Rogon ni Ngan Fil e Bible Ngak Be’ u Reb e Kanawo’ Nra Ayuweg ni Nge Mon’og Nge Un ko Taufe​—Bin Taareb

1. Uw rogon ni be ayuwegdad e 2 Korinth 3:1-3 ni nge ga’ fan u wan’dad fare tow’ath ni bay rodad ni aram e ngad filed e Bible ngak be’ ma gad guy ni ke mon’og ke un ko taufe? (Mu guy e sasing ni bay u wuru’ e re ke babyor ney.)

UW ROGON u wan’um ni faanra kam guy be’ ni yibe fil e Bible ngak ko ulung rom ni ke un ko taufe? Ba mudugil nri ga ra felfelan’ ko re n’ey. (Matt. 28:19) Ma faanra gur e kam fil e Bible ngak facha’ ni ka fini mang reb i gachalpen Jesus, ma rib gel e felfelan’ ni ga ra tay u nap’an ni ga ra guy ni ke un ko taufe! (1 Thess. 2:19, 20) Piin ka fin nra uned ko taufe kar manged boch i gachalpen Jesus e gathi kemus ni yad bod yungi “babyor” ni kan pi’ ni be yog boch ban’en nib fel’ u murung’agen e piin ke fil e Bible ngorad, ya kub muun e ulung ngay.​—Mu beeg e 2 Korinth 3:1-3.b

2. (a) Mang reb e deer nib ga’ fan nib t’uf ni ngad weliyed, ma mang fan? (b) Mang e re n’ey ni ngan fil e Bible ngak be’? (Mu guy e footnote.)

² Ri gad ba felfelan’ ni gad be guy nu lan fa aningeg i duw ni ke yan, ma sogonap’an 10,000,000 e girdi’ ni kan fil e Biblec ngorad u ga’ngin yang e fayleng ni gubin e pul. U lan e pi duw ney mab pag 280,000 e girdi’ ni kan taufenagrad u gubin e duw kar manged boch e Pi Mich Rok Jehovah nge boch i gachalpen Jesus Kristus. Ere uw rogon ni ngki yoor boch e pi girdi’ ney ni ngad ayuweged ngar uned ko taufe? Ka be bing Jehovah e kanawo’ ko girdi’ ni ngar manged boch e Pi Mich Rok. Aram fan nib t’uf ni ngad athamgilgad ngad rin’ed e tin rayog rodad ni ngad ayuweged yad ngar uned ko taufe u rogon payngin nrayog. Be ngoch e tayim i yan nib papey!​—1 Kor. 7:29a; 1 Pet. 4:7.

3. Mang e gad ra weliy u lan e re article ney u murung’agen rogon ni ngan fil e Bible ngak be’?

³ Bochan nrib t’uf ni ngad pingeged e girdi’ ngar manged boch i gachalpen Jesus e ngiyal’ ney, ma aram fan ni ke fith fare Ulung ni Ma Pow’iyey ngak e pi branch ofis e n’en rayog ni ngad rin’ed ya nge yag nda ayuweged boch e piin gad be fil e Bible ngorad ni ngar mon’oggad ngar uned ko taufe. U lan e re article ney nge bin migid e gad ra weliy riy e n’en rayog ni ngad filed rok boch e walag ni ke n’uw nap’an ni kar manged boch e pioneer, nge missionary, nge piin ma lekag e ulung.d (Prov. 11:14; 15:22) Kar weliyed boch ban’en ni nge rin’ e piin yad be fil e Bible ko girdi’ nge piin yibe fil e Bible ngorad ya nge yag ni mon’og e fol Bible ni yad be tay. U lan e re article ney e gad ra weliy riy lal ban’en nib t’uf ni nge rin’ e piin yibe fil e Bible ngorad ya nge yag nra mon’oggad ngar uned ko taufe.

