Dariy Ba Ngiyal’ ni Gad Ra Par ni Yigoo Gadad

1-2. (a) Mang fan nrayog ni nga dogned ndariy ba mit e magawon ni gad ra mada’nag ni gad ra yan u fithik’ ni yigoo gadad? (b) Mang e gad ra weliy ko re article ney?

NAP’AN ni gad ra mada’nag boch e magawon nib gel e mo’maw’ riy, ma rayog ni ngaud lemnaged ni gowa gad bay u lan bochi bowoch nib achig u maday u borran nib meyko’. Machane dab darod u fithik’ e magawon rodad ni yigoo gadad. Ya gathi kemus ni ma guy e Chitamangidad ni bay u tharmiy e magawon ni gad be mada’nag, ya kki micheg nra ayuwegdad u fithik’. Be micheg ko pi tapigpig rok ni yad ba yul’yul’ ni be gaar: “Bay gu . . . ayuwegem.”​—Isa. 41:10.

² Re article ney e ra weliy rogon ni ma ayuwegdad Jehovah ni aram e (1) ma pow’iydad, (2) ma pi’ e tin nib t’uf rodad, (3) ma yororiydad, ma (4) ma fal’eg lanin’dad. Be micheg Jehovah ndemtrug e re miti magawon ni gad ra mada’nag, ma dariy ba ngiyal’ nra pagtildad. Dabi digeydad. Ere dariy ba ngiyal’ ni gad ra par ni yigoo gadad.

MA POW’IYDAD JEHOVAH

3-4. Uw rogon ni ma pow’iydad Jehovah? (Psalm 48:14)

³ Mu beeg e Psalm 48:14. Der lemnag Jehovah ni ngad pow’iyed gadad. Ere uw rogon ni ma pow’iy e pi tapigpig rok ni yad ba yul’yul’ e ngiyal’ ney? Reb e kanawo’ ni ma rin’ e re n’ey riy e u daken e Bible. (Ps. 119:105) Ma ayuwegdad Jehovah u daken e Thin rok ni ke thagthagnag ni ngad dugliyed boch ban’en ma gad maruweliy boch e fel’ngin nra gelnag boch e felfelan’ rodad e chiney me yognag e yafos ndariy n’umngin nap’an ngodad boch nga m’on.a Bod ni ma fil ngodad rogon ni nge dabi aw nga lanin’dad e kireb ni ke rin’ be’ ngodad, ma gad yul’yul’ u fithik’ urngin e tin ni gad be rin’, me bagadad ma ri t’uf bagadad rok u polo’ i laniyan’. (Ps. 37:8; Titus 2:10; 1 Pet. 1:22) Nap’an ni gad ra dag e pi fel’ngin ney, ma aram e gad ra mang boch e gallabthir, nge piin figirngiy, nge piin leengiy, nge pi fager nib manigil.

⁴ Ki uneg Jehovah murung’agen boch e girdi’ nga lan e Thin rok ni ur mada’naged boch e magawon ni bod e tin gad ma mada’nag, maku ur lemgad ni bod gadad. (1 Kor. 10:13; Jas. 5:17) Nap’an ni gad ra beeg e pi n’ey, ma gad fol ko n’en kad filed riy, ma bay l’agruw e kanawo’ nra yib angin riy ngodad. Som’on e gad ra nang ni gathi yigoo gadad e gad be mada’nag e magawon, ya ku bay boch e girdi’ ni ur mada’naged boch e magawon ni aray rogon me yag ni ngar athamgilgad u fithik’. (1 Pet. 5:9) Ma bin migid e gad ra nang rogon ni ngad athamgilgad u fithik’ e pi magawon ni gad be mada’nag.​—Rom. 15:4.

5. Mini’ e piin ma fanayrad Jehovah ni ngar pow’iyed gadad?

⁵ Ku ma fanay Jehovah e pi walag ni ngar pow’iyed gadad.b Bod ni bay boch e walag ni pumoon ni yad ma lekag e ulung ni gubin ngiyal’ ni ngar pied e athamgil nga lanin’dad. Pi welthin ni yad ma pi’ e ma gelnag e michan’ rodad me ayuwegdad ni ngad pared nib taareban’dad. (Acts 15:40–16:5) Ku ma ayuwegdad e piin piilal ni be’ nge be’ ni ngad pared ni gad ba chugur ngak Jehovah. (1 Pet. 5:2, 3) Piin gallabthir e yad ma pow’iy pi fakrad ko tirok Got ban’en, mar ayuweged yad ni ngaur dugliyed boch ban’en nib fel’ rogon, mar mechameged ngorad ni ngaur rin’ed boch ban’en nib fel’ ngorad. (Prov. 22:6) Ma pi walag nib pin ni kar ilalgad ko tirok Got ban’en e yad ma ayuweg e pi walag nib pin ni ka yad bbitir ngorad ni aram e yad ma dag e kanawo’ nib manigil nrayog ni ngar folwokgad riy, mar pied boch e fonow nib manigil ngorad, mu kur pied e athamgil nga lanin’rad.​—Titus 2:3-5.

