Tin Kug Fil ko Piin Rayog ni Ngan Folwok Rorad e Ke Yognag Boor e Tow’ath Ngog

Ni gargelnageg u Quebec City nreb e binaw ni bay u Quebec ni yima non riy ni thin ni French u lan fare nam nu Canada. Gallabthir rog e ka nog Louis nge Zélia ngorow, ma ri yow ma t’ufegeg maku yow ma ayuwegeg nib fel’ rogon. Chitamag e ir be’ ni gathi ri ma non ma baadag e beeg babyor. Gu baadag nug ma yoloy murung’agen boch ban’en, ere ug athapeg ni nge boch nga m’on mug mang be’ ni ma gay murung’agen boch ban’en ni ke buch me yoloy nga babyor ni ngan tay nga shimbung ara ngan weliy ko news.

Nap’an ni gaman 12 e duw rog, ma bay be’ ni ka nog Rodolphe Soucy ngak ni yow ma maruwel e chitamag u taabang nra bow reb e fager rok nga tabinaw romad. Gali cha’ney e yow l’agruw e Pi Mich Rok Jehovah. Gathi ri gu manang murung’agen e Pi Mich, maku gathi ri ban’en nug baadag ni nggu nang murung’agen e teliw rorad. Yugu aram rogon ma gu baadag rogon nra fanayew e Bible ni ngar piew e fulweg nib tamilang ko pi deer ni ug fithed, mu kur weliyew u fithik’ e sumunguy. Ku arrogon e gallabthir rog ni kur ngatgow ko re n’ey, ere gamad gubin ni m’agan’mad ngay ni nggu uned ko fol Bible.

Ngiyal’ nem e gu be un ko skul ko Katolik. Ere bayi n’en mug weliy ko bitir u class rog murung’agen e pi n’en nug be fil u Bible. Ere faani munmun me nang e pi sensey murung’agen e re n’ey, ma pi sensey nem e ku yad boch e padrey. Bay bagayad ni yog u p’eowchen e bitir u lan e class rog ni gu be togopuluw, ko bin nge fanay e Bible ni nge micheg nde riyul’ e n’en ni gu be weliy! Yugu aram rogon nib gel e mochuch ni ug tay ko re n’ey, machane ba ga’ angin ni yib ni bochan e ayuwegeg ni nggu nang ni pi machib ni un fil u skul e de puluw ko n’en be yog e Bible. Ere gu nang nib t’uf ni nggu tal ndab kug un ko binem e skul. Nap’an ni m’agan’ e gallabthir rog ngay, ma aram mug thilyeg e skul rog.

KUG FIL ROGON NI NGA RUG ADAG E MACHIB

Gu ulul i fil e Bible, machane ba sagaal ni ug mon’og ni bochan e ug rus ni nggu un ko machib u mit e tabinaw. Ba gel lungun e Teliw ko Katolik e ngiyal’ nem ma kub gel e togopuluw ni ur ted ko machib rodad. Maurice Duplessis nreb e tayugang’ ko am u Quebec e ir be’ nib ga’ ni ma pi’ e ayuw ko teliw ko Katolik. Bochan e re n’ey, ma bay yu ulung i girdi’ ni ur chaggad nga taabang ngaur gafgownaged e Pi Mich. Ngiyal’ nem e thingari athamgil e Pi Mich ni ngar machibgad ndab rrusgad.

John Rae e ir reb e walag ni pumoon ni ayuwegeg ni nge dab kug rus. Re walag ney e ir bagayad e piin ni un ko fa bin mereb e class ko fare Skul u Gilead. Boor ban’en ni manang e cha’nem i John, ma ir be’ nib sumunguy, mab sobut’an’, mab mom ni ngan non ngak. Gathi ri ma fonownageg, machane boor ban’en nug fil u boch ban’en nib manigil ni i rin’. John e gathi ri manang e thin ni French, ere ba ga’ ni gu ma un ngak ko machib ngaug ayuweg ko thin. Pi n’en ni ug rin’ew John u taabang e ayuwegeg ni nggu dugliy ni nggu mang reb e Pi Mich Rok Jehovah. Ere, ragag e duw nga tomuren nug mada’nag e Pi Mich, ma aram mug un ko taufe ko May 26, 1951.

Ba ga’ ni yooren e walag ko chi ulung romad nem u Quebec City e yad boch e pioneer. Bochan e re n’ey, ma aram mug adag ni ngkug pioneer. Ngiyal’ nem e kemus ni yigoo Bible e gamad ma fanay ko machib u mit e tabinaw. Dariy e babyor ni yima pi’. Ere thingar gu fanayed e thin nu Bible nib fel’ rogon. Ere, gguy rogon ni nggu nang boch e thin nu Bible nrayog ni nge ayuwegeg ni nggu weliy e tin riyul’ nib fel’ rogon. Machane, boor e girdi’ nde m’agan’rad ngay ni ngar beeged e yu ke Bible ndawori yog e Teliw ni Katolik nrayog ni ngaun beeg.

