Bay ba ngiyal’ ni kam lemnag ni ngam beeg e Bible, machane da nim beeg ni bochan fapi n’en ni kad weliyed aray u lang, fa? Boor e girdi’ ndubrad ni ngar beeged e Bible ni bochan e yad be lemnag nib mo’maw’. Machane, uw rogon ni faan ga ra nang nrayog ni nge ayuwegem e Bible ni ngam pirieg e felfelan’ me fel’ boch e par rom? Ma uw rogon ni faan ga ra nang ni bay boch i kanawoen nrayog ni ngam beeg e Bible riy nra k’aringem ni ngam adag e n’en ni ga be beeg? Ga baadag ni ngam beeg mag guy boch ban’en riy nra yib angin ngom, fa?

Am lemnag e n’en ni ke yog boch e girdi’ ni kar guyed nib ga’ angin e thin nu Bible ngorad u nap’an ni kar tababgad ni ngar beeged e Bible.

Ezekiel ni ka fini pag 20 e duw rok e yog ni gaar: “Kafram e gu bod be’ ni be yan u karrow nder nang e gin ni be sor ngay. Machane, nap’an nug beeg e Bible ma aram e n’en ni ke ayuwegeg ni nge yib fan e yafos rog. Boor e fonow riy nrayog ni nggu fanay u gubin e rran.”

Frieda nreb e ppin ni ke pag 20 e duw rok e ki yog ni gaar: “Kafram e gag be’ ni gub aduduw. Machane, bochan ni gu ma beeg e Bible, ma aram e ke yag ni nggu nang rogon ni nggu gonopiy rogon ni nggu rin’ ban’en. Bochan e re n’ey ma aram e ke adag e girdi’ ni ngaur chagilgad ngog. Ere, chiney e ke yoor e fager rog.”

Eunice nreb e ppin ni ke pag 50 e duw rok e weliy murung’agen e Bible ni gaar, “Be ayuwegeg ni nggu mang be’ nib manigil, mug tal i rin’ boch ban’en ni kug mecham ngay ni gathi rib fel’.”

Faan ga ra beeg e Bible ma rayog ni nge ayuwegem ni ngam pirieg e felfelan’ ni bod rogon e n’en ni ke buch ko fapi cha’ ni kad weliyed murung’agrad nge ku bokum milyon e girdi’. (Isaiah 48:17, 18) Boor e kanawo’ nrayog ni nge ayuwegem e Bible riy. Machane, reb riy e aram e rayog ni nge ayuwegem (1) ni ngam dugliy boch ban’en nib fel’ rogon, (2) me yag boch e fager nib manigil ngom, (3) me war e mochuch rom, ma (4) bin th’abi fel’ riy e ga ra nang e tin riyul’ u murung’agen Got. Pi fonow u lan e Bible e ke yib rok Got, ere gubin nra yib angin ngom. Dariy reb e fonow ni ma pi’ Got nib kireb.

Machane, n’en nib ga’ fan e ngam tabab i beeg e Bible. Ere, mang boch ban’en nra momnag ngom ni ngam tabab i beeg e Bible mu kum adag e n’en ni ga be beeg riy?

Mang boch ban’en nra ayuwegem ni ngam adag e beeg Bible ni ga ma tay me yib angin ngom? Baaray lal ban’en ni boor e girdi’ ni ke yib angin ngorad.

Mu gay bang nib fel’ ni ngam par riy. Mu gay bang ndariy lingan ban’en riy. Mu guy rogon ni nge dabi magawonnagem boch ban’en ya nge yag nim tiyan’um ko n’en ni ga be beeg. Faan ga ra par u bang nib tamilang mab tanfeng, ma rayog ni nge yib angin ngom e pi n’en ni ga be beeg.

