Um Pag e Michan’ Rom ni Nge Gagiyegnag e Pi N’en Ga Be Dugliy

1. Mang fan nrayog ni nge felfelan’ apostal Paul u nap’an ni lemnag e pi n’en ke rin’ u lan e yafos rok?

MANANG apostal Paul ndab ki n’uw nap’an ma yira thang e fan rok, machane nap’an ni lemnag e pi n’en ke rin’ u lan e yafos rok mi ri felfelan’. I yog ni gaar: “Kug mil u n’umngin yang ni ngan mil riy, ya ug par nib mich Kristus u wun’ug.” (2 Tim. 4:​6-8) Ba fel’ e n’en ni dugliy Paul ni nge rin’ ni aram e nge fanay e yafos rok ni nge pigpig ngak Jehovah, ma manang nib felfelan’ Jehovah ko n’en ke rin’. Ku arrogodad ni gad baadag ni ngad dugliyed boch ban’en nib fel’ rogon, ma gad fel’ u wan’ Got. Uw rogon nrayog ni ngad rin’ed e re n’ey?

2. Mang e be yip’ fan fapi thin ni yog Paul ko 2 Korinth 5:7?

² I weliy Paul murung’agrad boch e Kristiano ni yad ba yul’yul’ ni gaar: “N’en ni ke michan’dad ngay e ir e be gagiyegnag e ngongol rodad u roy u fayleng, ma gathi n’en ni gadad be guy.” (2 Kor. 5:7) Mang e be yip’ Paul fan? Piin nde mich Jehovah u wan’rad e kemus ni yad ma dugliy boch ban’en ni be yan u rogon e n’en yad be guy, ma yad be rung’ag, ma yad be lemnag. Machane be’ nib mich Jehovah u wan’ e ma lemnag e n’en baadag Jehovah u nap’an ni be dugliy boch ban’en. Ma m’ug ko ngongol rok nib mich u wan’ nra tow’athnag Got, ma ra yib angin ngak ni faanra fol ko fonow rok Jehovah ni bay u lan e Thin rok.​—Ps. 119:66; Heb. 11:6.

3. Faan gad ra pag e michan’ rodad ni nge gagiyegnag e pi n’en gad be dugliy, ma mang angin nra yib ngodad? (2 Korinth 4:18)

³ Riyul’ ni gad gubin ni gad ma dugliy boch ban’en ni be yan u rogon e n’en gad be guy, ma gad be rung’ag, ma gad be lemnag. Machane dabisiy ni gad ra mada’nag e magawon ni faanra kemus ni yigoo n’en gad be guy ara gad be rung’ag e ngad lemnaged u nap’an ni gad be dugliy boch ban’en nib ga’ fan. Mang fan? Ya bay yu ngiyal’ nrayog ni nge bannagdad owchedad nge teldad. Mus ni faanra de bannagdad, machane faanra kemus e n’en be tor e pi n’en gad ma dugliy nga daken, ma rayog ni nge tomur riy ma dab kud folgad ko n’en nib m’agan’ Got ngay ara pi fonow rok. (Ekl. 11:9; Matt. 24:​37-39) Machane faanra michan’ rodad e ir e be gagiyegnag e pi n’en gad be dugliy, ma dabisiy ni gad ra dugliy boch ban’en “ni ir e mm’agan’ Somol ngay.” (Efe. 5:10) Gad ra fol ko fonow rok Got ma ra gapas lanin’dad ma gad felfelan’. (Ps. 16:​8, 9; Isa. 48:​17, 18) Ma faan gad ra ulul ni ngad paged e michan’ rodad ni nge gagiyegnag e pi n’en gad be dugliy, ma aram e ra yag e yafos ndariy n’umngin nap’an ngodad boch nga m’on.​—Mu beeg e 2 Korinth 4:18.

4. Uw rogon nrayog ni nge nang be’ ko be dugliy ban’en nrogon nib puluw ko michan’ rok ara be dugliy ban’en ni be yan u rogon e n’en be guy?

