‘Dab Mu Rus . . . Mag Tabab ko Maruwel’

1, 2. (a) Mang e maruwel nib ga’ fan nni pi’ ngak Solomon? (b) Mang fan ni yog David ni be magafan’ ngak Solomon?

NI PI’ reb e maruwel ngak Solomon ni aram e nge yarmiy rogon e maruwel ni ngan tay ko fare tempel u Jerusalem. Re tempel nem nni toy e aram reb e maruwel nrib ga’ fan ni immoy. Re naun nem ni ngan toy e thingari “fel’ yaan me gilbuguwan u fayleng.” Maku reb e ban’en nib ga’ fan e, re tempel nem e nge yan i par ni aram e “gin bayi par fare Tempel [“naun,” NW] rok Somol ni Got riy.” Ere, dugliy Jehovah Solomon ni nge yarmiy rogon e maruwel ni ngan tay ko re naun nem.​—1 Kron. 22:1, 5, 9-11, BT.

² Ba pagan’ David ni Pilung ngay nra ayuweg Got Solomon, machane ngiyal’ nem e kab bitir Solomon “ndawori yoor ban’en ni ke nang.” Ere gur, rayog rok ni nge rin’ e re maruwel nem ni aram e nge toy fare tempel ndabi rus? Gur, ra mo’maw’ rogon ni nge rin’ e re maruwel nem ni bochan e kab bitir ndawori yoor ban’en ni ke nang? Faanra nge yag rok Solomon ni nge rin’ e re maruwel nem, ma thingari athamgil ndabi rus me rin’ e maruwel ni kan pi’ ngak.

3. Mang e rayog ni nge fil Solomon rok e chitamangin u rogon ni nge dabi rus?

³ Dabisiy ni boor ban’en ni fil Solomon rok e chitamangin u rogon ni nge dabi rus. Nap’an ni kab pagel David, ma aram me li’ boch e gamanman ni yib ni nge k’ad e saf ko chitamangin nge fek. (1 Sam. 17:34, 35) Ki dag nder rus u nap’an ni cham ngak Goliath nreb e salthaw nib falu’, mab ga’ nib tagiyet. Arrogon, bochan gelngin Got nge bochi malang nib pach downgin ni fanay David, ma aram me yag ni nge gel ngak Goliath.​—1 Sam. 17:45, 49, 50.

4. Mang fan nib t’uf ni nge dabi rus Solomon?

⁴ Ere, aram fan nib puluw ni nge pi’ David e athamgil nga laniyan’ Solomon ni nge dabi rus me toy fare tempel! (Mu beeg e 1 Kronicles 28:20.) Faan gomanga rus Solomon, ma rayog ni nge k’aring e re n’ey ni nge dabi tabab ko maruwel nni pi’ ngak. Ma gad manang ni kab gel e kireb ko re n’ey ko bin ni nge dabi rin’ e maruwel rok nib fel’ rogon.

5. Mang fan nib t’uf ni nge dab da rusgad?

⁵ Ba t’uf ni nge ayuwegdad Jehovah ni nge dab da rusgad ya nge yag nda mu’naged e maruwel ni kan pi’ ngodad ni bod rogon Solomon. Ere, chiney e ngad filed murung’agen boch e girdi’ ni ur moyed kakrom nda ur rusgad. Pi n’ey e rayog ni nge ayuwegdad ni ngad lemnaged rogon ni ngad daged ndarud rusgad, ma gad mu’nag e maruwel ni kan pi’ ngodad.

BOCH E GIRDI’ NRA DAGED NDARUR RUSGAD

6. Mang e ri ga baadag u rogon ni dag Josef nder rus ni nge rin’ e tin nib mat’aw?

⁶ Am lemnag rogon ni dag Josef nder rus ni nge rin’ e tin nib mat’aw u nap’an ni guy leengin Potifar rogon ni nge waliy ni nge un ko ngongol ndarngal. Dabisiy ni manang nrayog ni nge par e yafos rok nga thatharen e riya’ ni faanra siyeg ni ngar parew e re ppin nem. Machane yugu aram rogon, me dag nder rus ni nge rin’ e tin nib mat’aw me siyeg e n’en nni waliy ngay.​—Gen. 39:10, 12.

