“Kab Gel Fanag T’uf Rom Nga Rogon nib T’uf e Pi N’ey Rom,” Fa?

1, 2. Mang reb e ban’en ni fil Peter u tomuren ni ke fita’ nib polo’ reb e nep’?

BA POLO’ reb e nep’ ni par medlip i gachalpen Jesus u lan e Lipath nu Galile ni yad be fita’, machane dariy ban’en nra koled. Ma aram me yib i sak’iy Jesus nga dap’e ran nga i yaliyrad ni yad be fita’, ma aram me gaar ngorad: “‘Mon’ed e nug romed nga maran u ba’ ni mat’aw ko bowoch, mi gimed kol e nig.’ Ma aram mi yad yin’ e nug rorad nga maran, ma dakiyog ni ngar girngiyed nga lan e bowoch, ya ke sugnag e nig.”​—John 21:1-6.

² Tomuren ni ngongliy Jesus rogon e ggan nge pi’ ngorad ni ngar ked, ma aram me gaar ngak Simon Peter: “Simon, ni fak John gur, kab gel fanag t’uf rom nga rogon ni gub t’uf rok e pi cha’ ney [“nga rogon nib t’uf e pi n’ey rom,” NW]?” Mang e be yip’ Jesus fan? Manang Jesus nri baadag Peter e fita’. Ere, rayog ni be fith Jesus ngak Peter ko mang e n’en nth’abi ga’ fan u wan’. Gur, kab ga’ fan fapi nig u wan’ nge fita’ ni ma tay nga rogon feni ga’ fan Jesus u wan’ nge pi n’en ni ke fil ngorad, fa? Machane, i fulweg Peter ni gaar: “Er rogon, Somol, ga manang ni gab t’uf rog.” (John 21:15) Arrogon, ka nap’an e re ngiyal’ i n’em i yib nga tomuren, ma aram mi i ngongol Peter nib puluw ko n’en ni yog ngak Jesus. I dag nib t’uf Kristus rok ni aram e i fanay e tayim rok ni fan ko fare maruwel ni machib, me yan i par ni ir be’ u lan e ulung ni Kristiano ko bin som’on e chibog nib gel e michan’ rok.

3. Mang boch ban’en nib t’uf ni nge kol ayuw e piin Kristiano riy?

³ Mang e rayog ni ngad filed ko fapi thin ni yog Jesus ngak Peter? Ba t’uf ni ngad kol ayuwgad ndab da paged e t’ufeg rodad ngak Kristus ni nge war, ma gad pag boch ban’en ni nge magawonnag e pi n’en ni gad be rin’ ni fan nga Gil’ilungun Got. Manang Jesus e pi n’en ni ma k’aring e magafan’ ngodad ko re m’ag ney. U lan fare fanathin ni weliy ni murung’agen facha’ ni wereg e awoch nga daken e milay’ rok, me yog ni bay boch e girdi’ ni yad ra motoyil ko fare “thin rok Got ni murung’agen e gagiyeg rok” mar mon’oggad ko tirok Got ban’en ko som’on, machane me yib “e magafan’ rorad ko re par rodad ney u fayleng nge chogowen e fel’ rogon” i “thang fapi thin rok Got u lanin’rad.” (Matt. 13:19-22; Mark 4:19) Ere, faanra dab da kol ayuwgad, ma rayog ni nge m’on u wan’dad e pi n’en ni gad ma rin’ u reb e rran ngu reb me k’aringdad ni ngad malmalgad ko tirok Got ban’en. Aram fan ni ginang Jesus pi gachalpen ni gaar: “Mu ayuwgad, ma dab mpaged gimed nguum pired ni ba ga’ ni mur ni ke pag rogon nge muun rrum e gimed be muruwliy, nge pi n’en ni ma magafan’uy ngay ko biney e tamilang.”​—Luke 21:34.

