Pi Walag ni Ki Gimed Ba Pagel​—Mu Folwokgad rok Mark nge Timothy

1-2. Mang boch e magawon nrayog ni nge taleg Mark nge Timothy ndab ra yoornagew e tin yow be rin’ ni fan ngak Jehovah?

PI WALAG ni ki gimed ba pagel, gimed baadag ni ngam yoornaged e tin gimed be rin’ ni fan ko pigpig romed ngak Jehovah mi gimed ayuweg e pi walag u lan e ulung romed, fa? Ba mudugil ni gimed baadag. Ri gad ba felfelan’ ni gad be guy ni boor e walag ni ka yad ba pagel nib m’agan’rad ngay ni ngar yoornaged e tin yad be rin’ ni fan ngak Jehovah nge pi walag! (Ps. 110:3) Machane rayog ni ngam mada’naged boch e magawon. Gimed be tuntun ni ngam yoornaged e tin gimed be rin’ ni fan ngak Jehovah ni bochan e dam nanged ko mang e ra buch romed boch nga m’on, fa? Bay ba ngiyal’ nde m’agan’med nga reb e maruwel ni bochan e der pagan’med ngomed, fa? Faanra bay, ma gathi yigoo gimed e kam lemgad ni aray rogon.

² Ki mada’nag Mark nge Timothy boch e magawon ni aray rogon. Yugu aram rogon ndar nangew e n’en nra buch rorow boch nga m’on ara de yoor ban’en ni yow manang, machane dar pagew e re n’ey ni nge talegrow ndab ra yoornagew e tin yow be rin’ ni fan ngak Jehovah. Mark e rayog ni be par ko chitiningin u reb e naun nib manigil u nap’an nni pining ni nge un ngak apostal Paul nge Barnabas ko yay nsom’on e milekag nra tew ni yow be machib. (Acts 12:12, 13, 25) Machane i chuw Mark u tafen ya nge yag ni yoornag e tin be rin’ ni fan ngak Jehovah. Som’on e yan i par nga Antiok. Ngemu’ me un ngak Paul nge Barnabas ko milekag nga boch e binaw nib palog. (Acts 13:1-5) Ku arrogon Timothy ndabisiy ni be par ko gallabthir rok u nap’an ni pining Paul ni nge un ngak ko fare maruwel ni machib. Bochan ni kab pagel Timothy ma boor ban’en ndawori nang, ma rayog ni nge taleg e re n’ey ndabi rin’ boch ban’en. (Mu taarebrogonnag e 1 Korinth 16:10, 11 nge 1 Timothy 4:12.) Yugu aram rogon, me m’agan’ ngay ni nge un ngak Paul ma boor e tow’ath ni yag ngak ni bochan e re n’ey.​—Acts 16:3-5.

3. (a) Uw feni ga’ fan Mark nge Timothy u wan’ Paul? (2 Timothy 4:6, 9, 11) (Kum guy e sasing.) (b) Mang boch e deer ni gad ra weliy e fulweg riy ko re article ney?

³ Boor ban’en nib ga’ fan ni fil Mark nge Timothy, mu kur nangew rogon ni ngar rin’ew boor e maruwel u lan e ulung u nap’an ni ka yow ba pagel. Rib ga’ fan e gal pagel ney u wan’ Paul ya boch nga tomuren me yog ni ngar bow ra guyew u nap’an ni nang ndab ki n’uw nap’an ma bayi yim’. (Mu beeg e 2 Timothy 4:6, 9, 11.) Mang boch e fel’ngin ni bay rok Mark nge Timothy ni aram fan nri yow ba t’uf rok Paul ma i pagan’ ngorow? Uw rogon nrayog ni nge folwok e pi walag ni ka yad ba pagel rorow? Ma uw rogon nrayog ni nge yib angin e fonow ni pi’ Paul ngak e pi walag ni ka yad ba pagel?

