Um Meybil Ngak Got Ya Nge Yag Nim Fel’ u Wan’

Bay reb e tow’ath ni yugu ba thil ni ke pi’ Got ko girdi’. Re tow’ath nem e aram e rayog ni ngad nonad ngak ma gad weliy lanin’dad ngak u daken e meybil. I meybil David ni profet ni gaar: “Gur e En Ga Ma Rung’ag e meybil e nge yib urngin mit e girdi’ ngom.” (Psalm 65:2, NW) Machane uw rogon ni ngad meybilgad u reb e kanawo’ nra rung’ag Got me tow’athnagdad?

UM MEYBIL U FITHIK’ E SOBUT’AN’ NI KE YIB U GUM’IRCHAEM

Meybil ni ga ma tay ni yigoo gur e ra bing e kanawo’ ngom ni ngam weliy ngak Got urngin e magafan’ rom, ara urngin ban’en ni bay u lanin’um. (Psalm 62:8) Got ni Gubin Ma Rayog Rok e rib ga’ fan u wan’ e meybil ni ke yib u gum’irchaey.

MU NON NGAK GOT NI GA BE FANAY FITHINGAN

Yugu aram rogon ni boor e liw rok Got, machane kemus ni taareb fithingan ni bay. “Gag Jehovah. Ireray fithingag.” (Isaiah 42:8, NW) Fare ngachal ni Jehovah e sogonap’an 7,000 yay ni ke m’ug u lan fare Babyor nib Thothup. Boor e profet ni yad ma fanay fithingan Got u nap’an ni yad be meybil ngak. I gaar Abraham: “Somol [Jehovah], wenig ngom, . . . ya ngkug non [ngom] bayay.” (Genesis 18:30) Ku arrogodad nsusun e ngad fanayed fithingan Got ni Jehovah u nap’an ni gad be meybil.

MMEYBIL KO THIN ROM

Demtrug e thin rodad ma rayog ni nge nang Got fan e n’en gad be yog nge n’en gad be lemnag. Be micheg e Thin rok ngodad ni be gaar: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemturug ko be’ u kun nam.”​—Acts 10:34, 35.

Machane, faanra nge tow’athnagdad Got ma de gaman ni kemus ni ngaud meybilgad. Tin migid e article e gad ra weliy riy e n’en nib t’uf ni ngad rin’ed.