Ma Fal’eg Jehovah Lanin’dad u Fithik’ Urngin e Pi Magawon Rodad

1, 2. Uw rogon ni ma fal’eg Jehovah lanin’dad u fithik’ e pi magawon ni gad ma mada’nag? Mang e be yog e Thin rok nrayog ni nge pagan’dad ngay?

IMMOY reb e walag ni kab pagel ndawori un ko mabgol ni ka nog Eduardo ngak ni weliy ngak Stephen nreb e piilal u lan e ulung ni ke mabgol murung’agen e pi n’en ni be magafan’ ngay. Ke n’uw nap’an ni ma lemnag Eduardo fare thin ni bay ko 1 Korinth 7:28 ni be gaar: “Faanra mu un ko mabgol ma . . . [ga ra pirieg] e gafgow ni be pirieg e piin ni mabgol.” Ere, fith ni gaar, “Mang e re miti ‘gafgow’ nem, ma uw rogon ni nggu athamgil u fithik’ ni faanra gu un ko mabgol?” U m’on ni pi’ Stephen e fulweg ko deer rok Eduardo, ma aram me yog ngak ni nge lemnag yugu ban’en nib thil ni yoloy apostal Paul. Re n’em e aram fare thin ni be yog ni Jehovah e ir ‘fare Got ni ma fal’eg lanin’uy ma ma ayuwegdad u urngin e gafgow nge kireban’ ni ma yib ngodad.’​—2 Kor. 1:3, 4. 

² Jehovah e ir e Chitamangidad ni gad ba t’uf rok, ma ma fal’eg lanin’dad u nap’an ni kad mada’naged boch e magawon nib mo’maw’. Sana bay boch e magawon ni kam mada’nag ni ke yag ni nge ayuwegem Got riy me pow’iyem, mab ga’ ni ma rin’ e re n’ey u daken e Thin rok. Ba pagan’dad ni baadag Got e tin nib fel’ ni fan ngodad ni bod rogon e pi tapigpig rok kakrom.​—Mu beeg e Jeremiah 29:11, 12.

3. Mang deer e gad ra weliy e fulweg riy?

³ Riyul’ ni faanra gad manang e n’en ni be k’aring e magawon ara gafgow ngodad, mab mom ni ngad athamgilgad u fithik’ e pi magawon rodad. Ma aray rogon e pi gafgow ni gad ma mada’nag u lan e mabgol ara tabinaw rodad. Ere, mang boch ban’en ni ma k’aring fapi “gafgow” ni faani weliy Paul murung’agen? Mang e ke rin’ boch e girdi’ kakrom nge ngiyal’ ney nrayog ni nge ayuwegdad ni nge fel’ lanin’dad? Faan gad ra nang e re n’ey, ma rayog ni nge ayuwegdad ni ngad athamgilgad.

BOCH E “GAFGOW NI BE PIRIEG E PIIN NI MABGOL”

4, 5. Mang boch ban’en ni ma k’aring e “gafgow” ngak e piin mabgol?

⁴ Rayog ni ngad beeged fapi thin ni yog Got buchuuw nga tomuren ni ka fini sum e girdi’ ni gaar: “Be’ nib moon e ma pag e chitamangin nge chitiningin nge yan i chag ngak e ppin rok, ngar pirew ni kar taab girdi’gow.” (Gen. 2:24) I yog Jehovah e re thin ney u nap’an ni m’agpa’ e gal nsom’on e girdi’. Yugu aram rogon, ma bochan nda kud flontgad ma rayog ni nge magawon e tha’ u thildad chon e tabinaw rodad u nap’an ni gad ra un ko mabgol, ara nap’an ni ke yag reb e tabinaw ngodad. (Rom. 3:23) Ba ga’ ni aram e ngiyal’ ni ma chuw reb e ppin u tan pa’ e gallabthir rok nge yan i par nga tan pa’ figirngin. Ma Got e ir e ke pi’ mat’awun reb e pumoon ni nge maruwel nga mat’awun ni ir lolugen leengin. (1 Kor. 11:3) Bay boch e pumoon nge ppin ni ka fin nra uned ko mabgol ni yad ma guy nib mo’maw’ e re n’ey. Rogon ni be yog e Thin rok Got e thingari m’agan’ e en leengiy ngay ni nge mang figirngin e ir e nge gagiyegnag ma gathi gallabthir rok. Ku rayog ni nge magawon e tha’ u thilin fa wu’ i mabgol nge girdien e tabinaw rok bagayow, ma re n’ey e rayog ni nge k’aring boch e magawon nga thilin fa wu’ i mabgol.

