Mang e Ra Chuw u Nap’an Nra Yib Gil’ilungun Got?

1, 2. (a) Uw rogon nrayog ni ngan taareb rogonnag e re m’ag ney ngak be’ nib moon nib kireb ni kan dugliy ni ngan li’ nge yim’? (Mu guy e sasing ni bay u tabolngin e re article ney.) (b) Mang e ra rin’ urngin e piin ni yad bay u tharmiy ngu fayleng u tomuren ni yira thang e re m’ag nib kireb ney?

MU SUSUNNAG be’ nib moon nib kireb ni kan kalbusnag. Ma ke yib e pi matanagen e kalbus ni ngar feked i yan ko gin ni ngan li’ riy nge yim’. Nap’an ni yad be yan i yan ko gi n’em, ma be tolul fapi matanag u fiti keru’ fare moon ni be lungurad, “Baaray ba yam’ ni be yan!” Mang fan ni be yog e pi matanag e re thin ney? Yugu aram rogon nib fel’fel’ rogon fare moon nde bod be’ nib m’ar ni be n’en ni nge yim’, machane bochan ni ir be’ nib kireb ma aram fan ni kan dugliy ni ngan li’ nge yim’. Ere, aram fan nrayog ni nga nog ni fare moon e bod rogon be’ ni ke yim’.a

² Re m’ag ney e taareb rogon ngak be’ nib moon ni kan dugliy ni ngan li’ nge yim’. Ke kakrom ni kan dugliy e gechig ko re fayleng nib kireb ney, ma dab ki n’uw nap’an ma bay ni thang. Be gaar e Bible: “Re fayleng ney . . . e bayi m’ay.” (1 John 2:17) Ba mudugil ni yira thang e re m’ag nib kireb ney. Machane, bay ban’en nib thil u rogon ni yira thang e re fayleng ney nge rogon ni yira li’ fare kalbus nge yim’. Nap’an nra taw ko ngiyal’ ni ngan li’ fare kalbus nge yim’, ma rayog ni nge yib boch e girdi’ ko gi n’em ni ngar togopuluwgad ni bochan e yad be lemnag nde mat’aw rogon e pufthin ni kan tay ko fare moon, ara yad be athapeg ni manga yugu dabin li’ nge yim’. Machane, re fayleng ney e ke mu’ e En Th’abi Tolang u ga’ngin e palpalth’ib i dugliy nib fel’ rogon e n’en nra buch riy. (Deut. 32:4) Ra taw ko rofen ni ke dugliy ni nge thang e re m’ag ney ma ra rin’, maku dariy be’ nra maruwar u wan’ ko ba mat’aw rogon e n’en ni ke dugliy Got ni nge rin’ fa danga’. Ma tomuren nra thang e re m’ag ney, ma urngin e piin ni yad bay u tharmiy ngu fayleng e ra m’agan’rad ngay nib mat’aw mab puluw e n’en ni ke rin’ Got. Fin aram e ngiyal’ ni yira pogofan!

3. Mang aningeg ban’en ni gad ra weliy murung’agen nra chuw u nap’an nra yib Gil’ilungun Got?

³ Machane, mang e ba muun ko re “fayleng” ney ni “bayi m’ay”? Ba muun ngay e pi n’en ni ma lemnag e girdi’ e ngiyal’ ney ni ke mang bang ko par rodad. Gubin e pi n’ey ni goo ra chuw. Ere gur, nge kireban’dad ko re n’ey? Danga’! Ya bin riyul’ riy e, ireray reb e ban’en nib ga’ fan nib muun ko fare ‘Thin Nib Fel’ ni murung’agen e gagiyeg rok Got.’ (Matt. 24:14) Ere, chiney e ngad weliyed murung’agen aningeg ban’en nra chuw u nap’an nra yib Gil’ilungun Got. Re aningeg i n’em e aram e: girdi’ nib kireb, boch e ulung nib sasalap, ngongol nib kireb, nge rarogon e par rodad ni kari kireb. Nap’an ni gad be weliy reb nge reb e pi n’ey, ma gad ra weliy (1) rogon ni be magawonnagdad e ngiyal’ ney, (2) n’en nra rin’ Jehovah ngay, nge (3) boch ban’en nib fel’ nra tay nga lon e pi n’ey.

