Ka Ga Manang?
Kam beeg e pi Wulyang ko Damit ni fan ko re duw ney nib fel’ rogon, fa? Mu guy ko rayog ni ngam pi’ e fulweg ko pi deer ni baaray fa dabiyog:
Faanra gad ma tay e tayim ni ngad nonad ngak Jehovah, ma gad motoyil ngak, ma gad be lemnag murung’agen, ma uw rogon nra yib angin ngodad?
Ra ayuwegdad ni ngad dugliyed boch ban’en nib fel’ rogon, ma gad mon’og u rogon ni ngad filed ban’en ngak be’, me gel e michan’ rodad, miki gel feni t’uf Jehovah rodad.—w22.01, pp. 30-31.
Faan gad ra fil rogon ni nge pagan’dad ngak Jehovah nge pi pumoon ni ke mel’egrad ni nga u rogned e thin rok, ma uw rogon nra ayuwegdad?
Ireray e ngiyal’ ni ngad filed rogon ni nge pagan’dad nga rogon ni ma rin’ Got ban’en, ma dabi maruwar u wan’dad rogon e fonow ni be pi’ e piin piilal nge pi n’en yad be dugliy. Nap’an nra tabab fare gafgow nib ga’, ma kad fal’eged rogodad ni ngad folgad ni yugu aram rogon nrayog ni nga nog ngodad ni ngad rin’ed boch ban’en nib mo’maw’ ni ngad nanged fan ara ngad folgad riy.—w22.02, pp. 4-6.
Mang fan ni yog fare engel ngak Zekariah murung’agen ba “fol nib yil’ i gaf ni ba’ ban’en u taban ni ba’ tomalngin u pa’ Zerubbabel [ni Governor]”? (Zek. 4:8-10, NW)
N’en nni pilyeg e changar rok Zekariah nge guy e micheg nga laniyan’ e girdi’ rok Got ni yugu aram rogon nde taareb rogon e re tempel nem ko bin som’on ni immoy, machane yira mu’ i toy maku ra yan i aw nga rogon ni baadag Got.—w22.03, pp. 16-17.
Uw rogon nrayog ni ngad daged e kanawo’ nrayog ni ngan folwok riy u ‘rogon e thin ni gad ma yog’? (1 Tim. 4:12)
Aram e ngaud nonad u fithik’ e sumunguy nge tayfan u nap’an e machib, mad felfelan’gad ni ngad uned ko tang, ma gad be pi’ e fulweg u nap’an e muulung, mu u dogned e tin riyul’ ma gad be pi’ e athamgil nga laniyan’ yugu boch e girdi’, ma gad siyeg e thin nib kireb.—w22.04, pp. 6-9.
Mang fan ni pi n’en kan weliy u murung’agen fa aningeg i gamanman (pi am) ni bay ko Daniel ko guruy ni 7 e be sor fan nga taab gamanman ni kan weliy murung’agen ko Revelation 13:1, 2?
Fare gamanman ni kan weliy murung’agen ko Revelation 13 e gathi be yip’ fan taareb e am u fayleng ni bod yu Roma, ya be yip’ fan urngin e am ni be gagiyegnag e girdi’.—w22.05, p. 9.
Uw rogon ni ngad daged nib pagan’dad nib mat’aw e tin ma rin’ Got?
Faanra ke yog ara ke rin’ be’ ban’en ni ke aw nga lanin’dad, ara ke denen be’ nib togopuluw ngodad, ma ngad guyed rogon ni ngad talgad ndab kud damumuwgad, ma gad pag fan e magawon rodad ngak Jehovah. Ra yal’uweg wenegan e denen ni kan rin’.—w22.06, pp. 10-11.
Mang e susun ndabi pagtalin reb e walag ni pumoon ni be fek e meybil u nap’an e muulung?
Nap’an nra fek be’ e meybil ma gathi aram e ngiyal’ ni nge fonownag e ulung ara i weliy boch ban’en ni nge nang e girdi’ murung’agen. Ba ga’ nu tabolngin e muulung e de t’uf ni nge ‘n’uw e meybil ni ngan pi’.’ (Matt. 6:7)—w22.07, pp. 24-25.
Uw rogon ni “piin nib kireb e n’en ni ur rin’ed” e yira fasegrad ko yam’ “min pufthinnagrad”? (John 5:29, NW)
Dab ni pufthinnagrad ni be yan u rogon e ngongol ni ur rin’ed u m’on ni ngar m’ad. Ya yira fal’eg i yaliy rogon e ngongol rorad u tomuren ni kan fasegrad ko yam’.—w22.09, p. 18.
Mang e yog J. F. Rutherford u nap’an reb e convention nni tay ko September ko duw ni 1922?
Nap’an reb e convention nni tay u Cedar Point ni bay u Ohio u Meriken, me yog ni gaar: “Be gagiyeg fare Pilung! Gimed e pi tamachib rok. Ere, ngan machibnag, ngan machibnag, ngan machibnag, murung’agen fare Pilung nge Gil’ilungun!”—w22.10, pp. 3-5.
Mang dalip e kanawo’ ni ma ayuwegdad Got riy ni ngad athamgilgad nrogon ni be tamilangnag e Isaiah ko guruy ni 30?
Be tamilangnag e re guruy ney ni (1) ma fal’eg e motoyil ngodad me fulweg taban e meybil rodad, (2) ma be pow’iydad, (3) ma be tow’athnagdad e chiney nge boch nga m’on.—w22.11, p. 9.
Mang fan nrayog ni nga dogned ni fapi thin ni bay ko Psalm 37:10, 11, 29 e lebug kakrom maku ra lebug boch nga m’on?
Thin rok David e be weliy murung’agen rogon ni i par piyu Israel ni yad ba gapas mab gaman e tin nib t’uf rorad ni bod u nap’an e gagiyeg ni i tay Solomon. I weliy Jesus murung’agen e paradis ni ka bay nga m’on me sul u daken e verse 11. (Matt. 5:5; Luke 23:43)—w22.12, pp. 8-10, 14.