⁴ Uw rogon nrayog ni ngad nanged ko gad be dugliy ban’en nrogon nib puluw ko michan’ rodad ara gad be dugliy ni be yan u rogon e n’en gad be guy? Rogon ni ngad nanged e aram e ngad lemnaged ko: Mang e be gagiyegnag e pi n’en gad be dugliy? Kemus ni yigoo tin nrayog ni ngad guyed e be gagiyegnagdad? Fa pagan’ rodad ngak Jehovah nge fonow rok e ir e be gagiyegnagdad? Ngad weliyed rogon nrayog ni ngaud taga’gad nga rogon ni be pow’iydad Jehovah u dalip ban’en nib ga’ fan ni aram e: nap’an ni gad be mel’eg e re miti maruwel ni ngad uned ngay, ngu nap’an ni ngad mel’eged be’ ni ngad leayed, ngu nap’an ni ke yog e ulung ban’en ni ngad rin’ed. Nap’an ni gad be weliy reb nge reb e pi n’ey, ma gad ra weliy boch ban’en nsusun e ngad lemnaged ya nge yag ni ngad dugliyed boch ban’en nib fel’ rogon.

NAP’AN NI GAD BE MEL’EG E RE MITI MARUWEL NI NGAD UNED NGAY

5. Mang e susun ni ngad lemnaged u m’on ni ngad dugliyed e re miti maruwel ni ngad uned ngay?

⁵ Gad gubin ni gad baadag ni ngad yognaged e tin nib t’uf rodad nge chon e tabinaw rodad. (Ekl. 7:12; 1 Tim. 5:8) Bay boch e maruwel nib fel’ puluwon, ya ra un be’ ngay ma rayog ni nge yognag e salpiy nib gaman ni fan ko tin nib t’uf ko tabinaw rok miki tay buchuuw nga bang ni fan ngak boch nga m’on. Machane bay boch e maruwel ni gathi rib ga’ puluwon nra un be’ ngay ma kemus ni yigoo tin nib t’uf rorad chon e tabinaw rok e rayog ni nge yognag. Riyul’ nu m’on ni ngad dugliyed ko gad ra un nga reb e maruwel fa danga’, ma gad ra lemnag urngin e salpiy nra yag riy ngodad. Machane faanra kemus ni aram e n’en nge lemnag be’, ma ra yan i aw ni kemus ni be dugliy ban’en ni be yan u rogon e n’en be guy.

6. Uw rogon nrayog ni ngad dugliyed ban’en nrogon nib puluw ko michan’ rodad u nap’an ni gad be mel’eg e re miti maruwel ni ngad uned ngay? (Hebrews 13:5)

⁶ Faanra gad be dugliy ban’en nrogon nib puluw ko michan’ rodad, ma aram e ku gad ra lemnag e n’en nra rin’ fare maruwel ko tha’ u thildad Jehovah. Rayog ni ngad fithed gadad ni nge lungudad: ‘Faan gu ra un ko re maruwel ney, ma ra t’uf ni nggu un nga boch ban’en nib fanenikan Jehovah, fa?’ (Prov. 6:​16-19) ‘Ra magawonnag e liyor rog, maku ra teg u orel ko tabinaw rog u lan ba ngiyal’ nib n’uw nap’an, fa?’ (Fil. 1:​10, NW) Faanra fulweg rom ko gal deer ney e arrogon, me ere ba fel’ ndab mu un ko fare maruwel ni yugu aram rogon nib mo’maw’ ni ngam pirieg e maruwel. Gad ma dugliy boch ban’en ni ma m’ug riy nib pagan’dad nra pi’ Jehovah e tin nib t’uf rodad ni bochan e gad ma ngongol nrogon nib puluw ko michan’ rodad.​—Matt. 6:33; mu beeg e Hebrews 13:5.

7-8. Uw rogon ni dugliy reb e walag ni pumoon u South America ban’en nrogon nib puluw ko michan’ rok? (Kum guy e sasing.)

