Gubin Ngiyal’ Nrayog ni Nge Ayuwegem Jehovah

1. Uw rogon ni pagan’ Moses ngak Jehovah u nap’an ni fek piyu Israel nga wuru’ yu Egypt?

BOOR e girdi’ ni bay murung’agrad ko fare babyor ni Hebrews nib mich Jehovah u wan’rad. Bagayad e aram Moses ni ir be’ nrib gel e michan’ rok. (Heb. 3:​2-5; 11:​23-25) I dag nib mich Got u wan’ u nap’an ni fek piyu Israel nga wuru’ yu Egypt. De rus ngak Farao nge pi salthaw rok. I pagan’ ngak Jehovah, ma aram me pow’iy fapi girdi’ nga barba’ fare day ni Red Sea me boch nga tomuren miki pow’iyrad u daken e ted. (Heb. 11:​27-29) Yooren piyu Israel e daki pagan’rad ngak Jehovah nrayog ni nge ayuwegrad, machane Moses e ulul ni nge pagan’ ko Got rok. Ba puluw e n’en ni rin’ Moses ni pagan’ ngak Got, ya ngongliy Got e maang’ang nge pi’ e ggan nge ran ni nge ayuweg e pi girdi’ nem u daken e gi ted nem nder tugul ban’en riy.a​—Ex. 15:​22-25; Ps. 78:​23-25.

2. Mang fan ni fith Got Moses ni gaar: “Gur ba’ ban’en ndabiyog rog”? (Numbers 11:​21-23)

² Machane yugu aram rogon nib gel e michan’ rok Moses, ma sogonap’an reb e duw nga tomuren ni chuw piyu Israel u Egypt, me tabab ni nge maruwar u wan’ ko rayog rok Jehovah ni nge pi’ e ufin ni nge kay e girdi’ rok ni bod ni ke yog fa danga’. De nang rogon nrayog ni nge pi’ Jehovah e ufin nib gaman ni nge kay e pi girdi’ nem ni aram urngirad ni yad bay u daken e gi ted nem nder tugul ban’en riy. Ere fith Jehovah ngak ni gaar: “Gur ba’ ban’en ndabiyog rog?” (Mu beeg e Numbers 11:​21-23.) Re thin ney ko thin ni Hebrew e “pa’ Jehovah” ni be yip’ fan gelngin Got nib thothup ara gelngin ni be maruwel ngay. Ere bod ni be gaar Jehovah ngak Moses, ‘Gur, ga be lemnag ndabiyog ni nggu rin’ e tin ku gog nug ra rin’?’

3. Mang nib ga’ fan ni ngad lemnaged n’en ni buch rok Moses nge piyu Israel?

³ Bay ba ngiyal’ ni kaam lemnag ko ra pi’ Jehovah e tin nib t’uf ko par rom ara par romed chon e tabinaw rom, fa? Demtrug ko kam lem ba ngiyal’ ni aray rogon fa danga’, ma ngad weliyed e n’en ni buch rok Moses nge piyu Israel nde pagan’rad ngak Got nrayog ni nge pi’ e tin nib t’uf rorad. Pi thin nu Bible ni gad ra weliy e ra ayuwegdad ni ngari pagan’dad ni gubin ngiyal’ nrayog ni nge ayuwegdad Jehovah.

MU FIL BAN’EN KO N’EN NI BUCH ROK MOSES NGE PIYU ISRAEL

4. Mang fan ni boor piyu Israel ni tabab ni nge maruwar u wan’rad nrayog rok Jehovah ni nge pi’ e tin nib t’uf rorad?

⁴ Mang fan ni boor piyu Israel ni tabab ni nge maruwar u wan’rad nrayog rok Jehovah ni nge pi’ e tin nib t’uf rorad? Ke n’uw nap’an ni be milekag piyu Israel nge “yugu boch e girdi’” ni yad boor ni kar uned ngorad ni yad be yan u daken e ted ni kar bad u Egypt ni yad be sor i yan ko fare Nam ni Kan Micheg. (Ex. 12:38; Deut. 8:15) Fapi girdi’ ni kar maathukgad nga fithik’ piyu Israel e kankanan’rad ni yugu yad be kay e manna maku arrogon e n’en ni rin’ boor e girdi’ nu Israel, ma aram mu kur uned ko gun’gun’ ni yad be tay. (Num. 11:​4-6) I tabab e pi girdi’ nem ni ngar fineyed e ggan ni ur ked u Egypt. Bochan ni ur gun’gun’gad ngak Moses, ma aram me lemnag nthingari gay e gin nge fek e ufin riy ni ngar ked machane de nang e gin nge fek riy.​—Num. 11:​13, 14.