Nap’an e duw ni 1952, mug leay reb e walag nib pin u rom ni ka nog Simone Patry ngak. Gu chuwgow u rom nggu warow gu parew nga Montreal, ma de gaman reb e duw nga tomuren, ma aram mug fakayew bochi tir nib pin, mug tunguyew Lise ngak. Yugu aram rogon nug tal ko pioneer u m’on ni nggu mabgolgow, machane ug guyew Simone rogon ni nggu momnagew e par romow ya nge yag nug uned ni gamad gubin ko tin yibe rin’ u lan e ulung.

Ragag e duw ni yan mfin kug lemnag bayay ni nggu un ko pioneer. Nap’an e duw ni 1962, ma aram mug un ko fare skul ni fan ko piin piilal ni ka nog e Kingdom Ministry School ngay nni tay u Bethel u Canada. Ere taab singgil e ug parew reb e walag ni pumoon riy ni ka nog Camille Ouellette ngak. Rug ngat nga rogon feni pasig Camille ko machib, ya ir be’ nib mabgol maku bay e bitir rok. Ngiyal’ nem u Quebec e gathi ri bay e gallabthir ni yad ma pioneer maku yad be chugol bitir; machane aram e n’en ni i guy Camille rogon ni nge rin’. Nap’an ni gamow bay ko re skul nem, me pi’ e athamgil nga lanin’ug ni nggu lemnag rogon e tin gu be rin’. In e pul nga tomuren, ma aram mug nang nrayog ni nggu un ko regular pioneer bayay. Bay boch e girdi’ nrogned nde fel’ e n’en kug dugliy, machane fan nug un ko pioneer bayay e bochan e ba pagan’ug ngay nra ayuwegeg Jehovah ni nggu yoornag e tayim rog ni fan ko machib.

KUG SULOW NGA QUEBEC CITY NI GAMOW L’AGRUW E SPECIAL PIONEER

Nap’an e duw ni 1964, ma aram min dugliy ni nggu pigpiggow Simone u Quebec City ni aram e gin gamow be’ riy ni gamow l’agruw e special pioneer. Aram e gin nug pigpiggow riy u lan in e duw. Nap’an e ngiyal’ nem ma ke war boch e togopuluw ni yibe tay ko machib, machane ka bay boch e girdi’ ni ur togopuluwgad.

Bay reb e Sabado ni mithigyal’ ni yib e polis ra koled gag u nap’an nug bay u Sainte-Marie ni bochi binaw nib achig nde palog u Quebec City. Ere ni fekeg nga tafen e polis min teg nga kalbus ni bochan e gu be machib u mit e tabinaw i yan ndariy bang e babyor rog ni be pi’ mat’awug nrayog ni nggu machib. Tomuren, ma aram min fekeg ngak reb e tapuf oloboch ni ka nog Baillargeon ngak. Re pumoon nem e be’ ni yima rus ngak. Ere fith ngog ko mini’ e lawyer rog. Ma nap’an ni lungug Glen Howa nreb e lawyer ko Pi Mich ni boor e girdi’ ni manang, ma aram me non ni ke rus ni gaar: “Danga’! Dabug e cha’nir!” Goo yimanang Glen How ni ir reb e lawyer nib cheg ni i ayuweg e Pi Mich e ngiyal’ nem. De n’uw nap’an nga tomuren mi nog u tafen e puf oloboch ndakuriy ba pa’ e oloboch ni yibe togopuluwnag ngog.

Bochan e togopuluw ni un tay ko machib u Quebec, ma aram fan nib mo’maw’ ni ngan pirieg bang nrayog ni ngaun tay e muulung riy. Kemus ni boch yang i ban’en ni yima tay e chugum nge karrow riy u reb e naun e ir e pirieg e pi walag nrayog ni ngaug ted e muulung riy. Ba ga’ ni ma fanay e pi walag e oil heater ni nge goweliy lan e gi n’em u nap’an ni gamad be tay e muulung ko ngiyal’ ni be aw e ayis. In e awa u m’on ni nge tabab e muulung, ma gamad ma mokun nga tooben e re heater nem ni nggu weliyed boch ban’en ni ke buch nrayog ni nge pi’ e athamgil nga lanin’mad.

Rib gel e felfelan’ ni yira tay ni ngan guy angin e machib u lan e pi duw nem keb i mada’ ko chiney. Nap’an e pi duw u thilin e 1960 nge 1969, ma kemus nri in e ulung nib achig u Quebec City, ngu Côte-Nord, ngu Gaspé Peninsula. Chiney e ke yoor e walag ko pi binaw ney, ma yad ma mada’ u boch e Tagil’ e Liyor ni kan ngongliy rogon nib fel’ yaan.