GIRDI’ NIB KIREB

4. Uw rogon ni be magawonnagdad e girdi’ nib kireb e ngiyal’ ney?

⁴ Uw rogon ni be magawonnagdad e girdi’ nib kireb e ngiyal’ ney? Tomuren ni yog apostal Paul nra taw ko ngiyal’ ney ma ra “mo’maw’” e par, ma aram min thagthagnag nga laniyan’ ni nge yoloy ni gaar: “Girdi’ nib kireb nge piin ni yad be dake girdien Kristus e bayi gel farad kireb.” (2 Tim. 3:1-5, 13) Kam guy e pi thin ney ni ke riyul’, fa? Boor i gadad e be gafgow u pa’ e piin ni yad ma gafgownag yugu boch e girdi’, nge piin ni yad ma sap nga but’ ngak e piin nib thil ramaen dowrad ara nam rorad, nge girdi’ ni kireb ni yad ma rin’ boch e ngongol nib kireb nib togopuluw ko motochiyel. Boch e pi girdi’ ney e darur mithaged e kireb ni yad ma rin’; machane boch i yad e ma guy rogon ni nge mithag e ngongol nib kireb ni be rin’. Bayi n’en mu ur dake yad be ayuweg e girdi’, machane bin riyul’ riy e yad ba kireb. Mus ni faanra dawori gafgownagdad e pi girdi’ ney, machane ku ma magawonnagdad e kireb ni yad ma rin’. Ri gad ma fanenikan e pi kireb ni gad ma rung’ag ni yad ma rin’. Kub ga’ ni gad ma rus u nap’an ni gad ra rung’ag rogon e gafgow ni yad be tay ko bitir, nge pilibthir, nge boch e girdi’ ndabiyog ni ngar ayuweged yad u pa’ e pi girdi’ ney. Pi girdi’ ney e ke taareb rogon e ngongol rorad ko gamanman ni maloboch ara pi moonyan’. (Jas. 3:15) Machane, gad ba felfelan’ ni bochan e be yog e Thin rok Jehovah ni bay e athap rodad.

5. (a) Mang e ka rayog ni nge rin’ e piin ni yad ba kireb? (b) Mang e ra buch rok e piin ndubrad ni ngar thilyeged e ngongol rorad boch nga m’on?

⁵ Mang e ra rin’ Jehovah ngay? Chiney e ka be pi’ Jehovah e tayim ko piin ni yad ba kireb ni ngar thilyeged e ngongol rorad. (Isa. 55:7) Pi girdi’ ney e dawor ni tay e bin tomur e pufthin ngorad. Re m’ag ney e aram e n’en ni kan dugliy ni ngan thang. Machane, uw rogon e tin baaray e girdi’ ndab ra thilyeged e ngongol rorad, ma ka yad be ulul i rin’ boch ban’en ni fan ko re m’ag ney nge mada’ ko ngiyal’ ni ke yib fare gafgow nib ga’? Ke micheg Jehovah nra thang e piin ni yad ba kireb. (Mu beeg e Psalm 37:10.) Rayog ni nge lemnag e piin kireb nrayog ni ngar thaygad ko gechig rok Got. Ma boor e girdi’ ni kar filed rogon ni ngar mithaged e ngongol nib kireb ni yad ma rin’, ma yooren e ngiyal’ e danir gechignagrad ko kireb ni yad be rin’. (Job 21:7, 9) Yugu aram rogon, ma be puguran e Bible ngodad ni be gaar: “Ma yaliy urngin e gachgech ko girdi’. Dariy ba lumor nrayog ni mithag ba tadenen rok Got.” (Job 34:21, 22, BT) Dariy be’ nrayog ni nge mith rok Jehovah Got. Rayog ni nge guy urngin ban’en ni ma rin’ e piin ni yad ba kireb. Ere, tomuren e Armageddon e dab kun pirieg e piin ni yad ba kireb, ya kan thangrad ni manemus!​—Ps. 37:12-15.

