Rogon ni Ngan Fanay e Pi Audio Recording
1. Ku mang boch ban’en ni bay rodad ni ku rayog ni nge ayuwegdad ni ngad mon’oggad ko tirok Got ban’en?
1 Boor e girdi’ e yad ma felfelan’ u nap’an ni yad ra yan ko fare website rodad ni jw.org ni ngar beeged e thin riyul’ ko Bible. (Ekl. 12:10) Machane uw rogon gur, kaam motoyil boch ko pi audio recording ni bay ko re website ney? Pi audio recording ney e ra ayuwegey ni ngan motoyil nga boor ban’en ni bay ko re website ney. Uw rogon ni nge yib angin e pi audio recording ney ngodad?
2. Uw rogon ni ngad fanayed e pi audio recording u nap’an ni gad be fil e Bible ni yigoo gadad ngu nap’an ni gad be tay chon e tabinaw rodad e fol Bible ni tabinaw u taabang?
2 Fan Ngodad nge Chon e Tabinaw Rodad: Faan gad ra motoyil ko pi audio recording ko Bible nge pi magazine ara yugu reb e babyor ko ulung u nap’an ni gad be milekag ara nap’an ni gad be rin’ yugu reb e ban’en, ma re n’ey e ra ayuwegdad ni ngad maruwelgad ko tayim rodad nib fel’ rogon. (Efe. 5:15, 16) Maku rayog ni ngad motoyilgad chon e tabinaw rodad nga reb e audio recording u nap’an e fol Bible ni tabinaw ma gad be beeg e birodad e babyor. Gad ra fanay e pi audio recording u nap’an ni gad be fil e Bible rodad ni yigoo gadad ma rayog ni ngad mon’oggad ko beeg babyor, maku gad ra mon’og i fil yugu reb e thin nib beech.
3. Mini’ e piin ni gad ma machibnagrad ni ku rayog ni nge yib angin e pi audio recording ngorad?
3 Nap’an e Machib: Sana bay boch e girdi’ ko gin ni gad ma machib riy ndariy e tayim rorad ni ngar beeged e pi babyor ni yima pi’ ngorad, ere dabisiy ni yad ra adag ni ngar motoyilgad ko fapi audio recording. Ara ku gad ra mada’nag e piin nib thil e thin rorad ma yad ra adag ni ngar rung’aged murung’agen Gil’ilungun Got ni faanra yad ra motoyil ngay “nthin” rorad. (Acts 2:6-8) U boch e binaw e faan ni yira motoyil e aram ban’en nrib ga’ fan ko birorad e yalen. Ni bod ni girdi’ nu Hmong e ba ga’ ni yad ma weliy rarogon e yalen rorad ko tin ni ka bay e mfen, ma pi girdi’ ney e ba ga’ ni darur paged talin e pi n’en ni kan weliy ngorad. Ku bay yu yang ko fare binaw nu Africa ni ba ga’ ni yad ma weliy murung’agen e pi chep ni bay rogon ko yalen rorad.
4. Mang boch e deer e ngad fithed gadad riy u murung’agen rogon ni ngad ayuweged e girdi’ u nap’an e machib?
4 Gur, ra yib angin reb ko fapi audio recording ngak be’ ni kad mada’naged u nap’an e machib ni faan gad ra cheleg ni nge motoyil ngay ni thin rok? Ma uw rogon fare audio publication, ra yib angin ngak be’ ni faan gad ra pi’ ko e-mail rok ni nge beeg? Sana rayog ni ngad downloadnaged reb e audio recording nga bang e CD ma gad pi’ ngak be’ ni kad mada’gad ni baadag e machib, maku rayog ni ngkud pied e babyor riy. Gubin e electronic book, brochure, magazine, ara tract ni gad ma pi’ ngak be’ u nap’an e machib e rayog ni ngad yoloyed ko report rodad. Kan fal’eg rogon e pi audio recording ni fan e nge ayuwegdad u nap’an ni gad be fil e Bible rodad ni yigoo gadad ngu nap’an ni gad be weliy e tin riyul’ u murung’agen Gil’ilungun Got ko girdi’.—1 Kor. 3:6.