7. Mu weliy rogon ni dag Rahab nder rus. (Mu guy e sasing ni bay u tabolngin e re article ney.)

⁷ Rahab e ku ir be’ ni dag nder rus. Nap’an ni yan fa gal damit nu Israel nga tafen u Jeriko, ma rayog ni nge rus me siyeg ni nge ayuwegrow. Machane, bochan nib pagan’ ngak Jehovah, ma aram e de rus ni nge mithagrow me ayuwegrow ni ngar chuwgow u rom nde buch ban’en rorow. (Josh. 2:4, 5, 9, 12-16) Ba mich u wan’ Rahab ni Jehovah e ir e bin riyul’ e Got, mab pagan’ nrayog rok Jehovah ni nge n’igin ni nge milfan e re nam nem ngak piyu Israel. De pag yugu boch e girdi’ ni ngar k’aringed e marus ngak ni kub muun e pilung nu Jeriko ngay, maku de pag e re n’ey ni nge taleg ni nge dabi rin’ e n’en ni manang nthingari rin’. Bin riyul’ riy e, rin’ ban’en u reb e kanawo’ ni ayuweg e yafos rorad chon e tabinaw rok.​—Josh. 6:22, 23.

8. Mang angin ni yib ngak e pi apostal rok Jesus ni bochan e i dag nder rus?

⁸ Pi apostal rok Jesus ni yad ba yul’yul’ e kur daged e kanawo’ nib fel’ ni ngan folwok riy u rogon nra daged ndarur rusgad. Kar guyed rogon ni dag Jesus nder rus. (Matt. 8:28-32; John 2:13-17; 18:3-5) Ere, n’en ni rin’ Jesus e ayuwegrad ni ngkur daged ndarur rusgad. Aram fan nap’an ni guy e pi Sadduse rogon ni ngar taleged yad ndab kur machibnaged fithingan nge murung’agen Jesus, ma dar folgad.​—Acts 5:17, 18, 27-29.

9. Uw rogon ni be ayuwegdad e 2 Timothy 1:7 ni ngad nanged e gin ni be yib gelngidad riy ni nge dab da rusgad?

⁹ Josef, nge Rahab, nge Jesus, nge pi apostal rok e ra daged ni kar dugliyed u wan’rad ni ngar rin’ed e tin nib fel’. Gathi ur pared nda ur rusgad ni bochan e kaygi pag rogon e pagan’ ni yad be tay. Ya fan nda ur rusgad e bochan ni ur taga’gad ngak Jehovah. Ku arrogodad ni gad ma mada’nag boch ban’en nib t’uf ni ngad daged riy ndarud rusgad. Machane, ba t’uf ni ngad taga’gad ngak Jehovah ko bin ni ngad taga’gad ngodad. (Mu beeg e 2 Timothy 1:7.) Ere, chiney e ngad weliyed l’agruw ban’en nib t’uf ni nge m’ug riy ndarud rusgad ni aram e: rogon e pi n’en ni gad ma rin’ u lan e tabinaw rodad ngu lan e ulung.

BOCH BAN’EN NI GAD MA RIN’ NIB T’UF NI NGE M’UG RIY NDARUD RUSGAD

10. Mang fan nib t’uf ni nge dabi rus e piin fel’ yangaren ni Kristiano?

¹⁰ Boor ban’en ni ma yib nga puluwon e piin fel’ yangaren nib t’uf ni nge m’ug riy ndarur rusgad ni ngar pigpiggad ngak Jehovah. Rayog ni ngar filed ban’en ko n’en ni rin’ Solomon, ni aram e dag nder rus ni nge dugliy boch ban’en u fithik’ e gonop ya nge yag ni mu’nag e maruwel ko fare tempel, mi yad guy rogon ni ngar folwokgad rok. Yugu aram rogon nrayog maku susun ni nge pi’ e piin gallabthir e fonow ngak e piin fel’ yangaren, machane bin riyul’ riy e bay ban’en nib ga’ fan nthingari dugliy e piin fel’ yangaren. (Prov. 27:11) Ba t’uf ni ngar athamgilgad ndab ra rusgad ya nge yag nra dugliyed boch ban’en u fithik’ e gonop ni bay rogon ko piin ni yad ma chag ngorad, nge pi n’en ni yad ma chuweg e chalban rorad ngay, nge rogon ni ngar pared nib fel’ e ngongol rorad, nge ngiyal’ ni ngar uned ko taufe. Fan nib t’uf ni ngar athamgilgad ni nge dab ra rusgad e bochan ni faan yad ra rin’ e pi n’ey, ma aram e yad be togopuluw ko n’en nib m’agan’ Satan ngay ni ir e en ni ma gathibthibnag Got.

