Mu Fanay e Yafos Rom ni Ngam Pining e Sorok ngak Jehovah!

Yafos rodad e ba tow’ath nrib ga’ fan. Ere, rogon ni gad ma maruwel ko re tow’ath ney ni gubin e rran e be m’ug riy feni rib ga’ fan e re n’ey u wan’dad. Bochan ni gadad e Pi Mich Rok Jehovah, ma aram fan ni gad ma fanay e salap rodad ni ngad ted fan ma gad pining e sorok ngak Jehovah ni ir e En ni Ke Pi’ e Yafos. (Ps 36:9; Re 4:11) Machane bochan e pi magafan’ ni gad ma mada’nag u reb e rran ngu reb u lan e re fayleng nib kireb ney, ma pi n’ey e rayog ni nge mo’maw’nag ngodad ni ngad m’oneged e pi n’en ni gad ma nameg ni fan ko tirok Got ban’en. (Mr 4:18, 19) Ere ba t’uf ni nge bagadad me fith ir ko: ‘Gur, gu be pi’ e tin th’abi fel’ rog ngak Jehovah? (Ho 14:2) Gur, re maruwel ney ni gu be un ngay e be momnag rogon e pigpig ni gu be tay ngak Jehovah, fa be mo’maw’nag? Mang boch ban’en ni gu be nameg ni fan ko tirok Got ban’en? Ma uw rogon ni nggu yoornag e tayim rog ni fan ko machib?’ Ere, faanra ga be guy ni bay boch ko pi n’ey nib t’uf ni ngam mon’og riy, mag yibilay ngak Jehovah ni nge ayuwegem mag guy rogon ni ngam thilyeg. Dariy e maruwar riy ni faan ga ra guy rogon ni ngam pining e sorok ngak Jehovah ni gubin e rran, ma ga ra pirieg e bin riyul’ e felfelan’ nge pagan’!​—Ps 61:8.

NGAN YALIY FARE VIDEO NI KENGGIN E USE YOUR TALENT FOR JEHOVAH, NGEMU’ MIN PI’ E FULWEG KO PI DEER NI BAARAY:

• Mang fan nde fel’ ni ngam fanay e salap rom ni fan ko tin nu fayleng ban’en? (1Jo 2:17)

• Mang boch e tow’ath nra yag ngak e piin ni yad ma pi’ e tin th’abi fel’ rorad ngak Jehovah?

• Mang boch e maruwel ni gad ma un i rin’ ni fan ngak Jehovah e rayog ni ngam fanay e salap rom riy ni ngam pi’ e ayuw?