Ra yag e bin riyul’ e felfelan’ ngodad ni faan gad ra fol ko pi motochiyel rok Got
Pi Tow’ath Nra Yag Ngak e Piin Yad Ma Fol Rok Got
I yog Moses ni profet ni faan gad ra fol ko pi motochiyel rok Got ma ra tow’athnagdad. (Deuteronomy 10:13; 11:27) Gathi gad ma fol rok Got ni bochan e gad be rus nra gechignagdad. Pi fel’ngin Got nib manigil e ma k’aringdad ni ngad folgad rok ni bochan e ba t’uf rodad ma dubdad ni ngad rin’ed ban’en nrayog ni nge kirebnag laniyan’. “Baaray fan ni nge t’uf Got rodad: fan e ngad folgad ko tin ni ke yog ni ngad rin’ed.”—1 John 5:3.
Machane uw rogon nra tow’athnagdad Got ni faan gad ra fol rok? Am lemnag l’agruw e kanawo’.
1. FAAN GAD RA FOL ROK GOT MA GAD RA GONOP
“I Gag Somol ni Got romed, faen baadag ni nge fil ngomed e tin nib fel’ me pow’iymed ko fare kanawo’ ni ngam marod riy.”—ISAIAH 48:17, BT.
Jehovah Got ni ir e En Ke Sunmiydad e manang rarogodad ma ma pow’iydad. Faanra gad baadag ni nge ayuwegdad e pi n’en be fil ngodad ni ngad dugliyed boch ban’en u fithik’ e gonop, ma aram e thingar da filed u lan fare Babyor nib Thothup e n’en baadag ni ngad rin’ed ma gad fol riy.
2. FAAN GAD RA FOL ROK GOT MA GAD RA FELFELAN’
“Ri kab felan’ e piin ni kar rung’aged e thin rok Got ma kar pired ni yad be fol riy!”—LUKE 11:28.
Bokum milyon e girdi’ e ngiyal’ ney ni yad ma fol ko Thin rok Got e ke yag e bin riyul’ e felfelan’ ngorad. Am lemnag e n’en ni buch rok reb e pumoon u Spain nib papey e damumuw ngak ma kub gel e gafgow ni ma tay ko girdi’ nib muun leengin ngay. Immoy reb e rran ni beeg u lan reb e babyor ni yoloy Moses ni profet murung’agen rogon feni sumunguy Josef ni fak Jakob. Josef e ni pi’ nchuway’ ni nge mang sib, mu kun t’ar e thin nga daken mi nin’ nga kalbus. Yugu aram rogon me ulul nga i dag e sumunguy, ma be par nib gapas, me n’ag fan e kireb ni kan rin’ ngak. (Genesis, guruy ni 37-45) I yog e re moon nem nu Spain ni gaar: “Bochan ni ug lemnag murung’agen e n’en ni rin’ Josef, ma aram e n’en ni k’aringeg ni nggu dag e sumunguy, nge gol, nge t’ar laniyan’. Bochan e re n’ey, ma chiney e ke yag ni nggu par ni gub felfelan’.”
Fare Babyor nib Thothup e boor ban’en ni bay riy nrayog ni nge pow’iydad u rogon e ngongol nsusun e ngaud daged ko girdi’. Bin migid e article e ku ra tamilangnag boch ban’en u murung’agen e re n’ey.