⁵ Ba ga’ ni ku ma tabab ni nge magafan’ fa wu’ i mabgol u nap’an nra yog fare pin ngak figirngin ni ‘ke diyen.’ Yugu aram rogon ni ma felfelan’ fa wu’ i mabgol ko re n’ey, machane kub ga’ ni ma magafan’row ni bochan e yow be magarnag nri chey me buch ban’en ko fare tir ara fare matin u nap’an nib diyen ara buch ban’en ko fare tir u tomuren ni kan gargeleg. Maku reb e, kub t’uf ni nge lemnag fa wu’ i mabgol boch e magawon nrayog ni ngar mada’nagew e ngiyal’ nem ara boch nga tomuren ni bay rogon ko salpiy. Maku nap’an ni yira gargeleg fare tir ma bay boch ban’en ni kub t’uf ni ngar thilyegew u rarogon e par rorow. Ya nap’an nra gargel fare matin, ma rayog ni nge par ni yigoo fare tir rok e ir e be tiyan’ ngak ara be tay e tayim ni fan ngak. Ma boor e piin figirngiy ni yad ma lemnag ndakir lemnagrad e piin leengirad ni bochan e ka yugu ra pared ni fare tir e ir e yad be tiyan’ ngak. Maku reb e, nap’an nra mang be’ reb e matam, ma aram e bay boch e maruwel ni ke milfan ngak. Aram e ngiyal’ ni ke mun daken e maruwel rok ni bochan e ke yag e bitir ngak nib t’uf ni nge ayuweg me pi’ e tin nib t’uf rok.

6-8. Uw rogon nrayog ni nge kireban’ ba wu’ e mabgol ni faanra der yag ni ngar fakayew e bitir?

⁶ Ku bay ba mit e gafgow ni ma yib ngak yu wu’ e mabgol nib thil. Bay yu wu’ e mabgol ni yad baadag ni ngar fakayed e bitir, machane der yag. Faanra der yag ni nge diyen fare pin ma rayog ni nge kireban’ nib gel. Yugu aram rogon ni ku ra i magafan’ be’ u nap’an ni ke mabgol ara nap’an ni ke fakay e bitir, machane faanra der yag ni nge fakay ba wu’ e mabgol e bitir, maku rayog ni nga nog ni fa wu’ i mabgol e yow be ‘pirieg e gafgow.’ (Prov. 13:12) Kakrom e faanra dabiyog ni nge diyen reb e ppin ma aram ban’en nrib gel e tamra’ riy. Rachel ni leengin Jakob e weliy gelngin e kireban’ rok u nap’an ni guy reb e ppin ni walagen ni ke fakay e bitir. (Gen. 30:1, 2) Pi missionary ni yad ma pigpig u boch e nam ni bang ko yalen riy ni ngan mabgol min fakay boor e bitir e ba ga’ ni yima fith ngorad ko mang fan ndariy e bitir rorad. Yugu aram rogon ni yad ma weliy fan ndarur fakayed e bitir u fithik’ e gonop nge sumunguy, machane ba ga’ ni yima gaar ngorad, “Bay ug yibilayed gimed!”

