Rogon ni Ma Fulweg Jehovah Taban e Meybil Rodad

1-2. Mang e rayog ni ngaud lemnaged u murung’agen e meybil?

BAY ba ngiyal’ ni kaam lemnag ko be fulweg Jehovah taban e meybil rom, fa? Faanra bay, ma gathi kemus ni yigoo gur e ga ma lem ni aray rogon. Boor e walag ni kar lemgad ni aray rogon nib ga’ nu nap’an ni yad be mada’nag boch e magawon. Faanra gad be yan u fithik’ e gafgow, maku rayog ni nge mo’maw’ ni ngad guyed rogon ni be fulweg Jehovah taban e meybil rodad.

² Ere chiney e ngad weliyed fan nrayog ni nge pagan’dad ngay ni ma fulweg Jehovah taban e meybil ko pi tapigpig rok. (1 John 5:15) Ku gad ra weliy e fulweg ko gal deer ni baaray ni be gaar: Mang fan ni bay yu ngiyal’ ni gowa der fulweg Jehovah taban e meybil rodad? Ma mang boch e kanawo’ ni be fulweg Jehovah taban e meybil rodad riy e ngiyal’ ney?

SANA DABI FULWEG JEHOVAH TABAN E MEYBIL RODAD U ROGON KANAWOEN NI GAD BE LEMNAG

3. Mang fan ni baadag Jehovah ni ngad meybilgad ngak?

³ Be micheg e Bible ngodad nri gad ba t’uf rok Jehovah ma rib ga’ fadad u wan’. (Hag. 2:7; 1 John 4:10) Aram fan ni be yog ngodad ni ngad ninged e ayuw rok u daken e meybil. (1 Pet. 5:6, 7) Baadag ni ngad pared ni gad ba chugur ngak me yag nda athamgilgad u fithik’ e pi magawon ni gad be mada’nag.

4. Uw rogon ni kad nanged ni ma fulweg Jehovah taban e meybil ko pi tapigpig rok? (Kum guy e sasing.)

⁴ Ba ga’ ni gad ma beeg u Bible ni i fulweg Jehovah taban e meybil ko pi tapigpig rok. Rayog ni ngam lemnag bagayad e pi cha’ney, fa? Uw rogon David ni Pilung? N’umngin nap’an e yafos rok ni boor e girdi’ ni ur manged toogor rok, mab ga’ ni i ning e ayuw ngak Jehovah. Bay bayay ni wenig ngak Jehovah ni gaar: “Somol, mmotoyil ko meybil rog! Mmotoyil ko wenig rog ni bochan e gab mat’aw; mu fulweg lungug u fithik’ e yul’yul’ rom!” (Ps. 143:1, BT) I fulweg Jehovah taban e meybil rok ni nge ayuweg. (1 Sam. 19:10, 18-20; 2 Sam. 5:17-25) Aram fan nrayog ni nge gaar: “Ba chugur [Jehovah] ngak urngin e piin ni yad ma non ngak.” Ku arrogodad nrayog ni nge pagan’dad ko re n’ey.​—Ps. 145:18.

5. Gur, gubin ngiyal’ ni i fulweg Jehovah taban e meybil ko pi tapigpig rok kakrom u rogon kanawoen ni ur lemnaged, fa? Mu weliy murung’agen be’. (Kum guy e sasing.)

⁵ Rayog nsana dabi fulweg Jehovah taban e meybil rodad u rogon kanawoen ni gad be lemnag. Aram e n’en ni buch rok apostal Paul. I yog ngak Got ni nge chuweg ‘ba liliy rok nib gel e amith riy.’ Dalip yay ni yibilay Paul murung’agen e re magawon ney ni yib ngak nib mo’maw’. Ere gur, i fulweg Jehovah taban e pi meybil nem? Arrogon, machane de rin’ u rogon kanawoen ni lemnag Paul. I pi’ gelngin ya nge yag ni ulul ko pigpig ni be tay ngak u fithik’ e yul’yul’ ko bin ni nge chuweg e magawon rok.​—2 Kor. 12:7-10.