Mu l’eg e lem rom ko n’en ni ga be beeg. Chitamangidad ni bay u tharmiy e ir e en ni ke yib e Bible rok. Ere, rayog ni nge yib angin ngom e n’en ni ga be beeg riy ni faan ga ra lem ni bod rogon bochi tir nib m’agan’ ngay ni nge pag e gallabthir rok ni nge fil ban’en ngak. Ere, faanra ga be lemnag boch ban’en nde fel’ u murung’agen e Bible, ma aram e ngam guy rogon ni nge dab kum lemnag e pi n’em ya nge yag nim pag Got ni nge fil boch ban’en ngom.​—Psalm 25:4.

Mmeybil u m’on ni ngam beeg e Bible. Lem rok Got e bay u lan e Bible. Ere, dariy e maruwar riy nib t’uf ni nge ayuwegdad ni ngad nanged fan e pi n’em. Ke micheg Got nra pi’ gelngin nib thothup ngak e “piin ni yad ra ning ngak.” (Luke 11:13) Rayog ni nge ayuwegem gelngin Got nib thothup ni ngam nang fan e lem rok. Ra munmun maku ra ayuwegem e re gelngin nem ni nge tamilang u wan’um e “tin nda nnang ni ke m’ay i lemnag rok Got.”​—1 Korinth 2:10.

Mu guy rogon ni ngam beeg ni ngam nang fan e thin riy. Dab mu beeg ni kemus ni bochan e ngam guy rogon ni ngam mu’nag e n’en ni kam lemnag ni ngam beeg. Mu fal’eg i lemnag e n’en ni ga be beeg, mag fithem ni nge lungum: ‘Mang boch e fel’ngin ni gu be guy rok e en ni gu be beeg murung’agen? Uw rogon ni nggu fanay e re n’ey nga lan e yafos rog?’

Mu nameg boch ban’en ni ngam rin’. Faanra nge yib angin e beeg Bible ni ga be tay, mab fel’ ni ngam nameg ni ngam fil ban’en riy nra yib angin nga lan e yafos rom. Rayog ni ngam nameg ni nge yoor ban’en ni ngam fil u murung’agen Got, ara ngam guy rogon ni ngam mang be’ nib manigil, ara ngam mang reb i figirngiy ara reb i leengiy nib manigil. Tomuren ni kam rin’ e re n’ey, ma aram mag mel’eg yu yang u lan e Bible nra ayuwegem ni ngam rin’ e n’en ni ga be nameg.a

Fa lal i n’em ni kad weliyed murung’agen e ra ayuwegem ni ngam tabab i beeg e Bible. Machane, mang e ku ra ayuwegem ni ngar mu adag e n’en ni ga be beeg? Bin migid e article e ku be weliy boch ban’en nra ayuwegem.

Ra chalbam ngay, fa ra fal’eg lanin’um? Uw rogon e beeg Bible ni ga ra tay? Re n’ey e ra yan u rogon ni ga ra beeg. Chiney e ngad weliyed boch ban’en nrayog ni ngam rin’ ya nge yag ni ngar mu adag e beeg Bible ni ga ma tay.

Mmel’eg ba ken e Bible nib puluw e thin riy, ma kun pilyeg ni yibe fanay e thin ni yima yog e ngiyal’ ney. Faan ga ra beeg boch e babyor nib mo’maw’ ni ngam nang fan e thin riy ara kan tay boch e thin ngay ndam nang fan ma dakunir yog e ngiyal’ ney, mab mudugil ndab mu adag ni ngam beeg. Ere, mu gay ba ken e Bible nib mom ni ngan nang fan e thin riy ma ra taw nga gum’irchaey. Machane, kub t’uf ni ngam mel’eg ba ken ni kan pilyeg nib fel’ rogon ma kub puluw.a

