin nib malmit ngak. Nap’an ni ga ra weliy fan ni kam man, ma dabisiy ni ku ra bayay nim man ma rayog ni ngam pirieg be’ ni baadag e machib.
4. Mang e rayog ni ngad filed ko n’en ni ke buch rok Janet?
4 Janet nreb i walagdad nib malmit e yan nga bang ni ma par e girdi’ riy ni ku yad ba malmit. Me tabab ni nge non ngak reb e ppin. I gaar ngak, “I golnag Jesus e piin nib malmit ya nge dag e n’en nra rin’ ni fan ngak gubin e piin ni yad ba malmit boch nga m’on.” Ma aram mar weliyew fare thin ko Revelation 21:3, 4, me weliy Janet ngak rogon nra lebguy Gil’ilungun Got e re n’ey ni ke micheg. Me par fare pin ni daki non ma aram me gaar ngak Janet, “Dariy ba ngiyal’ ni kug rung’ag be’ nib malmit ni ke yog ban’en ni aray rogon. Ya yooren e girdi’ nrayog ni ngar guyed ban’en e ba mich u wan’rad ni piin ni yad ba malmit e bay boch ban’en ni kar rin’ed ara bay ban’en ni ke rin’ e girdi’ rorad kakrom ma aram fan ni kar malmitgad.” Ke e-mailnag Janet reb e link ko fare babyor ni kenggin e Mang e Ri Be Fil e Bible? ni bay ko jw.org ngak fare pin ni kar nonow. Ma chiney e be un e re ppin nem ko fol Bible ni l’agruw yay u reb e wik.
5. Yugu aram rogon ndabiyog ni ngad golniged e piin ni yad ba malmit ni bod rogon e n’en ni rin’ Jesus, machane mang tow’ath e ra yag ngodad ni faan gad ra athamgil ni ngad machibnaged yad?
5 Bin riyul’ riy, e dabiyog rodad ni ngad golniged e piin ni yad ba malmit ni bod rogon e n’en ni rin’ Jesus, machane rayog ni ngad ayuweged e girdi’ ni ke tay Satan lanin’rad u fithik’ e lumor nib muun ngay e piin nriyul’ ni yad ba malmit ni nge tamilangan’rad ko tin riyul’ ni yib ko Thin rok Got. (2 Kor. 4:4) Bochan ni ke “kireban’” Jesus ngak fa gal pumoon ni yow be par u tooben e kanawo’ u Jeriko ma aram me golnagrow. (Matt. 20:34) Faan gad ra lemnag rogon ni ngad ayuweged e piin ni yad ba malmit, ma rayog ni ngad felfelan’gad u nap’an ni gad ra ayuweg boch i yad ni ngar nanged murung’agen Jehovah ni ir faen nra chuweg e binem e magawon ni malmit ni manemus.