5-6. Mang e rayog ni ngad filed u rogon ni magawonnag piyu Israel e n’en ni rin’ fapi girdi’ nra maathukgad nga fithik’rad?

⁵ Rayog ni tabab piyu Israel ni nge dabki ga’ fan u wan’rad e pi n’en be pi’ Jehovah ni fan ngorad ni bochan e n’en ni rin’ fapi girdi’ ni kar maathukgad nga fithik’rad. Ku arrogodad nrayog ni nge dabki fel’ u wan’dad e tin be pi’ Jehovah ni fan ngodad ni bochan ni girdi’ u toobdad e darur pininged e magar. Rayog ni nge buch e re n’ey ni faanra ud lemnaged e pi n’en immoy rodad kafram ara awan’dad ko tin bay rok yugu boch e girdi’. Machane ra gel boch e felfelan’ rodad ni faan gad ra fil rogon ni nge fel’ u wan’dad e tin bay rodad ni yugu demtrug rogon e par rodad.

⁶ Susun e dabi pag piyu Israel talin ni ke micheg Got ngorad nnap’an ni yad ra taw ko gin ngar pared riy, ma boor ban’en nra yag ngorad nib t’uf ko par rorad ni yad ra felfelan’ ngay. Ra lebug e re n’ey u nap’an ni yad ra taw ko fare Nam ni Kan Micheg, ma gathi nap’an ni yad be milekag u daken e ted i yan. Ku arrogodad nib fel’ ni ngaud lemnaged e n’en ke micheg Jehovah nra pi’ ngodad u lan e bin nib beech e fayleng, ko bin ngaud lemnaged boch ban’en ndariy rodad u lan e re m’ag ney. Ku rayog ni ngad fal’eged i lemnag boch e thin nu Bible nrayog ni nge ayuwegdad ni nge gel boch e pagan’ rodad ngak Jehovah.

7. Mang fan nrayog ni nge pagan’dad ngay ni gubin ngiyal’ nrayog rok Jehovah ni nge ayuwegdad?

⁷ Nap’an ni fith Jehovah fare deer ngak Moses ni bay ko Numbers 11:​23, ma rayog ni bay l’agruw ban’en ni baadag ni nge lemnag Moses ni aram e: (1) Dariy e gin nra mus gelngin riy. (2) Demtrug e gin nrayog ni nge fanay gelngin riy. Rayog ni nge pi’ Got e ufin ni boor ni nge kay piyu Israel ni yugu aram rogon ni yad bay u daken bangi ted ndariy ban’en riy. I dag gelngin “nga rifrifen pa’ nib gel, nge pa’ nib gel gelngin.” (Ps. 136:​11, 12, BT) Ere nap’an ni gad ra mada’nag e skeng ma susun e dabi maruwaran’dad nrayog rok Jehovah ni nge ayuwegdad ni be’ nge be’.​—Ps. 138:​6, 7.