NGAN TAY E FOL BIBLE NI GUBIN E WIK

4. Mang e susun ni ngad nanged u murung’agen e fol Bible ni yibe tay ngak be’ u langan e mab rok ni yib sak’iy?

⁴ Boor e walag ni yad be fil e Bible ko girdi’ u langan e mab rorad ni yad ba sak’iy. Yugu aram rogon ni aray reb e kanawo’ nrayog ni nge adag be’ riy ni nge nang e n’en be fil e Bible, machane mit ney e fol Bible e ba ga’ nder ma n’uw nap’an ma sana ku rayog ni gathi gubin e wik ni yima tay. Bay boch e walag ni yad ma fith e namba rok facha’ ni kar mada’naged, ma aram mi yad callnag fa ra textnaged ni ngar weliyed ban’en u lan e Bible ngorad, ya nge yag ni ngki adag ni nge nang boch ban’en u lan e Bible. Rayog ni nge yan boor e pul ni aray rogon e n’en ni be rin’ e pi walag ney nge piin kar mada’naged. Machane gur, rayog ni nge mon’og facha’ nge un ko taufe ni faanra kemus urngin e tayim nge rogon e athamgil ni be tay ni nge fil e Thin rok Got, fa? Sana danga’.

5. Mang e yog Jesus ko Luke 14:27-33 nrayog ni ngad fanayed ni ngad ayuweged e piin gad be fil e Bible ngorad?

⁵ Bay ba ngiyal’ ni weliy Jesus murung’agen ban’en ni nge tamilangnag e n’en thingari rin’ be’ ni faanra baadag ni nge mang reb i gachalpen. I weliy murung’agen be’ ni baadag ni nge toy ba wulyang ni tafen e damit nge be’ nib pilung ni baadag ni nge yan ko mahl. I yog Jesus ni facha’ ni be lemnag ni nge toy fare wulyang ni tafen e damit e som’on e nge “par nga but’ nge tafinaynag rogon puluwon” me guy ko ba gaman e salpiy rok nrayog ni nge mu’nag fare wulyang fa danga’. Ma fare pilung e thingari “par nga but’ nge lemnag” ko rayog ko salthaw rok ni ngar rin’ed e n’en kar lemnaged ni ngar rin’ed fa danga’. (Mu beeg e Luke 14:27-33.) Ere ku manang Jesus ni faanra baadag be’ ni nge mang reb i gachalpen, ma som’on e nge fal’eg i lemnag e n’en nib t’uf ni nge rin’ ni faanra nge lek Jesus. Aram fan nib t’uf ni ngad pied e athamgil nga laniyan’ e piin gad be fil e Bible ngorad ni ngaur filed e Bible ni gubin e wik. Uw rogon ni ngad rin’ed e re n’ey?

6. Mang e rayog ni ngad guyed rogon ni ngad rin’ed ya nge yag ni mon’og e piin gad be fil e Bible ngorad?

⁶ Som’on e ngam guy rogon ni nge n’uw boch nap’an ni ngam filew be’ e Bible u langan e mab rok ni gimew ba sak’iy. Rayog ni nge bayay nim man mu guy mag guy rogon ni ngam beegew l’agruw e thin nu Bible, ma gathi kemus ni taareb. Nap’an nra mecham ngak facha’ ni ngam filew e Bible nib n’uw boch nap’an, mag fith ngak ko bay bang nrayog ni ngam man mu parew ngay ngam ululgow ko n’en gimew be weliy fa dariy. Fulweg rok e ra dag rogon feni ga’ fan u wan’ e fol Bible ni gimew be tay. Ra ngam ayuweg ni nge yoor ban’en ni nge fil nib papey, ma rayog ni ngam fith ngak ko baadag ni ngam filew e Bible ni l’agruw yay u reb e wik fa danga’. Machane ku bay boch ban’en nib t’uf ni ngan rin’ ko bin ni ngan fil e Bible ngak be’ ni taab yay ara l’agruw yay u reb e wik.

NGAN FAL’EG ROGOY U M’ON KO FOL BIBLE

7. Uw rogon ni nge fal’eg e en be fil e Bible ngak be’ rogon nib fel’ rogon u m’on ni ngar filew be’ e Bible?

⁷ Faanra gur e ga be fil e Bible ngak be’, mab t’uf ni ngam fal’eg rogom nib fel’ rogon u m’on ni ngam filew e Bible. Rayog ni ngam beeg e n’en gimew ra fil u taabang, mag guy e thin nu Bible ni bay riy. Mu guy rogon ni ngam nang e pi n’en ni bay riy nib ga’ fan. Mu lemnag e n’en be yog kenggin fare guruy ni ngam filew, nge pi subheading riy, nge pi deer riy, nge pi thin nu Bible ni ngan “beeg,” nge pi sasing ni bay riy, nge pi video nrayog ni ngam yaliyew ya nge yag ni tamilang e n’en gimew be fil. Tomuren mag lemnag rarogon facha’ ni gimew be fil e Bible nge rogon ni ngam weliy fapi thin u reb e kanawo’ nib mom ni ngan nang fan mab tamilang, ya nge yag ni mom ngak ni nge nang fan me fol riy.​—Prov. 15:28a.

