1 Mang Fan ni Ngan Meybil?

MEYBIL. Bay in i ban’en u Bible ni baadag e girdi’ ni ngar weliyed murung’agen. Mu lemnag lal e deer ni ba ga’ ni ma fith e girdi’ u murung’agen e meybil; ma ngad guyed e fulweg riy u lan e Bible. Pi article ney e kan yoloy ni fan e nge ayuwegem ni ngam nang rogon ni ngam tabab ko meybil nge rogon ni nge yib angin e meybil rom.

U GA’NGIN yang u fayleng, ma urngin e yalen nge teliw, e ma meybil e girdi’ riy. Ra be’ ma ir e ma meybil rok, maku yima meybil u taabang, ngu lan e galesiya, ngu lan e pi tempel ngu lan e yungi n’en ni tafen e meybil. Yad ma fanay e rosario, nge liyos, nge babyoren e meybil u nap’an e meybil rorad.

Meybil ni ma tay e girdi’ e be dag ni yad ba thil ko urngin ban’en nib fas u roy u fayleng. Riyul’ ni boor ban’en ni taareb rogon u thilin e girdi’ nge gamanman. Bod ni gamanman e ba t’uf e ggan, nifeng, nge ran rorad, maku arrogon e girdi’. Gamanman e yima gargelnag, maku ma yim’, maku arrogon e girdi’. (Eklesiastes 3:19) Machane kemus ni goo girdi’ e ma meybil. Mang fan?

Fulweg riy e ba t’uf ni ngad meybilgad. Ma lemnag e girdi’ ni ireray e kanawo’ nrayog ni ngad tawgad ko gin nib thothup mab fel’. Be dag e Bible ni kan sunmiydad ni gad baadag ni ngad meybilgad ngak Got. (Eklesiastes 3:11) Immoy ba ngiyal’ ni yog Jesus Kristus ni gaar: “Nge felan’ e piin ni kar pirieged u lanin’rad ni kar gafgowgad ndabisiy ni nge yog Got ngorad.”—Matthew 5:3.

Ma toy e girdi’ tafen e meybil rorad nge boch ban’en ni bay rogon ko liyor, ma yad ma fanay boor e awa ya yad baadag ni “nge yog Got ngorad.” Riyul’ ni boch e girdi’ e yad ma ayuweged yad ko tirok Got ara yad ma ning e ayuw ngak yugu boch e girdi’. Machane gad manang ni girdi’ e dabiyog ni ngar ayuweged yad nib fel’ rogon. Gad ba meewar, mab ngoch e yafos rodad, ma dariy gelngidad ni ngad nanged e tin ni bay nga m’on. Kemus ni faen ni th’abi gonop, ma th’abi gel gelngin, ma dabi yim’ biid e rayog ni nge pi’ urngin ban’en nib t’uf rodad. Bochan nib t’uf rodad e tirok Got ban’en, ma aram e n’en ni ma k’aringdad ni ngad meybilgad ngak.

Am lemnag e re n’ey: Ka am lemnag nib t’uf ni bay be’ nra ayuwegem ara nge pi’ e gonop ngom ara nge pi’ e fulweg ko pi deer nib mo’maw’ ni ngan nang e fulweg riy, fa? Ka am lemnag nib t’uf ni nge fal’eg be’ lanin’um ko ngiyal’ ni ke yib e magawon ngom nib gel, ara ngiyal’ nib t’uf ni ngam dugliy ban’en nib ga’ fan ara ngiyal’ ni ke kireban’um ya kam rin’ ban’en nib kireb ma ga baadag ni ngan n’ag fan rom?

Rogon ni yog e Bible e ireray e pi n’en nib puluw ni ngaud yibilayed. Kemus ni goo Bible e be weliy murung’agen e pi n’ey nib tamilang, ma boor e meybil rok e pi tapigpig rok Got nib yul’yul’ ni bay riy. Ur meybilgad ngak Got ni nge fal’eg lanin’rad, ma be pow’iyrad, ma be n’ag fan e kireb rorad, ma be fulweg e deer rorad nib mo’maw’.—Psalm 23:3; 71:21; Daniel 9:4, 5, 19; Habakkuk 1:3.