4. Mang e ra ayuwegdad ni ngad nanged gelngin feni t’uf Kristus rodad? (Mu guy e sasing ni bay u tabolngin e re article ney.)

⁴ Rayog ni ngad daged gelngin feni t’uf Kristus rodad ni aram e ngad ted fare maruwel ni ke pi’ ngodad ni ngad rin’ed ni aram e n’en nib m’on u wan’dad, ni bod rogon e n’en ni rin’ Peter u nap’an ni non Jesus ngak u tomuren ni ka fini fos ko yam’. Uw rogon ni ngad daged ni ka gad be ulul i rin’ e re n’ey? Ba t’uf ni ngad fithed gadad ni nge lungudad: ‘Mang e n’en nth’abi t’uf rog? Gur, tirok Got ban’en ni gu ma rin’ e aram e n’en ni ma k’aring e felfelan’ ngog fa yugu boch ban’en ni gu ma rin’ nde ga’ fan e aram e pi n’en ni ma k’aring e felfelan’ ngog?’ Ere, chiney e ngad weliyed dalip ban’en ni gad ma rin’ ni faanra dab da kol ayuwgad riy, ma rayog ni nge k’aringdad ni nge war e t’ufeg rodad ngak Kristus nge tirok Got ban’en. Pi n’ey e aram e maruwel ni yima un ngay ni nge yag e salpiy riy, nge boch ban’en ni yima rin’ ni ngan felfelan’ ngay, nge chugum.

DAB MU PAG E MARUWEL NI GA MA UN NGAY NI NGE M’ON U WAN’UM ME TOMUR E TIROK GOT BAN’EN

5. Mang e be yog e Bible nib milfan ngak e piin lolugen e tabinaw?

⁵ Gathi kemus ni ma fita’ Peter ni bochan e aram ban’en ni baadag ni ma rin’, ya aram e re maruwel ni ma un ngay ni nge yognag e tin nib t’uf ko tabinaw rok. Piin lolugen e tabinaw e ngiyal’ ney e yad manang ni be yog e Bible ni yad e ba milfan ngorad ni ngar pied e tin nib t’uf ko girdi’ u lan e tabinaw rorad ni fan ko par rorad. (1 Tim. 5:8) Ere, thingar ra maruwelgad nib gel ya nge yag nra rin’ed e re n’ey. Machane, ngiyal’ ney ko tin tomuren e rran e ba gel e magafan’ ni yima tay ni bochan e maruwel ni yima un ngay ni nge yag e salpiy riy.

6. Mang boch ban’en ni ma k’aring e mochuch ko girdi’ u tabon e maruwel?

⁶ Chiney ni ke mo’maw’ e maruwel e boor e girdi’ ni yad be guy rogon ni nge yag e maruwel ngorad. Bochan e re n’ey, ma aram fan ni boor i girdien e maruwel e yad ma lemnag nthingar ra maruwelgad u lan boor e awa, machane ba ga’ nrib achig puluwrad. Maku reb e, bochan ni ma guy e pi siyobay rogon ni ngar fanayed buchuuw i girdien e maruwel ni ngar ngongliyed boor mit e chugum ni ngan pi’ ni chuway’, ma aram fan ni boor i girdien e maruwel e yad be mochuch nib gel, ma ke aw parowrad, ma kub gel e m’ar ni yad be tay ni bochan e re n’ey. Piin nder m’agan’rad ngay ni ngar rin’ed e pi maruwel ney ni bod rogon ni ke yog e piin nib ga’ ko maruwel e ba mom ni ngan talegrad ko maruwel rorad.

7, 8. (a) Mini’ e en nthingar da pared ni gad ba yul’yul’ ngak ni gubin ngiyal’? (b) Mang reb e ban’en nib ga’ fan ni fil reb e walag ni pumoon ni ma par u Thailand u murung’agen e maruwel rok?

