Jesus Kristus​​—Feni Manging’ e Thin Rok

“Fan ni gilbuguwan Jesus nu Kapernaum e bochan ni thin ni i yog e mus ko chiney ma ka be fol e girdi’ riy.”a​—AUTHOR GREGG EASTERBROOK.

THIN e bay gelngin. Thin nnog u fithik’ e gonop e rayog ni nge taw nga gum’irchaen be’ me yog e athap ngak me thilyeg e yafas rok. Dariy be’ ni ka e welthin ni bod rogon Jesus Kristus. Immoy be’ ni rung’ag fare welthin ni pi’ Jesus u Daken e Burey me yoloy ni gaar: “Faani yog Jesus e pi n’ey nge mu’, me gin fapi girdi’ ni aram urngirad nga rogon e machib ni ke tay.”​—Matthew 7:28.

Ke mada’ ko chiney ma ka boor e girdi’ u fayleng ni ka manang fapi n’en ni i weliy Jesus u lan e re welthin rok nem. Baaray boch e pi thin ni i yog nem.

“Dabiyog ni ngam manged tapigpig rok Got ma ki gimed e tapigpig rok e salpiy.”​—Matthew 6:24.

“Ere mu rin’ed ngak e girdi’ e tin ni gimed ba adag ni ngar rin’ed ngomed; ereray fan fapi Motochiyel rok Moses nge tin i fil e pi profet ngak e girdi’.”​—Matthew 7:12.

“Mpied ngak e pilung nu Roma e tirok ban’en, mi gimed pi’ ngak Got e tirok ban’en.”​—Matthew 22:21.

“Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

Gathi kemus ni weliy Jesus e thin nib fel’ nra taw nga gum’irchaen e girdi’, ya thin ni i machibnag e bay gelngin ni bochan e i fil e tin riyul’ u murung’agen Got ngak e girdi’ miki fil ngorad rogon ni ngar nanged e bin riyul’ i fan e yafas nge n’en nra chuweg e gafgow ko girdi’ ni aram Gil’ilungun Got. Faan gad ra fal’eg i yaliy e thin rok ko tin migid e page, ma rayog ni ngad guyed fan ni ka be “fol” bokum milyon e girdi’ ko thin ni yog Jesus.

N’en ni i Weliy Jesus u Murung’agen

“Manang Jesus ko ir mini’, nge gin ni ke yib riy, nge n’en nra rin’ boch nge m’on.”​—AUTHOR HERBERT LOCKYER.

U M’ON ni nge mich u wan’dad e n’en ni i fil Jesus ma ba t’uf ni ngad nanged ban’en u murung’agen. Ri mini’ Jesus? Uw e yib riy? Ma mang fan e yafas rok? Gad ra guy e fulweg ko pi deer ney u lan e Gospel rok, Matthew, nge Mark, nge Luke, nge John.

Immoy u m’on nni gargeleg nga fayleng I yog Jesus bayay ni gaar: “Dawor ni gargeleg Abraham ma Gu Ba’.” (John 8:58) Sogonap’an 2,000 e duw u m’on nni gargeleg Jesus ma immoy Abraham. Machane ka immoy Jesus u m’on ko ngiyal’ ni immoy Abraham. Ere uw e immoy Jesus riy? I gaar Jesus: “Ku gub u tharmiy nga but’.”​—John 6:38.

Fa En Fak Got Boor e engel ni fak Jehovah. Machane Jesus e yugu ba thil u fithik’ rad. I yog ni ir “Fak Got ni kari maagirag rok.” (John 3:18) Re thin ney e be yip’ fan ni kemus ni yigoo Jesus e sunmiy Jehovah. Mu pa’ Jesus ni fak e sunmiy Jehovah urngin ban’en ngay.​—Kolose 1:16.

“En Fak e Girdi’” Ba ga’ ni ma fanay Jesus e re bugithin ney u nap’an ni be weliy murung’agen. (Matthew 8:20) Ere be dag ni gathi ir reb e engel ni ke m’ug ni bod yaan be’ ara ke fanay downgin e girdi’, ya rriyul’ nib girdi’. I fanay Got gelngin nib thothup ni nge ngal’uweg e yafas rok Fak nga yin Maria ngan gargelnag nib girdi’ nib flont.​—Matthew 1:18; Luke 1:35; John 8:46.