11, 12. (a) Uw rogon ni dag Moses nder rus? (b) Uw rogon nrayog ni nge folwok e piin fel’ yangaren rok Moses?

¹¹ Reb e ban’en nib ga’ fan nthingari dugliy e piin fel’ yangaren e bay rogon ko pi n’en ni ngar nameged ni ngar rin’ed. Bay boch e nam nib ga’ ni yima pi’ e athamgil nga laniyan’ e piin fel’ yangaren riy ni ngar nameged e skul nib tolang nge maruwel nib tolang puluwon. Ma boch e nam e rayog ni nge lemnag e piin fel’ yangaren riy nthingar ra guyed rogon ni ngar rin’ed boch ban’en ni ngar ayuweged e tabinaw rorad ko tin nib t’uf ko par rorad ni bochan e bay e magawon ko salpiy. Faanra ireray e magawon ni ga be mada’nag, ma ngam lemnag e n’en ni rin’ Moses. Fare pin ni fak Farao e ir e chuguliy Moses, ere ba mom nrayog ni nge nameg boch ban’en ni nge rin’ nra gilbuguwan riy me yoor e salpiy rok. Maku reb e, dabisiy ni i towasariy girdien e tabinaw rok u Egypt, nge pi sensey, nge pi tafonow ni nge rin’ e re n’ey! Machane, yugu aram rogon ma de rus Moses ni nge par nib mudugil ni fan ko bin riyul’ e liyor. (Heb. 11:24-26) Bochan e re n’ey, ma aram me tow’athnag Jehovah, ma gad manang ni ka boor e tow’ath nra yag ngak boch nga m’on.

¹² Nap’an ni digey Moses e flaab ni immoy riy u Egypt, ma de rus ni nge pagan’ ngak Jehovah. Ere, ku arrogon ni piin fel’ yangaren ndarur rusgad ni ngar nameged boch ban’en ni fan ko tirok Got, mar m’oneged Gil’ilungun u lan e yafos rorad e ku ra tow’athnagrad Jehovah. Ra ayuwegrad ni ngar pied e tin nib t’uf ko tabinaw rorad. Nap’an e bin som’on e chibog, ma aram me nameg Timothy boch ban’en ni fan ko tirok Got u nap’an ni kab fel’ yangaren, maku arrogom nrayog ni ngam rin’ e re n’ey.a​—Mu beeg e Filippi 2:19-22.

13. Uw rogon ni yag rok reb e walag nib pin ni kab fel’ yangaren ni nge rin’ e n’en ni be nameg ni bochan e athamgil ni nge dabi rus?

¹³ Immoy reb e walag nib pin ni ma par u Alabama nreb e binaw u Meriken nthingari athamgil ndabi rus ni nge nameg boch ban’en ni fan ko tirok Got. I yoloy ni gaar: “Gu ilal ni gag be’ ni gub tamra’. Rib mo’maw’ ni nggu non ngak e girdi’ u Kingdom Hall. Ere, ri kub gel e mo’maw’ riy ni nggu tugtuguy e mab rok be’ ni dag nang owchen u nap’an ni yibe yan ko machib.” Bochan ni ayuweg e gallabthir rok nge girdi’ u lan e ulung, ma aram me yag rok ni nge rin’ e n’en ni be nameg ni aram e nge un ko regular pioneer. I yog ni gaar: “Fayleng rok Satan e ma k’aring e girdi’ ni ngar nameged e skul nib tolang, mar guyed rogon ni nge gilbuguwrad, me yoor e salpiy nge chugum rorad. Yooren e ngiyal’ e der ma yag ko girdi’ ni nge yag e pi n’em ngorad, ma aram mar pared ni yad be mochuch ma be kireban’rad. Machane, rib gel e felfelan’ ni be yib ngog ko pigpig ni gu be tay ngak Jehovah ma gu be guy ni bay angin e n’en ni gu be rin’.”

