“Thin rok Got e . . . Ba’ Gelngin ni Ma Maruwel”

1. Mang fan nib mich u wan’dad ni bay gelngin e Thin rok Got? (Mu guy e sasing ni bay u tabolngin e re article ney.)

GADAD e pi tapigpig rok Jehovah e rib mich u wan’dad ni thin rok Got ni ke pi’ ko girdi’ e “ba fos ma ba’ gelngin ni ma maruwel.” (Heb. 4:12) Boor i gadad e ke guy rogon ni ke maruwel gelngin e thin nu Bible ke thilyeg e yafos rok. Bay boch i walagdad ni ur moyed kafram ni yad ba moro’ro’, ara yad ma fanay boch e falay ni kireb, ara yad ma un ko ngongol ndarngal. Ku bay boch i gadad ni immoy kafram nib gilbuguwan ara boor e salpiy rok, machane ke nang ni bay ban’en ndariy u lan e yafos rok. (Ekl. 2:3-11) Ba gel e felfelan’ riy ni bochan e boor e piin ni ur moyed kafram ni gowa dakuriy e athap rorad e kar pirieged fare pa’ i kanawo’ ni be sor i yan ko yafos ni bochan e ke yag ni nge thilyeg e thin nu Bible e yafos rorad. Dabisiy ni kam beeg murung’agen boch e pi girdi’ ney ko fapi article ni bay ko Fare Wulyang ko Damit ni kenggin e “Bible e Rayog ni nge Thilyeg e Yafos Rok Be’.” Ma pi n’ey e dabisiy ni ma k’aring e felfelan’ ngom. Maku reb e, kam guy ni piin Kristiano e mus nga tomuren ni kar uned ko tin riyul’ maku yad ma ulul i guy rogon ni ngar mon’oggad ko tirok Got ban’en u daken e ayuw ko Bible.

2. Uw rogon ni i maruwel gelngin e Thin rok Got u daken boch e girdi’ ni ur moyed u nap’an e bin som’on e chibog?

² Ere gur, ngad gingad ko re n’ey ni boor e girdi’ e ngiyal’ ney ni ke yag ni nge thil e ngongol rorad ni bochan e kar filed e Thin rok Got? Danga’, ya pi’ n’ey e be puguran ngodad boch ban’en ni i buch rok pi walagdad ni ur moyed u nap’an e bin som’on e chibog ni yad boch e piin ni ur athapeged e yan nga tharmiy. (Mu beeg e 1 Korinth 6:9-11.) Tomuren ni weliy apostal Paul murung’agen e re miti girdi’ ndabiyog ni ngar uned nga Gil’ilungun Got, ma aram me yog ni gaar: “Ba’ boch i gimed ni immoy ni aram rogon.” Machane, bochan e ayuw ko Thin rok Got nge gelngin nib thothup ma aram me yag ni ngar thilyeged e ngongol rorad. Mus nga tomuren nra uned ko tin riyul’, ma immoy boch i yad ni i rin’ boch e denen nib ubchiya’ ni magawonnagrad ko tirok Got ban’en. Be weliy e Bible murung’agen reb e Kristiano ni ir bagayad e piin ni kan dugliy ko bin som’on e chibog nni tharbog ko ulung, me boch nga tomuren miki sul ko ulung bayay. (1 Kor. 5:1-5; 2 Kor. 2:5-8) Faan gad ra lemnag urngin mit e kireb ni i rin’ pi walagdad kafram nge rogon ni ke yag ni ngar gelgad ngay u daken e ayuw ko Thin rok Got, ma gathi be pi’ e re n’ey e athamgil nga lanin’dad?