Fare Messiah ni kan micheg I yog be’ nib pin nu Samaria ngak Jesus ni gaar: “Gu manang ni fare Messiah ni ke lunguy e Kristus e bay yib.” Me fulweg Jesus ni gaar: “I gag ir, i gag e cha’ ney ni gu be non ngom.” (John 4:25, 26) Fare bugithin ni “Messiah,” nge “Kristus” e be yip’ fan e “En ni Kan Dugliy.” I dugliy Got Jesus nga reb e liw ni nge lebguy e tin ni ke micheg.

Fan ni yib Jesus nga fayleng Immoy bayay ni gaar Jesus: “Dabi siy ni ngku gu machibnag . . . fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43) Yugu aram rogon ni boor ban’en ni i rin’ ni fan ko girdi’, machane n’en nib m’on u wan’ e aram e nge machibnag murung’agen Gil’ilungun Got. Gad ra weliy taaboch e n’en ni i machibnag Jesus u murung’agen Gil’ilungun Got.

Ba tamilang ni Jesus e de taareb rogon ngak e yug girdi’.a Gad ra fil ni rogon e par rok u tharmiy e aram e n’en ni yibnag angin e thin ni i weliy u nap’an ni yib nga fayleng. Ere aram fan ni thin rok e ke thilyeg e yafas rok bokum milyon e girdi’ u ga’ngin yang e fayleng.

[Footnote]

N’en ni i Machibnag Jesus u Murung’agen Got

“Dariy be’ ni manang ko mini’ e en ni Chitamangiy, ya ke mus ni en ni Fak e manang, nge piin ni ba adag e en ni Fak nem ni ngar nanged e Chitamangin.”​—LUKE 10:22.

U M’ON ni yib Jesus nga fayleng ma ba n’uw nap’an ni i par ko Chitamangin u tharmiy. (Kolose 1:15) Manang e En Fak rarogon laniyan’ e Chitamangin, nge rogon ni ma rin’ ban’en. Ma nap’an ni yib nga fayleng nib girdi’ ma ri baadag ni nge machibnag e tin riyul’ u murung’agen e Chitamangin. Faan gad ra motoyil ko n’en ni i weliy Jesus ma boor ban’en ni gad ra fil u murung’agen Got.

Fithingan Got Rib ga’ fan fare ngachal ni Jehovah u wan’ Jesus ma ri baadag ni ngki nang boch e girdi’ e re ngachal nem mu u rogned. Fare ngachal ni Jesus e be yip’ fan ni “Jehovah e Ra Thapegey.” Fare nep’ u m’on ni yim’ Jesus me meybil ngak Jehovah ni gaar: “Ku gog fithingam kan nang.” (John 17:26, NW) Ere dab da gingad ngay ni i fanay Jesus fithingan Got ma be machibnag. Machane, uw rogon ni nge nang e girdi’ e tin riyul’ u murung’agen Jehovah ni faanra dar nanged fithingan nge fan?a

T’ufeg rok Got nrib gel Immoy bayay ni meybil Jesus ni gaar: “Chitamag, . . . dawor ni sunumeg e fayleng, ma gu be par ni gub t’uf rom.” (John 17:24) Bochan ni i guy Jesus gelngin e t’ufeg rok Got u nap’an ni immoy u tharmiy ma aram fan ni i m’ug rok e re t’ufeg nem u nap’an ni yib nga fayleng.

I dag Jesus ni t’ufeg rok Jehovah e boor ban’en nib muun ngay. I yog ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Rib gel feni t’uf e girdi’ nu fayleng rok Got, aram fan ni pi’ Fak ni kari maagirag rok ni nge chuweg e piin nib yul’yul’ u pa’ e denen nge yam’ me yog e yafas ni manemus ngorad. Dabiyog ni ngad nanged feni gel gelngin e re t’ufeg nem.​—Roma 8:38, 39.