Ba thilthil e meybil ni bay u Bible, machane bay ban’en riy ni taareb rogon. Piin ni ur meybilgad e bay ban’en ni yad manang ni boor e girdi’ e ngiyal’ ney ni dar nanged murung’agen. Yad manang ko mini’ e thingar ra meybilgad ngak.

2 Mini’ e Ngan Meybil Ngak?

GUR, ra rung’ag Got e meybil rodad, ni yugu demtrug ko mini’ e gad be meybil ngak? Girdi’ e ngiyal’ ney e ba ga’ ni yad ma lemnag ni aram rogon. Re n’ey e ba fel’ u wan’ boor e girdi’ nib thilthil e teliw rorad ni yad ma liyor ngak Got u taabang. Machane riyul’ nib fel’ u wan’ Got e liyor ni aram rogon, fa?

Bible e be fil ngodad ni boor e girdi’ kakrom ni yad ma meybil ko pi got ni googsur. Nap’an nni yoloy e Bible ma boor e girdi’ ni yad ma meybil ko liyos. Machane, boor yay ni ke yog Got ngorad nib kireb e re ngongol nem. Psalm 115:4-6 e be yog murung’agen e liyos rorad ni gaar: “Bay telrad, machane dabiyog ni ngar rung’aged ban’en.” Ere rib tamilang ni be yog e re thin ney ni dariy fan ni ngan meybil ngak reb e got ni dabiyog ni nge rung’ag ban’en.

Thin nu Bible e be tamilangnag e re n’ey. Elijah ni profet rok Got e ke yog ngak e pi profet rok Baal ni ngar meybilgad ngak e Got rorad ma ir e ra meybil ngak Jehovah. Ke yog Elijah ni fa bin nib riyul’ e Got e ra fulweg taban e meybil, ma got ni googsur e danga’. Pi profet rok Baal e ur meybilgad ngak nib n’uw nap’an ma yad be yor, machane da i yib angin. Be yog e Bible ni gaar: “De yib e fulweg ko meybil rorad, ma da nrung’ag ba lam ni non.” (1 Kings 18:29) Mang e ke buch u nap’an ni ke meybil Elijah?

U tomuren ni meybil Elijah, ma ka chingiyal’ nem me fulweg Got taban e meybil rok. Me yib e nifiy u tharmiy nga but’ me urfeg fare maligach ni ke fal’eg. Mang e ba thil ko meybil ni kar ted? Rayog ni ngad nanged e fulweg riy ko meybil rok Elijah ni bay ko 1 Kings 18:36, 37. De n’uw e meybil rok ya kemus ni 39 bugithin ni Hebrew ni bay riy. Machane dalip yay ni ke pining Elijah fithingan Got ni Jehovah u nap’an e re meybil rok nem.

Fare bugithin ni Baal e be yip’ fan nib “mil fan ban’en ngak” ara “masta”. Baal e ir e got rok piyu Kanaan, ma boor fithingan e re got nem. Machane fare ngachal ni Jehovah e kemus ni fan ngak, ni ir fare Got nu tharmiy ngu fayleng. Re Got ney e ke yog ngak e girdi’ rok ni gaar: “I gag Jehovah, ireray fithingag. Dariy yugu reb e kan ni taareb rogomow.”—Isaiah 42:8, NW.

Urngin e meybil rok Elijah nge pi profet rok Baal e ke rung’ag Got, fa? Dab mu pagtalin ni girdi’ ni ma pigpig ngak Baal e kan fil ngorad ni ngar gathibthibnaged Jehovah nge piin ni yad ma pigpig ngak. Liyor ngak Baal e be darifannag e girdi’ ya ba muun ngay e ngongol ni darngal nge girdi’ ni ngan pi’ ni maligach. Machane liyor ni yibe tay ngak Jehovah e be tayfan e girdi’ rok ni piyu Israel ya yima fil ngorad ni ngar paloggad ko re ngongol ney nib kireb. Am lemnag e re n’ey: Faanra kam lemnag ni ngam pi’ bang i babyor ngak reb e fager rom ni yima tayfan ma kam yoloy fithingan ngay, ga ra adag ni ngan pi’ e re ngi babyor nem ngak be’ nib kireb e ngongol rok? Danga’!