6. Mang fan ni bay yu ngiyal’ nrayog ni ngad lemnaged nder fulweg Jehovah taban e meybil rodad?

⁶ Ku arrogodad ni bay yu ngiyal’ nrayog ni ngan fulweg taban e meybil rodad u reb e kanawo’ ndad lemnaged. Machane rayog ni nge pagan’dad ngay ni manang Jehovah e bin th’abi fel’ e kanawo’ ni nge ayuwegdad riy. Ku rayog rok ni “nge maruwel nge pag rogon ko tin ni kad wenigniged ngak, ara ke taw e lem rodad ngay.” (Efe. 3:20) Aram fan nrayog ni nge fulweg taban e meybil rodad u ba ngiyal’ ara reb e kanawo’ ndad lemnaged nra rin’ riy.

7. Mang fan nrayog nib t’uf ni ngad thilyeged e n’en gad be yibilay? Mu weliy murung’agen be’.

⁷ Nap’an nra tamilang boch e n’en nib m’agan’ Jehovah ngay u wan’dad, ma sana ra t’uf ni ngad thilyeged e n’en gad be yibilay. Am lemnag e n’en ni buch rok Martin Poetzinger. De n’uw nap’an nga tomuren ni un ko mabgol, min kalbusnag u lan reb e concentration camp ko Nazi. Som’on e meybil ngak Jehovah ni nge ayuweg nge chuw u rom ya nge yag ni ayuweg leengin miki sul ko machib bayay. Machane tomuren l’agruw e wik, ma ka dawori guy e pow riy ni bayi bing Jehovah e kanawo’ ngak ni ngan pag u kalbus. Ere tabab ni nga i meybil ni be gaar: “Jehovah, wenig ngom mu dag ngog e n’en ni ga baadag ni nggu rin’.” Ere tabab ni nge lemnag e gafgow ni be yan e tin baaram e walag ni pumoon u fithik’ ni ku yad bay u rom. Boor i yad e be magafan’ ngak leengin nge pi fak. Ere meybil Brother Poetzinger ni gaar: “Jehovah, kammagar ko biney e maruwel nib beech ni kam pi’ ngog. Mu ayuwegeg ni nggu pi’ gelngin pi walageg mug pi’ e athamgil nga lanin’rad.” Aram e n’en ni rin’ u lan mereb e duw ni par u rom!

8. Mang reb e ban’en nib ga’ fan nsusun e dab da paged talin u nap’an ni gad be meybil?

⁸ Thingar dab da paged talin ni bay e n’en nib m’agan’ Jehovah ngay ma ra lebguy ko ngiyal’ ni ke dugliy. Re n’ey e ba muun ngay ni nge chuweg gubin e magawon ni be k’aring e gafgow ngodad e ngiyal’ ney ni bod boch ban’en ni ma yib ni yima gafgow riy, nge m’ar, nge yam’. Ra lebguy Jehovah e n’en nib m’agan’ ngay u daken Gil’ilungun. (Dan. 2:44; Rev. 21:3, 4) Machane chiney ndawori taw ko ngiyal’ nem e ka be pag Satan ni nge gagiyegnag e re fayleng ney.b (John 12:31; Rev. 12:9) Faanra nge pithig Jehovah gubin e magawon ni be mada’nag e girdi’ e ngiyal’ ney, ma rayog ni nge m’ug riy ni gowa ba fel’ rogon ni be gagiyegnag Satan e re fayleng ney. Ere yugu aram rogon nthingar da sonnaged Jehovah ni nge lebguy boch ban’en ni ke micheg, machane der yip’ fan ni ke digeydad nder ayuwegdad. Chiney e ngad weliyed boch e kanawo’ ni ma ayuwegdad Jehovah riy.