8. Uw rogon nrayog ni ngad siyeged e oloboch ni rin’ fapi girdi’ ni ur moyed u daken e ted? (Kum guy e sasing.)

⁸ De n’uw nap’an nga tomuren me pi’ Jehovah e ufin ni ngar ked; i pi’ e arche’ ni quail ni boor ni ngar ked. Machane de pining piyu Israel e magar ngak Got ko re maang’ang ney. Ya boor i yad e baadag ni nge kunuy e pi arche’ nem ni boor ni nge kay. Ur maruwelgad ni rran nge nep’ ni yad be kunuy e pi arche’ nem ni ngar ked. I damumuw Jehovah ngak e piin ur ‘ar’arnaged e ufin,’ ma aram me gechignagrad. (Num. 11:​31-34) Rayog ni ngad filed ban’en ko re n’ey. Ba t’uf ni ngad kol ayuwgad ko chogow. Demtrug ko ba fel’ rogodad ara gad ba gafgow, ma susun e nge m’on u wan’dad rogon ni ngad ulunguyed e ‘flaab rodad u tharmiy’ ni aram e nge chugur e tha’ u thildad Jehovah nge Jesus. (Matt. 6:​19, 20; Luke 16:9) Faan gad ra rin’ e re n’ey, ma aram e rayog ni nge pagan’dad ngay nra pi’ Jehovah e tin nib t’uf rodad.

9. Mang e rayog ni ngari pagan’dad ngay?

⁹ Ba m’agan’ Jehovah ngay ni nge ayuweg e girdi’ rok e ngiyal’ ney. Machane re n’ey e der yip’ fan ndariy ba ngiyal’ ni gad ra magawon ko salpiy ara yib e bilig ngodad.b Yugu aram rogon ma dariy ba ngiyal’ nra pagdad Jehovah. Ra ayuwegdad u fithik’ e pi magawon ni gad be mada’nag. Uw rogon nrayog ni nge pagan’dad nra pi’ Jehovah e tin nib t’uf rodad? Ngad weliyed l’agruw ban’en: (1) nap’an ni gad be mada’nag e magawon ko salpiy, nge (2) nap’an ni gad be lemnag rogon ni nge gaman e tin nib t’uf rodad boch nga m’on.

GAD BE MAGAWON KO SALPIY

10. Mang boch e magawon ko salpiy nrayog ni ngad mada’naged?

¹⁰ Nap’an ni gad ra chugur nga tungun e re m’ag ney ma dabisiy nra yoor e magawon ni gad ra mada’nag ni bochan e am ni be thilthil, ara mahl, ara boch ban’en ni ma buch ni yima gafgow riy, ara boch e m’ar nib beech ni be garer. Rayog ni ngad talgad ko maruwel nib tomgin, ara mul e chugum rodad u pa’dad, ara t’uf ni ngad chuwgad ko gin gad ma par riy me gel boch e mo’maw’ riy ni ngad yognaged e tin nib t’uf ko par rodad. Rayog nib t’uf ni ngad gayed reb e maruwel nib beech ara darod chon e tabinaw rodad da pared nga yugu bang ya nge yag nda pied e tin nib t’uf rorad. Ere mang e rayog ni nge ayuwegdad ni ngad dugliyed boch ban’en nra m’ug riy ni be pagan’dad ngak Jehovah?

11. Mang e rayog ni nge ayuwegem u nap’an ni ga be magawon ko salpiy? (Luke 12:​29-31)

¹¹ Reb e ban’en nib ga’ fan ni ngam rin’ maku ra yib angin e aram e ngam weliy e magafan’ rom ngak Jehovah. (Prov. 16:3) Mu ning e gonop ngak ya nge yag nim dugliy boch ban’en nib fel’ rogon, mu ku mog ngak ni nge ayuwegem ni nge gapas lanin’um ya nge dabki ‘magafan’um.’ (Mu beeg e Luke 12:​29-31.) Mu wenig ngak ni nge ayuwegem ni ngam fil rogon ni nge fel’ u wan’um e tin bay rom nib t’uf ko par rom. (1 Tim. 6:​7, 8) Mu gay murung’agen e n’en nrayog ni ngam rin’ u nap’an ni ga be magawon ko salpiy u lan e pi babyor rodad. Boor e walag ni ke yib angin ngorad boch ban’en ni bay ko jw.org ni be weliy murung’agen e magawon ko salpiy.

12. Mang boch e deer nrayog ni nge ayuweg reb e Kristiano ni nge dugliy e n’en nib fel’ ni nge rin’ ni fan ko tabinaw rok?