6. Mang e thingar da rin’ed ya nge yag ni fel’ rogodad u rogon ni be pow’iydad Jehovah?

⁶ Ke rin’ Jehovah e n’en nib milfan ngak ni aram e nge pow’iydad. Uw rogon ni ngad daged nib ga’ fan u wan’dad e n’en ke rin’ ni fan ngodad? Be gaar e Proverbs 3:5, 6: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang.” Faan gad ra rin’ e re n’ey, ma aram e ra “dag [ngodad] e bin nib mat’aw e kanawo’” ni aram e nge ayuwegdad ni ngad siyeged boor e magawon mad pirieged e felfelan’. Gad ba felfelan’ ni ke pi’ Jehovah boch e fonow ngodad u fithik’ e t’ufeg!​—Ps. 32:8.

MA PI’ JEHOVAH E TIN NIB T’UF RODAD

7. Mang boch e kanawo’ ni ma pi’ Jehovah e tin nib t’uf rodad riy? (Filippi 4:19)

⁷ Mu beeg e Filippi 4:19. Gathi kemus ni ma pow’iydad Jehovah ni fan ko tirok ban’en, ya ku ma tow’athnagdad ko maruwel nib gel ni gad ma tay ni ngad yognaged e ggan, nge mad, nge bang ni ngad pared riy. (Matt. 6:33; 2 Thess. 3:12) Yugu aram rogon ni ka ban’en ni gad ma rin’ ni nga i magafan’dad nga rogon ni ngad yognaged e tin nib t’uf ko par rodad, machane be pi’ Jehovah e athamgil nga lanin’dad ndabi magafan’dad ko pi n’ey ni yugu ba pag rogon. (Mu guy e study note ko Matthew 6:25.) Mang fan? Ya Chitamangidad e dariy ba ngiyal’ nra digey e pi tapigpig rok ni yad ba yul’yul’ ko ngiyal’ ni ke t’uf e ayuw rorad. (Matt. 6:8; Heb. 13:5) Rayog ni nge pagan’dad ko n’en ke micheg nra pi’ e tin nib t’uf rodad.

8. Mang e rin’ Jehovah ni fan ngak David?

⁸ Am lemnag rogon ni ayuweg Jehovah David. Nap’an e pi duw ni i gafgow u nap’an ni be mil rok Saul ni Pilung, ma i pi’ Jehovah e tin nib t’uf rorad fapi pumoon ni ur uned ngak ya nge yag nra pared ni yad ba fos. Nap’an ni sul nge lemnag rogon e ayuw ni i pi’ Jehovah ngak u lan e pi duw nem, me yoloy ni gaar: “Chiney e kug pilibthir, ni gathi ku gub pagel, machane dawor gguy be’ nib fel’ ni gomanga ke pag Somol faanem, ara gguy pi fak ni yad be man ggan.” (Ps. 37:25) Dabisiy ni ku arrogom ni kam guy rogon ni ke pi’ Jehovah e tin nib t’uf romed pi walagem u nap’an ni gimed be gafgow.

9. Uw rogon ni ma pi’ Jehovah e tin nib t’uf ko girdi’ rok u nap’an ni ke buch ban’en ni kan gafgow riy e ngiyal’ ney? (Kum guy e sasing.)

⁹ Ku ma pi’ Jehovah e tin nib t’uf ko girdi’ rok u nap’an ni ke buch ban’en ni kan gafgow riy. Bod nnap’an ni yib ba uyungol ko bin som’on e chibog, me pi’ e pi Kristiano ni yad ma par u yugu boch e nam boch ban’en ni fan ngak pi walagrad ni kar gafgowgad. (Acts 11:27-30; Rom. 15:25, 26) Ku aram e n’en ma rin’ e girdi’ rok Got e ngiyal’ ney. Nap’an nra buch ban’en ni kan gafgow riy, ma ma pow’iy Jehovah e girdi’ rok ni ngar pied boch ban’en nib t’uf ni bod e ggan, nge rran, nge mad, nge falay ngak e pi walag ni yad ma par ko yungi n’em ni ke yib e gafgow ngay. Ku ma yan boch e walag ni ngar ngongliyed e naun ko pi walag nge pi Tagil’ e Liyor ni ke kireb. Ku ma gur e pi tapigpig rok Jehovah ni ngar fal’eged laniyan’ e piin ke kireb e naun rorad ara ke yim’ be’ nib t’uf rorad, mar ayuweged yad ko tirok Got ban’en.c

10-11. Mang e kam fil ko n’en ni buch rok Borys?