⁷ Gadad e piin Kristiano e gad manang ni Jehovah Got e ir e thingar da pared ni gad ba yul’yul’ ngak ni gubin ngiyal’, ma gathi en ni gad ma maruwel rok. (Luke 10:27) Gad ma un ko maruwel ni bochan e nge yag nda yognaged e tin nib t’uf ko par rodad me yag ni ngkud ululgad ko machib. Machane, faanra dab da kol ayuwgad, ma maruwel ni gad ma un ngay e rayog ni nge magawonnag e liyor ni gad ma tay. Immoy reb e walag ni pumoon u Thailand ni yog ni gaar: “Gu baadag e maruwel rog ni gu ma ngongliy e computer ni ke kireb, machane thingar gu maruwel u lan boor e awa. Bochan e maruwel ni ug un ngay, ma aram mi ri lich e tayim rog ni fan ko tirok Got ban’en. Ere, yan i tomur riy mug nang ni faanra nge par nib m’on Gil’ilungun Got u wan’ug, ma aram e ba t’uf ni nggu thilyeg e maruwel rog.” Ere, mang e rin’ e re walag ney?

⁸ I yog ni gaar, “Reb e duw nug fal’eg i lemnag ko ba miti mang maruwel e nggu rin’. Ere, gu dugliy ni nggu ngongliy bochi kantin u tooben e kanawo’ ni ngaug pi’ e ice cream riy ni chuway’. Som’on e ug magawon ko salpiy ma aram me mulan’ug. Maku nap’an ni gamad ra mada’ e piin ni ug maruwelgad u taabang kafram, mab ga’ ni yad ma minmin ngog ma yad be fitheg ko mang fan ni gu be lemnag ni kab fel’ e biney e maruwel ni gu be rin’ ni aram e gu be pi’ e ice cream ni chuway’ ko bin ni nggu maruwel u bang nib air-con ni gu be ngongliy e computer. Ere, ug meybil ngak Jehovah ni nge ayuwegeg ni nggu athamgil mug rin’ e n’en ni gu be nameg ni aram e nggu yoornag e tayim rog ni fan ko tirok Got ban’en. De n’uw nap’an nga tomuren, ma aram me yag ni nggu mon’og ko maruwel rog. Gu nang e re miti ice cream ni baadag e girdi’ ni ngaur chuw’iyed mu kug salap i ngongliy e ice cream. De n’uw nap’an nga tomuren, ma aram me yag ni nga i sell gubin e ice cream rog nge m’ay u gubin e rran. Bin riyul’ riy e, boor e salpiy ni i yag ngog ko binem e maruwel ni ug rin’ nga urngin puluwog u nap’an ni ug maruwel ni gu be ngongliy e computer. Ba gel e felfelan’ ni kug tay ni bochan e dakugur mochuch nib gel, ma dakir magafan’ug ni bod rogon kafram u nap’an ni kug ma maruwel. Ma bin th’abi ga’ fan riy e, chiney e ke yag ni nge gel e chugur ko tha’ u thilmow Jehovah.”​—Mu beeg e Matthew 5:3, 6. 

9. Uw rogon ni ngad nanged ko ba fel’ rogon ni gad ma lemnag murung’agen e maruwel ni gad ma un ngay ni nge yag e salpiy ngodad fa danga’?

