Fare Biyul e Ba “Tow’ath” ni Ke Yib Rok e Chitamangidad u Tharmiy

1. Mang boch e tow’ath nra yag ko girdi’ ni bochan fare biyul?

BOOR e tow’ath nra yag ngodad ni bochan fare biyul nib maligach ni pi’ Jesus Kristus. Ireram e n’en ni ke bing e kanawo’ ngak pi fak Adam nib t’uf e tin nib mat’aw rorad ni ngar manged bang ko tabinaw rok Got boch nga m’on. Re biyul nem e ku aram e n’en ni ke pi’ e athap ngodad ni nge yag e yafos ni manemus ngodad boch nga m’on u fithik’ e felfelan’. Machane, fare biyul ni pi’ Kristus e gathi kemus nra tow’athnag e piin ni yad ra fol boch nga m’on. Ya bay boch ban’en nib ga’ fan ni ke buch ni bay rogon ko piin ni yad bay u tharmiy ngu fayleng ni ke yag ni nge tamilang ni bochan e ke m’agan’ Jesus ngay ni nge yim’ ni fan ngodad miki par nib yul’yul’ ngak Jehovah.​—Heb. 1:8, 9.

2. (a) Mang boch ban’en nrib ga’ fan ni ke tamilang ko fare meybil rok Jesus? (Mu guy e sasing ni bay u tabolngin e re article ney.) (b) Mang e gad ra weliy ko re article ney?

² Sogonap’an l’agruw e duw u m’on ni nge yim’ Jesus miki pi’ fare biyul nib maligach, ma aram me fil ngak pi gachalpen ni ngaur meybilgad ni nge lungurad: “Chitamangimad ni ga bay u tharmiy: Ngan tay fan fithingam nib thothup, ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matt. 6:9, 10) Ere, chiney e ngad weliyed rogon nib peth fare biyul nga rogon ni yira tayfan fithingan Got nib thothup, nge gagiyeg nra tay Gil’ilungun, nge rogon nra lebug e n’en nib m’agan’ ngay ya nge yag ni ngari ga’ fan fare biyul u wan’dad.

“NGAN TAY FAN FITHINGAM NIB THOTHUP”

3. Mang e be dag e ngachal rok Jehovah u rarogon? Uw rogon ni yog Satan boch ban’en nde riyul’ u murung’agen e re ngachal nem?

³ N’en nth’abi som’on ni yog Jesus ko fare kenggin e meybil rok e aram e ngan tayfan fithingan Got nib thothup. Fithingan Jehovah e be dag rarogon nrib tolang, ma ir e bay rogon ni ngan pining e sorok ngak, mab thothup. Ku immoy bayay u nap’an ni be meybil Jesus ngak Jehovah me yog ni ir e ‘Chitamangin nib thothup.’ (John 17:11) Ere, bochan nib thothup Jehovah, ma aram fan ni urngin e pi kenggin e motochiyel nge motochiyel ni ke yib rok e ba thothup. Yugu aram rogon, me guy Satan rogon ni nge m’ug ndariy mat’awun Got ni nge dugliy e motochiyel ni nge fol e girdi’ riy u nap’an ni ban u lan fare milay’ nu Eden. Ere, nap’an ni yog Satan boch ban’en nde riyul’ u murung’agen Jehovah, ma aram e ngiyal’ ni yog boch ban’en nde riyul’ u murung’agen e ngachal rok nib thothup.​—Gen. 3:1-5.

4. Uw rogon ni tay Jesus fan e ngachal rok Got?

⁴ Machane, Jesus e rib ga’ fan e ngachal rok Jehovah u wan’. (John 17:25, 26) Maku reb e, i tayfan fithingan Got nib thothup. (Mu beeg e Psalm 40:8-10.) Bochan e yul’yul’ ni tay u nap’an ni immoy u fayleng ma aram me micheg nib puluw ma kub mat’aw ni nge ngongliy Jehovah boch e motochiyel ni nge fol e girdi’ riy. Mus nga nap’an ni gagiyegnag Satan ni nge yim’ Jesus nrib gel e gafgow ko yam’ ni tay, machane ki par nib yul’yul’ ngak e Chitamangin ni bay u tharmiy. Ere, bochan e yul’yul’ ni tay Jesus ma aram me micheg nrayog rok be’ nib flont ni nge par nib yul’yul’ ko pi motochiyel rok Got nib mat’aw.