¹² Bay boch e walag ni ke m’agan’rad ni ngar uned nga reb e maruwel nib t’uf ni nga ranod ra pared nga bang nib palog ko gin bay chon e tabinaw rorad riy, machane boor i yad e ma yan i nang boch nga tomuren nde fel’ e n’en ke dugliy. Ere u m’on ni ngam un nga reb e maruwel, ma gathi kemus ni ngam lemnag puluwon nra yag ngom ya ngkum lemnag ko ra ayuwegmed chon e tabinaw rom ni ngam pared ni gimed ba chugur ngak Jehovah fa danga’. (Luke 14:28) Mu fithem ni nge lungum: ‘Mang e rayog ni nge buch ko mabgol rog ni faanra gu be par u bang nib palog? Faan gu ra chuw nggu wan gu par nga bang, ma uw rogon nra magawonnag e muulung nge machib nug ma un ngay?’ Faanra bay e bitir rom, ma kub t’uf ni ngam fithem ni nge lungum: ‘Uw rogon ni nggu ‘llowan’nag pi fakag nrogon, mug fonownagrad nrogon girdien Kristus’ ni faanra dag moy u toobrad?’ (Efe. 6:4) Mu pag e lem rok Got ni nge pow’iyem ma gathi n’en be lemnag chon e tabinaw rom nge pi fager rom ndarur ted fan e pi kenggin e motochiyel u Bible.c Tony ni ma par ko ba’ ni ngal yu Asia e ni ognag in e maruwel ngak nib fel’ puluwon ni bay u yugu reb e nam. Machane tomuren ni yibilay murung’agen e re n’ey mu kur weliyew leengin u taabang, ma aram me dugliy ni nge siyeg me lemnag rogon ni ngar lichnaged chon e tabinaw rok e n’en yad be n’ag e salpiy ngay. Ra sul Tony nge lemnag e re n’em, ma ma yog ni gaar: “Ke yag ni nggu ayuweg in e girdi’ ni ngar nanged Jehovah, mab pasig gal fakmow ko tin riyul’. Kug nanged chon e tabinaw rog ni faanra gamad be fol ko fapi thin ni bay ko Matthew 6:​33, ma ra ayuwegmad Jehovah.”

GAD BE LEMNAG ROGON NI NGE GAMAN E TIN NIB T’UF RODAD BOCH NGA M’ON

13. Mang boch ban’en nrayog ni ngad rin’ed e chiney ya nge yag ni boch nga m’on ma bay buchuuw e salpiy ni fan ngodad?

¹³ Rayog ni ngan skengnag rogon e pagan’ rodad ngak Jehovah u nap’an ni gad ra lemnag rogon e par rodad ko ngiyal’ ni kad pilibthirgad. Be pi’ e Bible e athamgil nga lanin’dad ni ngad maruwelgad nib gel, ya nge yag nda yognaged e tin nib t’uf ko par rodad boch nga m’on. (Prov. 6:​6-11) Ba puluw ni ngad ted buchuuw e salpiy nga bang ni fan ngodad boch nga m’on. Riyul’ ni salpiy e rayog ni nge yororiydad u boch ban’en. (Ekl. 7:12) Machane susun e dabi m’on e salpiy u wan’dad.

14. Mang fan nsusun e ngad lemnaged fare thin ni bay ko Hebrews 13:5 u nap’an ni gad be lemnag rogon ni nge gaman e tin nib t’uf ko par rodad boch nga m’on?