8. Mang e be fil fapi thin ni yog apostal Paul ko Kolose 1:9, 10 ngodad u murung’agen e piin gad ma fil e Bible ngorad ni ngaud yibilayed yad?

⁸ Reb e ban’en ni ngam rin’ u nap’an ni ga be fal’eg rogom e aram e ngam meybil ngak Jehovah ngam weliy murung’agen facha’ ni ga be fil e Bible ngak nge n’en nib t’uf rok. Mu wenig ngak Jehovah ni nge ayuwegem ngam fil e Bible ngak u reb e kanawo’ nra taw e thin riy nga gum’irchaen. (Mu beeg e Kolose 1:9, 10.) Mu lemnag ko bay ban’en nrayog ni nge mo’maw’ ngak facha’ ni nge nang fan ara ban’en ndabi m’agan’ ngay fa dariy. Dab mu pagtalin ni n’en ni ga be nameg e ngam ayuweg ni nge mon’og nge un ko taufe.

9. Uw rogon nrayog ni nge ayuweg be’ e en be fil e Bible ngak ni nge fal’eg rogon u m’on ko ngiyal’ ni ngar filew e Bible? Mu tamilangnag.

⁹ Gad be athapeg ni ngaud filed facha’ e Bible u gubin e wik ya nge yag ni ga’ fan u wan’ urngin ban’en ni ke rin’ Jehovah nge Jesus, me yag ni ngki adag ni ngki fil boor ban’en. (Matt. 5:3, 6) Faanra ngari yib angin e fol Bible ngak facha’ mab t’uf ni nge tiyan’ ko pi n’en be fil. Ra ngam ayuweg ni nge rin’ e re n’ey, ma aram e ngam weliy ngak feni ga’ fan ni nge fal’eg rogon u m’on ni ngam man mu guy ni ngam filew e Bible, ni aram e nge beeg e n’en gimew ra fil u m’on riy me lemnag rogon nrayog ni nge fol riy. Uw rogon nrayog ni ngam ayuweg ni nge fal’eg rogon? Mu fal’egew reb e guruy u taabang ya nge yag nim dag ngak rogon ni nge fal’eg rogon.e Mu dag ngak rogon ni nge pirieg e fulweg ko fare deer, ma gog ngak ni faanra tay e pow nga in e thin u lan fare paragraph ma ra ayuweg ni nge yib ngan’ e fulweg ko fare deer. Tomuren ma gog ngak ni nge pi’ e fulweg ko fare deer nrogon ni ke nang fan. Faanra rin’ e re n’ey, ma aram e rayog ni ngam nang ko uw rogon ni ke nang fan e n’en bay ko fare guruy. Machane ku bay ban’en nrayog ni ngam pi’ e athamgil riy nga laniyan’ ni nge rin’.

MU FIL NGAK ROGON NI NGE MOTOYIL NGAK JEHOVAH MAKU BE NON NGAK NI GUBIN E RRAN

10. Mang nib ga’ fan ni ngaun beeg e Bible ni gubin e rran? Mang e ba t’uf ni nge rin’ be’ ni be fil e Bible ya nge yib angin ngak e thin nu Bible ni be beeg ni gubin e rran?

¹⁰ Gathi kemus ni nga i fil facha’ e Bible ni gubin e wik, ya ku bay boch ban’en nra i rin’ ni gubin e rran ni ir rok ma ra yib angin ngak. Rib ga’ fan ni nge motoyil ngak Jehovah mi i non ngak. Rayog ni nge motoyil ngak Got ni faanra i beeg e Bible ni gubin e rran. (Josh. 1:8; Ps. 1:1-3) Ere mu dag ngak rogon ni nge fanay fare “Schedule ko Thin nu Bible ni Ngan Beeg” ni bay ko jw.org nrayog ni ngan printnag.f Riyul’ nra ngam ayuweg ni nge yib angin ngak e beeg Bible ni ma tay, mab t’uf ni ngam pi’ e athamgil nga laniyan’ ni nge fal’eg i lemnag e n’en be fil e Bible u murung’agen Jehovah, nge rogon nrayog ni nge fanay u lan e yafos rok.​—Acts 17:11; Jas. 1:25.