⁹ Ma felfelan’ Jehovah u nap’an nra guydad ni gad be maruwel nib gel, ma kub ga’ angin nra yib ni faanra ud maruwelgad nib gel. (Prov. 12:14) Yugu aram rogon, mab t’uf ni ngad kol ayuwgad ndab da paged e maruwel ni nge m’on u wan’dad me tomur e tirok Got ban’en. I gaar Jesus: “Ngam m’oneged u wun’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed [ni aram e tin nib t’uf ko par rodad].” (Matt. 6:33) Ere, uw rogon ni ngad nanged ko ba fel’ rogon ni gad ma lemnag murung’agen e maruwel ni gad ma un ngay ni nge yag e salpiy riy ngodad fa danga’? Ba fel’ ni ngad fithed gadad ni nge lungudad: ‘Rug baadag e maruwel ni gu ma un ngay ni nge yag e salpiy riy ngog ma gu ma lemnag nib fel’ e re maruwel nem, machane gu ma lemnag ni pi n’en ni gu ma rin’ ni fan ko pigpig rog ngak Got e ka yug taareb rogon ko tin ni ka bay ban’en fa reb e be chalbag ngay, fa?’ Faan gad ra par ngad fal’eged i lemnag rogon ni gad ma lemnag e maruwel ni gad ma un ngay ni nge yag e salpiy riy ngodad nge pi n’en ni gad ma rin’ ni fan ko pigpig rodad ngak Got, ma rayog ni nge ayuwegdad ni ngad nanged ko mang e n’en nth’abi ga’ fan u wan’dad.

10. Mang reb e ban’en nib ga’ fan ni fil Jesus u murung’agen e pi n’en ni ir e thingar ni m’oneg u wan’uy?

¹⁰ Ke fil Jesus ngodad rogon ni nge dab da paged e maruwel ni nge magawonnag e tirok Got ban’en. Immoy bayay ni yan nga tafen Maria nge Martha ni walagen. Ma nap’an ni be farwol Martha ni be ngongliy rogon e ggan ni ngan kay, ma aram me yan Maria i par nga tooben Jesus nga i motoyil ngak. Ere, nap’an ni tabab Martha ko gun’gun’ ni bochan e der pi’ Maria e ayuw, ma aram me gaar Jesus ngak: “Maria e ke mel’eg e bin ni ir, ma dab ni fek rok.” (Luke 10:38-42) Ere, bay ban’en ni fil Jesus ngak Martha nrib ga’ fan. Faanra nge dabi magawonnagdad e maruwel ni gad ma un ngay mi i par nib t’uf Kristus rodad, ma aram e gubin ngiyal’ nthingar da mel’eged e “bin ni ir” ni aram e be yip’ fan ni ngad m’oneged e tirok Got ban’en u wan’dad.

ROGON NI GAD MA LEMNAG E PI N’EN NI GAD MA RIN’ NI NGAD FELFELAN’GAD NGAY ME CHUWEG E CHALBAN RODAD

11. Mang e be yog e Bible u murung’agen e toffan ni gad ma tay nge pi n’en ni gad ma rin’ ni ngad felfelan’gad ngay?

¹¹ Ri boor pa’ u puluwdad. Ere, ba t’uf ba ngiyal’ ni ngad toffangad ma gad rin’ boch ban’en ni ngad felfelan’gad ngay. Be gaar e Thin rok Got: “Bin th’abi fel’ ngak be’ ni nge rin’ e nge abich me garbod me felfelan’ ko tin ke thognag.” (Ekl. 2:24, BT) Manang Jesus nib t’uf ni ngaun toffan. Bod ni, immoy bayay u tomuren ni kar maruwelgad pi gachalpen nib gel ni yad be machib, ma aram me gaar ngorad: “Mmarod nga darod nga bang ndariy be’ riy nga yugu mtoffangad buchuuw.”​—Mark 6:31, 32.

12. Mang fan nib t’uf ni ngad kol ayuwgad ko pi n’en ni gad ma rin’ ni ngad felfelan’gad ngay me chuweg e chalban rodad? Mu weliy ban’en ni ke buch rok be’.