BOCH E KANAWO’ NI MA FULWEG JEHOVAH TABAN E MEYBIL RIY E NGIYAL’ NEY

9. Uw rogon nrayog ni nge ayuwegdad Jehovah u nap’an nra t’uf ni ngad dugliyed boch ban’en? Mu weliy ban’en ni ke buch.

⁹ Ma pi’ e gonop ngodad. Be micheg Jehovah nra pi’ e gonop ngodad ya nge yag ni ngad dugliyed boch ban’en nib fel’ rogon. Rib ga’ nib t’uf e gonop rok Got rodad u nap’an ni gad be dugliy boch ban’en nra thilyeg rogon e par rodad, ni bod ni ngad dugliyed ko ngad pared ni gad ba muchugbil ara ngad uned ko mabgol. (Jas. 1:5) Am lemnag e n’en ni buch rok reb e walag nib pin nib muchugbil ni ka nog Maria ngak.c Ba felfelan’ ni be pigpig ni ir reb e regular pioneer, ma aram me mada’nag reb e walag ni pumoon. I yog ni gaar: “Nap’an nri pach e thin romow, ma aram mug adagew gamow. Gu manang nthingar gu dugliy ban’en. Ere ba n’uw nap’an ni ug yibilay murung’agen e re n’ey. Ba t’uf ni nge pow’iyeg Jehovah, machane ku gu manang ni gathi ir e nge dugliy e n’en ni nggu rin’.” Be lemnag ni ke fulweg Jehovah taban e meybil rok ni aram e ke pi’ e gonop ngak. Ni uw rogon? I gay murung’agen boch ban’en u lan e pi babyor rodad, me pirieg boch e article ni be pi’ e fulweg ko deer rok. Ki motoyil ko fonow ni bay e gonop riy ni pi’ e chitiningin ngak. Re fonow ney e ayuweg Maria ni nge fal’eg i lemnag rogon e re walag nem u wan’. Tomur riy me yag ni nge dugliy e n’en nib fel’ ni nge rin’.

10. Mang e ra rin’ Jehovah ni nge ayuweg e pi tapigpig rok nrogon ni be yog e 2 Korinth 4:7? Mu weliy murung’agen be’. (Kum guy e sasing.)

¹⁰ Ma pi’ gelngidad ni ngad athamgilgad. Ra pi’ Jehovah gelngidad ni ngad athamgilgad u fithik’ e pi magawon ni gad be mada’nag ni bod e n’en ni rin’ ni fan ngak apostal Paul. (Mu beeg e 2 Korinth 4:7.) Am lemnag rogon ni ayuweg Jehovah reb e walag ni pumoon ni ka nog Benjamin ngak ni nge athamgil u fithik’ boch e magawon ni i mada’nag nib mo’maw’. Nap’an ni kab fel’ yangaren mab ga’ ni ur pared chon e tabinaw rok ko yungi n’en ni kan ngongliy rogon ni nge par e girdi’ riy u Africa ni kar milgad ko binaw rorad. I gaar Benjamin: “Gubin ngiyal’ ni ug meybil ngak Jehovah ni nge pi’ gelngig ni nggu rin’ e n’en nib m’agan’ ngay. I fulweg Jehovah taban e meybil rog ni aram e ayuwegeg ni nge gapas lanin’ug, ma dab kug rus ni nggu ulul ko machib, mu kug beeg boch e babyor nra ayuwegeg ni nggu par ni gub chugur ngak.” Ki ulul ngay ni gaar: “Murung’agen e pi walag ni ug beeg nge rogon ni ayuwegrad Jehovah ni ngar athamgilgad e k’aringeg ni nggu dugliy u wan’ug ni nggu par ni gub yul’yul’.”

11-12. Uw rogon nrayog ni nge fulweg Jehovah taban e meybil rodad u daken pi walagdad? (Kum guy e sasing.) 

¹¹ Ma fanay pi walagdad. Fare nep’ u m’on ni nge pi’ Jesus e yafos rok nib maligach, mab gel e meybil ni i tay. I wenig ngak Jehovah ndabi pag yugu boch e girdi’ ni ngar lemnaged ni ke darifannag fithingan. Machane gathi aram e n’en ni rin’ Jehovah, ya ayuweg Jesus u daken ba engel ni l’og ni nge pi’ gelngin. (Luke 22:42, 43) Ku rayog ni nge ayuwegdad Jehovah u daken reb e walag ni ke callnagdad ara ke yib i guydad. Gad gubin nrayog ni ngad gayed boch e kanawo’ nrayog ni nga dogned e “thin nib fel’” riy ngak pi walagdad.​—Prov. 12:25, BT.

