L’agruw i Girdien Fare Ulung ni Ma Pow’iyey ni Ka Yow Bbeech
ROFEN ni Dalip Fen e Maruwel ko January 18, 2023, me m’ug ba thin ko jw.org ni be yog ni kan mel’eg Brother Gage Fleegle nge Jeffrey Winder ni ngar mangew bang ko fare Ulung ni Ma Pow’iyey ko Pi Mich Rok Jehovah. Gal walag ney e ke n’uw nap’an ni yow ma pigpig ngak Jehovah u fithik’ e yul’yul’.
Gage Fleegle nge Nadia ni leengin
Brother Fleegle e chuguliy e gallabthir rok ko tin riyul’ me ilal u ba’ ni ngal yu Pennsylvania ni bay u Meriken. Nap’an ni fel’ yangaren ma ranod chon e tabinaw rok ra pared nga reb e binaw nib achig nib t’uf e ayuw riy ko machib. De n’uw nap’an nga tomuren me un ko taufe ko November 20, 1988.
Gubin ngiyal’ ni ma pi’ e gallabthir rok Brother Fleegle e athamgil nga laniyan’ ni nge un ko pigpig u polo’ e tayim rok. Kub ga’ ni ma par e pi walag ni pumoon ni yad ma lekag e ulung nge boch e walag ni yad ma pigpig u Bethel u tabinaw rorad, ere rayog ni nge guy nrib felfelan’ e pi walag ney. De n’uw nap’an nga tomuren ni un ko taufe, me tabab ko pioneer ko September 1, 1989. L’agruw e duw nga tomuren, ma aram me yag ni nge rin’ ban’en ni i nameg ni ka nap’an ni 12 e duw rok ni aram e nge pigpig u Bethel. Ere nap’an e October ko duw ni 1991 me tabab ko pigpig u Bethel u Brooklyn.
Meruk e duw ni maruwel Brother Fleegle ko gin yima ngongliy yu ken e babyor riy u Bethel, ma nga tomuren min fek ni nge maruwel ko Service Department. Nap’an e re ngiyal’ i n’em mi i pigpig u reb e ulung ni yima non riy ko thin nu Russia u lan in e duw. Nap’an e duw ni 2006 ma aram mar mabgolgow Nadia, me un ngak ngaur pigpiggow u Bethel. Ka ur pigpiggow ko ulung ni yima non riy ni thin ni Portuguese, ma kki pag ragag e duw ni kar pigpiggow ko ulung ni yima non riy ni thin ni Spanish. Tomuren ni ke maruwel Brother Fleegle ko Service Department u lan boor e duw, ma aram min fek ni nge maruwel ko Teaching Committee Office me boch nga tomuren mu kun fek ni nge maruwel ko Service Committee Office. Ma nap’an e March ko duw ni 2022 min mel’eg ni nge mang reb e walag ni ma pi’ e ayuw ko Service Committee ko fare Ulung ni Ma Pow’iyey.
Jeffrey Winder nge Angela ni leengin
Brother Winder e nni chuguliy u Murrieta ni bay u California u Meriken. I chuguliy e gallabthir rok ko tin riyul’, me un ko taufe ko March 29, 1986. Bin migid e pul nga tomuren me dugliy ni nge un ko pioneer ni ayuw. Bochan nri baadag e n’en ni i rin’ ma aram me dugliy ni nge ulul ngay. Tomuren ni un ko pioneer ni ayuw u lan in e pul, ma aram me tabab ko regular pioneer ko October 1, 1986.
Nap’an ni kab fel’ yangaren Brother Winder, me yan i guy l’agruw e pagel ni walagen ni yow ba ilal ngak ni yow ma pigpig u Bethel. Re n’ey e k’aring ni nge adag ni nge fal’eg e babyor rok ni nge un ko pigpig u Bethel u nap’an ni ke ilal boch. Ere nap’an e May ko duw ni 1990, ma aram min pining ni nge un ko pigpig u Bethel u Wallkill.
Ba thilthil e maruwel ni i rin’ Brother Winder u Bethel ni kub muun ngay e maruwel ko Cleaning Department, nge Farm Department, nge Bethel Office. Nap’an e duw ni 1997 mar mabgolgow Angela, ma kar pigpiggow u Bethel ke mada’ ko chiney. Nap’an e duw ni 2014 min fekrow ni ngar maruwelgow u Warwick, ma aram e gin ni i pi’ Brother Winder e ayuw riy ni ngan toy e bin nib beech e tochuch rodad. Nap’an e duw ni 2016, min fekrow ni ngar pigpiggow ko fare Watchtower Educational Center ni bay u Patterson, ma aram mi i maruwel Brother Winder ko Audio/Video Services. Aningeg e duw nga tomuren mar sulow nga Warwick, ma aram min fek Brother Winder ni nge maruwel ko Personnel Committee Office. Nap’an e March ko duw ni 2022 min mel’eg ni nge mang reb e walag ni ma pi’ e ayuw ko Personnel Committee ko fare Ulung ni Ma Pow’iyey.
Gad be meybil ni nge tow’athnag Jehovah e gal walag ney ni yow l’agruw e “pumoon ni tow’ath” u nap’an ni yow be ulul ni ngar maruwelgow nib gel ni fan nga Gil’ilungun.—Efe. 4:8, NW.