¹² Ere, kub t’uf ni ngaud rin’ed boch ban’en ni ngad felfelan’gad ngay me chuweg e chalban rodad. Machane, ba t’uf ni ngad kol ayuwgad ni bochan e rayog ni nge par ni ireray e pi n’en nib m’on u wan’dad. Nap’an e bin som’on e chibog, ma boor e girdi’ ni immoy fare lem rorad ni ma tay boch e girdi’ ni aram e ma lungurad: “Mmarod nguud abichgad ma gadad be garbod, ya bayi gabul ma kad m’ad.” (1 Kor. 15:32) Ku ireray e re lem ni ma tay boor e girdi’ u fayleng e ngiyal’ ney. Bod ni boch e duw ni ke yan, ma aram me tabab reb e pagel ni ma par u Ngal u Europe ni nga i un ko muulung. Machane, bochan nri baadag ni ma fanay e tayim rok ni fan ko pi n’en ni yima chuweg e chalban ngay, ma aram me tal nda ki i chag ko girdi’ rok Jehovah. Munmun ma aram me tamilang u wan’ ni bochan ni kaygi par ni yigoo pi n’em e ir e be m’oneg u wan’, ma aram fan ni boor e magawon ni be mada’nag. Ere, sul nge un ko fol Bible bayay ma boch nga tomuren ma aram me mang reb e publisher ara be’ ni ke bung rogon nrayog ni nge un ko machib. Tomuren ni un ko taufe, ma aram me yog ni gaar: “Taare n’en ni kug kalngan’ug riy e aram e kug n’ag boor e tayim rog ni fan nga boch ban’en nde ga’ fan, ma ka fini tomur riy ma ke tamilang u wan’ug ni faan gu ra pigpig ngak Jehovah mab gel e felfelan’ ni gu ra tay ko bin ni nggu n’ag e chalban rog ko pi n’en ni bay ko re fayleng ney.”

13. (a) Mu weliy reb e fanathin ni be tamilangnag fan nde fel’ ni ngad ted boor e tayim ni fan nga boch ban’en ni ngad felfelan’gad ngay me chuweg e chalban rodad. (b) Mang e rayog ni nge ayuwegdad ni nge dabi pag rogon ni gad ma lemnag e pi n’en ni gad ma rin’ ni ngad felfelan’gad ngay me chuweg e chalban rodad?

¹³ Fan ni gad ma rin’ boch ban’en ni ngad felfelan’gad ngay e bochan e ngad toffangad me yag ni ngki yib gelngidad bayay ni ngkud rin’ed boch ban’en. Ere, uw urngin e tayim nsusun e ngaud ted ni fan ko pi n’ey? Am lemnag e re n’ey: Boor i gadad e baadag ni nge kay ban’en nib athibthib u tomuren ni ke mu’ ko abich. Machane, gad manang ni faanra yugu da pared ni yigoo kek nge okas e gad be kay, ma rayog ni nge k’aring e m’ar ngodad. Ere, aram fan nib ga’ ni gad ma kay e ggan nib fel’ nga fithik’ i dowdad. Ku arrogon e pi n’en ni gad ma rin’ ni ngad felfelan’gad ngay me chuweg e chalban rodad. Faanra ud pared ni yigoo ireray e n’en ni gad be rin’, ma rayog ni nge magawonnagdad ko tirok Got ban’en. Ere, aram fan ni gubin e rran ni gad ma rin’ boch ban’en ni fan ko pigpig ni gad be tay ngak Got. Ere, uw rogon ni ngad nanged ko ba fel’ rogon ni gad ma lemnag e pi n’en ni gad ma rin’ ni ngad felfelan’gad ngay, fa danga’? Reb e ban’en nrayog ni ngad rin’ed e aram e rayog ni ngad yoloyed nga but’ urngin e awa ni kad ted u lan reb e wik ni fan ko tirok Got ban’en ni bod rogon e muulung, nge machib, nge fol Bible ni gad ma tay ni goo gadad, nge fol Bible ni tabinaw. Ngemu’ ma gad yoloy nga but’ urngin e awa ni kad fanayed u lan e re wik nem ni fan nga boch ban’en ni ngad felfelan’gad ngay me chuweg e chalban rodad ni bod rogon e gosgos, ara pi n’en ni gad baadag ni gad ma rin’, ara miyal TV, ara pi video games ni gad ma fafel ngay. Ere, mang e kad guyed u nap’an ni kad taareb rogonnaged urngin e tayim ni gad ma fanay ni fan ko pi n’ey? Gur, bay boch ban’en nib t’uf ni ngad thilyeged?​—Mu beeg e Efesus 5:15, 16a.