Faanra ngam meybil ngak Jehovah, ma ga be meybil ngak e en ni ke Sunmiy urngin ban’en, ma ir e Chitamangin e girdi’.a Nap’an e meybil ni tay Isaiah ni profet me yog ni gaar: “Gur Jehovah e Chitamangimad gur.” (Isaiah 63:16, NW) Ireray e En ni weliy Jesus murung’agen u nap’an ni yog ngak pi gachalpen ni gaar: “Bay gu sul nga tharmiy ngak faanem ni ir e Chitamag me ir e Chitamangimed, ni ir e Got rog me ir e Got romed.” (John 20:17) Jehovah e ir e Chitamangin Jesus. Ma ir fare Got ni meybil Jesus ngak miki fil ngak pi gachalpen ni ngar meybilgad ngak.—Matthew 6:9.

Gur be fil e Bible ngodad ni ngad meybilgad ngak Jesus, nge Maria, nge piin nib thothup ara ngak e pi engel? Danga’, ya ke mus ni goo Jehovah. Mu lemnag l’agruw i fan. Bin som’on, meybil e bang ko liyor rodad, ma be yog e Bible ni goo Jehovah e ngaud liyorgad ngak. (Exodus 20:5) Bin migid, e be yog e Bible ni ir e en ni ma “fulweg taban e meybil.” (Psalm 65:2) Yugu aram rogon nri baadag ni nge pi’ e maruwel ngak e pi tapigpig rok, machane ireray ban’en ndawori pi’ mat’awun be’ ni nge rin’. Ya ir fare Got ni ke micheg nra motoyil ko meybil rodad.

Ere faanra ga baadag ni nge motoyil Got ko meybil rom ma dab mu pag talin e re thin nu Bible ni baaray ni gaar: “Cha’ nra pining fithingan [Jehovah] ni nge ayuweg e ra fos.” (Acts 2:21) Machane ma motoyil Jehovah nga urngin e meybil? Fa ka bay ban’en nib t’uf ni ngad nanged me motoyil Jehovah ko meybil rodad?

[Footnote]

[Picture on page 5]

N’en ni yog Elijah ngak fapi profet rok Baal e be micheg ni gathi urngin e meybil ni ma motoyil Got ngay

3 Uw Rogon ni Ngan Meybil?

BOOR e girdi’ e rib ga’ fan u wan’rad rogon ni ngar pared u nap’an ni yad ra meybil, nge n’en ni nga rogned, nge ku boch ban’en. Machane, Bible e ra ayuwegdad ni ngad nanged boch ban’en ni kab ga’ fan ko fare deer ni, “Susun uw rogon ni ngad meybilgad?”

Be weliy e Bible murung’agen e pi tapigpig rok Got ni yad ba yul’yul’ ni boor yang ni ur meybilgad riy, nge rogon ni ur pared nguur meybilgad. Yu ngiyal’ e ur meybilgad nib ga’ lamrad ma yu ngiyal’ e ur meybilgad nib achig lamrad. Ma ur meybilgad ni yad be sap nga lang ara yad be siro’. Da ur fanayed e liyos, ara rosario, ara babyoren e meybil, ya meybil rorad e ke yib u gum’ircha’rad. Mang fan ni ke yib angin e meybil rorad?

Rogon ni kan weliy ko fa binem e article e taareb e Got e ur meybilgad ngak ni aram Jehovah. Maku bay reb e ban’en nib ga’ fan. Fare thin ni bay ko 1 John 5:14 e be gaar: “Aram fan nib pagan’dad u p’eowchen Got; mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” Meybil rodad e ba t’uf ni nge puluw ko n’en nib m’agan’ Got ngay. Mang e be yip’ fan e re n’em?

