Ba M’agan’um Ngay ni Ngam Gum’an’nagem Ngam Son, Fa?

1, 2. (a) Mang boch ban’en nrayog ni nge k’aringdad ni ngad fithed ni nge lungudad: “Uw n’umngin nap’an”? (b) Mang fan ni pi n’en ni i buch ko pi tapigpig rok Got kakrom ni yad ba yul’yul’ e rayog ni nge pi’ e athamgil nga lanin’dad?

“UW N’UMNGIN nap’an?” Ireray e re deer ni fith Isaiah nge Habakkuk ni l’agruw e profet rok Got ni yow ba yul’yul’. (Isa. 6:11; Hab. 1:2) Nap’an ni be yoloy David e bin 13 e Psalm, ma aningeg yay ni fith ni gaar: “Uw n’umngin nap’an?” (Ps. 13:1, 2) Mus ngak Jesus Kristus ni ki fith e re deer ney u nap’an ni be non ngak boch e girdi’ ni ur moyed ko ngiyal’ ni immoy riy ndariy e michan’ rorad. (Matt. 17:17) Ere, ku arrogodad nsusun e dab da gingad ni faanra kad lemnaged e re deer ney.

² Mang e rayog ni nge k’aringdad ni ngad fithed ni nge lungudad: “Uw n’umngin nap’an?” Sana rayog ni ke n’uw nap’an ni gad be par u fithik’ boch e ngongol nde mat’aw. Fa reb e sana rayog ni kad pilibthirgad ma yug gad be m’ar, ara boor e magawon ni gad be mada’nag ni bochan e gad be par u ba ngiyal’ ni kari ‘mo’maw’ e par.’ (2 Tim. 3:1) Fa reb e be mulan’dad ni bochan rogon e lem ko girdi’ u toobdad. Demtrug rogon, ma gad ba felfelan’ ni kad nanged nde puwan’ Jehovah ko pi tapigpig rok kakrom ni yad ba yul’yul’ ni ur fithed e re deer ney.

3. Mang e rayog ni nge ayuwegdad u nap’an ni kad mada’naged boch e magawon nib mo’maw’?

³ Machane, mang e rayog ni nge ayuwegdad u nap’an ni kad mada’naged e pi magawon ney nib mo’maw’? Nni thagthagnag nga laniyan’ James nreb i walagen Jesus ni nge yog ni gaar: “Pi walageg ni girdien Kristus, mpired ni gimed ba gum’an’ nge mada’ ko ngiyal’ ni bayi sul Somol riy.” (Jas. 5:7) Arrogon, gad gubin nib t’uf ni ngad gum’an’naged gadad. Machane, faanra nge yag e re fel’ngin ney ngodad, ma mang e ba t’uf ni ngad rin’ed?

MANG E GUM’AN’?

4, 5. (a) Faanra ngad gum’an’gad, ma mang e ba t’uf ni nge yag ngodad? (b) Uw rogon ni tamilangnag James nreb i gachalpen Jesus rogon ni ngaud gum’an’gad? (Mu guy e sasing ni bay u tabolngin e re article ney.)

⁴ Be yog e Bible ni gum’an’ e aram bang u wom’engin gelngin Got nib thothup. Gad gubin ndawor da flontgad, ere faanra dabi ayuwegdad Got ma rra mo’maw’ ngodad ni ngad gum’an’naged gadad u fithik’ boch e magawon nrib mo’maw’. Gum’an’ e aram reb e tow’ath ni ke yib rok Got, ma faanra ud gum’an’gad ma aram reb e kanawo’ nrayog ni ngad daged ngak Got nib t’uf rodad. Faanra ud gum’an’gad ma aram e ku gad be dag nib t’uf yugu boch e girdi’ rodad. Faanra dab ud gum’an’naged gadad, ma aram e gad be warnag e t’ufeg u thildad yugu boch e girdi’; machane faanra ud gum’an’gad ma aram e gad be gelnag e re t’ufeg nem. (1 Kor. 13:4; Gal. 5:22) Ku bay boch e fel’ngin nrib ga’ fan ni nge yag ngodad nib peth ko gum’an’. Bod ni, gum’an’ e ba peth ko k’adan’. Faanra gad manang rogon ni ngaud k’adedan’dad, ma aram e rayog ni ngad pared ni gad ba felfelan’ ni yugu aram rogon ni gad be mada’nag boch e magawon nib mo’maw’. (Kol. 1:11; Jas. 1:3, 4) Gum’an’ e ku ra ayuwegdad ni ngad pared ni gad ba yul’yul’ ngak Jehovah ni yugu demtrug e re miti magawon nra yib ngodad. Ra ayuwegdad ni nge dab da lemnaged ni ngad sulweged taban e kireb ni kan rin’ ngodad. Maku reb e, be yog e Bible nthingari m’agan’dad ngay ni ngad songad. Aray rogon e gum’an’ ni kan tamilangnag ko James 5:7, 8. (Mu beeg.)