3. Mang e gad ra weliy ko re article ney?

³ Bochan ni Thin rok Got e aram reb e talin e maruwel ni bay rodad nrib gel gelngin, ma aram fan ni gad baadag ni ngad maruwelgad ngay nib fel’ rogon. (2 Tim. 2:15) Re article ney e gad ra weliy riy rogon nrayog ni ngad paged gelngin e Thin rok Got ni nge maruwel u (1) lan e yafos rodad, (2) nap’an ni gad be machib, nge (3) nap’an ni gad be pi’ e welthin u nap’an e muulung. Pi thin ney ni yibe puguran ngodad e ra ayuwegdad ni ngad daged ngak e Chitamangidad ni bay u tharmiy nib t’uf rodad ma gad be pining e magar ngak ni be fil ngodad e tin nib fel’ nra yib angin ngodad.​—Isa. 48:17.

U LAN E YAFOS RODAD

4. (a) Mang e ba t’uf ni ngad rin’ed ni faanra nge yib angin e Thin rok Got ngodad? (b) Uw rogon ni ga ma tay e tayim ni fan ko beeg Bible?

⁴ Faanra nge yib angin e Thin rok Got ngodad, mab t’uf ni ngaud beeged ni gubin ngiyal’. Machane, bin th’abi fel’ e susun e ngaud beeged ni gubin e rran. (Josh. 1:8) Riyul’ ni yooren i gadad e boor pa’ u puluwon. Machane, susun e dab da paged ban’en ni kub muun ngay boch e maruwel nib milfan ngodad ni ngad rin’ed ni nge magawonnag rogon e tayim ni gad ma tay ni fan ko beeg Bible. (Mu beeg e Efesus 5:15, 16.a) Boor e tapigpig rok Jehovah ni kar pirieged boch e kanawo’ nrayog ni ngaur beeged e Bible riy ni gubin e rran, ndemtrug ko kadbul, ara blayal’, ara ba ngiyal’ u thilin e kadbul nge blayal’. Pi cha’ney e taareb rogon e lem rorad fare psalmist ni faani yoloy ni gaar: “Rib t’uf rog e motochiyel rom! Gu ma par ni gu ma lemnag ni polo’ e rran.”​—Ps. 119:97.

5, 6. (a) Mang nib ga’ fan ni ngaud fal’eged i lemnag e n’en ni gad ma beeg? (b) Uw rogon ni ngad fal’eged i lemnag boch ban’en u reb e kanawo’ nra yib angin ngodad? (c) Uw rogon ni ke yib angin ngom e beeg Bible ni ga ma tay nge thin riy ni ga ma fal’eg i lemnag?

⁵ Gathi kemus nib ga’ fan ni ngaud beeged e Bible rodad, ya kub ga’ fan ni ngaud fal’eged i lemnag e n’en ni gad be beeg. (Ps. 1:1-3) Faan gad ra rin’ ni aray rogon, ma aram e rayog ni ngad folgad ko thin riy ni bay e gonop riy. Ere, demtrug ko gad be beeg e Bible rodad ni ken ni kan printnag ara gad be beeg u lan e tablet ara cellphone, ma susun e ngad nameged ni nge taw e thin riy nga gum’ircha’dad.

⁶ Uw rogon ni ngad fal’eged i lemnag boch ban’en u reb e kanawo’ nra yib angin ngodad? Boor e girdi’ ni kar guyed nib fel’ nu tomuren ni kar beeged bang u lan e Bible, mar talgad ngar lemnaged e pi deer ni baaray ni be gaar: ‘Mang e be fil e re n’ey ngog u murung’agen Jehovah? Mang boch e kanawo’ ni gu be fanay e re thin ney riy nga lan e yafos rog? Mang boch ban’en nib t’uf ni ngkug mon’og riy?’ Faan gad ra meybil ma gad fal’eg i lemnag e n’en ni kad beeged ko Thin rok Got, ma ra k’aringdad ni ngad adaged ni ngad folgad ko pi fonow riy. Faan gad ra rin’ ni aray rogon, ma aram e gad be pag gelngin e thin rok Got ni nge maruwel u lan e yafos rodad.​—2 Kor. 10:4, 5.   