14. Mang boch ban’en ni ma buch nib t’uf ni nge dag e piin gallabthir ni Kristiano riy ndarur rusgad?

¹⁴ Ku arrogon e pi gallabthir ni Kristiano nib t’uf ni nge dab ra rusgad. Bod nrayog ni nga i yog e en nib ga’ ko maruwel ngom ni ngam maruwel nge pag e tayim ni ga ma maruwel riy ko rofen ni kam dugliy ni ngam ted chon e tabinaw rom e fol Bible ni tabinaw, ara rofen ni ga ma un ko machib, nge muulung. Ba t’uf ni ngam guy rogon ni nge dab mu rus ni ngam siyeg e n’en ni ke yog e en nib ga’ ko maruwel ngom, mag dag e kanawo’ nib fel’ nrayog ni nge folwok pi fakam riy. Fa reb e rayog ni bay in e gallabthir u lan e ulung ni yad ma pag pi fakrad ni ngar rin’ed boch ban’en ni dabum ni nge rin’ fakam. Ere, sana rayog ni nge fith e pi gallabthir nem ngom ko mang fan nder un fakam ko pi n’em. Faanra buch ni aray rogon, ma gur, ga ra guy rogon ni nge dab mu rus mag weliy fan ngorad ni kam dugliy ndabi un fakam ko pi n’em u fithik’ e tayfan, fa?

15. Uw rogon nrayog ni nge ayuweg fa gal thin u Psalm 37:25 nge Hebrews 13:5 e piin gallabthir?

¹⁵ Faan gad ra ayuweg pi fakdad ni ngar nameged boch ban’en ni fan ko tirok Got mar rin’ed e pi n’em, ma aram e ku be mug riy ndarud rusgad. Bod ni, bay boch e gallabthir ni yad be magar ni ngar pied e athamgil nga laniyan’ pi fakrad ni ngar nameged ni ngar uned ko pioneer, ara nga ranod ra pied e ayuw ko gin nib t’uf e ayuw ko machib riy, ara ngar uned ko maruwel u Bethel, ara ngar uned i pi’ e ayuw ko pi Kingdom Hall nge Assembly Hall ni yibe toy. Rayog ni be magar e pi gallabthir ney nri de yag rok pi fakrad ni ngar pigpiggad ngorad u nap’an ni kar pilibthirgad. Machane, pi gallabthir ni yad ba gonop e yad ma dag ndarur rusgad mab michan’rad ko pi n’en ni ke micheg Jehovah. (Mu beeg e Psalm 37:25; Hebrews 13:5.) Ku reb e kanawo’ nrayog ni ngam dag riy nda mur rus ma ga be taga’ ngak Jehovah e aram e ngam ayuweg pi fakam u rogon ni ngar rin’ed e re n’ey.​—1 Sam. 1:27, 28; 2 Tim. 3:14, 15.

16. Uw rogon ni ke ayuweg boch e gallabthir pi fakrad ni ngar nameged boch ban’en ni fan ko tirok Got? Uw rogon ni ke yib angin e re n’ey ngak pi fakrad?