6. Mini’ e piin nra magey u tomuren ni kan thang e piin ni yad ba kireb, ma mang fan ni ireray e thin nib fel’?

⁶ Mini’ e piin nra magey u tomuren ni kan thang e piin ni yad ba kireb? Ke micheg Jehovah ni gaar: “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.” Re tang ney e ku bay fapi thin riy ni be gaar: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Ps. 37:11, 29) Mini’ e piin ni yad “mmunguy” nge piin ni yad “mmat’aw”? Piin ni yad mmunguy e aram e piin ni yad ba sobut’an’, mab m’agan’rad ngay ni ngar motoyilgad ko thin rok Jehovah mar paged ni nge pow’iyrad; ma piin ni yad mmat’aw e aram e piin ni yad baadag ni ngar rin’ed e tin nib mat’aw u p’eowchen Jehovah Got. Ngiyal’ ney e ke yoor e piin ni yad ba kireb ko piin ni yad ba mat’aw. Machane, nap’an ni gad ra yan nga lan e bin nib beech e m’ag, ma kemus ni yigoo piin ni yad ba mmunguy nge piin ni yad mmat’aw e yad ra par u paradis u fayleng!

BOCH E ULUNG NIB SASALAP

7. Uw rogon ni be magawonnagdad boch e ulung e ngiyal’ ney nib sasalap?

⁷ Uw rogon ni be magawonnagdad boch e ulung e ngiyal’ ney nib sasalap? Yooren e kireb ni be buch u fayleng e ngiyal’ ney e gathi girdi’ e be k’aring, ya pi ulung ni ke sunmiy e girdi’. Am lemnag e pi yurba’ i teliw ni bay e ngiyal’ ney ni yad be bannag bokum milyon e girdi’. Bod ni, yad ma fil ko girdi’ boch ban’en nde riyul’ u murung’agen Got, ma yad ma yog ngorad ndabiyog ni nge pagan’uy ko Bible, maku yad ma machibnag boch ban’en nde puluw u murung’agen e n’en nra buch ko fayleng nge girdi’ riy boch nga m’on, nge ku boch e machib ni googsur. Ma uw rogon e pi am ni yad be k’aring e mahl nge cham nga thilin e girdi’ ko pi nam i yan, ma yad be gafgownag e piin gafgow nge piin ndabiyog ni ngar ayuweged yad ko gafgow ni yibe tay ngorad, ma yad ma laniyan’, maku yad ma fek e salpiy ni ke pi’ e girdi’ ni puluwon e sasalap? Ma uw rogon boch e ulung ni ke sunmiy e girdi’ ni yad be rin’ boch ban’en ni be alitnag e nam, nge nifeng, ma be kirebnag boch ban’en u fayleng, maku yad be rin’ boch ban’en nde mat’aw ko girdi’ ya nge yag ni fel’ rogorad riy? Bochan e n’en ni yad be rin’ ma aram fan nri in e girdi’ e ba fel’ rogorad ma yooren e girdi’ e yad ba gafgow. Ere, ba tamilang ni pi ulung nib sasalap ni ke sunmiy e girdi’ e aram e piin ni yad be k’aring yooren e gafgow u roy u fayleng e ngiyal’ ney.

8. Mang e be yog e Bible nra buch ko pi ulung e ngiyal’ ney ni ma lemnag e girdi’ ni be par nib mudugil ndariy ban’en nra buch riy?

⁸ Mang e ra rin’ Jehovah ngay? Nap’an nra chel e pi am u fayleng ngar togopuluwgad ko pi yurba’ i teliw ni googsur, ni ke taareb rogonnag e Bible ngak fare pin ni ma pi’ ir ni chuway’ ni yima yog fare Babylon nib Gilbuguwan ngak, ma aram e ngiyal’ nra tabab fare gafgow nib ga’. (Rev. 17:1, 2, 16; 18:1-4) Gubin e pi yurba’ i teliw ni googsur e goo yira thang nge chuw. Machane, uw rogon e tin ni ka bay e ulung u roy u fayleng ni yad ba sasalap? Be weliy e Bible murung’agen e pi burey nge nam nib liyeg e day ni nge yip’ fan e pi ulung ni bay e ngiyal’ ney ni ma lemnag e girdi’ ni be par nib mudugil ndariy ban’en nra buch riy. (Mu beeg e Revelation 6:14.) Ke yiiynag e Thin rok Got u m’on riy ni pi am nge pi ulung ni ma taga’ ko pi am e goo yira chuweg u tagil’. Ma ra mus fare gafgow nib ga’ u nap’an ni yira thang urngin e pi am ko re fayleng nib kireb ney nge urngin e piin ni yad ma togopuluw nga Gil’ilungun Got. (Jer. 25:31-33) Tomuren e re ngiyal’ i n’em, ma aram e ra chuw urngin e pi ulung nib sasalap!