14. Mang e susun ni nge pow’iydad u rogon ni ngad mel’eged e pi n’en ni ngad rin’ed ni ngad felfelan’gad ngay me chuweg e chalban rodad?

¹⁴ Ke pag Jehovah urngin e girdi’ nge piin lolugen e tabinaw ni ngar mel’eged e re miti n’en ni ngar rin’ed ni ngar felfelan’gad ngay. Machane, pi n’em e thingari puluw ko lem rok Jehovah ni bay ko pi kenggin e motochiyel rok u Bible.b Pi n’en nib fel’ ni gad ma rin’ ni ngad felfelan’gad ngay e aram reb e “tow’ath” ni ke yib rok Got ngodad. (Ekl. 3:12, 13) Riyul’ nra be’ ma rogon e re miti n’en ni baadag ni ma rin’ ni nge felfelan’ ngay me chuweg e chalban rok. (Gal. 6:4, 5) Machane, demtrug rogon ma thingar da kol ayuwgad ndab da paged e pi n’ey ni nge par ni ir e ba m’on u wan’dad, me tomur e tirok Got ban’en. I gaar Jesus: “Lanin’med e gubin ngiyal’ ni bay i par ko gin ni bay e flaab romed riy.” (Matt. 6:21) Ere, t’ufeg rodad ngak Jesus e aram e n’en nra k’aringdad ni ngaud lemgad, ma gad be non, ma gad be ngongol u reb e kanawo’ nra m’ug riy ni kab ga’ fan e tirok Got ban’en u wan’dad ko pi n’en ni gad ma rin’ u reb e rran ngu reb.​—Fil. 1:9, 10.

ROGON NI NGAD GELGAD NGA CHOGOWEN E CHUGUM

15, 16. (a) Uw rogon nrayog ni nge bannagdad chogowen e chugum? (b) Mang fonow nib manigil e pi’ Jesus u murung’agen e chugum?

¹⁵ Boor e girdi’ e ngiyal’ ney e yad baadag ni nge yag ngorad e tin ni kab beech e mad, nge phone, nge computer, nge ku boch ban’en. Ere, gubin ngiyal’ nra reb e Kristiano mab t’uf ni nge fal’eg i lemnag ko mang e pi n’en nib ga’ fan u wan’, me fith ir ni nge gaar: ‘Gur, boor e tayim ni gu ma fanay ni nggu lemnag ara nggu gay murung’agen e tin ni kab beech e karrow ara mad, ko tayim ni gu ma fanay ni nggu fal’eg rogog riy ni fan ko muulung, fa? Gur, ka yug gu par ni yigoo pi n’en ni gu ma rin’ u reb e rran ngu reb e ir e kug mit riy ndakuriy e tayim rog ni fan ko meybil ara beeg Bible, fa?’ Faanra kad guyed ni ke ga’ fan e chugum u wan’dad ko t’ufeg rodad ngak Kristus, ma aram e susun ni ngad lemnaged fapi thin ni yog ni gaar: “Mu ayuwgad mi gimed guy rogomed rok urngin mit e chogow.” (Luke 12:15) Mang fan ni yog Jesus e re thin ney?

¹⁶ I yog ni “dariy be’ nrayog ni nge mang sib rok l’agruw i masta.” Miki ulul ngay ni gaar: “Dabiyog ni ngam manged tapigpig rok Got ma ki gimed e tapigpig rok e salpiy.” Gad manang ndabiyog ni ngad pigpiggad ngak Jehovah nib fel’ rogon ni faanra ka gad be m’oneg e chugum u wan’dad. Ya yog Jesus nreb e gad ra ‘fanenikay bagayow me t’uf bagayow rodad,’ fa reb e da ‘yul’yul’gad ngak bagayow ma gad darifannag bagayow.’ (Matt. 6:24) Bochan ndawor da flontgad, ma aram fan ni gad gubin nib t’uf ni ngad guyed rogon ni ngad gelgad ko pi n’en ni ‘gad be ar’arnag,’ ni kub muun chogowen e chugum ngay.​—Efe. 2:3.