Ba t’uf ni ngad nanged e tin nib m’agan’ Got ngay ma aram e ra puluw e meybil rodad. Ere rib ga’ fan ni ngan fil e Bible. Gur, be yip’ fan e re n’ey ni dabi motoyil Got ngodad ni faanra de yoor e tamilangan’ rodad ko thin u Bible? Danga’, ya baadag Got ni ngad nanged e tin nib m’agan’ ngay ma gad ngongol nib puluw ngay. (Matthew 7:21-23) Ba t’uf ni ngad meybilgad nib puluw ko n’en ni kad filed.

Tomuren ni kad filed murung’agen Jehovah nge tin nib m’agan’ ngay ma ra gel e michan’ rodad. Ke yog Jesus ni gaar: “Faanra mmich Got u wun’med ma demtrug e n’en ni gimed ra ning ngak ko meybil romed ma ra yog ngomed.” (Matthew 21:22) Be’ ni bay e michan’ rok e gathi be yip’ fan nib mom ni ngan bannag. Ya be’ ni bay e michan’ rok e be yip’ fan ni ke mich u wan’ ban’en ni dabiyog ni ngan guy, ma bay e mich riy nib gel. (Hebrews 11:1) Boor e thin nu Bible ni be micheg ni Jehovah e ba riyul’ ma rayog ni ngan pagan’uy ngak, ma baadag ni nge fulweg taban e meybil ko piin nib michan’rad ngak. Ma gubin ngiyal’ ni rayog ni ngad ninged ngak Jehovah ni nge gelnag e michan’ rodad, ya baadag ni nge pi’ e tin nib t’uf rodad.—Luke 17:5; James 1:17.

Ka bay reb e ban’en nrib ga’ fan ko meybil rodad. Ke yog Jesus ni gaar: “Dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak.” (John 14:6) Ere rayog ni ngad chuchugurgad ngak Jehovah u daken Jesus. Arfan ni ke yog Jesus ngak pi gachalpen ni ngar meybilgad u daken fithingan. (John 14:13; 15:16) Re n’ey e gathi be yip’ fan ni ngad meybilgad ngak Jesus. Ya ngad meybilgad u daken fithingan Jesus ya gad manang ni kemus ni Jesus e rayog ni nge ayuwegdad nge chugurnagdad ngak Jehovah ni Chitamangidad nib thothup.

Reb i gachalpen Jesus nrib chugur ngak e yog ni gaar: “Somol, mu fil rogon e meybil ngomad.” (Luke 11:1) Ba tamilang ni dar fithed Jesus ko uw rogon ni ngar meybilgad ni bod rogon e pi n’en ni kafin da weliyed. Ya bod ni ka rogned ni lungurad, ‘Mang e nggu yibilayed?’

[Picture on page 6]

Meybil nib puluw ko tin nib m’agan’ Got ngay, ngu fithik’ e michan’, ngu daken fithingan Jesus e ra yib angin

4 Murung’agen e Mang e Ngaud Yibilayed?

FARE kenggin e meybil ni fil Jesus ni yu ngiyal’ e yima yog e Meybil rok Somol ngay ara Chitamangimad e goo manang e girdi’ ni yad ma yog ni yad e Kristiano, ma yad ma sul u daken. Demtrug ko riyul’ fa danga’, machane re meybil ney e boor e girdi’ nde nang fan. Bokum milyon e girdi’ ni yad ma sul u daken ni gubin e rran. Machane, gathi aram fan e re meybil nem ni fil Jesus. Uw rogon ni kad nanged?

U m’on ni fil Jesus e re kenggin e meybil nem, me gaar: “Faanra mmeybilgad ma dab um sulod u daken taab bugithin ni pire’ yay.” (Matthew 6:7) Ere gur, tomuren ni yog e re thin ney me fil fare kenggin e meybil ni nge mit ngaun sul u daken? Danga’, ya re kenggin e meybil nem e ke fil Jesus ngodad riy e n’en ni ngaud yibilayed murung’agen, nge n’en ni nge m’on u wan’dad u nap’an ni gad be meybil. Ere ngad fal’eged i yaliy ko mang e yog. Re meybil nem e bay ko Matthew 6:9-13.