⁷ Fa reb e mu lemnag reb e walag nib pin ni ma par u England ni ke n’uw nap’an ni baadag ni nge diyen, machane der yag. Nap’an ni nang ni ke taw ko fare yangar ndabkiyog ni nge diyen riy, ma rib gel e kireban’ ni tay ni bochan e ke nang ndabkiyog ni nge diyen u lan e biney e m’ag. Ere, ra dugliyew e pumoon rok ni ngar pofew reb e bitir ni ngar fakayew. Machane, i yog ni gaar: “Yugu aram rogon ma ka be kireban’ug. Ya gu manang ni faan gu ra pof reb e bitir ni nggu fakay ma de taareb rogon ko bin ni gag e kug diyennag.”

⁸ Be yog e Bible nrayog ni nge “thap” reb e ppin ni Kristiano ngak Got u nap’an ni be ‘chuguliy e bitir’ rok. (1 Tim. 2:15) Machane, re n’ey e der yip’ fan ni faanra fakay be’ e bitir, ma aram e ra yag e yafos ni manemus ngak. Ya re thin ney e be yip’ fan ni faanra bay e bitir rok reb e ppin ni be ayuweg, maku be rin’ boch e maruwel ni fan ko tabinaw rok, ma aram e rayog ni nge ayuweg e re n’ey ni nge dabi un ko gun’gun’ ara i magawonnag e maruwel rok yugu boch e girdi’. (1 Tim. 5:13) Machane, ku rayog ni nge mada’nag boch e magawon u lan e mabgol ara tabinaw rok.

9. Ku mang ba mit e gafgow ni ma yib ngak e piin mabgol?

⁹ Nap’an ni yira weliy murung’agen e pi gafgow ni ma pirieg e piin mabgol, ma bay ba mit e gafgow nder ma yib ngan’uy. Re n’em e aram e nap’an ni ke yim’ be’ nib t’uf rom. Arrogon, ba mit e gafgow ni ke mada’nag boor e girdi’ e aram e ke yim’ e en mabgol rorad. Ireray ba mit e gafgow nsana der ma lemnag be’ nra mada’nag u nap’an ni ka gad bay ko biney e m’ag. Machane, piin Kristiano e rib mich u wan’rad fapi thin ni micheg Jesus ni aram e yira faseg e piin ni kar m’ad. (John 5:28, 29) Uw rogon ni ma ayuweg e re thin ney faen ni ke yim’ e en mabgol rok? Re thin ney e rayog ni nge fal’eg laniyan’ facha’. Ku ireray reb e kanawo’ ni ma fanay e Chitamangidad ni bay u tharmiy e Thin rok riy ni nge ayuweg e piin ni yad be mada’nag e gafgow me fal’eg lanin’rad. Chiney e ngad weliyed rogon ni i lemnag boch e tapigpig rok Got murung’agen boch e magawon ni ur mada’naged, nge rogon ni i fal’eg Jehovah lanin’rad, nge angin ni yib ngorad.

ROGON NRAYOG NI NGE FEL’ LANIN’DAD U NAP’AN NI KAD MADA’NAGED BOCH E MAGAWON

10. Uw rogon ni yag ni nge fel’ laniyan’ Hannah ko kireban’ ni i tay? (Mu guy e sasing ni bay u tabolngin e re article ney.)

¹⁰ Bay ba mit e gafgow ni ki pirieg Hannah ni leengin Elkanah. I par nder yag ni nge diyen, machane bin baaram e piin ni leengin Elkanah ni ka nog Peninnah ngak e boor pi fak. (Mu beeg e 1 Samuel 1:4-7.) “Urngin e duw” ni i par Peninnah ni be moningnag Hannah. Ere, ri amith laniyan’ ni bochan e re n’ey ma gubin ngiyal’ ni i par nib kireban’. Machane, i guy rogon ni nge fel’ laniyan’ ni aram e weliy e magawon rok ngak Jehovah u daken e meybil. Arrogon, “i meybil ngak Somol nib n’uw nap’an.” Ere gur, i lemnag nra fulweg Jehovah taban e meybil rok? Dabisiy ni i athapeg ni manga yigi fulweg taban. Bin riyul’ riy e, yag ni nge “chuw e kireban’ rok.” (1 Sam. 1:12, 17, 18) Ba pagan’ ngak Jehovah nra ayuweg ni nge diyen fa reb e ra ayuweg ko re magawon rok nem u yugu reb e kanawo’.

