Mmel’eg ni Ngam Pigpig ngak Jehovah

Faanra gur reb e Kristiano ni kab fel’ yangarem ara gur be’ ni ga be fil e Bible, ma gur, ga be nameg ni ngam un ko taufe, fa? Mang fan nsusun e ngam adag ni ngam un ko taufe? Ya faan ga ra ognagem ngak Jehovah ngam un ko taufe, ma aram e ra fel’ e tha’ u thilmew. (Ps 91:1) Taufe ni ga ra un ngay e ra yognag e yafos ngom. (1Pe 3:21) Ere uw rogon ni ngam mon’og i yan ya nge yag nim ognagem ngak Jehovah ngam un ko taufe?

Mmicheg nga lanin’um ni ireray e tin riyul’. Faanra be maruwar boch ban’en u wan’um, mag tay e tayim ni ngam fal’eg i gay murung’agen. (Ro 12:2) Mu fal’eg i yaliy boch ban’en nib t’uf ni ngam thilyeg u rarogom, mag guy rogon ngam thilyeg e pi n’em, machane ngam rin’ ni bochan e ga baadag ni ngam felfelan’nag Jehovah. (Pr 27:11; Ef 4:23, 24) Gubin ngiyal’ ni ngam yibilay e ayuw rok, ma nge pagan’um nra pi’ gelngim me ayuwegem u daken gelngin nib thothup. (1Pe 5:10, 11) Rib ga’ fan e athamgil ni ga ra tay. Pigpig ni ga ra tay ngak Jehovah e aram e bin th’abi fel’ kanawoen e yafos!—Ps 16:11.

NGAN YALIY FARE VIDEO NI THE ROAD TO BAPTISM, NGEMU’ MIN PI’ E FULWEG KO PI DEER NEY:

Mang boch e magawon ni ke yag ni nge gel boch e girdi’ ngay ya nge yag nra uned ko taufe?
Uw rogon ni ngam gelnag e michan’ rom ya nge yag nim ognagem ngak Jehovah?
Mang boch ban’en ni ke k’aring boch e girdi’ ni ngar athamgilgad ya nge bung rogorad ni ngar uned ko taufe?
Mang boch e tow’ath ni ke yag ngak boch e girdi’ ni bochan e kar mel’eged ni ngar pigpiggad ngak Jehovah?
Mang e be yip’ fan ni ngan ognagey ngak Jehovah ngan un ko taufe?

U m’on ni nge mus fare welthin ni yima pi’ ni fan ngak e piin ngar uned ko taufe, ma ra yog e en ni be pi’ e welthin ngak e piin ngar uned ko taufe ni ngar sak’iygad ngar pied e fulweg ko gal deer ni baaray nib ga’ lamrad:

Kam kalngan’um ko denen rom, ma kam ognagem ngak Jehovah, ma ke m’agan’um nga rogon ni ke yarmiy ni nge yag e yafos ngodad u daken Jesus Kristus, fa?

Ke tamilang u wan’um ni taufe ni ngam un ngay e ra dag ni kam mang reb e Pi Mich Rok Jehovah ma kam mang bang ko ulung rok, fa?

Nap’an nra yog e piin ngar uned ko taufe e arrogon ko gal deer ney, ma aram e yad be yog nga ‘dap’i l’ugunrad’ u p’eowchen e girdi’ ni yoor ni ke mich u wan’rad fare biyul ni pi’ Jesus, ma kar ognaged e yafos rorad ni ngar pigpiggad ngak Jehovah u polo’ i gum’ircha’rad.—Ro 10:9, 10.