9. Mang fan nrayog ni nge pagan’dad nra par gubin ban’en u lan e bin nib beech e fayleng nib yaram?

⁹ Mang e ra yan nga lon e pi ulung nib sasalap ni bay e ngiyal’ ney? Bay reb e ulung nra magey u roy u fayleng u tomuren e Armageddon, fa? Be gaar e Bible: “Bay sum e bin nib beech e lan e lang nge bin nib beech e fayleng, ni aram e tin nib mat’aw e ngongol e bay i par riy, ni ereray e pi n’en ni gadad be sonnag.” (2 Pet. 3:13) Ere, be yog e Bible nra chuw e bin kakrom e lan e lang ni aram e be yip’ fan e pi am nib sasalap ni be gagiyeg e ngiyal’ ney nge bin kakrom e fayleng ni be yip’ fan e girdi’ ni kar paged yad be mang am e ir e be gagiyegnagrad. Ere, mang e ra yan nga lon e gali n’ey? Aram e “bin nib beech e lan e lang nge bin nib beech e fayleng.” Bin nib beech e lan e lang e be yip’ fan e bin nib beech e am ara Gil’ilungun Got ni Jesus Kristus nge fare 144,000 e yad ra gagiyegnag. Ma bin nib beech e fayleng e be yip’ fan e piin e yad ra par u tan Gil’ilungun Got. Ere, nap’an nra tabab Gil’ilungun Got ko gagiyeg u fayleng u tan pa’ Jesus Kristus, ma aram e ra m’ug rarogon Jehovah Got riy ni ir reb e Got nib yaram. (1 Kor. 14:33) Ere, gubin ban’en u lan e “bin nib beech e fayleng” nra par nib yaram. Ku bay boch e pumoon ni yad ba manigil e ngiyal’ nem ni yad ra yarmiy rogon boch e maruwel ni ngan rin’. (Ps. 45:16) Pi pumoon nem e ra pow’iyrad Kristus nge fare 144,000. Am lemnag e re ngiyal’ i n’em u nap’an nra chuw gubin e pi ulung nib sasalap me par reb e ulung nga lon ndariy e sasalap riy, ma gubin e girdi’ riy nib taareban’rad!

NGONGOL NIB KIREB

10. Mang boch e ngongol nib kireb ni ke garer ko gin ni ga ma par riy? Uw rogon ni be magawonnagem e pi ngongol ney nge chon e tabinaw rom?

10 Uw rogon ni be magawonnagdad e pi ngongol nib kireb ni yibe rin’ e ngiyal’ ney? Gad be par u lan ba fayleng ni ke sug ko ngongol nib kireb. Boor e girdi’ u toobdad ni yad ma un ko ngongol ndarngal, ma darur yul’yul’gad, ma yad ba ta cham. Ba ga’ ni piin gallabthir e be mo’maw’ rogon ngorad ni ngar ayuweged pi fakrad ko pi ngongol nib kireb ney. Bin riyul’ riy e, piin ni yad ma ngongliy e pi n’en ni yima yaliy ara yima motoyil ngay ni nge chuweg e chalban e ba ga’ ni yad be ngongliy boch ban’en ni ngan chuweg e chalban ngay nib sug e ngongol nib kireb riy mab togopuluw ko pi motochiyel rok Jehovah u murung’agen e tin nib fel’ nge tin nib kireb. (Isa. 5:20) Ere, thingari gay e piin Kristiano rogon ni ngar siyeged e pi n’ey. Ba t’uf ni ngar gayed rogon ni ngar ayuweged e tha’ u thilrad Jehovah ni yugu aram rogon ni yad be par u lan ba fayleng nder ma tay e girdi’ riy fan e pi motochiyel rok Jehovah.