⁷ Mu tay fanam i yan u rogon ni guy Javiera nreb e walag ni pumoon ni ma par u South America fan nib t’uf ni nge dugliy ban’en nrogon nib puluw ko michan’ rok. I yog ni gaar: “Kug ngongliy e babyor rog ni nggu un nga reb e maruwel nib tolang puluwon ko bin baaram e maruwel ni ug un ngay ma kug ra adag.” Machane ri ku baadag Javier ni nge pioneer. I ulul ngay ni gaar: “Nog ngog ni nggu wan ni ngan fith boch e deer ngog ni bay rogon ko re maruwel nem. U m’on ni nggu wan mug meybil ngak Jehovah ni nge ayuwegeg, ya ba pagan’ug ngay ni manang e n’en th’abi fel’ ni fan ngog. Gu baadag ni nge yoor ban’en ni nge milfan ngog u tabon e maruwel miki tolang puluwog, machane dabug ni nggu un ko re maruwel ney ni faanra dabi ayuwegeg ni nggu rin’ e n’en nug be nameg ni fan ko tirok Got ban’en.”

⁸ Ki ulul ngay ni gaar: “Nap’an ni be fith faen nib ga’ boch e deer ngog, me yog nra i t’uf ni nggu maruwel nge pag e tayim. Ere gog ngak u fithik’ e sumunguy ndabiyog ni nggu rin’ e re n’ey ni bochan e pi n’en nug ma rin’ ni fan ko pigpig rog.” Arrogon, i dugliy Javier ndabi un ko fare maruwel. L’agruw e wik nga tomuren me tabab ko pioneer. Miki boch nga tomuren u lan e re duw nem, me pirieg reb e maruwel nrayog ni nge un ngay ni gathi ba polo’ e tayim rok. I yog ni gaar: “I rung’ag Jehovah e meybil rog me ayuwegeg ni nggu pirieg reb e maruwel ndabi magawonnag rogon e pioneer nug be tay. Rug be felfelan’ ni ke yag ni nggu pirieg reb e maruwel ni ke ayuwegeg ni nggu yoornag e tayim ni fan ko pigpig rog ngak Jehovah ma kug be ayuweg pi walageg.”

9. Mang e kam fil ko n’en ni buch rok Trésor?

⁹ Uw rogon ni faanra kad nanged ni maruwel ni gad be un ngay e chiney e der ayuwegdad ni ngad ngongolgad nrogon nib puluw ko michan’ rodad? Am lemnag e n’en ni buch rok Trésor ni be’ nu Congo. I yog ni gaar: “Rug baadag e maruwel ni ka fin gu un ngay. Dalip yay ni ke mun nga puluwog ma yima tay fag.” Machane ba ga’ nder ma un Trésor ko muulung ni bochan e ma maruwel nge pag e tayim. Ku yima towasariy ni nge mithag boch ban’en ni yima rin’ u fithik’ e sasalap u tabon e maruwel. Baadag ni nge tal machane be magafan’ ni nge par ndariy e maruwel rok. Ere mang e ayuweg? I yog ni gaar: “I ayuwegeg e Habakkuk 3:​17-19 ni nggu nang ni mus faanra ndakuriy e gin nge yag e salpiy riy ngog, maku ra ayuwegeg Jehovah. Ere gu tal ko maruwel.” Ki yog ni gaar: “Boor e piin yad ba ga’ u tabon e maruwel ni yad ma lemnag ni faanra nge un be’ nga reb e maruwel nib fel’ puluwon, ma ra pag fan urngin ban’en nib muun chon e tabinaw rok ngay nge pi n’en ma rin’ ni fan ko liyor rok. Kug felfelan’ ngay ni ke yag ni nggu ayuweg e tha’ u thilmow Jehovah nge thilmad chon e tabinaw rog nde kireb. Reb e duw nga tomuren, me ayuwegeg ni nggu pirieg reb e maruwel nib gaman e salpiy ni be yag riy ngog ni nggu yognag e tin nib t’uf rog miki yoor e tayim nug be fanay ni fan ko pigpig rog ngak. Gad ra m’oneg Jehovah ma rayog ni ngad magawongad ko salpiy u lan ba ngiyal’, machane ra ayuwegdad.” Arrogon, faanra pagan’dad ko pi fonow rok Jehovah nge pi n’en ke micheg, ma aram e gad ra ulul ni ngaud ngongolgad nrogon nib puluw ko michan’ rodad me tow’athnagdad.