¹⁴ I weliy Jesus ba fanathin ni be tamilangnag rogon feni balyang be’ ni faanra kunuy e salpiy ni boor, machane de ‘yoor ban’en rok u p’eowchen Got.’ (Luke 12:​16-21) Dariy be’ ni manang e n’en nra buch rok gabul. (Prov. 23:​4, 5; Jas. 4:​13-15) Gadad pi gachalpen Kristus e ku bay reb e magawon ni gad ma mada’nag. I yog Jesus nthingari m’agan’dad ngay ni ngad ‘paged’ urngin e tin bay rodad ya nge yag nda manged boch i gachalpen. (Luke 14:33) Pi Kristiano u Judea ko bin som’on e chibog e mul e chugum rorad u pa’rad, machane de chuw e felfelan’ rorad. (Heb. 10:34) Boor e walag e ngiyal’ ney ni kan talegrad ko maruwel ni bochan e darur pied e ayuw nga reb e ulung ko am. (Rev. 13:​16, 17) Ere mang e ke ayuwegrad? Rib pagan’rad ko fapi thin ni ke micheg Jehovah ni be gaar: “Ri dab gu pagem; ma ri dab gu n’igem.” (Mu beeg e Hebrews 13:5.) Gad ma rin’ e tin nrayog rodad ni ngad lemnaged rogon ni nge gaman e tin nib t’uf ko par rodad boch nga m’on, ma faanra ke buch ban’en ndad lemnaged mab pagan’dad nra ayuwegdad Jehovah.

15. Uw rogon nsusun e nga i lemnag e piin gallabthir ni Kristiano pi fakrad? (Kum guy e sasing.)

¹⁵ Bay boch e nam nib ga’ ni ma fakay e girdi’ e bitir riy ni bochan e nge boch nga m’on ma rayog ni ngar yognaged e salpiy nib gaman ni ngar ayuweged e gallabthir rorad u nap’an ni kar pilibthirgad. Machane be yog e Bible nsusun ni piin gallabthir e ngar ayuweged pi fakrad ko tin nib t’uf ko par rorad. (2 Kor. 12:14) Riyul’ nrayog nib t’uf ni ngan ayuweg e gallabthir u boch ban’en u nap’an ni kar pilibthirgad, ma boor e bitir ni yad ba felfelan’ ngay ni ngar rin’ed e re n’ey. (1 Tim. 5:4) Machane piin gallabthir ni Kristiano e yad manang ni bin th’abi ga’ e felfelan’ ni ma yag ngorad e bochan ni kar chuguliyed pi fakrad ni ngar manged boch e tapigpig rok Jehovah, ma gathi bochan e nge boch nga m’on mar ayuweged yad ko salpiy.​—3 John 4. 

16. Uw rogon nrayog ni nge ayuweg e piin gallabthir pi fakrad ni ngar nanged rogon ni ngar yognaged e tin nib t’uf ko par rorad boch nga m’on? (Efesus 4:28)

¹⁶ Mu fil ngak pi fakam ni nge pagan’rad ngak Jehovah u nap’an ni ga be ayuwegrad ni ngar nanged rogon ni ngar yognaged e tin nib t’uf ko par rorad boch nga m’on. Mu dag ngorad feni ga’ fan ni ngan maruwel nib gel u nap’an ni ka yad bbitir. (Prov. 29:21; mu beeg e Efesus 4:28.) Ma nap’an ni yad be ilal i yan, mag ayuwegrad ni ngar tedan’rad ko skul. Rayog ni nge gay e piin gallabthir ni Kristiano murung’agen boch i kenggin e motochiyel u Bible mar folgad riy, ya nge yag nra ayuweged pi fakrad ni ngar nanged rogon ni ngar maruwelgad ko tin kar filed u skul nib fel’ rogon. Re n’ey e ra ayuweg pi fakrad ni ngar yognaged e tin nib t’uf ko par rorad, mar fanayed e tayim rorad nib fel’ rogon ni fan ko machib.

17. Mang e rayog ni nge pagan’dad ngay?

¹⁷ Pi tapigpig rok Jehovah ni yad ba yul’yul’ e rayog ni nge pagan’rad nrayog rok maku baadag ni nge pi’ e tin nib t’uf ko par rorad. Nap’an ni gad ra chugur i yan nga tungun e re m’ag ney, ma gad manang ni yira skengnag rogon e pagan’ rodad ngak Jehovah. Machane demtrug e n’en nra buch, ma ngad dugliyed u wan’dad ni nge pagan’dad ngay nra fanay Jehovah gelngin ni nge pi’ e tin nib t’uf ko par rodad. Rayog ni nge pagan’dad ngay ni gubin ngiyal’ nrayog ni nge ayuwegdad nga rifrifen pa’ nib gel nge pa’ nib gel gelngin.