U NAP’AN E MACHIB

7. Uw rogon ni ngad fanayed e Thin rok Got nib fel’ rogon u nap’an e machib?

⁷ Mang e ra ayuwegdad ni ngad fanayed e Thin rok Got nib fel’ rogon u nap’an e machib? N’en nsom’on nrayog ni nge ayuwegdad e aram e ngad fanayed e Thin rok Got ni gubin ngiyal’ u nap’an ni gad be machibnag e girdi’ ngu nap’an ni gad be fil ban’en ngorad. Baaray e n’en ni yog reb e walag ni pumoon u murung’agen e re n’ey. I gaar: “Faanra gimew Jehovah ni gimew be machib u mit e tabinaw, ma yigoo gur e ga ra non fa ka ga ra pag ni nge non boch?” N’en ni be yip’ fan e: Nap’an ni gad ra beeg e Bible u nap’an e machib, ma aram e gad be pag Jehovah ni nge non ngak e en ni gad be machibnag. Gad ra mel’eg reb e thin nu Bible nib fel’ ni ngad beeged ma dariy e maruwar riy ni kab ga’ angin nra yib ko n’en ni gad ra yog. (1 Thess. 2:13) Ere, mu fithem ni nge lungum, ‘Nap’an nra mab e kanawo’ ngog ma gu ma gay rogon ni nggu beeg bang ko Thin rok Got ngak e piin ni gu be weliy fare thin nib fel’ ngorad, fa?’

8. Mang fan nde gaman ni kemus ni ngad beeged e thin nu Bible u nap’an e machib?

⁸ Riyul’ nde gaman ni kemus ni ngad beeged e thin nu Bible ngak e piin ni gad be non ngorad. Mang fan? Bochan e boor e girdi’ ni gathi ri yad manang fan e thin nu Bible, fa reb e ri dar nanged fan. Aram rogon boch e girdi’ ni ur moyed u nap’an e bin som’on e chibog, maku arrogon e ngiyal’ ney. (Rom. 10:2) Ere, yug dab da lemnaged ni yugu rayog rok be’ ni nge nang fan reb e thin nu Bible ni bochan e kad beeged ngak, ya nap’an ni gad ra beeg reb e verse, mab t’uf ni ngad tamilangnaged yu yang riy. Rogon ni ngad rin’ed e re n’ey e aram e rayog ni ngad sulod u daken yu bugithin nib ga’ fan ni kad beeged ko fare verse, ma gad tamilangnag e n’en ni be yip’ fan. Faan gad ra rin’ ni aray rogon, ma aram e rayog ni nge taw e Thin rok Got nga laniyan’ nge gum’irchaen e piin ni yad be motoyil ngodad.​—Mu beeg e Luke 24:32.

9. Uw rogon ni nga dogned boch e thin u m’on ni ngad beeged reb e thin nu Bible nra k’aring e girdi’ ni ngar ted fan e Bible? Mu weliy reb e kanawo’.

⁹ Kub fel’ ni nga dogned boch e thin u m’on ni ngad beeged reb e thin nu Bible nra k’aring e girdi’ ni ngar ted fan e Bible. Bod nrayog ni nge lungudad ngak facha’, “Ngad guyew e n’en ni be yog e En ni Ke Sunmiydad u murung’agen e re n’ey.” Maku reb e, faanra kad mada’naged be’ ni ma un nga reb e teliw ni gathi yad ma yog ni yad e Kristiano, ma rayog ni nge lungudad ngak, “Am guy e n’en ni be yog e Babyor nib Thothup ngodad.” Ma reb e, faanra gad be machibnag be’ ndariy fan e teliw u wan’, ma rayog ni ngad fithed ni nge lungudad, “Ka am rung’ag e re thin ni baaray ni yima yog kakrom?” Arrogon, gad ma lemnag e girdi’ ni be’ nge be’, ma gad ma guy rogon ni nge puluw e n’en ni gad be weliy nga rarogorad.​—1 Kor. 9:22, 23.