I micheg Jesus ban’en nib riyul’ ni aram e: Ri ma t’ufeg Jehovah e pi tapigpig rok ni be’ nge be’. I yog Jesus ni Jehovah e bod reb e ta chugol saf ni yugu ba thil e tirok e saf ma ma ayuwegrad nib fel’ rogon ma yad ba t’uf rok. (Matthew 18:12-14) Ki yog Jesus ndariy reb fapi arche’ ni sparrow fithingan nra mul nga but’ nde nang Jehovah. Miki gaar: “Mus nga piyan lolugmed ni ke m’ay i theeg.” (Matthew 10:29-31) Ere faanra aram rogon nra yan taareb e arche’ ni sparrow nga bang ma manang Jehovah me ere gadad e piin ni gad ma pigpig ngak e ri ma tiyan’ ngodad ma ri ku ma lemnagdad. Faanra rayog ni nge theeg urngin gaf i piyan lolugdad me ere dariy ban’en u rarogodad ni tabab ko pi magawon rodad nge mada’ ko pi magafan’ rodad nde nang.

Chitamangidad nu tharmiy Rogon ni kad filed ko fa binem e thin e Jesus e Fak Got ni kari maagirag rok. Ma en Fak Got ney e gubin ngiyal’ ni ma pining maku ma yog ni Jehovah e ‘Chitamangin.’ Bin riyul’ riy e tin som’on e thin ni yog Jesus u tempel ni bay u Bible u nap’an ni ke gaman 12 e duw rok e yog ni Jehovah e ‘Chitamangin.’ (Luke 2:49) Fare bugithin ni “Chitamag” e sogonap’an 190 yay ni kan tay nga lan e pi Gospel. Ba ga’ ni ma yog Jesus e “Chitamangimed,” “Chitamangimad,” nge “Chitamag” ngak Jehovah. (Matthew 5:16; 6:9; 7:21) Bochan ni ma yog Jesus e pi thin ney ni gubin ngiyal’ ma be dag ni gubin e girdi’ ndawor ra flontgad e rayog ni nge fel’ e tha’ u thilrad Jehovah.

Ma runguyey ma ma n’ag fan e kireb Manang Jesus ni gubin e girdi’ ndawor ra flontgad e ba t’uf ni nge runguyrad Jehovah. U lan fare fanathin rok u murung’agen fare pagel ni malog e taarebrogonnag Jesus Jehovah ngak reb e matam ni ma runguy ma ma n’ag fan e kireb rok pi fak ma demtrug gelngin e kireb rorad ma rayog ni nge pagrad ngar sulod ngak bayay. (Luke 15:11-32) Pi thin ni yog Jesus ney e be micheg ngodad ni ma runguy Jehovah e piin ni kar kalgadngan’rad ko kireb rorad ma kar thilyeged e ngongol rorad. I yog Jesus ni gaar: “Nggog ngomed . . . ni ba ga’ e felfelan’ ni yira tay u tharmiy ni bochan taareb e tadenen ni ke pi’ keru’ ko kireb ni be ngongliy, ko felfelan’ ni yira tay ni bochan mereb i ragag nge mereb e girdi’ ni yad ba yal’uw ndariy rogon ni ngar pied keru’rad ko denen.” (Luke 15:7) Mini’ e ra dabuy ni nge chugur ngak reb e Got ni ma runguyey?

Ma rung’ag e meybil U m’on ni yib Jesus nga fayleng me guy ni Jehovah e ma “rung’ag” e meybil ma ba m’agan’ ko meybil rok e pi tapigpig rok ni yad ba yul’yul’. (1 John 5:14) Nap’an ni i machib Jesus me fil ngak e piin ni ur motoyilgad ngak rogon ni ngaur meybilgad nge n’en ni ngar yibilayed. I fonownagrad ni gaar: “Faanra mmeybilgad ma dab um sulod u daken taab bugithin ni pire’ yay.” Rayog ni ngad yibilayed e tin nib t’uf ko par rodad, min n’ag fan e kireb rodad, min ayuwegdad ngad gelgad ko pi n’en ni yibe waliydad ngay. (Matthew 6:5-13) I yog Jesus ni ma motoyil ma ma fulweg Jehovah taban e meybil ni ke tay e pi tapigpig rok u fithik’ e michan’ ni bod reb e matam.​—Matthew 7:7-11.