MU YOORNAG E TIN GA BE RIN’ NI FAN NGAK JEHOVAH NGE PI WALAG NI BOD MARK

4-5. Uw rogon ni dag Mark nib m’agan’ ngay ni nge yoornag e tin be rin’ ni fan ngak yugu boch e girdi’?

⁴ Ra ngan rin’ boch ban’en ni fan ngak yugu boch e girdi’ ma rayog ni nge yip’ fan ni ngan maruwel nib gel ni ngan ayuwegrad min ulul ni ngan rin’ e re n’ey ngki mada’ ko ngiyal’ nib mo’maw’. I dag Mark e kanawo’ nrayog ni ngan folwok riy u rogon ni ngan rin’ e re n’ey. Nap’an ni siyeg Paul ni nge fek nge un ngak ko yay ni l’agruw e milekag ni tay ni be machib, ma dabisiy ni kireban’ ko re n’ey. (Acts 15:37, 38) Machane de pag e re n’ey ni nge taleg ndab ki yoornag e tin be rin’ ni fan ngak pi walagen.

⁵ I un Mark ngak Barnabas ni be’ rok nga ranow ra machibgow u yugu boch e binaw. Sogonap’an 11 e duw nga tomuren, ma Mark bagayad e piin ur ayuweged Paul u nap’an e yay nsom’on e kalbus nni tay ngak u Roma. (Filem. 23, 24) Bin riyul’ riy e rib ga’ fan u wan’ Paul e ayuw ni i pi’ ngak, ya yog ni ‘ri ba ga’ e ayuw ni pi’ ngak’ ara ri i fal’eg laniyan’.​—Kol. 4:10, 11.

6. Mang angin ni yib ngak Mark ni bochan e i chag ngak boch e Kristiano ni kar ilalgad ko tirok Got ban’en? (Mu guy e footnote.)

⁶ Ba ga’ angin ni yib ngak Mark ni bochan e i chag ngak boch e Kristiano ni kar ilalgad ko tirok Got ban’en. Tomuren ni ke par rok Paul u Roma u lan ba ngiyal’, me yan i mada’nag apostal Peter nga Babylon. Bochan nri chugur e tha’ u thilrow Peter, ma aram mi i yog ni ir ‘fak.’ (1 Pet. 5:13) Nap’an ni ur maruwelgow Peter u taabang, ma dabisiy ni boor ban’en nib manigil u murung’agen Jesus nge machib ni i tay ni i weliy ko re fager rok ney, ma aram me boch nga tomuren me yoloy murung’agen nga lan e Gospel rok.a

7. Uw rogon ni folwok reb e walag ni kab pagel ni ka nog Seung-Woo ngak ko n’en ni rin’ Mark? (Kum guy e sasing.)

⁷ I par Mark nib pasig ko pigpig ni be tay me par nib chugur ngak e pi walag ni kar ilalgad ko tirok Got ban’en. Uw rogon nrayog ni ngam folwok rok? Faanra bay reb e tow’ath ni ga baadag ni ngan pi’ ngom ma dan pi’, mag gum’an’nagem mu kum gay boch e kanawo’ nrayog ni ngam pigpig riy ngak Jehovah mag ayuweg e ulung. Ireray e n’en ni buch rok Seung-Woo ni ma pigpig e chiney ni ir reb e piilal. Nap’an ni kab bitir boch, ma ma taarebrogonnag ir ngak yugu boch e walag ni ka yad ba pagel. Bay boch i yad nni pi’ boch e maruwel ngak ni nge rin’ u lan e ulung u m’on ni ngkun pi’ e pi maruwel nem ngak. I lemnag Seung-Woo ndanir lemnag me boch nga tomuren me weliy laniyan’ ngak boch e walag ni pumoon ni kar ilalgad ko tirok Got ban’en. Bay reb e piilal ni yog ngak ni nge yoornag e tin be rin’ ni fan ngak Jehovah nge pi walag ni mus ni faanra bay yu ngiyal’ ndanir guy e pi n’em. Re fonow ney e k’aring Seung-Woo ni nge tabab i ayuweg e piin pilibthir nge piin nib t’uf bang ni ngar bad riy ko muulung. Ra sul nge lemnag e re n’em, ma ma gaar: “Munmun mug nang e n’en nri be yip’ fan ni nggu yoornag e tin nug be rin’ ni fan ngak Jehovah nge pi walag. Ba gel e felfelan’ nug tay ni bochan e ug ayuweg yugu boch e girdi’ ko tin nib t’uf rorad.”