5. Uw rogon nrayog ni ngad uned i tayfan fithingan Got nib thothup?

⁵ Uw rogon nrayog ni ngad daged nib ga’ fan e ngachal rok Jehovah u wan’dad? Thingari m’ug ko ngongol rodad. Baadag Jehovah ni ngad pared ni gad ba thothup. (Mu beeg e 1 Peter 1:15, 16.) Re n’ey e be yip’ fan ni kemus ni yigoo ir e ngaud liyorgad ngak ma gad be fol rok u polo’ i gum’ircha’dad. Mus nga nap’an ni yira gafgownagdad, ma gad ma athamgil ni ngad ngongolgad u rogon nib puluw ko pi kenggin e motochiyel nge motochiyel rok. Maku reb e, ngongol nib fel’ ni gad ma rin’ e aram ramaedad ni be gal u p’eowchen e girdi’ ma yibe pining e sorok riy nga fithingan Jehovah. (Matt. 5:14-16) Bochan ni gad boch e girdi’ ni gad ba thothup, ma gad ma micheg u rogon ni gad ma par nib fel’ e pi motochiyel rok Jehovah ma de riyul’ e pi n’en ni ke yog Satan. Ma nap’an ni gad ra oloboch, ni ka ban’en ni ma buch, ma aram mad kalgadngan’dad ma gad digey e ngongol ni ud rin’ed ni be darifannag Jehovah.​—Ps. 79:9.

6. Mang fan nrayog ni ngad mat’awgad u p’eowchen Jehovah ni yugu aram rogon ndawor da flontgad?

⁶ Bochan fare biyul ni maligach ni pi’ Kristus, ma aram fan ni ma n’ag Jehovah fan e denen rok e piin ni yad ma dag nriyul’ ni bay e michan’ rorad. Ku ma fek e piin ni kar ognaged yad ngak ni ngar manged boch e tapigpig rok. Pi Kristiano ni kan dugliyrad e ke mat’awnagrad Jehovah ngak ni kar manged pi fak, ma piin ni yad ba muun nga “yugu boch e saf” e ke mat’awnagrad ngak ni kar manged e pi fager rok. (John 10:16; Rom. 5:1, 2; Jas. 2:21-25) Ere, mus ko ngiyal’ ney nrayog ni ngad mat’awgad u p’eowchen e Chitamangidad ma gad un i tayfan fithingan nib thothup u daken fare biyul.

“MA GA PAR NI GUR E GA BE GAGIYEGNAGMAD”

7. Mang boch e tow’ath nra yag ngodad u tan Gil’ilungun Got ni bochan fare biyul ni kan pi’?

⁷ Tin migid e thin ni yog Jesus u lan fare kenggin e meybil ni fil ngak pi gachalpen e be gaar: “Ma ga par ni gur e ga be gagiyegnagmad.” Uw rogon nib peth fare biyul nga Gil’ilungun Got? Bochan fare biyul ma aram e rayog ni ngan mel’eg 144,000 e girdi’ ni ngar uned ngak Kristus ko gagiyeg u tharmiy ni yad boch e pilung nge prist. (Rev. 14:1; 20:4) Ra taw ko ngiyal’ nem ma aram e ra yibnag Jesus nge piin ni yad ra gagiyeg u Gil’ilungun Got angin fare biyul ko girdi’ nu fayleng u lan bbiyu’ e duw. Yira ngongliy e re fayleng ney nge mang paradis, ma piin ni yad ba yul’yul’ e yad ra sul ngkur flontgad bayay, me par e tabinaw rok Got u tharmiy ngu fayleng nib taareb. (Rev. 5:13; 20:6) Ra bilbilig Jesus lolugen fare porchoyog me chuweg wenegan e togopuluw ni ke tay Satan u ga’ngin e palpalth’ib.​—Gen. 3:15.

8. (a) Uw rogon ni ayuweg Jesus pi gachalpen ni ngar nanged feni ga’ fan Gil’ilungun Got? (b) Uw rogon ni gad ma dag ni gad ba muun nga Gil’ilungun Got e ngiyal’ ney?