Fapi thin ni bay ko fare kenggin e meybil rok Jesus e gathi ke mus e n’en nrayog ni ngad yibilayed murung’agen. Dab mu pagtalin ni be weliy e 1 John 5:14 murung’agen Got ni gaar: “Mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” Ere dab mu lemnag ni kaygi ga’ e magawon rom ni ngam yibilay ngak Got.—1 Peter 5:7.

Yooren e girdi’ ko re fayleng ney e goo yad e yad ma lemnaged yad, ere aram fan ni boor e girdi’ ni ma lemnag ko rib ga’ fan e meybil fa danga’. Sana ga ra fith ni nge lungum, ‘Ra rung’ag Got e meybil rog me fulweg taban, fa?’

“Chitamangimad ni ga bay u tharmiy: Ngan tay fan fithingam nib thothup.”

Ke puguran Jesus ngak pi gachalpen ni gubin e meybil ma goo nge yan ngak e Chitamangin, ni aram Jehovah. Machane, ga manang ko mang fan nrib ga’ fan fithingan Got nge fan ni ngan tayfan ara ngan thothupnag?

Kan gathibthibnag fithingan Got aram ko tabolngin. Satan ni ir faen ni toogor rok Got e ke yog ni Jehovah e ir reb e Pilung nib malulfith l’igin, mab kireb, ma dariy mat’awun ni nge gagiyegnag e pi n’en ni Ke sunmiy. (Genesis 3:1-6) Boor e girdi’ ni kar folgad ngak Satan. Yad be fil ngak e girdi’ ni Got e der ma runguy be’, mab kireb, maku yad ma yog ni gathi ir e Ke Sunmiy urngin ban’en. Ku boch e girdi’ e kar togopuluwgad nga fithingan, ya kar chuweged fare ngachal ni Jehovah u lan e yu ke Bible ni kar pilyeged, maku rogned ndab unog.

Be yog e Bible nra yal’uweg Got urngin ban’en nde mat’aw. (Ezekiel 39:7) Ma ra pi’ e tin nib t’uf rom me chuweg e magawon rom. Uw rogon nra rin’? Tin migid e thin ko fare kenggin e meybil rok Jesus e ra pi’ e fulweg riy.

“Ma ga par ni gur e ga be gagiyegnagmad.”

Ngiyal’ ney e boor ban’en nde puluw ni ma fil e pi tamachib ko pi yurba’ i teliw u murung’agen Gil’ilungun Got. Machane piin ni ur motoyilgad ngak Jesus e yad manang ni ke yiiynag e pi profet rok Got kakrom murung’agen fare Messiah ni ir e ke mel’eg Got ni nge gagiyeg u Gil’ilungun nra thilyeg rarogon e fayleng. (Isaiah 9:6, 7; Daniel 2:44) Re am nem e ra thothupnag fithingan Got, ni aram e nge gagiyelnag e ban rok Satan me chuweg nge gagiyeg rok. Gil’ilungun Got e ku ra taleg e mahl, me chuweg e m’ar, nge uyungol, nge yam’. (Psalm 46:9; 72:12-16; Isaiah 25:8; 33:24) Nap’an ni ga ra yibilay Gil’ilungun Got ni nge yib, ma aram e ga be yibilay ni nge riyul’ e pi n’en ni kan micheg nra rin’.

“Min rin’ e tin nib m’agan’um ngay u roy u but’ ni bod rogon ni yibe rin’ u tharmiy.”

Pi thin rok Jesus ney e be dag ni yira rin’ e tin nib m’agan’ Got ngay u roy u but’ ni bod rogon ni yibe rin’ u tharmiy ko gin ni ma par Got riy. De yog ni nge taleg Satan ni nge dab ni rin’ e tin nib m’agan’ Got ngay u tharmiy; ye cham Fak Got ngak Satan nge pi engel rok me yin’rad nga fayleng. (Revelation 12:9-12) Aray e bin dalip e wenig ko fare kenggin e meybil. Ma be ayuwegdad ni ngad m’oneged u wan’dad e n’en nth’abi ga’ fan, ni aram e gathi tin nib m’agan’dad ngay, ya tin nib m’agan’ Got ngay ni bod fa gal nsom’on e wenig. Tin nib m’agan’ ngay e gubin ngiyal’ ni ma yib fel’ngin nga urngin ban’en ni ke sunmiy. Aram fan ni gaar Jesus ngak e Chitamangin: “Gathi tin nib m’agan’ug ngay e ngam rin’, ya tin nib m’agan’um ngay.”—Luke 22:42.