17. (a) Mang fan ni piin ni kar pared ni tin ni be ar’arnag e dowef rorad e ir e yad be m’oneg u wan’rad e ba mo’maw’ rorad ni nge dab ra lemnaged e chugum nib pag rogon? (b) Mang e ra ayuwegdad ni ngad gelgad nga chogowen e chugum?

¹⁷ Piin ni kar pared ni tin ni baadag e dowef rorad e ir e yad be m’oneg u wan’rad e ba mo’maw’ ngorad ni nge dab ra lemnaged e chugum nib pag rogon. Mang fan? Bochan e kar paged chogowen e chugum ni nge magawonnag rogon ni yad ma lemnag e tirok Got ban’en. (Mu beeg e 1 Korinth 2:14c.) Ere, ke mo’maw’ rogon ni ngar lemgad nib fel’ rogon ni bochan e da kur nanged e n’en nib thil u thilin e tin nib fel’ nge tin nib kireb. (Heb. 5:11-14) Bochan e re n’ey, ma aram fan ni yad baadag ni nge yoor i yoor e chugum rorad, ma ke mo’maw’ ni nge fel’ u wan’rad e tin ni bay rorad ban’en. (Ekl. 5:10) Machane, gad ba felfelan’ ni bochan e bay ban’en nrayog ni nge ayuwegdad ni ngad gelgad ko biney e lem. Re n’em e aram e Thin rok Got ni bay u Bible ni gad ma beeg ni gubin e rran. (1 Pet. 2:2) Jesus e i fal’eg i lemnag e tin riyul’ ni ke yib rok Got, ma aram e n’en ni ayuweg ni nge siyeg e pi n’en nni waliy ngay. Ere, ku arrogodad ni faan gad ra fol ko pi kenggin e motochiyel ni bay u Bible, ma ra ayuwegdad ni ngad gelgad nga chogowen e chugum. (Matt. 4:8-10) Faan gad ra rin’ ni aray rogon, ma aram e gad be dag ni kab gel e t’ufeg rodad ngak Jesus ko chugum.

18. Mang e kam dugliy ni ngam rin’?

¹⁸ Nap’an ni fith Jesus Peter ni gaar: “Kab gel fanag t’uf rom nga rogon ni gub t’uf rok e pi cha’ ney [“nga rogon nib t’uf e pi n’ey rom,” NW]?” ma be puguran ngak Peter feni ga’ fan ni nge m’oneg e tirok Got ban’en u lan e yafos rok. Fan fare ngachal ni Peter e “Bangi Malang.” Ma rriyul’ ni ngongol Peter nib puluw nga fan e ngachal rok ni bochan e i m’ug boch e fel’ngin nib manigil rok, ma pi fel’ngin nem e rayog ni ngan taareb rogonnag ngab malang. (Acts 4:5-20) Ku arrogodad e ngiyal’ ney ni kad dugliyed u wan’dad ni ngaud pared nib t’uf Kristus rodad, ma gad guy rogon ndab da paged e maruwel ni gad ma un ngay ni nge yag e salpiy riy, nge pi n’en ni gad ma rin’ ni ngad felfelan’gad ngay, nge chugum ni nge m’on u wan’dad me tomur e tirok Got ban’en. Ere, manga yigi m’ug ko pi n’en ni kad mel’eged ni nge m’on u wan’dad ni taareb rogon e lem rodad Peter u nap’an ni gaar ngak Jesus: “Somol, ga manang ni gab t’uf rog.”