11. Mang e gad be fil u rogon e pufthin ni tay Jehovah ngak yu Sodom nge Gomorrah?

11 Mang e ra rin’ Jehovah ko ngongol nib kireb? Am lemnag e n’en ni rin’ ko ngongol nib kireb ni un rin’ u Sodom ngu Gomorrah kakrom. (Mu beeg e 2 Peter 2:6-8.) Lot ni ir be’ nib mat’aw e rib gel e gafgow ni ur ted chon e tabinaw rok ni bochan e ngongol nib kireb ni be rin’ e girdi’ u toobrad. Ere, nap’an ni gothey Jehovah e gal mach nem, ma gathi kemus ni ke ayuweg ni nge tal e ngongol nib kireb ni un rin’ u rom, ya ku be dag ngak e “piin ni kireb e n’en nra rin’ ngorad ni faanra ur pired nib kireb e ngongol rorad.” Ra boch nga m’on u nap’an nra pufthinnag Jehovah e re m’ag nib kireb ney, ma aram e ra chuweg e kireb ni yibe rin’ e ngiyal’ ney ni bod rogon ni chuweg e kireb ni un rin’ u Sodom nge Gomorrah kakrom.

12. Mang boch e maruwel ni ga be athapeg ni ngam un i rin’ u tomuren nra chuw e re m’ag nib kireb ney?

12 Mang e ra yan nga lon e ngongol nib kireb ni yibe rin’ e ngiyal’ ney? Boor ban’en ni yira rin’ u Paradis u fayleng boch nga m’on ni yira felfelan’ ngay. Am lemnag e maruwel ni gad ra tay e ngiyal’ nem ni aram e ngad fal’eged e re fayleng ney nge mang paradis, ma gad toy boch e naun ni ngad pared riy nge piin ni yad ba t’uf rodad. Kum lemnag e n’en ni gad ra rin’ e ngiyal’ nem ni aram e ngad guyed bokum milyon e girdi’ ni kan fasegrad ko yam’ ma gad fil murung’agen Jehovah ngorad nge urngin e pi n’en ni ke rin’ ni fan ko girdi’. (Isa. 65:21, 22; Acts 24:15) Boor e maruwel ni gad ra rin’ e ngiyal’ nem nra yibnag e felfelan’ ngodad min pining e sorok riy ngak Jehovah!

RAROGON E PAR NI KARI KIREB

13. Mang wenegan e togopuluw nni tay u Eden kakrom?

13 Uw rogon ni be magawonnagdad rarogon e par e ngiyal’ ney ni kari kireb? Bochan e girdi’ nib kireb, nge pi ulung nib sasalap, nge ngongol nib kireb, ma aram fan ni kari kireb e par ko girdi’ u roy u fayleng. Mini’ rodad e rayog ni nge yog nder magawonnag e mahl ni yibe tay e ngiyal’ ney, nge girdi’ nib gafgow e par rorad, nge laniyan’ ni yibe tay ko girdi’ nib thil raen dowrad ara nam rorad? Ma uw rogon e m’ar nge yam’? Gad gubin ni be magawonnagdad e pi n’ey. Gubin e pi n’ey ni be buch ni bochan e togopuluw ni tay Satan, nge Adam, nge Efa ngak Jehovah. Ma gad gubin e ngiyal’ ney ni gad be par u fithik’ wenegan e togopuluw ni kar ted.