KA NOG NGOG NI NGGU UN I LEKAG BOCH E ULUNG

Nap’an e duw ni 1970, me taw e thin ngomow Simone ni ngaug lekagew boch e ulung. Nap’an e duw ni 1973, ma aram min dugliy ni nggu mang reb e district overseer. Nap’an e pi duw nem, ma boor ban’en nug fil rok boch e walag ni pumoon ni bod rogon Laurier Saumurb nge David Splane.c Gal walag ney e ur lekagew boch e ulung. Tomuren gubin e assembly ni yira tay, ma ra bagamow David mab ga’ ni ma yog ngak bagamow boch ban’en nrayog ni nge rin’ nib thil ko yay ni migid nge rogon ni nge mon’ognag rogon ni be fil ban’en ko girdi’. Keb ngan’ug bayay ni gaar David ngog: “Léonce, gu baadag fa bin tomur e welthin ni kam pi’. Ba manigil, kemus ni faan gu ra puthuy urngin ban’en ni kam weliy nga taabang ma rayog ni nggu pi’ dalip e welthin riy!” Ba ga’ ni kaygi yoor ban’en ni gu ma weliy ko pi welthin ni gu ma pi’. Ba t’uf ni nggu fil rogon ni nggu buchuuwnag e pi n’en nug ma weliy.

Pi district overseer e ba milfan ngorad ni ngar pied e athamgil nga laniyan’ e pi walag ni yad ma lekag e ulung. Machane, boor e walag u Quebec nri yad manangeg. Ere nnap’an ni gu ra yan ngaram ni gu be lekag boch e ulung mab ga’ ni yad baadag ni nggu machibgad u taabang. Yugu aram rogon nug baadag ni gamad ma machib u taabang, machane gathi ri ug tay e tayim ni fan ko pi circuit overseer ara pi walag ni yad ma lekag e ulung. Ere bay bayay ni gaar reb e walag ni pumoon ni ma lekag e ulung ngog: “Ba manigil ni ga be tay e tayim rom ni fan ko pi walag u lan e ulung, machane dab mu pagtalin ni biney e wik e fan ngog. Kub t’uf ni ngan pi’ e athamgil nga lanin’ug!” Boor ban’en nug fil ko re fonow ney ni pi’ ngog u fithik’ e sumunguy.

Nap’an e duw ni 1976, me buch ban’en ndag lemnag nra buch nri kireban’ug ngay. I yib e m’ar ngak Simone ni ppin rog nib ubchiya’ nge yim’. Rib manigil e re ppin rog nem ni bochan e ir be’ ni ma pag fan u boch ban’en ma ri kub t’uf Jehovah rok. I yag ni nggu athamgil u fithik’ e kireban’ rog ni bochan e boor e tayim ni ug tay ni fan ko machib, ma kug be pining e magar ngak Jehovah ko ayuw ni i pi’ ngog u fithik’ e t’ufeg ko ngiyal’ nem. Boch nga tomuren, mug leay Carolyn Elliott nreb e walag nib pin nib pioneer ni ma thin ni Meriken ni ke yib nga Quebec ni nge pi’ e ayuw ko machib u rom. Carolyn e ir be’ nib mom ni ngan non ngak ma ri ma lemnag yugu boch e girdi’ nib ga’ ni piin nib tamra’ ara piin be kireban’rad ya yigoo yad. Ba gel e ayuw ni pi’ ngog u nap’an ni ug lekagew e pi ulung i yan.

REB E DUW NRIB GA’ FAN

Nap’an e January ko duw ni 1978, ma aram mi nog ngog ni nggu pi’ e bin som’on e Pioneer Service School u Quebec. Rug rus nib gel ni bochan e dawor gu un ko re skul nem maku dawor gguy e babyor riy bayay, ere gubin ban’en riy ni kab beech ngog nge piin nra uned ko re skul nem. Machane gu felfelan’ ni bochan e bin som’on e class nug pi’ e boor e walag ni pioneer riy ni ke n’uw nap’rad ko pioneer. Yugu aram rogon ni gag e sensey riy, machane boor ban’en nug fil rok e pi walag ni ug skulnagrad!