¹⁶ Immoy ba wu’ e mabgol u Meriken nra ayuwegew gal fakrow ni ngar namegew boch ban’en ni fan ko tirok Got. I gaar fare pumoon: “U m’on ni un gal fakmow ko yan nge welthin, ma gamow ma yog ngorow nib gel e felfelan’ ni yow ra tay ni faan yow ra un ko pioneer mar rin’ew boch e maruwel u lan e ulung. Chiney e ireray e n’en ni yow be nameg. Bochan ni i nameg gal fakmow boch ban’en ni fan ko tirok Got ma ke yag ni ngar rin’ew, ma aram e n’en ni ke ayuwegrow ni ngar gelgow ko pi n’en ni yima towasariyrow ngay ko re m’ag rok Satan ney, mar tiyan’row ko pigpig ni yow be tay ngak Jehovah.” Ki yoloy reb e walag ni pumoon ni bay l’agruw e bitir ni fak ni gaar: “Boor e gallabthir ni yad ma athamgil u rogon nrayog rorad maku yad ma fanay e salpiy nge boch ban’en ni bay rorad ni ngar ayuweged pi fakrad ni ngar nameged ni ngar mon’oggad u boch e gosgos, ara boch ban’en ni yad ba salap riy, ara skul. Machane bin riyul’ riy e, kab fel’ ni nge athamgil e gallabthir u rogon nrayog rorad mar fanayed e salpiy nge boch ban’en ni bay rorad ni ngar ayuweged pi fakrad ni nge fel’ e tha’ u thilrad Jehovah. Rib gel e felfelan’ ni kug tew ni kug guyew gal fakmow ni ke yag ni ngar rin’ew boch ban’en ni ka ur namegew ni fan ko tirok Got, nge rogon ni ke yag ni nggu ayuwegew yow ni ngar rin’ew e pi n’ey.” Rayog ni nge pagan’um nra tow’athnag Jehovah e pi gallabthir ni yad ma ayuweg pi fakrad ni ngar nameged boch ban’en ni fan ko tirok ban’en mar rin’ed e pi n’em.

DAB DA RUSGAD NI NGAD RIN’ED BOCH E MARUWEL U LAN E ULUNG

17. Mu weliy boch e kanawo’ nrayog ni nge m’ug riy ndarud rusgad ni ngad rin’ed boch ban’en u lan e ulung.

¹⁷ Kub t’uf ni nge m’ug ndarud rusgad ni ngad rin’ed boch e maruwel u lan e ulung. Bod nib t’uf ni nge dag e piin piilal ndarur rusgad u nap’an ni yad be pithig boch e magawon ni ke sum ni bay rogon nga reb e denen nib ubchiya’ ni ke rin’ be’, ara nap’an ni yad be ayuweg e piin ni kar maad’adgad nib tomgin ara ke yib ba mit e m’ar nib ubchiya’ ngorad. Bay boch e piilal ni yad ma yan nga kalbus ni ngar filed e Bible ngak boch e kalbus ni yad baadag e machib ara ngar ted e muulung u rom. Ma uw rogon e pi walag nib pin ni ka yad ba muchugbil? Boor e kanawo’ nrayog ni ngar pigpiggad riy ngak Jehovah mar daged ndarur rusgad. Rayog ni ngar uned ko pioneer, ara nga ranod ra pied e ayuw ko gin nib t’uf e ayuw ko machib riy, ara ngar uned i pi’ e ayuw ko fare ulung ni ka nog e Local Design/Construction ngay, ara ngar fal’eged e babyor rorad ni ngar uned ko fare skul ni ka nog e School for Kingdom Evangelizers ngay. Ku bay boch e pi walag ney ni kan piningrad ni ngar uned ko fare Skul u Gilead.

18. Uw rogon nrayog ni nge dag e pi walag nib pin ni kar puwelwolgad ndarur rusgad?

¹⁸ Ku gad ba felfelan’ ngay ni bay boch e walag nib pin u lan e ulung rodad ni kar puwelwolgad. Rib t’uf e pi walag ney rodad! Bay boch i yad ni sana dabkiyog ni ngar rin’ed boor ban’en ni fan ko pigpig ni yad be tay ngak Got ni bod kafram, machane rayog ni ngar daged ndarur rusgad mar rin’ed boch e maruwel ni fan ko ulung. (Mu beeg e Titus 2:3-5.) Bod ni, faanra ke yog e piin piilal ngak reb e walag nib pin ni ke puwelwol ni nge non ngak reb e rugod u murung’agen rogon ni nge yalen e munmad rok, mab t’uf ni nge athamgil ndabi rus ya nge yag ni rin’ e re n’ey. Susun e dabi puwan’ ngak fare walag ni bochan rogon e mad ni ma chuw ngay. Machane, rayog ni nge pi’ e athamgil nga laniyan’ ni nge fal’eg i lemnag rogon nrayog ni nge magawonnag laniyan’ yugu boch e girdi’ ni bochan rogon e munmad ni be tay. (1 Tim. 2:9, 10) Faanra i m’ug e t’ufeg ko pi walag ney u boch e kanawo’ ni aray rogon, ma aram e rayog ni ngar ayuweged e ulung ni nge par nib gel.