⁸ Nap’an ni immoy Jesus u fayleng, ma aram me ayuweg pi gachalpen ni ngar nanged feni ga’ fan Gil’ilungun Got. Ere, nap’an ni yigi un ko taufe, ma aram me tabab i machibnag “fare Thin Nib Fel’ ni murung’agen e gagiyeg rok Got” u gubin yang. (Luke 4:43) Ma u m’on ni nge sul nga tharmiy, ma aram me yog ngak pi gachalpen ni ngar weliyed murung’agen “nge yan i mada’ ko yungi n’en ni yan i mus e fayleng ngay.” (Acts 1:6-8) Ere, bochan fare maruwel ni yibe machibnag murung’agen Gil’ilungun Got ma aram fan nrayog rok urngin e girdi’ u ga’ngin yang e fayleng ni ngar nanged murung’agen fare biyul mar manged boch e piin ni yad ra par u tan Gil’ilungun Got. Ngiyal’ ney e gad ma dag ni gad ba muun nga Gil’ilungun Got ni aram e gad ma ayuweg pi walagen Kristus ni ka yad bay u roy u fayleng ko fare maruwel ni ngan machibnag murung’agen Gil’ilungun Got u ga’ngin yang e fayleng.​—Matt. 24:14; 25:40.

“MIN RIN’ E TIN NIB M’AGAN’UM NGAY”

9. Mang fan nrayog ni nge pagan’dad nra lebguy Jehovah e n’en nib m’agan’ ngay ni fan ko girdi’?

⁹ Mang e be yip’ Jesus fan ko tin migid e thin ni yog ni gaar: “Min rin’ e tin nib m’agan’um ngay”? Jehovah e ir e En ni Ke Sunmiy urngin ban’en. Nap’an nra yog ni nge buch ban’en, ma ra buch ni bod rogon ni ke yog. (Isa. 55:11) Dabi pag e togopuluw ni tay Satan ni nge taleg ndabi lebguy e n’en nib m’agan’ ngay ni fan ko girdi’. Ka aram ko tabolngin nib m’agan’ ngay ni nge suguy pi fak Adam nge Efa ni yad ba flont e re fayleng ney. (Gen. 1:28) Ere, faan gomanga yim’ Adam nge Efa ndar fakayew e bitir, ma aram e dabi lebug e n’en nib m’agan’ Got ngay ni aram e nge sug pi fakrow u ga’ngin yang e fayleng. Aram fan nu tomuren nra denengow me pagrow Jehovah ni ngar fakayew e bitir. Fare biyul e aram e n’en nra bing e kanawo’ ngak urngin e piin ni yad ra dag nriyul’ ni bay e michan’ rorad ni ngar flontgad me yag e yafos ndariy n’umngin nap’an ngorad. Ba t’uf e girdi’ rok Jehovah, ma kub m’agan’ ngay ni nge par e piin ni yad ba yul’yul’ ngak nrogon nib m’agan’ ngay aram ko tabolngin.

10. Uw rogon nra yib angin fare biyul ngak e piin ni kar m’ad?

¹⁰ Ere, uw rogon bokum bilyon e girdi’ ni kar m’ad ndawor ra filed murung’agen Jehovah mar pigpiggad ngak? Bochan fare biyul ma aram fan ni bay e athap rorad ni ku yira fasegrad bayay. Ra fasegrad e Chitamangidad ni bay u tharmiy me pagrad ni ngar filed murung’agen e n’en nib m’agan’ ngay me yag e yafos ndariy n’umngin nap’an ngorad. (Acts 24:15) De m’agan’ Jehovah ngay ni nga i yim’ e girdi’. Bochan ni Ir enggin gubin e yafos, ma aram fan nra mang Chitamangin urngin e piin ni yira fasegrad ko yam’. (Ps. 36:9) Ere, aram fan nib puluw fare meybil ni ke fil Jesus ngodad ni gaar: “Chitamangimad ni ga bay u tharmiy.” (Matt. 6:9) Ke pi’ Jehovah e maruwel ngak Jesus ni aram e nge faseg e piin ni kar m’ad. (John 6:40, 44) Ere, nap’an ni gad ra yan nga Paradis, ma aram e ra rin’ Jesus e maruwel ni kan pi’ ngak ni nge mang e en ni ir “owchen e fos ko yam’ nge yafos.”​—John 11:25.