⁵ Mang fan nib t’uf ni nge m’agan’dad ngay ni ngad sonnaged Jehovah ni nge pithig e magawon rodad? I taareb rogonnag James e pi n’en ni gad be yan u fithik’ ko n’en ni ma rin’ reb e tamilay’. Yugu aram rogon nib gel e maruwel ni ke tay fare tamilay’ ni nge yung e woldug rok, machane dabiyog ni nge gagiyegnag e yafang ara gagiyegnag rogon ni be ilal fapi woldug ni ke yung. Ku dabiyog ni nge papeynag e tayim. Thingari gum’an’nag ir nge sonnag e “woldug rok ni nge yib limngun.” Ku arrogodad ni boor ban’en ndabiyog ni ngad gagiyegnaged u nap’an ni gad be sonnag e ngiyal’ nra lebug e pi n’en ni ke micheg Jehovah. (Mark 13:32, 33; Acts 1:7) Ba t’uf ni ngad gum’an’naged gadad ngad songad ni bod rogon fare tamilay’.

6. Mang e rayog ni ngad filed ko n’en ni rin’ Mikah ni profet?

⁶ Pi magawon ni gad be mada’nag e ngiyal’ ney e bod rogon e pi magawon ni i buch u nap’an Mikah ni profet. Immoy Mikah u nap’an ni be gagiyeg Ahaz nreb e Pilung nib kireb. Ngiyal’ nem e kari gel e sasalap ko girdi’. Bin riyul’ riy e, girdi’ e ngiyal’ nem e “ri yad ba salap i ngongliy e kireb.” (Mu beeg e Mikah 7:1-3.) Manang Mikah ndabiyog rok ni nge thilyeg e ngongol ko girdi’. Machane, mang e rayog ni nge rin’? I gaar: “Machane gag e bay ug tor ngak Jehovah. Bay ug sonnag [“gu ra gum’an’nageg nggu sonnag,” ftn.] fare Got ni ir e rayog ni nge pi’ e yafos ngog. Got rog e bayi rung’ag lungug.” (Mic. 7:7, NW) Ku arrogodad nib t’uf ni ngad ‘songad’ ni bod rogon Mikah.

7. Mang fan ni ku bay boch ban’en nthingar da rin’ed ko bin ni kemus ni ngad pared ngad sonnaged Jehovah ni nge lebguy e pi n’en ni ke micheg?

⁷ Faanra ba gel e michan’ rodad ni bod rogon Mikah, ma aram e ra m’agan’dad ngay ni ngad sonnaged Jehovah. Bin riyul’ riy e, de taareb rogodad ngak be’ ni bay u kalbus ni ke par ni be sonnag e rofen ni ngan li’ nge yim’. Be’ ni aray rogon e kemus ni be son ni bochan e ban’en nthingari rin’, ma der athapeg ni nge taw ko rofen ni yira li’ riy. Machane, gadad e gathi aram rogodad! Ba m’agan’dad ngay ni ngad sonnaged Jehovah ni bochan e gad manang nra lebguy e n’en ni ke micheg ngodad ni aram e ra pi’ e yafos ndariy n’umngin nap’an ngodad ko ngiyal’ nrib puluw ni nge rin’ riy! Ere, aram fan ni gad be ‘athamgiliy urngin ban’en u fithik’ e gum’an’ . . . [nge] felfelan’.’ (Kol. 1:11, 12) Machane, faanra ud songad ma ka gad be gun’gun’ ni bochan e der papey Jehovah ni nge chuweg e pi magawon rodad, ma aram e gad be rin’ ban’en nde m’agan’ ngay.​—Kol. 3:12.

BOCH E GIRDI’ KAKROM NI YAD BA GUM’AN’ NRAYOG NI NGAD FOLWOKGAD RORAD

8. Mang e ba t’uf ni ngad lemnaged u nap’an ni gad be fal’eg i lemnag murung’agen boch e pumoon nge ppin kakrom ni yad ba yul’yul’?