“Mpi’ ngomad e daba’ e ggan ni nge yog ngomad.”

Me migid me yog Jesus nrayog ni ngad ninged e tin nib t’uf ni nge yog ngodad. Dariy ban’en nib kireb riy ni ngad ninged ngak Got e tin nib t’uf rodad u reb e rran ngu reb. Ya bin riyul’ riy, e faan gad ra rin’ ni aray rogon ma be puguran ngodad ni Jehovah e ir e en ni “ke pi’ e yafos nge pogofan nge urngin ban’en ngak e girdi’.” (Acts 17:25) Be yog e Bible ni Got e bod reb e gallabthir ni ma runguy pi fak ma baadag ni ma pi’ e tin nib t’uf rorad. Machane, bochan ni ir reb e gallabthir nib fel’, ma dabi pi’ e tin ndabi fel’ rogorad riy.

“Ma ga n’ag fan u wun’um e kireb romad.”

Ba t’uf ni nge n’ag Got fan e denen rom, fa? Boor e girdi’ e ngiyal’ ney nde nang ko mang e denen, maku de nang ni denen e ra fekey i yan ko yam’. Kan gargelegdad ni gadad e tadenen, ere aram fan ni gad ma denen ma athap rodad ko gabul nge langlath e be yan u rogon ko ra n’ag Got fan e denen rodad fa danga’. (Roma 3:23; 5:12; 6:23) Machane, gad ba felfelan’ ya be gaar e Bible: “Gur [Jehovah] e gab gol ngomad ma ga ma n’ag fan u wun’um e kireb romad.”—Psalm 86:5, BT.

“Ngam ayuwegmad rok Faanem nib Kireb.”

Ga manang nrib t’uf ni nge ayuwegem Got? Boor e girdi’ e dubrad ni nge mich u wan’rad ni bay Satan ni ir “faanem nib kireb.” Machane ke yog Jesus nriyul’ ni bay Satan, ma ki yog ni ir e “be gagiyegnag e girdi’ nu fayleng.” (John 12:31; 16:11) Ke kirebnag Satan e re fayleng ney ni be gagiyegnag, ma ri ku baadag ni nge gafgownagem, ya dabun ni nge fel’ e tha’ u thilmew Jehovah. (1 Peter 5:8) Yugu aram rogon ma kab gel Jehovah ngak Satan ma baadag ni nge ayuweg e piin nib t’uf rorad.

Fapi thin ni bay ko fare kenggin e meybil rok Jesus e gathi ke mus e n’en nrayog ni ngad yibilayed murung’agen. Dab mu pagtalin ni be weliy e 1 John 5:14 murung’agen Got ni gaar: “Mmudugil u wan’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay.” Ere dab mu lemnag ni kaygi ga’ e magawon rom ni ngam yibilay ngak Got.—1 Peter 5:7.

Yooren e girdi’ ko re fayleng ney e goo yad e yad ma lemnaged yad, ere aram fan ni boor e girdi’ ni ma lemnag ko rib ga’ fan e meybil fa danga’. Sana ga ra fith ni nge lungum, ‘Ra rung’ag Got e meybil rog me fulweg taban, fa?’

5 Ra Rung’ag Got e Meybil Rodad me Fulweg Taban, Fa?

RE DEER ney e ra pug e tafinay rok be’ ma ra adag ni nge nang e fulweg riy. Be yog e Bible ni ma motoyil Jehovah ko meybil e ngiyal’ ney. Gadad e ba milfan ngodad ko ra motoyil Jehovah ko meybil rodad fa danga’.