11. Mang e ba m’agan’ Got ngay ni fan ko fapi girdi’ ni yad ba “pire’ ni pire’”?

¹¹ Gathi kemus nri in e girdi’ e ra pi’ Jehovah e pi tow’ath ney ngorad, ya yog Jesus ni gaar: “En nra rin’ e tin nib m’agan’ Got ngay e ir e walageg ni pumoon, ma walageg ni ppin, ma chitinag.” (Mark 3:35) Ba m’agan’ Got ngay ni nge yib e girdi’ nib “pire’ ni pire’” u urngin e nam, nge ganong, nge thin ni ngar manged boch e tapigpig rok. Piin ni yad ra maruweliy e michan’ rorad ko fare biyul ni pi’ Kristus mar rin’ed e n’en nib m’agan’ Got ngay e rayog ni ngar manged boch e piin ni yad ra tolul ni lungurad: “Kanawoen ma gamad thap ngak Got e yib rok e Got romad ni ir e ke par nga tagil’, ma ki yib rok fare Fak e Saf!”​—Rev. 7:9, 10.

12. Uw rogon ni ke gagiyel e n’en nib m’agan’ Jehovah ngay ni fan ko girdi’ u daken fare kenggin e meybil ni fil Jesus ngak pi gachalpen?

¹² Ke gagiyel e n’en nib m’agan’ Jehovah ngay ni fan ngak e piin ni yad ba yul’yul’ ko n’en ni bay ko fare kenggin e meybil ni fil Jesus ngak pi gachalpen. Ere, gad baadag ni ngad athamgilgad u rogon nrayog rodad ni ngad ted fan fithingan Jehovah nib thothup nrogon nib puluw ko re meybil nem. (Isa. 8:13) Fan e ngachal rok Jesus e “Jehovah e Ir e Ma Thapegey,” ma rogon nra yag e yafos ngodad u daken fare biyul e ra pining e sorok nga fithingan Jehovah. Ku ra fanay Jehovah Gil’ilungun ni nge yibnag angin fare biyul ngak e piin ni yad ra fol rok. Arrogon, fare kenggin e meybil e be micheg ngodad ndariy ban’en nrayog ni nge taleg Got ndabi rin’ e n’en nib m’agan’ ngay.​—Ps. 135:6; Isa. 46:9, 10.

MU DAG NIB GA’ FAN FARE BIYUL U WAN’UM

13. Nap’an ni gad ra un ko taufe, ma mang e be dag?

¹³ Reb e kanawo’ nrayog ni ngad daged nib ga’ fan fare biyul u wan’dad e aram e ngad ognaged e yafos rodad ngak Jehovah ma gad un ko taufe. Taufe ni gad ma un ngay e ma dag ni ke ‘mil fadad’ ngak Jehovah. (Rom. 14:8) Maku reb e, be yip’ fan ni kad weniggad ngak Got ni nge ayuwegdad ni nge fel’ e nangan’ rodad u p’eowchen. (1 Pet. 3:21) Ma rogon nra dag Jehovah ni ke m’agan’ ko n’en ni gad be ning ngak e aram e ra yibnag angin fare biyul ni pi’ Kristus ngodad. Ere, ba pagan’dad nra pi’ urngin ban’en ni ke micheg nra pi’ ngodad.​—Rom. 8:32.

14. Mang fan ni kan tay chilen ngodad ni ngad t’ufeged e piin ni yad ba migid ngodad?

¹⁴ Ku mang reb e kanawo’ nrayog ni nge m’ug nriyul’ nib ga’ fan fare biyul u wan’dad? Pi n’en ni ma rin’ Jehovah e gubin ni ma rin’ ni bochan e t’ufeg rok. Ere, aram fan nib m’agan’ ngay ni urngin e pi tapigpig rok e ngaur daged e t’ufeg ni gubin ngiyal’. (1 John 4:8-11) Gad ma micheg ni gad baadag ni ngad manged ‘pi fak e Chitamangidad ni bay u tharmiy’ ni aram e gad ma t’ufeg e piin ni yad ba migid ngodad. (Matt. 5:43-48) Fare motochiyel ni be yog ni ngad t’ufeged e en nib migid ngodad e aram e re motochiyel nib migid ko fare motochiyel ni be yog ni nge t’uf Jehovah rodad. (Matt. 22:37-40) Ere, reb e kanawo’ ni gad ma dag e re t’ufeg ney riy ngak e piin ni yad ba migid ngodad e aram e gad ma fol ko n’en ni kan tay chilen ngodad ni aram e ngad machibnaged fare thin nib fel’ ni murung’agen Gil’ilungun Got. Ere, faanra ud t’ufeged e girdi’ ma aram e be m’ug rarogon Got rodad. Bin riyul’ riy e, nap’an ni gad ra fol ko fare motochiyel ni be yog ni ngaud t’ufeged yugu boch e girdi’, ma aram e ra ilal e t’ufeg rodad ngak Got nge “yan i aw nga rogon ni kari fel’.”​—1 John 4:12, 20.