⁸ Reb e ban’en nrayog ni ngki ayuwegdad ni nge m’agan’dad ngay ni ngad songad e faanra ud lemnaged boch e pumoon nge ppin kakrom ni yad ba yul’yul’ ni ur gum’an’naged yad ngar sonnaged Jehovah ni nge lebguy e pi n’en ni ke micheg. (Rom. 15:4) Nap’an ni gad be fal’eg i lemnag e pi n’en ni ur rin’ed, mab fel’ ni ngad lemnaged n’umngin nap’an nra songad, nge fan ni m’agan’rad ngay ni ngar songad, nge tow’ath ni yag riy ngorad.

9, 10. Uw n’umngin nap’an nib t’uf ni nge sonnag Abraham nge Sarah Jehovah?

⁹ Am lemnag Abraham nge Sarah. Yow bagayad e “piin nib mich Kristus u wun’rad ma ba gum’an’rad, ma aram fan ni ke yog ngorad e tin ni yog Got nra pi’.” Be yog e Bible nu tomuren ni “par Abraham nib gum’an’,” ma aram me yag ngak e n’en ni micheg Jehovah nra pi’ ngak ni aram e ra tow’athnag me yoornag e piin owchen. (Heb. 6:12, 15) Mang fan nib t’uf ni nge gum’an’nag Abraham ir? Bochan e ba n’uw nap’an mfini lebug e n’en ni ke micheg Jehovah. Re m’ag ni baaram ni ngongliy Jehovah u thilrow Abraham e tabab ko Nisan 14, ko duw ni 1943 B.C.E. Aram e ngiyal’ nra th’abed Sarah nge chon e tabinaw rorow fare Lul’ ni Eufrates nga barba’, ma ranod nga lan fare Nam ni Kan Micheg. Nap’an ni taw Abraham e ngaram, ma thingari son u lan 25 e duw mfin nni gargeleg Isak ni fak ko duw ni 1918 B.C.E. Tomuren e re n’ey, ma aram miki son u lan 60 e duw mfin nni gargeleg Esau nge Jakob ni tungin ko duw ni 1858 B.C.E.​—Heb. 11:9.

¹⁰ Uw ga’ngin e binaw nni pi’ ni nge tafanay Abraham? Be gaar e Bible: “De pi’ [Jehovah] bayang riy ngak Abraham ni ngari mil suwon ngak, ni mus nga taareb e square foot e but’; machane yog Got ni bayi pi’ ngak nge tafnay nge piin ni owchen ni bay ra bad nga tomren. Ngiyal’ i n’en ni baaram ni yog Got e re bugithin ney ngak Abraham e dariy e bitir rok Abraham.” (Acts 7:5) Ere, fini gaman 430 e duw nga tomuren ni th’ab Abraham fare lul’ ni Eufrates nga barba’, mfin aram e ngiyal’ nni yarmiy e piin owchen ni ngar manged girdien reb e nam ni ngar tafnayed e re nam nem.​—Ex. 12:40-42; Gal. 3:17.

11. Mang fan ni m’agan’ Abraham ngay ni nge sonnag Jehovah? Mang boch e tow’ath nra yag ngak boch nga m’on ni bochan e gum’an’ ni tay?

¹¹ Ba m’agan’ Abraham ngay ni nge son ni bochan e ba mich u wan’ nra lebguy Jehovah e pi n’en ni ke micheg. Ba pagan’ ngak Jehovah. (Mu beeg e Hebrews 11:8-12.) Ba felfelan’ Abraham ngay ni nge son ni yugu aram rogon nde lebug e pi n’en ni micheg Got ngak ko ngiyal’ ni immoy riy. Machane, am lemnag gelngin e felfelan’ nra tay Abraham u nap’an ni yira faseg ko yam’ ko ngiyal’ ni ke paradis e fayleng. Ra gin u nap’an nra nang urngin e thin u lan e Bible ni kan tay murung’agen ngay nge piin nra bad ni owchen.a Kum lemnag gelngin e felfelan’ nra tay u nap’an nra nang rogon ni ke un i lebguy e n’en nib m’agan’ Jehovah ngay ni fan ko faen ni owchen ni kan micheg! Dariy e maruwar riy nra felfelan’ ni ke son ni aram n’umngin nap’an.