11. Uw rogon nrayog ni nge fel’ lanin’dad u daken e meybil?

¹¹ Chiney ndawor da flontgad ma ka gad be par ko re m’ag ney ni be gagiyegnag Satan e ra ud mada’naged e magawon nge gafgow. (1 John 5:19) Machane, gad ba felfelan’ ni kad nanged ni Jehovah e ir “fare Got ni ma fal’eg lanin’uy”! Meybil e aram reb e ban’en nrayog ni nge ayuwegdad u rogon ni ngad athamgilgad u fithik’ e pi magawon nge gafgow ni gad ma yan u fithik’. Hannah e ri weliy gubin ban’en ni bay u laniyan’ ngak Jehovah. Ere ku arrogodad nnap’an ni gad ra mada’nag e gafgow, ma gathi kemus ni nga dogned ngak Jehovah e n’en ni gad be lemnag. Ya ba t’uf ni ngad ninged ngak e tin ni nge yag ngodad ni aram e ngad weliyed ngak gubin ban’en ni bay u lanin’dad.​—Fil. 4:6, 7.

12. Mang e ayuweg be’ nib pin ni ke yim’ figirngin ni ka nog Anna ngak ni nge pirieg e felfelan’?

¹² Mus ni faanra gad be lemnag ni bay ban’en ndariy rodad ni bochan e der yag ni ngad fakayed e bitir ara ke yim’ be’ nib t’uf rodad, ma ka rayog ni nge fel’ lanin’dad. Nap’an ni immoy Jesus u fayleng, ma immoy reb e ppin nib profet ni ka nog Anna ngak ni yim’ figirngin u tomuren medlip e duw ni kar mabgolgow. Der yog e Bible ni immoy fak e re ppin ney. Machane, mang e i rin’ Anna ngki yan i mada’ ko ngiyal’ ni ke gaman 84 e duw rok? Be gaar e Luke 2:37: ‘Der pag e tempel ni rran nge nep’, ni be meybil ma be pag e abich yu ngiyal’ ngi i meybil.’ Arrogon, i yag ni nge fel’ laniyan’ Anna miki felfelan’ ko pigpig ni i tay ngak Jehovah.

13. Mu weliy reb e ban’en ni ke buch ni be dag rogon nrayog ko tin riyul’ e fager ni ngar fal’eged laniyan’ be’ u nap’an ni ke rin’ reb e girdi’ u lan e tabinaw rok ban’en ni ke kirebnag laniyan’.

¹³ Faanra ud chaggad ngak pi walagdad u lan e ulung, ma aram e rayog ni ngad pirieged e tin riyul’ e fager nge boch e girdi’ nrayog ni ngari chugur e tha’ u thildad. (Prov. 18:24) I yib ngan’ Paula gelngin e kireban’ ni tay u nap’an ni chuw e chitiningin ko tin riyul’ u nap’an ni ka fini gaman lal e duw rok. De mom rok ni nge gel ko re magawon nem. Machane, i yag ni nge fel’ laniyan’ u nap’an ni tabab reb e walag nib pin nib pioneer u lan e ulung rok ni ka nog Ann ngak ni nge ayuweg ko tirok Got ban’en. I yog Paula ni gaar: “Yugu aram rogon ndariy rogomow Ann, machane rib gel e ayuw ni pi’ ngog nga rogon ni i dag ni be lemnageg. Ireray e n’en ni ayuwegeg ni nggu ulul ko pigpig ni gu be tay ngak Jehovah.” Ke mada’ ko chiney ma ka be pigpig Paula ngak Jehovah u fithik’ e yul’yul’. Kub gel e felfelan’ ni ke tay ni bochan e ke sul e chitiningin ko tin riyul’, ma yow be pigpig ngak Got u taabang. Kub felfelan’ Ann ni bochan e ke yag ni nge ayuweg Paula ko tin riyul’ ma kki par ni bod rogon ba matin ngak.