NAP’AN NI NGAD MEL’EGED BE’ NI NGAD LEAYED

10. Mang e rayog ni nge k’aringdad ni ngad dugliyed ban’en ni be yan u rogon e n’en gad be guy u nap’an ni gad be mel’eg e en ngad leayed?

¹⁰ Mabgol e aram reb e tow’ath ni ke yib rok Jehovah, ma de kireb ni ngad adaged ni ngad uned ko mabgol. Faanra be lemnag reb e walag nib pin ni nge leay reb e walag ni pumoon, ma sana ra lemnag rogon yaan, nge ngongol rok, nge rogon thin u wan’ e girdi’, nge rogon ni ma ayuweg e salpiy, nge n’en nib milfan ngak u lan e tabinaw rok, nge rogon nra yibnag e felfelan’ ngak.b Riyul’ nib ga’ fan e pi n’ey. Machane faanra kemus e n’en nge lemnag, ma aram e rayog ni be dugliy ban’en ni be yan u rogon e n’en be guy.

11. Uw rogon nrayog ni ngad ngongolgad nrogon nib puluw ko michan’ rodad u nap’an ni gad be mel’eg e en ngad leayed? (1 Korinth 7:39)

¹¹ Rib felfelan’ Jehovah ngak e pi walag ni yad ma fol ko fonow rok u nap’an ni yad be mel’eg e en ngar leayed! Bod ni yad ma fol ko fare fonow ni ngar songad nge mada’ ko ngiyal’ ni kar paged e “bin baaram e yangar ni ur moyed riy nib gel e ar’ar u fithik’ i dowrad ni ma tay e piin fel’ yangaren” u m’on ni ngar puruy’naged be’ e mabgol. (1 Kor. 7:​36, NW) Ba ga’ ni pi fel’ngin ni ke yog Jehovah nib fel’ ni nge yag ngak reb i figirngiy ara reb i leengiy nib manigil e aram e n’en yad ma sap ngay u nap’an ni yad be mel’eg e en ngar leayed. (Prov. 31:​10-13, 26-28; Efe. 5:33; 1 Tim. 5:8) Ma faanra bay be’ ni gathi ir reb e Pi Mich ni be ngongol ngak bagayad u reb e kanawo’ ni be m’ug riy ni baadag, ma aram e ma fol ko fare fonow ni bay ko 1 Korinth 7:39 ni be yog ni ngan mabgol “nrogon e mabgol ni ma tay e piin ni girdien Kristus.” (Mu beeg.) Yad ma ulul ni ngar ngongolgad nrogon nib puluw ko michan’ rorad, ya ba pagan’rad nrayog rok Jehovah ni nge t’ufegrad ni kab fel’ nga rogon nrayog ni nge rin’ yugu be’.​—Ps. 55:22.