19. (a) Uw rogon nrayog ni nge dag e pi walag ni pumoon ni kar taufegad ndarur rusgad? (b) Uw rogon nrayog ni nge ayuweg fa gal thin u 2 Korinth 4:7 nge Filippi 2:13 e pi walag ni pumoon ni nge dab kur rusgad?

¹⁹ Kub t’uf ni nge dag e pi walag ni pumoon u lan e ulung ni kar uned ko taufe ndarur rusgad mar rin’ed boch e maruwel u lan e ulung. Faanra m’agan’ e pi walag ney ngay ni ngar pigpiggad ni yad boch e ministerial servant ara piilal, ma ra yib angirad ko ulung. (1 Tim. 3:1) Machane, sana bay boch i yad ni be magar ni nge nameg boch e maruwel u lan e ulung. Sana bay reb e walag ni pumoon ni i rin’ boch ban’en nib kireb kafram, ma bochan e re n’ey ma aram fan ni be lemnag ndariy rogon ni nge mang reb e ministerial servant ara piilal u lan e ulung. Fa reb e rayog ni nge lemnag reb e walag ni pumoon ndabiyog rok ni nge rin’ reb e maruwel ni yira pi’ ngak. Faanra ga be lem ni aray rogon, ma rayog ni nge ayuwegem Jehovah ni nge dab kum rus. (Mu beeg e 2 Korinth 4:7; Filippi 2:13.) Dab mu pagtalin ni mus ngak Moses ma immoy ba ngiyal’ ni lemnag ndabiyog rok ni nge rin’ reb e maruwel ni kan pi’ ngak. (Ex. 3:11) Yugu aram rogon, me ayuweg Jehovah ni nge dab ki rus ya nge yag ni lebguy e maruwel ni kan pi’ ngak. Ere, ku arrogon reb e walag ni pumoon ni kan taufenag ni faanra ning e ayuw rok Got u daken e meybil mi i beeg e Bible rok ni gubin e rran, ma aram e rayog ni nge dab ki rus ni bod rogon Moses. Maku reb e, faanra i fal’eg i lemnag boch e thin nu Bible ni be weliy murung’agen boch e girdi’ nda ur rusgad, ma rayog ni nge ayuweg e re n’ey. Ku rayog ni nge yog ngak e piin piilal u fithik’ e sobut’an’ ni ngan skulnag u rogon ni nge rin’ boch e maruwel, me ognag ir ni nge pi’ e ayuw ko pi maruwel nib t’uf e ayuw riy u lan e ulung. Yibe pi’ e athamgil nga laniyan’ urngin e walag ni pumoon ni kar taufegad ndab ra rusgad mar maruwelgad nib gel ni fan ko ulung!

“I SOMOL NI GOT . . . E BAYI PAR ROM”

20, 21. (a) Mang e puguran David ngak Solomon? (b) Mang e rayog ni nge pagan’dad ngay?

²⁰ I puguran David ni Pilung ngak Solomon nra ayuweg Jehovah nge mada’ ko ngiyal’ ni ke m’ay e maruwel ko fare tempel. (1 Kron. 28:20) Dariy e maruwar riy ni fal’eg Solomon i lemnag e pi thin nem, ma yugu aram rogon ni kab bitir nde yoor ban’en ni manang, machane de pag e re n’em ni nge taleg ni nge dabi rin’ e re maruwel nem. I dag nder rus, me rin’ e maruwel ni kan pi’ ngak, me ayuweg Jehovah ni nge mu’nag e re tempel nem nrib fel’ yaan u lan medlip nge baley e duw.

²¹ Ku arrogodad nrayog ni nge ayuwegdad Jehovah ni nge dab da rusgad ma gad lebguy e maruwel nib milfan ngodad u lan e tabinaw rodad nge ulung ni bod rogon ni ayuweg Solomon. (Isa. 41:10, 13) Faanra ud daged darud rusgad ko pigpig ni gad be tay ngak Jehovah, ma rayog ni nge pagan’dad nra tow’athnagdad e chiney i yan nga m’on. Ere, ‘dab mu rus . . . [mag] tabab ko maruwel.’