Kabang ni Bay e Pi Talin e Maruwel Rodad Riy
1. Uw rogon nrayog ni ngan taarebrogonnag e pi tamachib ni Kristiano ngak e girdi’ ni yad ba salap i ngongliy ban’en?
1 Be’ nib salap i ngongliy ban’en e boor talin e maruwel ni ma maruwel ngay. Bay boch e talin e maruwel nib mudugil e ngiyal’ nrayog ni ngan maruwel ngay nge miti maruwel nrayog ni ngan fanay ngay, maku bay boch e talin e maruwel ni boor mit e maruwel nrayog ni ngan fanay ngay. Pi girdi’ ney ni yad ba salap i ngongliy ban’en e gubin ngiyal’ ni yad ra yan ma bay e kabang rorad ni bay e pi talin e maruwel rorad riy ni yad ba salap i fanay. Be pi’ e Bible e athamgil nga laniyan’ gubin e Kristiano ni ngar rin’ed fare maruwel ni machib nib fel’ rogon ma ngkur manged ‘girdien e maruwel nder tamra’gad ko maruwel rorad.’ (2 Tim. 2:15) Nap’an ni gadad ra yan ko machib, ma mang e bin th’abi ga’ fan e talin e maruwel ni gadad ma fek u kabang rodad? N’en ni th’abi ga’ fan ni gad ma fanay e aram e Thin rok Got ya nge yag ni ngad ayuweged e girdi’ ni ngar manged ‘pi gachalpen’ Jesus. (Matt. 28:19, 20) Ere, rib ga’ fan ni ngad athamgilgad ngad mon’oggad ma gad “machibnag e thin rok Got nrogon.” Maku bay yugu boch e talin e maruwel u kabang rodad nib t’uf ni nge nang gubin e Kristiano rogon ni ngar maruwelgad ngay nib fel’ rogon ya nge yag ni ngar filed e tin riyul’ ngak e girdi’.—Prov. 22:29.
2. Mang boch e pi talin e maruwel nib ga’ ni gad ma fanay u nap’an e machib?
2 Pi Babyor nib Ga’ ni Gad Ma Fanay u Nap’an e Machib: Gad ma fanay e Bible u nap’an ni gad be machib. Machane, ku mang boch e pi talin e maruwel ni thingar da fanayed u nap’an e machib? Fare talin e maruwel nib ga’ ni ir e gad ma fanay ni ngad filed e tin riyul’ u Bible ngak e girdi’ e aram fare babyor ni kenggin e Mang e Ri Be Fil e Bible? U tomuren ni kad mu’naged i fil e re babyor ney ngak faen ni gad be fil e Bible ngak, ma aram e ngad fanayed fare babyor ni kenggin e “Um Pired ni Gimed Ba T’uf rok Got” ya nge yag ni nge nang rogon ni nge fanay e pi kenggin e motochiyel rok Got u lan e yafas rok. Aram fan nib t’uf ni ngad nanged rogon ni ngad maruwelgad ara ngad fanayed e gal babyor ney. Ku bay yugu boch e babyor ni gad ma fanay ni fan ko fol Bible nib t’uf ni nge gubin ngiyal’ ma ngaud feked u lan e kabang rodad. Fare babyor ni kenggin e Thin nib Fel’ ni Yib rok Got! e ku aram reb e babyor ni gad ma fanay ni ngad tababnaged e fol Bible ngak be’. Ma faanra bay e girdi’ ko gin ni gad ma machib riy nib mo’maw’ rorad ni ngar beeged e babyor ara bay boch i yad ndawor ni pilyeg e babyor ko thin rorad, ma aram e rayog ni ngad fanayed fare babyor ni kenggin e Mmotoyil ngak Got me Yog e Yafas ni Manemus Ngom. Reb e babyor nrayog ni nge ayuweg e girdi’ ni ngar nanged murung’agen e ulung rok Jehovah e aram fare babyor ni kenggin e Mini’ e Piin ni Yad Be Rin’ e N’en nib M’agan’ Jehovah Ngay e Ngiyal’ Ney? Boch e pi talin e maruwel rodad ni thingar da nanged rogon ni ngad fanayed ni ngad ayuweged e girdi’ ni ngar manged boch i gachalpen Jesus e aram boch e video ni kenggin e Mang Fan ni Ngam Fil e Bible?, nge Mang e Yima Rin’ ko Pi Tagil’ e Liyor Romad?, nge Does God Have a Name?
3. Fapi babyor ni Machib ko Gil’ilungun nra yag ngodad boch nga m’on e mang e ra ayuwegdad riy?
3 Pi babyor ni Machib ko Gil’ilungun nra yag ngodad boch nga m’on e rayog ni nge ayuwegdad ni ngad mon’oggad u rogon ni ngad fanayed e pi babyor rodad ney. Gad ra athamgil ni ngad fanayed e pi talin e maruwel ney nib fel’ rogon, ma aram e gad be fol ko fare fonow ni be gaar: “Mu ayuwegem, ma ga ayuweg rogon ni ga be weliy murung’agen e thin rok Got ngak e girdi’. Um rin’ e pi n’ey i yan, ya faanra mu rin’ ma ga ra ayuwegem nge piin ni yad ma motoyil ngom ngar thapgad ngak Got.”—1 Tim. 4:16.