12. Mang e ga be fil ko n’en ni rin’ Rosa?

¹² Am lemnag e n’en ni buch rok Rosa nreb e pioneer ni ma par u Colombia. Bay be’ nib pumoon ni yow nga maruwel ni gathi ir reb e Pi Mich ni tabab ni nge dag ngak ni baadag. Ku arrogon Rosa ni ku baadag e re pumoon nem. I yog ni gaar: “Gu ra guy ma bod ni ir be’ nrib manigil. Ma ayuweg e girdi’ ko gin ma par riy, ma bod ni ir be’ nib fel’ e ngongol rok. Ba gol ngog. Urngin e fel’ngin nug baadag ni nge yag ngak be’ ni nggu mabgolgow ma bay rok, kemus ni gathi ir reb e Pi Mich.” Ki ulul ngay ni gaar: “Ba mo’maw’ ngog ni nggog ngak ndabiyog ni nge fel’ e thin romow. Ngiyal’ nem e be kireban’ug ni bochan e yigoo gag ma gu baadag ni nggu un ko mabgol, machane dawor gu pirieg reb e walag nrayog ni nggu mabgolgow.” Yugu aram rogon, ma gathi kemus ni yigoo tin be guy Rosa e ir e i par ni be lemnag. I lemnag rogon nra kirebnag e re n’ey e tha’ u thilrow Jehovah. Ere tal ndaki non ko fare pumoon me yoornag e tin be rin’ ni fan ko pigpig rok ngak Jehovah. De n’uw nap’an nga tomuren me taw e thin ngak ni nge un ko fare School for Kingdom Evangelizers, ma chiney e be pigpig ni ir reb e special pioneer. I yog Rosa ni gaar: “Boor e tow’ath ni ke pi’ Jehovah ngog ni kari yibnag e felfelan’ ngog.” Yugu aram rogon nrayog nde mom ni ngad ngongolgad nrogon nib puluw ko michan’ rodad nib ga’ ni faanra bay rogon nga ban’en nri gad baadag, machane faan gad ra pag e lem rok Jehovah ni nge pow’iydad, ma gubin ngiyal’ nra yib angin ngodad.

NAP’AN NI KE YOG E ULUNG BAN’EN NI NGAD RIN’ED

13. Mang e rayog ni nge k’aringdad ni ngad ngongolgad ni be yan u rogon e n’en gad be guy u nap’an ni ke yog e ulung ban’en ni ngad rin’ed?

¹³ Ba ga’ ni ma yog e piin piilal ko ulung rodad, ara pi walag ni pumoon ni yad ma lekag e ulung, ara branch ofis, ara fare Ulung ni Ma Pow’iyey boch ban’en ni ngad rin’ed nra ayuwegdad u rogon e pigpig rodad ngak Jehovah. Machane uw rogon ni faanra bay yu ngiyal’ ndarud nanged fan e pi n’em? Rayog ni nge maruwar u wan’dad ko ba puluw e pi n’em fa danga’. Ku rayog ni ngad tababgad ni ngad sapgad nga thibngin e pi walag ni ka rogned fapi n’em ni ngan rin’.

14. Mang e ra ayuwegdad ni ngad ngongolgad nrogon nib puluw ko michan’ rodad u nap’an ni ke yog e ulung ban’en ni ngad rin’ed? (Hebrews 13:17)

¹⁴ Nap’an ni gad ra ngongol nrogon nib puluw ko michan’ rodad, ma aram e ba pagan’dad ni Jehovah e ir e be pow’iy gubin ban’en ma manang e n’en be buch rodad. Bochan e re n’ey, ma aram fan ni gad ma gur ngad folgad ma gad be sap nga fel’ngin ban’en. (Mu beeg e Hebrews 13:17.) Gad manang ni fol ni gad ma tay e ma ayuweg e ulung ni nge par ni bay e taareban’ riy. (Efe. 4:​2, 3) Gad manang ni yugu aram rogon ndawori flont e pi walag ni yad ma yog e thin rodad, machane ra tow’athnagdad Jehovah ni faan gad ra fol. (1 Sam. 15:22) Ku gad manang nra taw ko ngiyal’ ni ke dugliy, ma ra yal’uweg e tin nrib t’uf ni ngan yal’uweg.​—Mik. 7:7.

15-16. Mang e ayuweg reb e walag ni pumoon ni nge ngongol nrogon nib puluw ko michan’ rok ni yugu aram rogon ni be maruwar u wan’ e n’en ka nog ngak ni nge rin’? (Kum guy e sasing.)