11. Uw rogon ni nge nang be’ ni yima fil e Bible ngak rogon ni nge meybil ko bin nib puluw e kanawo’? Mang nib ga’ fan ni nga i meybil ngak Jehovah ni boor yay?

¹¹ Mu pi’ e athamgil nga laniyan’ e en ga ma fil e Bible ngak ni nga i non ngak Jehovah ni aram e nga i meybil ngak ni gubin e rran. Mmeybil ni ke yib u gum’irchaem u m’on ni ngam tababgow ko fol Bible ngu tomuren ni kam mu’gow, mag uneg facha’ u lan e meybil rom. Nap’an nra i motoyil ko meybil rom, ma rayog ni nge nang rogon ni nge meybil ni ke yib u gum’irchaen miki nang nsusun e nge meybil ngak Jehovah Got u daken fithingan Jesus Kristus. (Matt. 6:9; John 15:16) Mu lemnag rogon nra chugur e tha’ u thilin e en ga ma fil e Bible ngak nge Got ni faanra i beeg e Bible ni gubin e rran (ni aram e be motoyil ngak Jehovah) ma be meybil (ni aram e be non ngak Jehovah)! (Jas. 4:8) Faanra i rin’ e re n’ey ni gubin e rran, ma aram e ra ayuweg ni nge mon’og nge yag ni ognag ir nge un ko taufe. Machane mang reb e ban’en ni ku ra ayuweg?

MU AYUWEG NI NGE FEL’ E THA’ U THILROW JEHOVAH

12. Uw rogon ni nge ayuweg be’ e en be fil e Bible ngak ni nge fel’ e tha’ u thilrow Jehovah?

¹² Gad baadag ni nge fil e en gad ma fil e Bible ngak murung’agen Jehovah. Machane pi n’en be fil e susun ni ngki taw nga gum’irchaen ya nge yag ni adag ni nge fol riy. Boor ban’en ni i fil Jesus ko girdi’, maku baadag e girdi’ ni yad ma fil boch ban’en rok. Machane ku reb i fan ni i lek e girdi’ Jesus e bochan ni i taw e pi n’en ni i fil nga gum’ircha’rad. (Luke 24:15, 27, 32) En ga be fil e Bible ngak e ba t’uf ni nge nang nib riyul’ Jehovah ma rayog ni nge fel’ e tha’ u thilrow, miki tamilang u wan’ nrayog ni nge mang Jehovah e Chitamangin, nge Got rok, nge Fager rok. (Ps. 25:4, 5) Nap’an ni gimew be fil e Bible, mag guy rogon ni ngari nang pi fel’ngin e Got rodad nrib manigil. (Ex. 34:5, 6; 1 Pet. 5:6, 7) Demtrug e n’en gimew be weliy murung’agen, ma ngam gagiyelnag pi fel’ngin Jehovah. Mu ayuweg ni nge ga’ fan u wan’ pi fel’ngin Jehovah nrib manigil ni bod rogon e t’ufeg, nge sumunguy, nge runguy. I yog Jesus ni “bin th’abi ga’ nge bin th’abi ga’ fan e motochiyel” e aram e nge ‘t’uf rom Jehovah ni ir e Got rom.’ (Matt. 22:37, 38) Ere mu guy rogon ni ngam ayuweg e en ga be fil e Bible ngak ni ngari t’uf Jehovah rok.

13. Mu weliy reb e kanawo’ nrayog ni ngam ayuweg riy e en ga be fil e Bible ngak ni nge fil murung’agen pi fel’ngin Jehovah nrib manigil.

¹³ Mu weliy ngak e en gimew be fil e Bible fan nrib t’uf Jehovah rom. Re n’ey e rayog ni nge ayuweg ni nge tamilang u wan’ ni kub t’uf ni nge mang fager rok Jehovah me fil rogon ni nge t’uf Jehovah rok. (Ps. 73:28) Bod ni, bay ban’en u lan fare ke babyor ni gimew be fil ara reb e thin nu Bible ni kam beegew nri ga baadag ni be weliy murung’agen e t’ufeg rok Jehovah, nge rogon feni gonop, nge feni mat’aw, ara rogon feni gel gelngin, fa? Faanra bay ma gog ngak, mag tamilangnag ngak ni ireray reb i fan nib t’uf e Chitamangidad ni bay u tharmiy rom. Ku bay ban’en nib t’uf ni nge rin’ urngin e piin yibe fil e Bible ngorad ya nge yag nra mon’oggad ngar uned ko taufe.