14. Mang boch e tow’ath nra yag ngak e piin ni yad ma fal’eg laniyan’ yugu boch e girdi’?

¹⁴ Bin riyul’ riy e, nap’an nra ud daged ngak yugu boch e girdi’ ni gad be lemnagrad, ma aram e rayog ni nge chuw boch e lem rodad nde puluw. Pi walag nib pin ndemtrug ko kar uned ko mabgol fa dawor e yad manang nib gel e felfelan’ nra yib ngorad ni faan yad ra maruwel Got u taabang mar wereged fare thin nib fel’ ko girdi’. N’en ni yad be nameg e aram e ngar rin’ed e n’en nib m’agan’ Got ngay mar pininged e sorok ngak. Ku bay boch e walag ni yad ma tay ni machib ni yad ma un ngay e bod rogon e tafalay. Arrogon, faanra gad gubin ni gad ma dag ni gad be lemnag yugu boch e girdi’, ndemtrug ko girdi’ ni gad ma mada’nag u nap’an e machib ara pi walagdad u lan e ulung, ma aram e rayog ni ngad ayuweged e girdi’ u lan e ulung ni nge gel e chugur ko tha’ u thilrad. (Fil. 2:4) I dag apostal Paul e kanawo’ nib fel’ nrayog ni ngan folwok riy. I par ni bod rogon ba “matin” ngak e pi walag u lan e ulung nu Thessalonika; ma kki par ni bod rogon ba matam ngorad.​—Mu beeg e 1 Thessalonika 2:7, 11, 12.

ROGON NRAYOG NI NGE FEL’ LANIYAN’ E GIRDI’ U LAN E TABINAW

15. Mini’ e piin ni ir e ba milfan ngorad ni ngar filed e tin riyul’ ko bitir?

¹⁵ Reb e ban’en ni kub t’uf ni ngad lemnaged e aram e ayuw ni gad ma pi’ ngak girdien yugu boch e tabinaw nge rogon ni gad ma fal’eg lanin’rad. Bay yu ngiyal’ nrayog ni nge yog boch e girdi’ ni ka fin nra uned ko tin riyul’ ngak boch e walag u lan e ulung ni kar ilalgad ko tirok Got ban’en ni ngar filed e tin riyul’ ngak pi fakrad, ara ngar filed e Bible ngorad. Rogon ni be yog e Bible e piin gallabthir e aram e piin nib milfan ngorad ni ngar filed e tin riyul’ ngak pi fakrad mi yad llowan’nagrad. (Prov. 23:22; Efe. 6:1-4) Machane, bay yu ngiyal’ nib t’uf ni nge pi’ yugu boch e walag e ayuw, ma ri ma felfelan’ e piin gallabthir ko re n’ey. Yugu aram rogon, machane gathi aram e be yip’ fan ndakuriy e maruwel ko piin gallabthir. Ya ba t’uf ni nga i non e gallabthir nge pi fakrad ni gubin ngiyal’.