14. Mang e ra rin’ Jehovah nga rarogon e par rodad ni kari kireb? Mu weliy murung’agen reb e ban’en nra chuweg.

14 Mang e ra rin’ Jehovah nga rarogon e par rodad ni kari kireb? Am lemnag e mahl ni yibe tay. Ke micheg Jehovah nra taleg e mahl ni manemus. (Mu beeg e Psalm 46:8, 9.) Ma uw rogon e m’ar? Ra chuweg e m’ar. (Isa. 33:24) Ma uw rogon e yam’? Ra kirebnag gelngin e yam’ ni manemus! (Isa. 25:8) Ra taleg e gafgow ni be tay e girdi’. (Ps. 72:12-16) Ku arrogon boch ban’en ni be buch e ngiyal’ ney ni be mo’maw’nag rogon e par rodad ni goo ra chuweg ni gubin. Ku ra chuweg fare “lem” ni ir e be gagiyegnag e girdi’ ko re m’ag ney, ni bochan e ra chuweg Satan nge pi’ moonyan’ rok.​—Efe. 2:2, NW.

15. Mang boch ban’en nra chuw ndariy n’umngin nap’an u tomuren e Armageddon?

¹⁵ Rayog ni ngam susunnag rogon e par u lan reb e fayleng ndanir mahl riy, ma dakuriy e m’ar nge yam’, fa? Aygum lemnag, ya ra taw ko ngiyal’ nem ma dakuriy e salthaw, ara pi talin e cham, ara yungi n’en ni kan ngongliy ni bay fithingan e piin ni kar m’ad riy u nap’an e mahl! Ra taw ko ngiyal’ nem ma dakuriy e aspital, nge togta, nge kangof, nge tafen e yam’, nge teliw ko yam’! Ra tal e kireb ni yibe rin’ nib togopuluw ko motochiyel! Ere, dab ki t’uf e polis, ara alarm ara boch ban’en ni matanagen e naun, ara lok ara kiy! Gubin e pi n’ey ni ma k’aring e magafan’ ko girdi’ e goo ra chuw ndariy n’umngin nap’an!

16, 17. (a) Ra uw rogon e lem rok e piin ni yad ra magey ni yad ba fos u tomuren e Armageddon? Mu susunnag. (b) Mang e ngad rin’ed ya nge yag nda mageygad ni gad ba fos u tomuren ni yira thang e re m’ag nib kireb ney?

16 Ra uw rogon e par ko girdi’ u tomuren nra chuw urngin ban’en ni be kirebnag e par ko girdi’? Ba mo’maw’ rogon ni nge taw e lem rodad ngay. Ke n’uw nap’an ni kad pared ko re fayleng nib kireb ney, ere rayog ni gathi ri ka gad be lemnag gelngin e mochuch ni ma k’aring e pi ngongol nib kireb ney ngodad. Re n’ey e rayog ni ngan taareb rogonnag ngak be’ ni bay e naun rok u tooben e kanawo’ ni boor e karrow ni ma yan riy. Ra munmun me mecham nga lingan e karrow ni ma yib i yan u tooben ni gubin ngiyal’. Ku bod rogon be’ ni ma par u tooben bangi ban’en ni yima yon’ e dow ngay. Ra munmun ma dab ki farabon fapi dow, ya ke mecham ngay. Machane, ri gad ra pogofan u tomuren nra chuweg Jehovah urngin ban’en ni be kirebnag e par rodad e ngiyal’ ney!

¹⁷ Mang e ra yan nga lon e pi n’en ni be k’aring e mochuch ngodad e ngiyal’ ney? Be gaar e Psalm 37:11: “Bay . . . ur pired u fithik’ e gapas ni yad ba felfelan’.” Gathi be k’aring e pi thin ney e felfelan’ ngom? Aram e n’en ni baadag Jehovah ni fan ngom. Ere, mu athamgil u rogon nrayog rom ngam par ni gab chugur ngak Jehovah Got nge ulung rok e ngiyal’ ney ko tin tomuren e rran ni kari mo’maw’ e par! Athap rom boch nga m’on e ban’en nrib ga’ fan. Ere, um par ma ga be lemnag, mag guy rogon ni nga i par nib riyul’ u wan’um, mag weliy murung’agen ko tin ni ka bay e girdi’! (1 Tim. 4:15, 16; 1 Pet. 3:15) Faan ga ra rin’ ni aray rogon, ma aram e rayog ni ngam magey ni gab fos u tomuren ni yira thang e re m’ag nib kireb ney, mag par u fithik’ e felfelan’ ndariy n’umngin nap’an!