¹⁵ Am lemnag ban’en ni buch ni be tamilangnag angin nra yib riy ni faan gad ra ngongol nrogon nib puluw ko michan’ rodad. Yugu aram rogon ni yooren e girdi’ u Peru e yad ma non ni thin ni Spanish, machane ku boor e girdi’ u rom ni yad ma non ko thin rorad. Reb ko pi thin nem e thin ni Quechua. Boor e duw ni i gay e pi walag ni yad ma non ni thin ni Quechua e piin yad ma non ko re thin ney ni yad ma par ko gin yad ma machib riy. Machane min thilyeg rogon ni yibe gay e girdi’ u nap’an e machib ni bochan e ngan fol ko motochiyel ko am. (Rom. 13:1) Ere bay boch e walag nra lemnaged nri chey me magawonnag e re n’ey e maruwel ni yibe tay ko pi binaw u rom. Machane nap’an ni fol e pi walag ko n’en kan thilyeg, ma aram me tow’athnagrad Jehovah ya boor e girdi’ nra pirieged ni ma non ni thin ni Quechua.

¹⁶ Kevin ni ir reb e piilal ni ma un nga reb e ulung ni yima non riy ni thin ni Quechua e ir bagayad e piin ni i magafan’rad ko re n’ey. I weliy ni gaar: “I lungug u wan’ug, ‘Uw rogon ni ngan pirieg e girdi’ e chiney ni yad ma non ni thin ni Quechua?’” Ere mang e rin’ Kevin? I yog ni gaar: “Gu lemnag fare thin ni bay ko Proverbs 3:5. Ngemu’ mu kug lemnag murung’agen Moses. Nog ngak ni nge pow’iy piyu Israel nga wuru’ yu Egypt me fekrad nga bangi ban’en ni gowa dabkiyog ni ngar milgad rok piyu Egypt ni yad be lol’ograd. Yugu aram rogon me fol, me tow’athnag Jehovah ni aram e ngongliy ba maang’ang ni yira ngat ngay.” (Ex. 14:​1, 2, 9-11, 21, 22) I m’agan’ Kevin ngay ni nge thilyeg rogon e machib ni be tay. Mang angin ni yib riy? I yog ni gaar: “Rug ngat nga rogon ni tow’athnagmad Jehovah. Kafram e ba n’uw yang e gin gamad ma yan riy u but’ u nap’an e machib ma yu ngiyal’ e kemus ni taabe’ ara l’agruw ni’ ni yow ma non ni thin ni Quechua e gamad ma pirieg. Ma chiney e gamad ma yan ko gin boor e girdi’ riy ni yad ma non ni thin ni Quechua. Bochan e re n’ey ma boor e girdi’ ni gamad ma non ngorad, maku gamad ma sul ngaug guyed yad, maku gamad ma fil e Bible ngorad. Ki yoor e girdi’ ni yad be un ko muulung.” Arrogon, faan gad ra ngongol nrogon nib puluw ko michan’ rodad ma gubin ngiyal’ nra tow’athnagdad Jehovah.

17. Mang e kam fil ko re article ney?

¹⁷ Kad weliyed dalip e kanawo’ nib ga’ fan nrayog ni ngad ululgad ni ngad paged e michan’ rodad ni nge gagiyegnag e pi n’en gad be dugliy. Machane bin riyul’ riy e gubin ban’en ni gad ma rin’ u lan e yafos rodad nib t’uf ni nge m’ug riy ni gad be ngongol nrogon nib puluw ko michan’ rodad, ni bod e pi n’en gad ma mel’eg ni ngad chuweged e chalban rodad ngay ara ngad felfelan’gad ngay, ngu nap’an ni gad be dugliy boch ban’en ni bay rogon ko skul ni ngad uned ngay, ara chugol bitir. Demtrug e n’en nib t’uf ni ngad dugliyed ma susun e gathi kemus ni pi n’en nrayog ni ngad guyed e nge gagiyegnagdad, ya kub muun ngay e tha’ u thildad Jehovah, nge pi fonow rok, nge rogon ni ke micheg nra ayuwegdad. Faan gad ra rin’ e re n’ey, ma aram e rayog ni ngaud “meybilgad ngak Somol ni Got rodad ma gadad be fol rok ndariy n’umngin nap’an.”​—Mik. 4:5.