MU DAG NRIYUL’ NI GA BE LEMNAG E GIRDI’ NI BOD TIMOTHY

8. Mang fan ni mel’eg Paul Timothy ni ngar milekaggow u taabang? (Filippi 2:19-22)

⁸ Ba t’uf boch e walag ni pumoon ndarur rusgad ni ngar uned ngak Paul ko milekag u nap’an ni sul ko pi mach ni un togopuluw riy ngak. Som’on e mel’eg reb e Kristiano ni ke yoor e duw ni ke pigpig ngak Jehovah ni ka nog Silas ngak ni nge un ngak. (Acts 15:22, 40) Boch nga tomuren miki mel’eg Timothy ni nge un ngak. Mang fan ni baadag Paul ni nge un Timothy ngak? Reb riy e bochan nib fel’ thin. (Acts 16:1, 2) Ku ir be’ nri ma lemnag e girdi’.​—Mu beeg e Filippi 2:19-22.

9. Uw rogon ni dag Timothy nriyul’ ni ma lemnag pi walagen?

⁹ Ka nap’an ni tabab Timothy nge Paul ko pigpig u taabang, ma i dag ni ma m’oneg e girdi’ u wan’ mfini migid. Aram fan nrayog ni nge pag Paul nge par u Berea ni nge pi’ e athamgil nga laniyan’ e piin ka fin nra manged boch i gachalpen Jesus u rom. (Acts 17:13, 14) Nap’an e re ngiyal’ i n’em ma dariy e maruwar riy ni boor ban’en ni fil rok Silas ni ki par rok u rom u Berea. Machane boch nga tomuren me l’og Paul Timothy ni nge yan nga Thessalonika ni nge pi’ e athamgil ko pi Kristiano ni yad ma par ko re mach nem. (1 Thess. 3:2) U lan sogonap’an 15 e duw nga tomuren e re ngiyal’ i n’em, me fil Timothy rogon ni nga i “un ko meyor ngak e piin ni [ur yorgad]” ni aram e i dag ni manang rogon laniyan’ e piin yad be gafgow. (Rom. 12:15; 2 Tim. 1:4) Ere uw rogon nrayog ni nge folwok e pi Kristiano ni ka yad ba pagel rok Timothy?

10. Uw rogon ni fil reb e walag ni pumoon ni ka nog Woo Jae ngak rogon ni nga i dag ni be lemnag e girdi’?

¹⁰ Bay reb e walag ni pumoon ni ka nog Woo Jae ngak ni fil rogon ni nga i dag ni be lemnag e girdi’. Nap’an ni kab bitir boch, mab mo’maw’ ngak ni ngaur sabethingad e pi walag ni yad ba ilal ngak. Ere nap’an ni yira yib nga Tagil’ e Liyor ma kemus ni ma fingichiyrad ngemu’ me chuw. I yog reb e piilal ngak ni nga i yan i non ngak e pi walag ni aram e nga i yog ngorad e n’en baadag u rarogorad. Ki yog ngak ni nge lemnag ban’en nrayog ni baadag facha’ ni ngan weliy murung’agen. Ere fol Woo Jae ko n’en ni yog fare piilal ngak. Chiney ni ke mang reb e piilal e ma yog ni gaar: “Chiney e ke mom ngog ni ngaug sabethingad e girdi’ nib thilthil yangarrad. Kug felfelan’ ni ke yoor boch ban’en ni kug nang u rarogon yugu boch e girdi’ e chiney. Re n’ey e ma ayuwegeg u nap’an nra t’uf ni nggu ayuweg pi walageg ko tin nib t’uf rorad.”