¹² Am lemnag e n’en ni buch rok reb e walag nib pin ni ka nog Miriam ngak. In e wik nga tomuren ni ke yim’ figirngin u nap’an ni bay u tabinaw ni yigoo ir, ma aram mi ri kireban’ nib gel. I par nga i yor ndaki yag ni nge tal mab t’uf ni nge weliy laniyan’ ngak be’. I yog ni gaar: “Dabkiyog u gelngig ni nggu callnag be’, ere gu meybil ngak Jehovah. Ma nap’an ni kug be meybil ni gu be yor me chub e telefon rog. Reb e piilal ni fager rog e be call.” I fal’eg e re piilal nem nge leengin laniyan’ Miriam. Ba mich u wan’ ni Jehovah e ir e k’aring e re walag ney ni nge callnag.

13. Mu weliy reb e kanawo’ nrayog ni nge fulweg Jehovah taban e meybil rodad riy u daken e piin ndarur pigpiggad ngak.

¹³ Rayog ni nge fanay e piin ndarur pigpiggad ngak. (Prov. 21:1) Yu ngiyal’ e ma fulweg Jehovah taban e meybil ko girdi’ rok ni aram e ma k’aring e piin ndarur pigpiggad ngak ni ngar ayuweged yad. Bod ni k’aring Artaxerxes ni Pilung ni nge pag Nehemiah ni nge sul nga Jerusalem ya nge yag ni pi’ e ayuw ni ngkun ngongliy e re mach nem bayay. (Neh. 2:3-6) Ku arrogon e ngiyal’ ney nrayog ni nge k’aring Jehovah e piin ndarur pigpiggad ngak ni ngar ayuweged gadad ko ngiyal’ ni ke t’uf e ayuw rodad.

14. Uw rogon ni be pi’ e n’en ni buch rok Soo Hing e athamgil nga lanin’um? (Kum guy e sasing.)

¹⁴ Bay reb e walag nib pin ni ka nog Soo Hing ngak ni nang ni ke ayuweg Jehovah u daken e togta rok. Bay ba pagel ni fak ni bay in mit e m’ar rok ni ma mo’maw’nag ngak ni nge lem nib fel’ rogon. Nap’an ni maad’ad nib gel, ma thingari tal Soo Hing nge figirngin ko maruwel ya nge yag nra ayuwegew. Bochan e re n’ey, ma aram mar magawongow ko salpiy. I yog Soo Hing ni gowa ke par ni bod ba yil’ i goma ni kan tel kari matal. Ere weliy urngin ban’en ni bay u laniyan’ ngak Jehovah me ning e ayuw ngak. Ma aram me dugliy fare togta ni nge ayuwegrad. Bochan e re n’ey, ma aram me ayuwegrad e am miki yag bang ni ngar pared riy nrayog ni ngar pied puluwon. Tomuren me yog Soo Hing ni gaar: “Gguyed rogon ni ayuwegmad Jehovah. Riyul’ ni ir e ‘En Ma Rung’ag e meybil.’”​—Ps. 65:2, NW.

