Babyor ni Ke Yib ko Fare Ulung ni Ma Pow’iyey

Ngak e Pi Walag:

“Gubin ngiyal’ ma gamad ma pining e magar ngak Got ni bochmed ni gimed gubin, ma gubin ngiyal’ ni gamad ma unegmed ko meybil romad. Ya der m’ay u wun’mad u p’eowchen e Got rodad ni ir e Chitamangidad u rogon ni kam maruwelgad ko michan’ romed, nge rogon ni ke ngongliymed rogon nib t’uf Got romed nge girdi’ kam maruwelgad nrib gel, nge rogon ni kari l’agan’med ngak e Somol rodad i Jesus Kristus.” (1 Thess. 1:2, 3) Pi thin ney e ri be tamilangnag rogon lanin’mad ko pi n’en ni gimed be rin’! Gamad be pining e magar ngak Jehovah ni bochmed nge bochan e maruwel nrib fel’ ni gimed be rin’. Mang fan e re n’ey?

U lan fare duw ni ke yan ma boor e ‘maruwel’ ni kam ngongliyed u fithik’ e yul’yul’ ni fan ko Gil’ilungun Got ni be dag nib “t’uf” Got nge girdi’ romed. Boor i gimed e ke gay boch e kanawo’ u rogon ni nge yoornag e tayim rok ni fan ko machib. Bay boch e pi walag ni ka ranod nga boch e nam nib t’uf e ayuw riy ko machib. Maku bay boch e walag ni kur gayed rogon ni ngar machibgad u fithik’ e girdi’ ni yoor. Boor e pi walag ni kar athamgilgad ni ngar uned ko pioneer ni ayuw u nap’an ni ke chugur ko Puguran ngu tomuren, nge nap’an ni ke yib e en ni ma lekag e ulung, ara ngiyal’ ni kan tay fare special compaign ko pul ni August ko duw ni 2014. Yugu aram rogon nib thilthil rarogomed, machane gamad be guy ni gimed be pigpig ngak Jehovah u polo’ i gum’ircha’med, ma aram fan ni gamad be pining e magar ngomed. (Kol. 3:23, 24) Ere, bay rogon ni nggu pininged e magar ngak Jehovah ni bochan e ‘maruwel’ ni kam rin’ed u fithik’ e yul’yul’!

Ka gamad be pining e magar ngomed ni bochan e be m’ug rogon nib “t’uf” Got romed ya kam pied e ayuw ko dimow Kingdom Hall nge ku boch e naun ni gad ma fanay ni fan ko liyor rodad ngak Jehovah. Bochan e be yoor e girdi’ rok Jehovah i yan me rib t’uf ni nge yag e pi naun ney ni ngaun muulung riy. (Isa. 60:22) Fare duw ni baaray ni ke yan mab gaman 8,201,545 e pi walag ni kar uned ko machib, ma 9,499,933 urngin e girdi’ ni kan fil e Bible ngorad u gubin e pul. Bochan ni ke yoor e girdi’ ko ulung rok Jehovah ma aram fan nib t’uf ni ngan ga’nag e pi branch ofis ma kub t’uf ni ngan thilyeg boch ban’en riy. Ere, re n’ey e be yip’ fan ni kub t’uf ni ngkun toy boch e Kingdom Hall! Maku boor e binaw ni kub t’uf e pi translation ofis riy, ya nge mom rok e piin ni yad ma piliyeg e pi babyor rodad ni ngar pared mar maruwelgad ko yungi binaw ni taareb e thin rorad.

Ere, rayog ni ngad fithed gadad ni nge lungudad, ‘Mang boch ban’en nrayog ni nggu rin’ ni nggu pi’ e ayuw ko pi maruwel ney?’ Sana bay boch i gadad nrayog ni ngad pied e ayuw ko dimow Kingdom Hall. Ra bay ban’en ni gadad manang u murung’agen e dimow naun fa dariy, ma rayog ni ngad pied e tin ni bay rodad ara tayim rodad ni fan ko pi maruwel ney. (Prov. 3:9, 10) Nap’an ni yibe toy fare tabernacle mab gel e felfelan’ ni tay piyu Israel ma kur pied boch ban’en ko re maruwel nem, ma bochan e re n’ey ma ngan pi’ e thin nge yan ni be yog ndakuriy ban’en ni ngkun pi’ ya ke gaman. (Ex. 36:5-7) Ere, dariy e maruwar riy ni pi n’en ni buch ko girdi’ rok Jehovah kakrom e be pi’ e athamgil nga lanin’dad. Bochan nib “t’uf” Got romed ma be m’ug u daken e pi maruwel ney ni gimed be pi’ e ayuw riy, maku ireray fan ni nggu pininged e magar ngak Jehovah!

Bay fan ni nggu felfelan’gad ni bochan ni gamad be guy e pi walagmad ni yad be athamgil u fithik’ e gafgow. Ni bod ni gad ra lemnag e pi n’en ni be buch rok e pi walagdad u South Korea. Nap’an e duw ni 1950, ma boor i yad ni ka nin’rad nga kalbus ni bochan e dubrad ni ngar uned nga ngongolen e am, ma ra bagayad ma n’umngin nap’an ni nge par u rom. Kab kakrom i yib ni yugu aram rogon nib gel e gafgow ni un tay ngorad, machane kar pared ni yad ba mudugil. Bochan ni kar athamgilgad, ma re n’ey e ke gelnag e michan’ rodad!

Bay dalip e pi walagdad nu Eritrea ni kan kalbusnagrad ni ke pag 20 e duw. Maku bay e piin nib pin nge bitir ni kun kalbusnagrad nib ngoch nap’an. Boor ban’en ni yibe rin’ ya nge yag ni ngan ayuweg e pi walag ney ni ngan pagrad u kalbus, machane dawori buch e re n’ey. Yugu aram rogon ma kar pared nib gel e michan’ rorad. Ma yugu demtrug e gafgow ni yad be tay ma yad be par ni yad ba yul’yul’. Ere, dab ud paged talin ni ngaud yibilayed e pi walag rodad ney ni yad be athamgil ni ngar pared ni yad ba yul’yul’.​—Rom. 1:8, 9.

Yooren i gimed e dawor non’ nga kalbus ni bochan e michan’ rok. Machane, ku boor e magawon ni bay ni bod ni ga be pilibthir i yan, ara ga be m’ar, ara ku bay e en mabgol rom ni gathi ir reb e tapigpig rok Jehovah ara girdien e tabinaw rom ni yad be togopuluw ngom, ara ku boch e magawon ni yigoo gur e ga manang murung’agen. Ma yugu aram rogon ma ga be ulul ni ngam pigpig ngak Jehovah ni gab yul’yul’! (Jas. 1:12) Gamad be pining e magar ngomed ko pi n’ey ni gimed be rin’. Bochan ni gimed be athamgil u fithik’ e yul’yul’, maku ireray reb i fan ni nggu pininged e magar ngak Jehovah.

Arrogon, bochan ni gimed ba yul’yul’ ko pi maruwel ni gimed be rin’ maku bochan ni gimed be athamgil u fithik’ e pi magawon romed, ma ireray boch i fan ni nggu pininged e magar “ngak Somol, ni bochan e ba manigil.” (Ps. 106:1, BT) Ri gimed ba t’uf romad, ma gamad be meybil ngak Jehovah ni nge pi’ gelngimed miki tow’athnagmed ya nge yag nim pigpiggad ngak ndariy n’umngin nap’an.

Pi walagmed,

Fare Ulung ni Ma Pow’iyey ko Pi Mich Rok Jehovah