11. Uw rogon nrayog ni nge nang e pi walag ni ka yad ba pagel rogon ni ngaur daged ngak yugu boch e girdi’ u lan e ulung ni yad be lemnagrad? (Kum guy e sasing.)

¹¹ Ku arrogomed e pi walag ni ki gimed ba pagel nrayog ni ngaum daged ngak yugu boch e girdi’ ni gimed be lemnagrad. Nap’an ni yira yib ko muulung, mag guy rogon ni ngam non ngak e piin nib thilthil yangarrad nge rarogon e gin kar bad riy. Mu fith salperad, ngemu’ mag motoyil ngorad. Ra munmun ma sana ga ra nang rogon ni ngam ayuwegrad. Sana ga ra nang ni bay ba wu’ e mabgol ni kar pilibthirgow nib t’uf e ayuw rorow u rogon ni ngar fanayew fare JW Library^® app. Fa reb e rayog ni kam nang ndariy be’ ni ka rogned ni nga ranod ko machib u taabang. Rayog ni ngam ayuweg e pi walag ney u rogon ni ngar fanayed e phone ara tablet rorad ara mmarod ko machib u taabang, fa? Ra um ayuweg yugu boch e girdi’, ma aram e ga be dag e kanawo’ nib manigil nrayog ni ngan folwok riy.

RAYOG NI NGE YIB ANGIN NGOM E FONOW NI PI’ PAUL

12. Uw rogon nrayog ni nge yib angin ko pi walag ni ka yad ba pagel e fonow ni pi’ Paul ngak Timothy?

¹² I pi’ Paul boch e fonow ngak Timothy ni nge ayuweg ni nge fel’ rogon e par rok nge machib ni be tay. (1 Tim. 1:18; 2 Tim. 4:5) Ku arrogomed e pi walag ni ki gimed ba pagel nrayog ni nge yib angin ngomed e fonow ni pi’ Paul. Ni uw rogon? Mu beeged fa gal yang i babyor ni yoloy Paul ngak Timothy ni gowa gimed e kan yoloy ni fan ngomed, mi gimed guy boch e fonow riy nrayog ni ngam folgad riy. Ngad weliyed in ko pi fonow nem.

13. Mang e ra ayuwegem ni ngam yul’yul’ ngak Jehovah?

¹³ “Um par ma ga be muruwliy ni ngi i par pangim nib m’agan’ Got ngay.” (1 Tim. 4:7b) Be yog Paul ngak Timothy ni nge yul’yul’ ngak Jehovah me felfelan’nag. Machane ba t’uf ni ngad maruwelgad nib gel ya nge yag nda yul’yul’gad ngak Jehovah me t’uf rodad. Ni uw rogon? Nap’an ni gaar Paul “um par ma ga be muruwliy,” me fanay bbugithin ni be tamilangnag rarogon be’ ni girdien e gosgos nib t’uf ni nge maruwel nib gel ya nge yag ni fal’eg rogon ni fan ngab mit e gosgos. Pi cha’ ney ni girdien e gosgos e ba t’uf ni ngar mechameged ngorad ni ngaur rin’ed boch ban’en nra ayuwegrad ni ngar gelgad ko fare miti gosgos. Ere ku arrogodad nib t’uf ni ngad mechameged ngodad ni ngaud rin’ed boch ban’en nra chugurnagdad ngak Jehovah.