¹⁰ Ku ma pi’ Jehovah e tin nib t’uf ko piin ndarur liyorgad ngak e chiney. Ere ku gad ma gay boch e kanawo’ ni ngad golgad riy ngak e piin nib thil e michan’ rodad. (Gal. 6:10) Ba ga’ nnap’an ni gad ra rin’ e re n’ey, ma rayog ni ngad ayuweged yad ni ngkur nanged boch ban’en u murung’agdad nge Jehovah. Am lemnag e n’en ni buch rok Borys ni ma par u Ukraine ni ir e ba ga’ u reb e skul. Yugu aram rogon ni gathi ir reb e Pi Mich Rok Jehovah, machane gubin ngiyal’ ni ma dag e sumunguy ko bitir ni ma un ko re skul nem ni yad boch e Pi Mich ma ma tayfan e michan’ rorad. Nap’an ni dugliy Borys ni nge chuw ko gin ma par riy ko re nam nem nib gel e cham ni yibe tay riy nge yan nga bang ni gathi rib gel e cham riy, ma aram me ayuweg pi walagdad. Boch nga tomuren me un ko Puguran ko yam’ ni tay Kristus. Nap’an ni sul nge lemnag e n’en ni buch rok, me yog ni gaar: “Rib gol e Pi Mich ngog, ma kub fel’ rogon ni ur ayuweged gag. Kari magar e Pi Mich Rok Jehovah.”

¹¹ Ku arrogodad nrayog ni ngad folwokgad ko Chitamangidad ni bay u tharmiy ni ma runguyey ni aram e ngaud t’ufeged e piin ke t’uf e ayuw rorad ndemtrug ko taareb e michan’ rodad fa danga’. (Luke 6:31, 36) Gad be athapeg ni t’ufeg ni gad ma dag ko girdi’ e ra k’aringrad ni ngar manged boch i gachalpen Kristus. (1 Pet. 2:12) Machane yugu demtrug e n’en nra buch ma gad ra pirieg e felfelan’ ni ma yib ko ngiyal’ ni kad pied ban’en ngak be’.​—Acts 20:35.

MA YORORIYDAD JEHOVAH

12. Mang e ke micheg Jehovah nra ayuweg e girdi’ rok riy? (Psalm 91:1, 2, 14)

¹² Mu beeg e Psalm 91:1, 2, 14. Ke micheg Jehovah nra yororiydad u boch ban’en nra kirebnag e tha’ u thildad e ngiyal’ ney. Dariy ba ngiyal’ nra pag Satan ni nge kirebnag e bin riyul’ e liyor. (John 17:15) Ma nap’an “fare gafgow ni ba ga’” ma rayog ni ngari pagan’dad nra rin’ Jehovah e n’en ke micheg ni aram e gathi kemus ni nge ayuweg e girdi’ rok ni ngar pared nib gel e michan’ rorad, ya ku ra yororiyrad ndabi buch ban’en rorad.​—Rev. 7:9, 14.

13. Mang boch e kanawo’ ni ma yororiydad Jehovah riy ni be’ nge be’?

¹³ Uw rogon ni ma yororiydad Jehovah ni be’ nge be’? Ma ayuwegdad u daken e Bible ni ngad nanged e n’en nib fel’ nge n’en nib kireb. (Heb. 5:14) Nap’an ni gad ra fol ko pi kenggin e motochiyel ni bay ko Thin rok Got, ma rayog ni ngad ayuweged gadad ko pi n’en nrayog ni nge kirebnag e tha’ u thildad Got me gafgownag fithik’ i dowdad. (Ps. 91:4) Ku ma yororiydad Jehovah u daken e ulung rok. (Isa. 32:1, 2) Ra ud chaggad ngak e piin nib t’uf Jehovah rorad ma yad ma fol ko pi kenggin e motochiyel rok, ma rayog ni ngar pied e athamgil nga lanin’dad mar pied gelngidad ni ngad siyeged boch ban’en nra gafgownagdad.​—Prov. 13:20.