Mu fanay e computer nge boch e masin ni bay e ngiyal’ ney. Ngiyal’ ney e gathi kemus ni bay e Bible ni kan ngongliy ni yu ken ya ku bay u lan e computer. Bay boch e Bible nrayog ni ngan beeg u online ara nni downloadnag nga lan e computer, ara tablet, ara cell phone ni ngaun beeg. Bay yu ken ni kan tay boch ban’en ngay nrayog ni nge momnag ngom ni ngam yaliy yugu boch e thin nu Bible ni ku be weliy murung’agen e n’en ni ga be beeg ara mu taarebrogonnag e thin u lan yu ken e Bible nga yu ken. Maku reb e, faanra ga baadag ni ngam motoyil ko thin nu Bible ko bin ni ngam beeg, ma bay boch e thin ni kan ngongliy riy nrayog ni ngan motoyil ngay. Boor e girdi’ ni yad baadag ni yad ma motoyil ko thin nu Bible ni yibe beeg u nap’an ni yad be yan u bus, ara train, ara yad be maluk mad, ara u nap’an ni yad be rin’ yugu boch ban’en. Ere, mang ndab mu gay rogon ni ngam rin’ reb e pi n’ey nib m’ag ngom?

Mu fanay boch ban’en ni kan ngongliy rogon nrayog ni nge ayuwegey u nap’an e fol Bible. Pi n’ey ni kan ngongliy e rayog ni nge ayuwegem ni nge yib angin ngom e beeg Bible ni ga ma tay. Bay e map ni kan ngongliy ni be dag yaan boch e binaw ni bay murung’agen u Bible, ma pi n’ey e ra ayuwegem ni ngam nang e gin ni bay boch e binaw riy ni kam beeg murung’agen u Bible, me yag ni nge mom rogon ni ngam susunnag u lanin’um e pi n’en ni i buch riy. Bay boch e article ni bod rogon e tin ni kan tay ko re ke babyor ney ara boch ni bay ko fare website ni jw.org nrayog ni nge ayuwegem ni ngam nang fan yu yang u lan e Bible.

Mu thilthilyeg kanawoen e beeg Bible ni ga be tay. Faanra dabum ni ngam beeg e Bible ni ga’ngin ni bochan e ga be lemnag ni kaygi mo’maw’, ma rayog ni ngam tabab i beeg bang ni kam guy ni ga baadag ya nge yag nim adag e n’en ni ga be beeg. Faanra ga baadag ni ngam fil murung’agen boch e girdi’ nib gilbuguwrad u Bible, ma rayog ni ngam beeg murung’agen be’ nge be’ u lan e Bible. Rayog ni ngam guy fare thin ni kenggin e “Mu Fal’eg i Gay Murung’agen Boch e Girdi’ u Lan e Bible” ni be weliy rogon nrayog ni ngam rin’ e re n’ey. Fa reb e rayog ni ngam beeg ni be yan u rogon murung’agen ban’en nge ban’en ara ngiyal’ ni buch reb e ban’en riy nge reb. Mang ndab mu gay rogon ni ngam rin’ reb e gali n’ey?

Bible e yugu ba thil ko tin ni ka bay e babyor. Boor e fonow riy ni ke yib rok e En ni Ke Sunmiydad. (2 Timothy 3:16) Thin riy e rayog ni nge thilyeg e yafos rodad. Bin riyul’ riy e, be gaar e Bible: “Thin rok Got e ba fos ma ba’ gelngin ni ma maruwel.” (Hebrews 4:12) Bay gelngin ni nge thilyeg boch ban’en u lan e yafos rodad u l’agruw e kanawo’. Rayog ni nge pow’iydad u gubin e rran, me ayuwegdad ni nge yoor ban’en nda nanged u murung’agen Got nge pi n’en ni ke micheg.​—1 Timothy 4:8; James 4:8.

Ra thilyeg e yafos rom e chiney. Rayog ni nge ayuwegdad e Bible u boch ban’en ni ma buch rodad. Bay boch e fonow riy u murung’agen e pi n’en ni baaray.

• Tha’ u thildad yugu boch e girdi’.​—Efesus 4:31, 32; 5:22, 25, 28, 33.

• Rogon ni ngad ayuweged fithik’ i dowdad nge rogon ni gad ma lem.​—Psalm 37:8; Proverbs 17:22.

• Boch e ngongol nib kireb nthingar da siyeged.​—1 Korinth 6:9, 10.