RA PI’ JEHOVAH ‘NGODAD E NGIYAL’ NI NGE YIB GELNGIDAD’ U DAKEN FARE BIYUL

15. (a) Mang boch e tow’ath ni be pi’ Jehovah ngodad e ngiyal’ ney? (b) Mang boch e tow’ath nra yag ngodad boch nga m’on?

¹⁵ Nap’an ni gad ra maruweliy e michan’ rodad ko fare biyul ma aram e ke mab e kanawo’ ngodad ni ngan n’ag fan urngin e denen rodad. Ke micheg e Thin rok Got ngodad nrayog ni ngan “chuweg” e denen rodad. (Mu beeg e Acts 3:19-21.) Kad weliyed faram ni ke pof Jehovah e pi tapigpig rok ni kan dugliyrad ni ngar manged pi fak u daken fare biyul. (Rom. 8:15-17) Ma piin ni yad ba muun nga “yugu boch e saf” e ke piningrad ni ngar manged girdien e tabinaw rok u fayleng. Machane, tomuren ni kar flontgad ma aram e yira pi’ e bin tomur e skeng ngorad, ma faan yad ra par ni yad ba yul’yul’ ngak Jehovah, ma aram e ra pofrad ni ngkur manged boch pi fak. (Rom. 8:20, 21; Rev. 20:7-9) Gubin ngiyal’ nra i t’ufeg Jehovah pi fak. Ma ra par angin fare biyul ndariy n’umngin nap’an. (Heb. 9:12) Dariy e ngiyal’ nra m’ay angin e re tow’ath ney, maku dariy be’ nrayog rok ni nge chuweg rodad.

16. Uw rogon ni ke ayuwegdad fare biyul ni ngad chuwgad u tan gelngin boch ban’en ni ud manged sib riy kafram?

¹⁶ Dabiyog rok Moonyan’ ni nge taleg e piin ni kar kalgadngan’rad ni nge dab ra manged bang ko tabinaw rok Jehovah. I yib Jesus nga fayleng me yim’ nri “taab yay ma aram e ke mus.” Ere, ke math puluwon fare biyul. (Heb. 9:24-26) Aram e n’en ni ke yag ni nge chuwegdad u tan wenegan e denen ni ke af rok Adam ngodad. Ere, ri gad ba felfelan’ ya bochan fare biyul ni pi’ Kristus ma aram e ke yag ni ngad chuwgad u tan gelngin e re fayleng ney ni be gagiyegnag Satan ma dakurud rusgad ni ngad m’ad.​—Heb. 2:14, 15.

17. Uw rogon u wan’um e t’ufeg ni ke dag Jehovah ngodad?

¹⁷ Rayog ni nge pagan’dad ko pi n’en ni ke micheg Got. Gad manang ndabi thil e pi n’en ni ke micheg Jehovah ngodad ni bod rogon e pi motochiyel ni ke ngongliy ni ma gagiyegnag e pi n’en ni ke sunmiy ni gad manang ndabi thil. Jehovah e dabi thil. (Mal. 3:6) Machane, gathi kemus ni yigoo yafos rodad e aram e n’en ni ke pi’ ngodad, ya ku ma t’ufegdad. “Gadad manang ma mmich u wun’dad ni gadad ba t’uf rok Got. I Got e t’ufeg.” (1 John 4:16) Gad manang nra paradis e re fayleng ney ni ga’ngin, ma gubin e piin ni yad ra par riy e ra m’ug e t’ufeg rok Got rorad. Ere, manga yugu da uned ngak e pi engel rok Got u tharmiy ni yad ba yul’yul’ ngak nge lungudad: “Sorok, nge gilbuguwan, nge gonop, nge magar ni ngan pining, nge ta’ fan, nge gelngiy nib th’abi gel, nge gagiyeg e ir e bay i par rok e Got rodad ndariy n’umngin nap’an! Amen!”​—Rev. 7:12.