14. (a) Mang fan nder ma yororiydad Got u gubin mit e magawon? (b) Mang e be micheg e Psalm 9:10 ngodad? (Kum guy e footnote.)

¹⁴ Immoy yu ngiyal’ kakrom ni i ayuweg Jehovah e pi tapigpig rok u boch ban’en ni yad ra maad’ad ara ra m’ad riy. Machane gathi gubin ngiyal’ ni i rin’ e re n’ey. Be yog e Bible ndemtrug be’ nrayog ni nge mada’nag boch e magawon nde lemnag nra buch rok. (Jas. 4:13, 14) Maku reb e kab kafram i yib ni ma pag Jehovah e pi tapigpig rok ni ngan gafgownagrad ara ra m’ad, ya nge yag nra micheged ni Satan e ba malulfith l’igin. (Job 2:4-6; Matt. 23:34) Ku arrogon e n’en ma buch e ngiyal’ n’ey. Yugu aram rogon nsana dabi chuweg Jehovah e magawon rodad, machane rayog ni nge pagan’dad ngay ndariy ba ngiyal’ nra digey e piin yad ma t’ufeg.d​—Ps. 9:10.

MA FAL’EG JEHOVAH LANIN’DAD

15. Uw rogon ni yima fal’eg lanin’dad u daken e meybil, nge Thin rok Got, nge pi walag ni gad ma chag ngorad? (2 Korinth 1:3, 4)

¹⁵ Mu beeg e 2 Korinth 1:3, 4, NW.e Yu ngiyal’ e ma kireban’dad ni bochan e ke yim’ be’ nib t’uf rodad, ara be magafan’dad, ara be kireban’dad nga yugu boch ban’en. Sana rayog ni ga be mada’nag reb e magawon e chiney nri be kirebnag lanin’um ni be k’aringem ni ngam lemnag ni yigoo gur. Gur, bay be’ ni manang rogon lanin’um, fa? Manang Jehovah. Gathi kemus ni manang rogon e amith ni be tay lanin’dad, ya ku “ma fal’eg lanin’dad u urngin e gafgow nge kireban’ ni ma yib ngodad.” Ni uw rogon? Nap’an ni gad ra weliy lanin’dad ngak u daken e meybil, ma ma pi’ ngodad e ‘gapas rok ndabi chuchugur ni nge nang e girdi’ fan.’ (Fil. 4:6, 7) Maku reb e nap’an ni gad ra beeg e thin rok Jehovah ni fan ngodad ni bay u Bible, maku ma fal’eg lanin’dad. Pi n’en bay riy ni be weliy murung’agen e t’ufeg, nge gonop, nge athap e rayog ni nge pi’ e athamgil nga lanin’dad. Ma pi muulung ni gad ma un ngay e ma fal’eg lanin’dad ni bochan e aram e gin gad ma chag e pi walag riy, min pi’ e athamgil nga lanin’dad u daken e thin nu Bible.

16. Mang e kam fil ko n’en ni buch rok Nathan nge Priscilla?

¹⁶ Am lemnag e n’en ni buch rok Nathan nge Priscilla ni yow ma par u Meriken ni be dag rogon ni ma fanay Jehovah e Thin rok ni nge fal’eg lanin’dad me pi’ e athamgil ngodad. In e duw ni ke yan, mar dugliyew ni nga ranow ra parew nga bang nib t’uf boch e tamachib riy. I yog Nathan ni gaar, “Ba pagan’mow ngay nra tow’athnagmow Jehovah ko athamgil ni gamow be tay.” Machane tomuren nra tawgow ngaram, me yib e m’ar ngorow nib tomgin mu kur magawongow ko salpiy. Munmun me t’uf ni ngar sulow nga taferow, machane ka yow be magawon ko salpiy. I gaar Nathan: “Gu lemnag ko mang fan ndawori tow’athnagmow Got ni bod rogon nug lemnagew. Kug tabab ni nggu lemnag nsana bay ban’en nib kireb ni kug rin’.” Machane munmun me nang Nathan nge Priscilla nde digeyrow Got ko ngiyal’ ni ke t’uf e ayuw rorow. Ki gaar Nathan: “Nap’an e ngiyal’ nem nib gel e magawon ni gamow be mada’nag, me par e Bible ni ke bod ba fager ngomow nib ga’ e gonop rok ni ma pi’ e athamgil nga lanin’mow maku ma pow’iymow. Bochan ni ug lemnagew rogon ni be ayuwegmow Jehovah ni nggu athamgilgow u fithik’ e magawon romow ko bin ngaug parew ni gamow be lemnag e magawon romow, ma aram e n’en ni ayuwegmow ni nge pagan’mow ngay nra ulul Jehovah ni nge ayuwegmow boch nga m’on.”