• Rogon ni ngad yognaged e tin nib t’uf ko par rodad.​—Proverbs 10:4; 28:19; Efesus 4:28.a

Bay l’agruw ni’ u Asia ni ka fin ra mabgolgow ni kar felfelan’gow nga rogon ni ke ayuwegrow e pi fonow u lan e Bible. Bay boch e magawon ni ur mada’nagew ni bochan e ba thilthil rarogorow ma der ma yag ni nge puf e thin u thilrow, ni bod rogon yu wu’ e mabgol ni ka fin nra mabgolgad. Machane, ra tababgow ni ngar folgow ko n’en ni yow be beeg u Bible. Ere, mang angin ni yib ngorow? I yog Vicent ni gaar: “Ke ayuwegeg e n’en ni kug beeg u Bible ni nggu pithig boch e magawon ni gamow ma mada’nag u lan e mabgol romow u fithik’ e t’ufeg. Bochan ni gamow ma fol ko thin nu Bible ma aram e n’en ni ke ayuwegmow ni nggu parew u taabang ni gamow ba felfelan’.” Me Annalou ni ppin rok e yog ni gaar: “Murung’agen boch e girdi’ ni gamow ma beeg u lan e Bible e aram e n’en ni ke ayuwegmow. Chiney e ke yag ni nggu pirieg e felfelan’ u lan e mabgol romow ma kub fel’ u wan’ug e pi n’en ni gamow ma rin’ nge pi n’en ni gamow ma nameg.”

Ga ra nang boch ban’en u murung’agen Got. Gathi kemus ni weliy Vicent rogon ni ke ayuweg e thin nu Bible e mabgol rok, ya ki yog ni gaar: “Bochan ni gu ma beeg e Bible, ma chiney e ke yag ni nge chugur e tha’ u thilmow Jehovah ko kafram.” N’en ni ke nang Vicent e be tamilangnag ban’en nib ga’ fan. Re n’ey e aram e rayog ni nge ayuwegem e Bible ni ngam nang murung’agen Got. Faan ga ra rin’ ni aray rogon, ma gathi kemus nra yib angin e fonow rok ngom ya ku rayog ni ngam mang fager rok. Maku reb e, ga ra fil murung’agen e pi n’en ni ke micheg ni fan ko par rodad boch nga m’on ko ngiyal’ nra yag e “bin riyul’ e yafos” ngodad nra par ndariy n’umngin nap’an. (1 Timothy 6:19) Re n’ey e dariy murung’agen u lan yugu ba ken e babyor.

Faan ga ra beeg e Bible mag ulul ni ngaum beeg ni gubin ngiyal’, ma aram e ra thilyeg e yafos rom me ayuwegem ni ngam nang murung’agen Got. Machane, nap’an ni ga ra beeg e Bible, ma dabisiy ni boor e deer nra yib nga lanin’um. Ere, nap’an nra sum boch e deer u lanin’um, ma ngam lemnag e n’en ni rin’ fare pumoon nu Ethiopia nib tolang e liw rok ni immoy ni ke yan 2,000 e duw. Boor e deer ni i lemnag u murung’agen e Bible. Ma nap’an nni fith ngak ko be nang fan e n’en ni be beeg, me fulweg ni gaar: “Uw rogon mu gu nang fan ni faanra dabi weliy be’ fan ngog?”b I m’agan’ e re pumoon nem ngay ni nge pag Filip nreb e tamachib maku ir reb i gachalpen Jesus ni nge ayuweg ni nge nang fan e pi thin nem. (Acts 8:30, 31, 34) Ere, ku arrogom ni faanra ga baadag ni ngkum nang boch ban’en u murung’agen e Bible, ma gamad be pi’ e athamgil nga lanin’um ni ngam fal’eg bang e babyor ni bay u online ko www.jw.org/yap ara mu yol nga reb e address ni bay ko re ke babyor ney. Ku rayog ni ngam non ngak e Pi Mich Rok Jehovah ko gin ni ga ma par riy ara mman nga reb e Tagil’ e Liyor romad ni bay ko gin ni ga ma par riy. Ere, mang ndab mu fek ba ken e Bible ngam beeg, mag pag e thin riy ni nge thilyeg e yafos rom?