BA T’UF E MICHAN’ YA NGE YAG NDA GUYED ROGON NI BE FULWEG JEHOVAH TABAN E MEYBIL RODAD MIKI M’AGAN’DAD NGAY

15. Mang e ayuweg reb e walag nib pin ni nge nang ni yibe fulweg taban e meybil rok?

¹⁵ Ba ga’ ndanir ma fulweg taban e meybil rodad u boch e kanawo’ ni yira ngat ngay. Machane rogon ni yima fulweg taban e meybil rodad e aram e n’en nib t’uf rodad ya nge yag nda pared ni gad ba yul’yul’ ngak e Chitamangidad ni bay u tharmiy. Ere um tiyan’um nga rogon ni be fulweg Jehovah taban e meybil rom. Bay reb e walag nib pin ni ka nog Yoko ngak ni lemnag nder fulweg Jehovah taban e meybil rok, machane me tabab ni nga i yoloy nga but’ e n’en ni be yibilay ngak Jehovah. Boch nga tomuren, ma aram me fek fare ke babyor nga i yaliy ma aram me nang ni yooren e meybil rok e ke fulweg Jehovah taban ni kub muun boch ngay ni ke pagtalin. Ba t’uf ni nge ba ngiyal’ ma gad tal ngad lemnaged rogon ni be fulweg Jehovah taban e meybil rodad.​—Ps. 66:19, 20.

16. Uw rogon nrayog ni ngad daged ni bay e michan’ rodad u rogon e meybil ni gad ma tay? (Hebrews 11:6)

¹⁶ Rogon ni nge m’ug ni bay e michan’ rodad e aram e gathi kemus ni ngaud meybilgad ngak Jehovah, ya kub t’uf ni nge m’agan’dad nga rogon ni be fulweg taban e meybil rodad. (Mu beeg e Hebrews 11:6.) Am lemnag e n’en ni buch rok Mike nge Chrissy ni leengin. Ur namegew ni ngar pigpiggow u Bethel. I yog Mike ni gaar: “Boor yay ni ug fal’egew e babyor romow ni nggu unew ko pigpig u Bethel ma ka gamow be yibilay murung’agen e re n’ey ngak Jehovah, machane dan fekmow ni nggu pigpiggow u rom.” Yugu aram rogon me par Mike nge Chrissy nib pagan’row ni manang Jehovah e bin th’abi fel’ e kanawo’ ni nge fanayrow ni fan ko pigpig ni yow be tay ngak. Ra ululgow ni ngar rin’ew e tin nrayog rorow ni aram e ur pigpiggow ni yow l’agruw e regular pioneer ko gin nib t’uf e ayuw riy maku yow be pi’ e ayuw ni ngan toy boch e naun ni fan ko ulung rok Jehovah. Chiney e yow ma lekag e ulung. I yog Mike ni gaar: “Gathi gubin ngiyal’ ni ke fulweg Jehovah taban e meybil romow u rogon kanawoen ni ug lemnagew, machane ke fulweg taban e pi meybil nem ma kki rin’ u boch e kanawo’ ni kab gel e fel’ riy nga rogon nrayog ni nge taw e lem romow ngay.”

17-18. Mang e rayog ni nge pagan’dad ngay nrogon ni be yog e Psalm 86:6, 7?

¹⁷ Mu beeg e Psalm 86:6, 7. Ba pagan’ David ngay ni ir e yoloy e Psalm ni i rung’ag Jehovah e meybil rok ma be fulweg taban. Ku rayog ni nge pagan’um ko re n’ey. Fapi girdi’ ni kan weliy murung’agrad ko re article ney e be micheg ngodad nrayog ni nge pi’ Jehovah e gonop ngodad nge gelngidad ya nge yag nda athamgilgad. Ku rayog ni nge fanay pi walagdad ara piin darur pigpiggad ngak e chiney ni ngar ayuweged gadad u boch e kanawo’.

¹⁸ Yugu aram rogon ni gathi gubin ngiyal’ nra fulweg Jehovah taban e meybil rodad u rogon kanawoen ni gad be lemnag, machane gad manang nra fulweg taban. Ra pi’ e n’en nib t’uf rodad ko ngiyal’ nib t’uf ni nge pi’ riy. Ere mu ulul ko meybil me pagan’um nra rung’ag Jehovah e meybil rom me ayuwegem e chiney ma kub gaman urngin ban’en nra pi’ ngodad u lan e bin nib beech e fayleng nge yan i aw ni ‘ke fel’ u wun’dad ni gad gubin e tin ni ke yog ngodad.’​—Ps. 145:16.