I gathibthibnag Jesus e pi tayugang’ ko teliw kakrom ni bochan e yad ma meybil ni fan e nge guyrad e girdi’ mi nog e sorok ngorad. I yog ni pi girdi’ nem e ke “m’ay i pi’” puluwrad ni polo’ ni be yip’ fan ni kemus nra i yog e girdi’ e sorok ngorad, machane dabi motoyil Got ngorad. (Matthew 6:5) Ku arrogon e ngiyal’ ney ni boor e girdi’ ni yad ma yibilay e tin nib m’agan’rad ngay, ma gathi tin nib m’agan’ Got ngay. Bochan ni kar feked yathin e pi kenggin e motochiyel nu Bible ni kad weliyed, ma aram fan nder motoyil Got ngorad.

Ma uw rogom? Ra rung’ag Got e meybil rom me fulweg taban, fa? Fulweg ko re deer ney e der yan u rogon raen dowam, ara gin ni ga be’ riy, ara rarogom. Be yog e Bible ni: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:34, 35) Ba puluw e pi thin ney ngom, fa? Faanra bay madgun Got u wan’um, ma aram e ba m’on Got u wan’um ma dabum ni ngam kirebnag laniyan’. Ma faanra ga be rin’ e tin nib mat’aw ma aram e ga be gay rogon ni ngaum rin’ e tin ni ke yog Got nib fel’, ma gathi tin nib m’agan’um ngay ara tin nib m’agan’ e girdi’ ngay e ngaum rin’. Ga baadag ni nge motoyil Got ko meybil rom? Be dag e Bible rogon ni ngam meybil, me motoyil Got ngay.a

Riyul’ ni boor e girdi’ ni baadag ni nge fulweg Got taban e meybil rorad u daken e maang’ang. Kakrom e fin munmun me fal’eg Got e maang’ang. Ba ga’ nra yan bokum e chibog mfini ngongliy reb e maang’ang ni kan tay murung’agen nga Bible. Maku reb, e be yog e Bible ni tomuren ni ke yim’ fapi apostal ma da kun ngongliy e maang’ang. (1 Korinth 13:8-10) Ere gur, fan e re n’ey e dakir ma fulweg Got taban e meybil e ngiyal’ ney? Danga’. Am lemnag boch e meybil ni ma fulweg Got taban.

Ma pi’ Got e gonop. Jehovah e Ir e ke yib e bin riyul’ e gonop rok. Ba gol ngay, ma ma pi’ ngak e piin ni yad baadag ni nge pow’iyrad ma ur ngongolgad nib puluw ko gonop rok.—James 1:5.

Ma pi’ Got gelngin nib thothup nge angin. Gelngin Got nib thothup e aram gelngin ni ma maruwel. Dariy reb e gelngin nib gel ngay. Rayog ni nge ayuwegdad ngaud athamgilgad u fithik’ e skeng. Ma ma pi’ e gapas laniyan’ ngodad ko ngiyal’ ni keb e magawon ngodad. Maku rayog ni nge ayuwegdad ni ngad maruweliyed boch e fel’ngin nib gamog. (Galatia 5:22, 23) Ki micheg Jesus ngak pi gachalpen ni Got e ma pi’ e re tow’ath ney nib gol ngay.—Luke 11:13.

Ma pi’ Got e tamilangan’ ngak e piin ni yad ma gay. (Acts 17:26, 27) Bay e girdi’ u ga’ngin yang e re fayleng ney nriyul’ ni yad be gay e tin riyul’. Yad baadag ni ngar nanged murung’agen Got, nge fithingan, nge n’en nib m’agan’ ngay ni fan ko fayleng nge girdi’, nge rogon ni ngar chugurgad ngak. (James 4:8) Pi Mich Rok Jehovah e ba ga’ ni yad ma mada’nag e girdi’ ni aram rogon, ma yad ba felfelan’ ngay ni ngar daged e fulweg ko pi deer ney ni bay u Bible.

Gur, aram fan ni kam fek e re babyor ney? Ga be gay Got? Dabisiy ma ireray e fulweg ko meybil rom.

[Footnote]