MU PI’ E ATHAMGIL NGA LANIYAN’ NI NGE UN KO MUULUNG

14. Mang e be yog e Hebrews 10:24, 25 ngodad u murung’agen rogon ni ma ayuweg e pi muulung e piin gad be fil e Bible ngorad ni ngar mon’oggad?

¹⁴ Gad gubin ni gad baadag ni nge mon’og e piin gad be fil e Bible ngorad ngar uned ko taufe. Reb e kanawo’ nib ga’ fan nrayog ni ngad ayuweged yad riy e aram e ngad pied e athamgil nga lanin’rad ni ngar uned ko muulung. Piin kar salapgad i fil e Bible ko girdi’ e yad ma yog ni piin yibe fil e Bible ngorad ni yad ma tabab ni ngar uned ko muulung nib papey e ba papey ni yad ma mon’og. (Ps. 111:1) Bay boch e walag ni yad ma fil e Bible ko girdi’ ni yad ma yog ngorad ni faan yad ra un ko muulung ma boor ban’en nrayog ni ngar filed ko tin yad be fil u nap’an e fol Bible. Mu beeg e Hebrews 10:24, 25 ngak e en ga be fil e Bible ngak, mag weliy ngak fan nib fel’ ni nge un ko muulung. Mu pag fare video nge guy ni kenggin e Mang e Yima Rin’ ko Pi Tagil’ e Liyor Romad?g Kum ayuweg ni nge dugliy u wan’ ni nge un nga gubin e muulung.

15. Mang e rayog ni ngad rin’ed ni ngad pied e athamgil nga laniyan’ e en gad be fil e Bible ngak ni nge un ko muulung ni gubin ngiyal’?

¹⁵ Mang e rayog ni ngam rin’ ni faanra dariy bayay ni ke un e en ga be fil e Bible ngak ko muulung, fa reb e der ma un ko muulung ni gubin ngiyal’? Mu weliy murung’agen ban’en ngak ni ka fin mu fil u nap’an e muulung u fithik’ e felfelan’. Re n’ey e rra k’aring ni nge adag ni nge un ko muulung ko bin ni kemus ni ngaum pining ni nge un. Mu pi’ ba ken fare Wulyang ko Damit nge Pi N’en ni Ma Rin’ e Piin Kristiano nge Machib ni Yad Ma Tay ngak ni ir e yibe fil u nap’an e muulung. Mu dag ngak e n’en yira weliy u nap’an e bin migid e muulung, mag fith ko mang riy e baadag ni nge nang murung’agen. N’en nra guy me rung’ag ko yay nsom’on nra un ko muulung e kab fel’ ko tin ke guy ara ke rung’ag u reb e muulung ni ke tay barba’ e teliw ni ke un ngay bayay. (1 Kor. 14:24, 25) Ra mada’nag boch e girdi’ u nap’an e muulung nib fel’ e ngongol rorad nrayog ni nge folwok riy mu kur ayuweged ni nge mon’og nge un ko taufe.

16. Mang e ba t’uf ni ngan rin’ ya nge yag ni mon’og e piin yibe fil e Bible ngorad ngar uned ko taufe? Mang e gad ra weliy ko bin migid e article?

¹⁶ Uw rogon ni ngad filed e Bible ko girdi’ u reb e kanawo’ nra ayuwegrad ni ngar mon’oggad ngar uned ko taufe? Rayog ni ngad ayuweged e en gad be fil e Bible ngak ni nge guy feni ga’ fan e fol Bible ni be tay ni aram e ngad pied e athamgil nga laniyan’ ni nge fil e Bible ni gubin e wik, me fal’eg rogon u m’on riy. Ku gad baadag ni ngad pied e athamgil nga laniyan’ ni nge motoyil ngak Jehovah, mi i non ngak ni gubin e rran, miki fel’ e tha’ u thilrow. Gad baadag ni ngad pied e athamgil nga laniyan’ ni nge un ko muulung. (Mu guy fare kahol ko page 12 ni kenggin e, “N’en nib T’uf ni Nge Rin’ e Piin Yibe Fil e Bible Ngorad Ya Nge Yag Nra Mon’oggad Ngar Uned ko Taufe.”) Machane bin migid e article e ra weliy lal ban’en nrayog ni nge rin’ e piin yad ma fil e Bible ko girdi’ ya nge yag nra ayuweged yad ni ngar uned ko taufe.