12, 13. Mang fan nib t’uf ni nge gum’an’ Josef, ma uw rogon ni dag nib puluw e lem ni i tay?

¹² Josef ni fak tungin Abraham e ki dag nib m’agan’ ngay ni nge son. Boor ban’en nni rin’ ngak Josef nde mat’aw. Som’on e pi’ bogi pumoon ni walagen ni chuway’ ni nge mang sib u nap’an ni ke gaman sogonap’an 17 e duw rok. Ngemu’ mu kun t’ar e thin nga daken nga nog ni ke kol leengin e masta rok u gelngin, ma aram mi non’ nga kalbus ngan tay e chen ngak. (Gen. 39:11-20; Ps. 105:17, 18) Ere, yugu aram rogon ni i par Josef nib yul’yul’, machane gowa bod ni yibe gechignag ko bin ni ngan tow’athnag. Yugu aram rogon, ma tomuren 13 e duw ma aram me thil boch ban’en u puluwon Josef. Ni pag u kalbus ma aram min tay nga reb e liw ni nge par ni ir e ba migid ko en nth’abi tolang u Egypt.​—Gen. 41:14, 37-43; Acts 7:9, 10.

¹³ Ere gur, i aw e pi ngongol nem nde mat’aw nga laniyan’ Josef? Ma gur, i par ndaki pagan’ ngak Jehovah? Danga’. Ere, mang e ayuweg Josef ni nge gum’an’nag ir nge son? Michan’ rok ngak Jehovah. Manang ni Jehovah e ir e be gagiyegnag e pi n’en ni be buch. Mu tay fanam i yan u rogon ni tamilangnag e re n’ey u nap’an ni gaar ngak fapi pumoon ni walagen: “Dab mu tamdaggad; ya dabiyog ni nggu tiyeg nga luwan Got. Mu puruy’niged ni ngam ngongliyed e kireb ngog, machane me yib Got ngay nge pingeg nga daken e fel’ ni fan e nge ayuweg e pogofan rok e girdi’ ni pire’, ni piin ni ka yad ba fos e bin daba’ e rran ni bochan e tin ni mu rin’ed ngog.” (Gen. 50:19, 20) Ere, manang Josef nde aw nib m’ay fan e son ni ke tay ni aram n’umngin nap’an.

14, 15. (a) Mang fan ni gad ra ngat nga rogon e gum’an’ ni i tay David? (b) Mang e ayuweg David ni nge gum’an’nag ir nge son?

¹⁴ David ni Pilung e kun rin’ boch ban’en ngak nde mat’aw. Yugu aram rogon ni ke dugliy Jehovah David ni nge mang pilung u Israel u nap’an nri kab pagel, machane thingari son ni sogonap’an 15 e duw u m’on ni nge mang pilung ko ganong ni yib riy. (2 Sam. 2:3, 4) Ba ngiyal’ ko re ngiyal’ i n’em, ma aram e thingari mil rok Saul ni Pilung ni bochan e be guy rogon ni nge li’ nge yim’.b Bochan e re n’ey, ma aram e thingari mil ni be mith. Immoy yu ngiyal’ ni i mith u boch e binaw ni gathi binaw rok, ma yu ngiyal’ e i mith u lan boch e yiy. Mus nga nap’an nni li’ Saul nge yim’ u nap’an e mahl, maku thingari son David ni sogonap’an medlip e duw u m’on ni nga fin nni pi’ mat’awun ni nge mang pilung u Israel.​—2 Sam. 5:4, 5.

¹⁵ Mang fan ni m’agan’ David ngay ni nge gum’an’nag ir nge son? I pi’ e fulweg ko re deer ney u daken reb e tang ni yon’. U lan e re tang nem ma aningeg yay ni sul u daken fare deer ni be gaar: “Uw n’umngin nap’an?” Baaray e n’en ni yog nga tomuren. I gaar: “Kug tor ko t’ufeg rom ni dabi mus; Bay gu felan’, ni bochan e ga ra chuwegeg u pa’rad. Somol, bay gu tangnigem, ni bochan e ku um gol ngog.” (Ps. 13:5, 6, BT) Manang David nib t’uf rok Jehovah ma gubin ngiyal’ nra i par nib yul’yul’ ngak. I par ni be sonnag e ngiyal’ ni yira chuweg u fithik’ e gafgow ni i tay, miki sul nga i lemnag rogon ni i ayuweg Jehovah u fithik’ boch e magawon ni i mada’nag ni ke thumur. Arrogon, manang David ndabi aw nib m’ay fan e son ni ke tay ni aram n’umngin nap’an.