17. Uw rogon nni fal’eg laniyan’ reb e walag nib pin ni ka nog Helga ngak? (Kum guy e sasing.)

¹⁷ Ku rayog ni nge fal’eg e pi walag lanin’dad. Ni uw rogon? Am lemnag e n’en ni buch rok Helga ni ma par u Hungary. Boor e duw ni i mada’nag boch e magawon ni i k’aring e mochuch ngak miki lemnag ni ir be’ ndariy fan. Machane ra sul nge lemnag e pi n’em, ma rayog ni nge guy rogon ni i fal’eg Jehovah laniyan’ u daken e ulung. I yoloy ni gaar: “Kab kafram i yib nnap’an nra guy Jehovah ni ke aw parwog ni bochan e maruwel nug ma un ngay, nge fakag nib m’ar nug ma ayuweg, nge yugu boch e magawon ma ma ayuwegeg. Dariy borran u lan e re 30 i duw ney ni ke yan ndawori rin’ e n’en ke micheg ni aram e nge fal’eg lanin’ug. Ba ga’ ni ma pi’ gelngig u daken e thin ni ma yog yugu boch e girdi’ ngog ni ma pi’ e athamgil nga lanin’ug. Ba ga’ ni yima textnageg, ara ni pi’ bang e card ngog, ara nog ban’en nib fel’ ni kug rin’ ko ngiyal’ ni kari t’uf rog.”

18. Uw rogon nrayog ni ngad fal’eged laniyan’ yugu boch e girdi’?

¹⁸ Gad ba tow’ath nrayog ni ngad folwokgad ko Got rodad ni aram e ngad fal’eged laniyan’ yugu boch e girdi’. Uw rogon nrayog ni ngad rin’ed e re n’ey? Rayog ni ngad gum’an’naged gadad ngad motoyilgad ngorad, ma gad fal’eg lanin’rad, ma gad ayuwegrad ko tin ke t’uf rorad. (Prov. 3:27) Gad ma guy rogon ni ngad fal’eged laniyan’ e piin yad be gafgow ni kub muun ngay e piin ndarur pigpiggad ngak Got. Nap’an nra kireban’ e piin nib migid ngodad ni bochan e ke yim’ be’ nib t’uf rorad, ara kar m’argad, ara be magafan’rad, ma gad ma yan da guyed yad, ma gad motoyil ngorad, ma gad beeg boch e thin nu Bible nra pi’ e athamgil nga lanin’rad. Nap’an ni gad ra folwok rok Jehovah ni ir “fare Got ni ma fal’eg lanin’uy,” ma gathi kemus ni gad ra ayuweg e pi walagdad ni ngar athamgilgad u fithik’ e pi magawon rorad, ya ku gad ra munguynag laniyan’ e piin ndarur pigpiggad ngak Got ni ngar adaged e bin riyul’ e liyor.​—Matt. 5:16.

GUBIN NGIYAL’ NRA AYUWEGDAD JEHOVAH

19. Mang e ma rin’ Jehovah ni fan ngodad? Uw rogon nrayog ni ngad folwokgad rok?

¹⁹ Gubin ngiyal’ nra ayuweg Jehovah e piin yad ma t’ufeg. Der ma digeydad u nap’an ni gad be mada’nag e magawon. Ma ayuweg e pi tapigpig rok ni yad ba yul’yul’ ni bod reb e gallabthir ni ma ayuweg fak u fithik’ e t’ufeg. Ma pow’iydad, ma ma pi’ e tin nib t’uf rodad, ma ma yororiydad, ma ma fal’eg lanin’dad. Nap’an ni gad ra ayuweg yugu boch e girdi’ u nap’an ni yad be mada’nag e magawon ma gad pi’ e athamgil nga lanin’rad, ma aram e gad be folwok ko Chitamangidad ni bay u tharmiy. Yugu aram rogon nrayog ni ngad mada’naged e magawon miki kireban’dad nga boch ban’en, machane rayog ni nge pagan’dad ngay ni bay Jehovah rodad. Ya bin riyul’ riy e ke micheg ni ke gaar: “Dab mu tamdag, ya gu ba’ rom.” (Isa. 41:10) Ri be pi’ e re n’ey e pagan’ ngodad! Dariy ba ngiyal’ ni gad ra par ni yigoo gadad.