10. (a) Mu weliy e n’en ni buch rok reb e walag ni pumoon. (b) Uw rogon ni kam guy gelngin e Thin rok Got ni ke maruwel u nap’an e machib ni ga ma tay?

¹⁰ Boor e girdi’ ni kar guyed ni faanra ur fanayed e Thin rok Got u nap’an e machib, mab ga’ angin nra yib ngak e piin ni yad be machibnag. Am lemnag reb e ban’en ni ke buch. Immoy reb e walag ni pumoon ni ma sul nga i guy reb e pumoon ni ke pilibthir ni ke yoor e duw ni ma beeg e pi magazine rodad. Immoy bayay u nap’an ni yan i guy e re pilibthir nem ni nge pi’ e ken ni kab beech e Wulyang ko Damit ngak, ma aram me dugliy ni nge beeg reb e thin nu Bible ngak ni bay ko re ke babyor nem. Ere, beeg fare thin ni bay ko 2 Korinth 1:3, 4 (NW) ni be gaar: “Chitamangidad nrib tarunguy e girdi’, ni ir faanem i Got ni ma fal’eg lanin’uy . . . e ma fal’eg lanin’dad u fithik’ urngin e magawon ni ma yib ngodad.” Ri taw e pi thin ney ni beeg e re walag ney nga gum’irchaen fare pilibthir, ma aram me yog ngak fare walag ni ngki beeg bayay. Tomuren e re n’ey, ma aram me yog nrib t’uf ni ngan fal’eg lanin’row e ppin rok. Re thin nu Bible ney ni beeg e re walag nem ngak e k’aring ni nge adag ni ngki nang boch ban’en u Bible. Ere uw rogon u wan’um, gathi rriyul’ nib gel gelngin e Thin rok Got ni gad ma fanay u nap’an e machib?​—Acts 19:20.

NAP’AN NI GAD BE PI’ E WELTHIN U NAP’AN E MUULUNG

11. Mang e ba milfan ngak e pi walag ni pumoon ni yad ma pi’ e welthin u nap’an e muulung?

¹¹ Gad gubin ni gad ma felfelan’ ni gad ma un ko pi muulung, nge assembly, nge convention ni gad ma tay. Bin th’abi ga’ i fan ni gad ma un ko pi muulung ney e bochan e ngad liyorgad ngak Jehovah. Kub ga’ angin ngodad e pi fonow ni yima pi’ u nap’an e pi muulung ney. Pi walag ni pumoon ni yad ma pi’ e welthin u nap’an e pi muulung ney e rib manigil e tow’ath ni bay rorad. Machane, susun e dab ra paged talin nrib tomal e biney e maruwel ni kan pag fan ngorad, ya ba maruwel nrib ga’ fan. (Jas. 3:1) Ere, gubin ngiyal’ nthingar ra guyed rogon ni nge puluw e n’en ni yad be fil ko girdi’ ko n’en ni bay u lan e Thin rok Got. Faanra gur reb e walag ni pumoon ni ga ma un i pi’ e welthin u nap’an e muulung, ma uw rogon ni ngam pag gelngin e thin nu Bible ni nge maruwel u nap’an ni ga be pi’ e welthin rom?

12. Uw rogon ni nge guy e en ni be pi’ e welthin rogon ni nge yan i aw nib puluw e welthin rok ko n’en ni be yog e Bible?