16, 17. Uw rogon ni ke dag Jehovah Got nge Jesus Kristus e kanawo’ nib fel’ ni ngan folwok riy u rogon ni ke m’agan’row ngay ni ngar songow?

¹⁶ Der ma lemnag Jehovah ni ngad rin’ed ban’en ni mus ngak ma dabun ni nge rin’. Ir e ke dag e bin th’abi fel’ e kanawo’ ngodad u rogon ni ke m’agan’ ngay ni nge sonnag boch ban’en. (Mu beeg e 2 Peter 3:9.) Ke yan bokum biyu’ e duw ni ke m’agan’ ngay ni nge son ni bochan e nge yag ni tamilang e fulweg ko fare deer ni ke sum u lan fare milay’ nu Eden. Ke “gum’an’nag ir be son” maku be par ni “be athapeg ni nge taw” ko ngiyal’ ni yira tayfan e ngachal rok nib thothup. Angin nra yib riy e, aram e yira tow’athnag urngin e piin ni kar gum’an’naged yad “kar sonnaged.”​—Isa. 30:18, NW; ftn.

¹⁷ Ku arrogon Jesus ni kki m’agan’ ngay ni nge son. Yugu aram rogon ni par nib yul’yul’ nge mada’ ko yam’ u nap’an ni immoy u fayleng, miki ognag fel’ngin fare biyul ni maligach ngak Jehovah u nap’an e duw ni 33 C.E., machane thingari son nge mada’ ko duw ni 1914 mfini tabab ko gagiyeg. (Acts 2:33-35; Heb. 10:12, 13) Ku gad manang nthingari son nge mada’ nga tungun fare Biyu’ i Duw Nra Gagiyeg riy, mfin aram e ngiyal’ ni yira thang urngin e pi toogor rok ndariy n’umngin nap’an. (1 Kor. 15:25) Ba n’uw nap’an ni nge son Jesus, machane ba pagan’dad ndabi yan i aw nib m’ay fan e son nra tay ni aram n’umngin nap’an.

MANG E RA AYUWEGDAD?

18, 19. Mang e ra ayuwegdad ni nge m’agan’dad ngay ni ngad gum’an’naged gadad ngad songad?

¹⁸ Dariy e maruwar riy ni gad gubin nib t’uf ni ngad gum’an’naged gadad me m’agan’dad ngay ni ngad songad. Machane, mang e ra ayuwegem ni ngam rin’ e re n’ey? Thingar mu ning gelngin Got nib thothup u daken e meybil. Dab mu pagtalin ni gum’an’ e aram bang u wom’engin gelngin Got nib thothup. (Efe. 3:16; 6:18; 1 Thess. 5:17-19) Ere, thingar mu wenig ngak Jehovah ni nge ayuwegem ya nge yag nim gum’an’nagem.

¹⁹ Ku dab mu pagtalin ni michan’ nge pagan’ rok Abraham, nge Josef, nge David ngak Jehovah e aram e n’en ni ayuwegrad ni ngar gum’an’naged yad ngar sonnaged Jehovah ni nge lebguy e pi n’en ni ke micheg. Dar pared ni yigoo yad nge pi n’en ni yad baadag e ur lemnaged. Ere, nap’an ni gad ra lemnag angin ni yib ngorad ni bochan e ra sonnaged Jehovah, ma aram e rayog ni nge pi’ e athamgil nga lanin’dad ni ngkud gum’an’naged gadad ngad songad.

20. Mang e susun ni nge bagadad me dugliy ni nge rin’?

²⁰ Ere, yugu aram rogon ni gad be mada’nag boch e magawon nge skeng, machane kad dugliyed u wan’dad ni ngad ‘songad.’ Arrogon, bay yu ngiyal’ nrayog ni ngad fithed ni nge lungudad, “Somol, uw n’umngin nap’an?” (Isa. 6:11) Machane, bochan ni be ayuwegdad gelngin Got nib thothup, ma aram fan nra bagadad ma ke dugliy ni nge folwok rok Jeremiah ni faani gaar: “Jehovah e kemus ni ir e urngin ban’en ngog . . . Aram fan ni bay gu par nggu sonnag.”​—Lam. 3:21, 24, NW.