16. Mang e susun ndab ni pagtalin u nap’an ni yibe ayuweg boch e bitir?

¹⁶ Faanra ke dugliy reb e gallabthir ni nge fil reb e walag e Bible ngak pi fak, ma aram e faen ni be fil e Bible ngak fapi bitir e susun e dabi guy rogon ni nge milfan e maruwel ko gallabthir rok fapi bitir ngak. Bay yu ngiyal’ ni ka nog ngak boch e Pi Mich ni ngar filed e Bible ngak boch e bitir nder un e gallabthir rorad ko tin riyul’. Yugu aram rogon, ma fapi Mich e thingar dab ra paged talin ni yugu aram rogon ni yad be ayuweg fapi bitir ko tirok Got ban’en, machane gathi aram e kar manged e gallabthir ko fapi bitir. Maku reb e, faanra yad be fil e Bible ngak fapi bitir, mab fel’ ni nga u ranod nga taferad ngar filed e Bible ngorad u rom, ara ra filed e Bible ngorad ni yad reb e walag ni ke ilal ko tirok Got ban’en, ara ra filed e Bible ngorad u bang nib fel’ nrayog ni nge guyrad e girdi’ riy. Faan yad ra rin’ ni aray rogon, ma aram e dabi yib tapgin ni nge lemnag e girdi’ boch ban’en nde puluw u murung’agen e fol Bible ni yad be tay fapi bitir. Machane, bitir ni gathi gallabthir rorad e yad be fil e Bible ngorad e yibe athapeg nra boch ngaram ma ra dugliy e gallabthir rorad ni ngar rin’ed e biney e maruwel nib milfan ngorad ni ke pi’ Got, ni aram e ngar filed e tin riyul’ ngak pi fakrad.

17. Uw rogon nrayog ni nge fal’eg e piin bitir lanin’uy?

¹⁷ Piin bitir ni kar filed murung’agen e bin riyul’ e Got, ma ke t’uf rorad, ma yad be fol ko pi fonow rok e rayog ni ngar fal’eged laniyan’ e girdi’ u lan e tabinaw rorad. Rogon nrayog ni ngar rin’ed e re n’ey e aram e ngaur ted fan e gallabthir rorad ma yad be pi’ e ayuw ko tin nib t’uf u lan e tabinaw. Ku rayog ni ngar pied e ayuw ko tirok Got ban’en. U m’on ni yib fare Ran nge Tharey e Fayleng, ma Lamek ni ir reb i owchen Seth e i pigpig ngak Jehovah. Baaray e n’en ni yog Lamek u murung’agen Noah ni fak: “Re tir ney e ra pi’ e toffan nga urngin e maruwel nib gel ni gadad be tay; ya bucheg Somol waathan e re but’ ney.” I lebug e re yiiy ney u nap’an ni chuweg Got e buch waathan ni ke tay ko but’. (Gen. 5:29, BT; 8:21) Ere, bitir ni ke un ko bin riyul’ e liyor e rayog ni ngar fal’eged laniyan’ chon e tabinaw rorad, mar ayuweged yad ni ngar athamgilgad u fithik’ boch e magawon ni yad be mada’nag e chiney, mu kur ayuweged chon e tabinaw rorad ni ngar mageygad ni yad ba fos u nap’an fare gafgow ni bayi yib ni kab gel e gafgow riy ko fare Ran ni Tharey e Fayleng.

18. Mang e rayog ni nge ayuwegdad ni ngad athamgilgad u fithik’ e pi magawon ara gafgow ni gad ma mada’nag?

¹⁸ Meybil, nge ngan fal’eg i lemnag murung’agen boch e girdi’ ni bay murung’agrad u Bible, nge chag ni gad ma tay e girdi’ rok Jehovah e aram e n’en ni be ayuweg bokum milyon e girdi’ e ngiyal’ ney ni nge fel’ lanin’rad u fithik’ e pi magawon ni yad be mada’nag. (Mu beeg e Psalm 145:18, 19.) Bochan ni gad manang ni Jehovah e Ir e En nrayog ni nge fal’eg lanin’dad ndariy n’umngin nap’an, ma ireray e n’en ni be ayuwegdad ni nge dab da rusgad ma gad athamgil u fithik’ e pi gafgow ni gad be mada’nag e chiney nge boch nrayog ni ngad mada’naged boch nga m’on.