14. Mang e susun ni ngad nameged u nap’an ni gad be beeg e Bible? Mu weliy reb e kanawo’.

¹⁴ Nap’an ni ga be mechameg ngom ni ngaum beeg e Bible, ma dab mu pagtalin e n’en ga be nameg ni aram e ngam chugur ngak Jehovah. Bod ni, mang e rayog ni ngam fil u rogon ni non Jesus ngak fare moon ni boor ban’en rok? (Mark 10:17-22) Ba mich u wan’ fare moon ni Jesus e ir fare Messiah, machane de gaman e michan’ rok ni nge k’aring ni nge mang reb i gachalpen. Yugu aram rogon ma kab t’uf rok Jesus. Gathi be yib e athamgil nga lanin’um ni bochan rogon ni non Jesus ko re moon ney? Ba tamilang ni baadag Jesus ni nge dugliy fare moon e n’en nib fel’ ni nge rin’. N’en ni rin’ Jesus e ku be m’ug riy rogon e t’ufeg rok Jehovah ngak e re moon nem. (John 14:9) Nap’an ni ga be lemnag murung’agen e re n’ey nge rarogom, mag fithem ni nge lungum, ‘Mang e ba t’uf ni nggu rin’ ya nge yag nug chugur ngak Jehovah mug yoornag e tin gu be rin’ ni fan ngak yugu boch e girdi’?’

15. Mang fan nsusun e nge tiyan’ reb e walag ni kab pagel nga rogon e ngongol ni be dag? Mu tamilangnag. (1 Timothy 4:12, 13)

¹⁵ “Ngam dag ngak e piin nib mich Kristus u wun’rad rogon e ngongol nib m’agan’ Got ngay.” (Mu beeg e 1 Timothy 4:12, 13.) Gathi kemus ni yog Paul ngak Timothy ni nge maruweliy boch e salap ni bod rogon e beeg babyor nge rogon ni nge fil ban’en ko girdi’, ya ki yog ngak ni nge maruweliy boch e fel’ngin ni bod e t’ufeg, nge michan’, ma nga i guy rogon ni nge par nib machalbog. Mang fan? Ya kab ga’ fan e ngongol ko thin ni yima yog. Susun e ka nog ngom ni ngam pi’ reb e welthin ni murung’agen rogon ni ngad pasiggad ko machib. Ba mudugil nra mom ngom ni ngam weliy murung’agen e re n’ey ni faanra ga be pi’ e tin th’abi fel’ rom ni fan ko machib. Ra adag e piin yad be motoyil ngom ni ngar folgad ko n’en ga be yog ni faanra yad be guy ni aram e n’en ga ma rin’.​—1 Tim. 3:13.

16. (a) Mang lal e kanawo’ nrayog ni ngan folwok ko pi walag ni ka yad ba pagel riy? (b) Uw rogon nrayog ni nge dag reb e walag ni kab pagel e kanawo’ nrayog ni ngan folwok riy ‘u rogon e thin ni ma yog’?

¹⁶ Lal e kanawo’ ni weliy Paul nrayog ni ngan folwok rok reb e walag ni kab pagel riy nrogon ni kan weliy ko 1 Timothy 4:12. Ere mang ndab mu tay ba ngiyal’ u nap’an e fol Bible ni ga ma tay ni yigoo gur ni ngam fil murung’agen e pi n’ey nreb nge reb. Bod nsusun e ga baadag ni ngam dag e kanawo’ nrayog ni ngan folwok riy “u rogon e thin ni ga ma yog.” Ere rayog ni ngam lemnag boch e kanawo’ nrayog ni nga mog boch ban’en riy nra pi’ e athamgil nga laniyan’ e girdi’. Faanra ka ga ma par ko gallabthir rom, ma gur, rayog ni ngaum pining e magar ngorow ko tin yow be rin’ ni fan ngom, fa? Tomuren e muulung, ma gur, rayog ni nga mog ngak be’ e n’en ga baadag ko welthin ni ke pi’, fa? Ku rayog ni ngam guy rogon ni ngam pi’ e fulweg u nap’an e muulung nrogon ni ke yib u gum’irchaem. Rogon e athamgil ni ga ma tay ni ngam dag e kanawo’ nrayog ni ngan folwok riy u rogon e thin ni ga ma yog e ra m’ug riy ni ga be mon’og ko tirok Got ban’en.​—1 Tim. 4:15.