Boch nga tungun e duw ni 1978, ma aram min tay fare International Convention u reb e tagil’ e gosgos u Montreal ni kenggin e “Victorious Faith.” Aram e re convention nni tay u Quebec nth’abi ga’, ya ba pag 80,000 e girdi’ nra uned ngay. Nni teg ni nggu pi’ e ayuw ngak boch e walag ni yad be maruwel ko News Service Department ko re convention nem. Boor e girdi’ nug non ngorad ni yad ma gay murung’agen boch ban’en ni ke buch mar yoloyed nga babyor ni ngan tay nga shimbung ara ngan weliy ko news, mab gel e felfelan’ nug tay ya gguy ni boor ban’en nib manigil nra yoloyed u murung’agmad. Ra fithed boch e deer ngomad min pag e pi n’em u TV ma yibe weliy u radio nib pag 20 e awa, maku bokum miriay e babyor nni yoloy ni murung’agen ngaun wereg ko girdi’ ni yoor. Boor e girdi’ nrung’aged e machib ni bochan e re n’ey!

KUG WAN GU PIGPIG U REB E BINAW NIB THIL

Bay ban’en nri thil u lan e yafos rog ko duw ni 1996. Nap’an nug un ko taufe mu ug pigpig ko yungi n’en ni bay u Quebec ni yima non riy ni thin ni French. Machane min pieg ni nggu pigpig u boch e binaw u lan yu Toronto ni yima non riy ni thin ni Meriken. Gu lemnag ndabiyog ni nggu rin’ e re maruwel ney, ma ug rus ni nggu pi’ e welthin ni bochan e gathi ri gub salap ko thin ni Meriken. Ba t’uf ni ngaug meybil ni gubin ngiyal’ mu kug taga’ ngak Jehovah.

Nap’an nug tabab ko pigpig u rom mu ug rus nib gel, machane chiney e rayog ni nggog nib gel e felfelan’ nug tay ko gal duw ni baaram nug pigpig riy u lan yu Toronto. I gum’an’nag Carolyn ir nge ayuwegeg ni nggu salap boch ko thin ni Meriken, maku arrogon e pi walag ni ur ayuweged gag ma yad be pi’ e athamgil nga lanin’ug. Ba papey ni yag boor e fager nib beech ngomow.

Gathi kemus ni boor e maruwel nthingar gu rin’ mu kug fal’eg rogog ni fan ko pi assembly ni yima tay u tungun e wik, ya kub ga’ nug ma yan ko machib u lan gonap’an reb e awa u mit e tabinaw ko Biyernes ni blayal’. Sana bay boch e girdi’ nrayog ni nge lungurad u wan’rad, ‘Mang fan ni ngam man ko machib ni faanra bay e assembly ko re wik nem?’ Machane, ug guy nib gel e athamgil ni ma tay lanin’ug ni faanra yag ni nggu non ko girdi’ u nap’an e machib. Mus ko chiney ni gu ma felfelan’ u nap’an nug ra un ko machib.

Nap’an e duw ni 1998, ma aram mu kun sulwegmow Carolyn nga Montreal ni ngkug pigpiggow u rom ni gamow l’agruw e special pioneer. Boor e duw ni kug pigpig riy ni gag e en gu ma yarmiy rogon e machib ni yima tay ko yungi n’en ma muulung e girdi’ ni yoor ngay, maku gamad be maruwel girdien e news u taabang ni nggu tamilangnag boch ban’en nde puluw ni yibe weliy u murung’agen e Pi Mich Rok Jehovah. Chiney e gamow ba felfelan’ Carolyn ni gamow ma machibnag e girdi’ u boch e nam ni ka fin ra bad nga Canada ni yad baadag ni ngkur nanged boch ban’en u murung’agen e Bible.

Gu ra sul nggu lemnag e re 68 i duw ney ni kug pigpig riy ngak Jehovah, ma rriyul’ ni gub tow’ath. Ba gel e felfelan’ ni kug tay ni bochan e kug fil rogon ni nggu adag e machib ma boor e girdi’ ni kug ayuwegrad kar nanged e tin riyul’. Tomuren ni chuguliy Lise ni fakmow nge pumoon rok pi fakrow ngar ilalgad, ma aram mar tababgow ko pioneer. Rug ma felfelan’ nug ma guy ni kab pasig ko machib. Ri kug be pining e magar ngak boch e walag ni Kristiano ni ur daged e ngongol nib fel’ nrayog ni nggu folwok riy mu kur pied boch e fonow nib manigil ngog ya nge yag ni nge ayuwegeg e pi n’ey ni nggu mon’og ko tirok Got ban’en mu kug rin’ boch e maruwel ni kan pi’ ngog. Kug guy ni faan gad ra taga’ nga gelngin Jehovah nib thothup, ma aram e rayog ni ngad ululgad i rin’ e maruwel ni kan pi’ ngodad u fithik’ e yul’yul’. (Ps. 51:11) Ke mada’ ko chiney ni kug be pining e magar ngak Jehovah ni ke pi’ e biney e tow’ath ngog nrayog ni nggu un i pining e sorok nga fithingan!​—Ps. 54:6.