¹² Mu guy rogon ni nge yan i aw nib puluw e welthin rom ko n’en ni be yog e Bible. (John 7:16) Mang e ba muun ko re n’ey? Reb riy e ngam kol ayuw nrogon ni ga be pi’ e welthin rom, nge rogon ni ga be weliy boch ban’en ni ke buch rok boch e girdi’, ara rogon ni ga be fanay e fanathin e dabi k’aring e girdi’ ni nge dab kur lemnaged e pi thin nu Bible ni ga be fanay. Maku reb e, dab mu pagtalin nib thil e bin baaray ni kemus ni ngam beeg boor e thin nu Bible ko bin ni ngam fanay e Bible ni ngam fil ban’en ko girdi’. Bin riyul’ riy e, faanra yigi pag urngin e thin nu Bible nim beeg ma yooren riy e dabiyog ni nge par u laniyan’ e girdi’. Ere, ngam fal’eg i mel’eg e thin nu Bible ni ga ra beeg, mag tay e tayim ni ngam beeg, mag weliy fan, mag fanay e fanathin ni nge tamilangnag fan e re thin nem, ngemu’ mag weliy rogon nrayog ni ngan fol riy. Faanra ga be fanay e outline ni ke ngongliy e ulung rodad u nap’an ni ga be pi’ e welthin rom, mag fal’eg i fil e re outline nem nib fel’ rogon nge pi thin nu Bible ni bay riy. Mu guy rogon ni ngam nang rogon nib peth e thin ni bay ko re outline nem ko pi thin nu Bible ni kan tay ngay. Ngemu’, mag fanay boch e thin nu Bible ni bay riy ni ngam tamilangnag e n’en ni be weliy e re outline nem. (Rayog ni ngam pirieg boch e fonow nib manigil ko study 21 nge mada’ ko 23 ko fare ke babyor ni kenggin e Benefit From Theocratic Ministry School Education ni thin ni Meriken.) Bin th’abi ga’ fan riy e, ngam meybil ngak Jehovah mag wenig ngak ni nge ayuwegem u rogon ni ngam weliy e n’en ni bay ko Thin rok nib fel’ rogon.​—Mu beeg e Ezra 7:10b; Proverbs 3:13, 14.

13. (a) Uw rogon ni yib angin ngak reb e walag nib pin e pi thin nu Bible ni yima beeg u nap’an e muulung? (b) Uw rogon ni ke yib angin ngom rogon ni yima fanay e thin nu Bible u nap’an e muulung?

¹³ Ku bay reb e walag nib pin ni ma par u Australia ni ki yib angin ngak e thin nu Bible ni yima fanay u nap’an e muulung. Yugu aram rogon nib kireb rogon e chugol nni tay ngak u nap’an ni kab bitir, machane i fil e Bible me ognag e yafos rok ngak Jehovah. Yugu aram rogon, mab mo’maw’ ngak ni nge mich u wan’ nriyul’ nib t’uf rok Jehovah. Machane, faani munmun ma aram mfini mich u wan’ nib t’uf rok Got. Mang e ayuweg ni nge tamilang e re n’ey u wan’? I thil e lem rok u nap’an ni fal’eg i lemnag reb e thin nu Bible nni weliy u nap’an reb e muulung rodad, ngemu’ me fal’eg i gay murung’agen, miki beeg yugu boch e thin nu Bible nib peth fan ko re thin nem.c Me gur, ke yib angin ngom e Thin rok Got ni yima fanay u nap’an e pi muulung, nge assembly, nge convention?​—Neh. 8:12.

14. Uw rogon ni nge m’ug nib ga’ fan u wan’dad e Thin rok Jehovah?

¹⁴ Gathi gad be pining e magar ngak Jehovah ni ke pi’ e Thin rok ngodad, ni aram e Bible? Gathi kemus ni ke pi’ ko girdi’, ya kki tay u gil’ e n’en ni ke micheg ni aram e ra par e thin rok ndariy n’umngin nap’an. (1 Pet. 1:24, 25) Ere, ngad athamgilgad ngaud beeged e Thin rok Got ni gubin ngiyal’, ma gad fol riy, ma gad fanay ni ngad ayuweged yugu boch e girdi’ ngay. Faan gad ra rin’ ni aray rogon, ma aram e gad be dag nib t’uf rodad mab ga’ fan u wan’dad e biney e tow’ath ni ke pi’ Got ngodad, ma bin th’abi ga’ fan riy e ra m’ug riy nib t’uf rodad e En ni Ke Yib rok, ni aram Jehovah Got.