17. Mang e ra ayuweg reb e walag ni kab pagel ni nge rin’ e pi n’en be nameg ni fan ko tirok Got ban’en? (2 Timothy 2:22)

¹⁷ “Mu tiyem u urel ko tin ni ma ar’arnag e piin ni pagel, ma ga nameg e tin nib mat’aw.” (Mu beeg e 2 Timothy 2:22.) I yog Paul ngak Timothy ni nge cham ko pi ar’ar rok nrayog ni nge taleg ndab ki nameg boch ban’en ni fan ko tirok Got ban’en me kirebnag e tha’ u thilrow Jehovah. Sana ku rayog ni ngam guy ni bay boch ban’en ni yima rin’ ni yugu aram rogon nde kireb, machane rayog ni nge lichnag e tayim rom ko tin gad be nameg ni fan ko tirok Got ban’en. Am lemnag urngin e tayim ni ga ma fanay ni fan ko pi gosgos ni ga ma un ngay, ara yan ni ga ma tay ko Internet, ara pi video game ni ga ma fafel ngay. Rayog ni ngam tay boch e pi tayim nem ni fan ko pi n’en yima rin’ ni fan ko tirok Got ban’en, fa? Sana rayog ni ngam un i pi’ e ayuw ni ngan ngongliy e yungin ke kireb ko Tagil’ e Liyor ara mu un ko machib ni yibe fanay e cart. Faan ga ra un nga boch e maruwel ni aray rogon, ma dabisiy nra yag boch e fager ngom nib beech ni yad ra ayuwegem ni ngam nameg boch ban’en ni fan ko tirok Got ban’en mu kum rin’ e pi n’em.

GA RA YOORNAG E TIN GA BE RIN’ NI FAN NGAK JEHOVAH NGE PI WALAG MA YIRA TOW’ATHNAGEM

18. Mang fan nrayog ni nga dogned nib gel e felfelan’ ni i tay Mark nge Timothy?

¹⁸ Boor ban’en ni pag fan Mark nge Timothy ya nge yag nra yoornagew e tin yow be rin’ ni fan ngak Jehovah nge pi walag, mab gel e felfelan’ nra tew ni bochan e re n’ey. (Acts 20:35) I milekag Mark nga boch e binaw nib palog ya nge yag ni yoornag e tin be rin’ ni fan ngak pi walagen. Ki yoloy murung’agen e n’en ni rin’ Jesus nge machib ni i tay. Timothy e i ayuweg Paul ni ngar sunmiyew boch e ulung mar piew e athamgil nga laniyan’ e pi walag. Ba tamilang nib felfelan’ Jehovah ngak Mark nge Timothy ni bochan e ur pagew farow u boch ban’en.

19. Mang fan nsusun e nge tiyan’ e pi walag ni ka yad ba pagel ko fonow ni pi’ Paul ngak Timothy, ma mang angin nra yib riy?

¹⁹ Rayog ni ngan guy gelngin e t’ufeg rok Paul ngak Timothy u lan fa gal yang i babyor ni yoloy ngak e re fager rok ney. Ku be m’ug ko gal yang i babyor ney ni gimed e pi walag ni ki gimed ba pagel e ri gimed ba t’uf rok Jehovah. Baadag ni ngam felfelan’gad ko pigpig ni gimed be tay ngak. Ere mu folgad ko fonow ni pi’ Paul mi gimed guy rogon ni ngam adaged ni ngam yoornaged e tin gimed be rin’ ni fan ngak Jehovah nge pi walag. Faan gimed ra rin’ e re n’ey, ma aram e gimed ra par ni gimed ba felfelan’ e chiney me ‘yog ngomed e yafos ni ir e bin riyul’ e yafos’ boch nga m’on.​—1 Tim. 6:18, 19.