Gubin ngiyal’ ni i machibnag Jesus e tin riyul’ u murung’agen Jehovah nge rarogon. Machane ku bay ban’en u murung’agen Jehovah nri ku baadag Jesus ni ma weliy ni aram e n’en nra rin’ Jehovah ni nge lebguy e n’en nib m’agan’ ngay ni fan ko fayleng nge girdi’. Bin riyul’ riy e re n’em e aram kenggin e machib rok Jesus.

[Footnote]

N’en ni Fil Jesus u Murung’agen Gil’ilungun Got

“I yan u lan e pi binaw ni ba ga’ nge pi binaw ni ba achig, ni be machibnag ngak e girdi’ e Thin Nib Fel’ ni murung’agen e gagiyeg rok Got.”​—LUKE 8:1.

GAD gubin ni gad baadag ni ngad weliyed ban’en nib ga’ fan u wan’dad. I yog Jesus ni “l’uguney e ma weliy e n’en ni ke sugnag lanin’uy.” (Matthew 12:34) Faan gad ra lemnag e pi n’en ni i weliy Jesus murung’agen u nap’an ni i machib ma rayog ni ngad dogned nrib ga’ fan Gil’ilungun Got u wan’.

Mang e Gil’ilungun Got? Gil’ilungun e aram reb e am ni bay e pilung riy. Ere Gil’ilungun Got e aram reb e am ni Got e ke sunmiy. Boor ban’en ni i weliy Jesus u murung’agen Gil’ilungun Got ma aram kenggin e machib rok. Ke pag 110 yay ni weliy murung’agen e re am nem u lan fa aningeg i Gospel. Machane gathi kemus ni i machib Jesus ko thin. Ya boor ban’en ni i rin’ ni be dag rarogon Gil’ilungun Got nge n’en nra rin’.

Mini’ e Pilung riy? En nra mang Pilung u Gil’ilungun e dabi towaliy e girdi’, ya Got e ke mel’eg. Nap’an ni i machib Jesus me tamilangnag ni ir e ke mel’eg Got ni nge mang Pilung.

Manang Jesus ni kan yiiynag ni fare Messiah ni kan micheg e ir e ra gagiyeg ko fare am nra par ndariy n’umngin nap’an. (2 Samuel 7:12-14; Daniel 7:13, 14; Matthew 26:63, 64) Dab mu pagtalin ni yog Jesus faram ni ir fare Messiah ni kan yiiynag. Ere n’en ni be yip’ fan e ir fare Pilung ni ke dugliy Got. (John 4:25, 26) Aram fan ni boor yay ni i yog fare bugithin ni “gin nsuwog.”​—John 18:36.

Ki yog Jesus ni ku bay boch e girdi’ ni yad ra un ngak ko gagiyeg ko re Am nem. (Luke 22:28-30) I yog fa “chi ulung” ngorad ni bochan e ba mudugil urngirad. I weliy murung’agrad ni gaar: “Chitamangimed e ba adag ni nge pi’ e gin nsuwon ngomed.” (Luke 12:32) Bin tomur e babyor ko Bible e be yog ni 144,000 urngin e girdi’ ni yad ra un ngak Kristus ko gagiyeg.​—Revelation 5:9, 10; 14:1.

Uw e bay Gil’ilungun Got riy? I yog Jesus ngak Pontius Pilate ni pilung nu Roma ni gaar: “Gin nsuwog e dariy u roy u fayleng.” (John 18:36) Gil’ilungun Got e dabi gagiyegnag e girdi’. Boor yay ni yog Jesus ni Gil’ilungun Got e aram e “gagiyeg nu tharmiy.”a (Matthew 4:17; 5:3, 10, 19, 20) Ere, Gil’ilungun Got e reb e am ni bay u tharmiy.

Manang Jesus nra sul nga tharmiy u tomuren e par rok u fayleng. I yog nra ‘ngongliy tagil’’ e piin ni yad ra un ngak ko gagiyeg ni fan e nge mab e kanawo’ ngorad.​—John 14:2, 3.

Mang e ra rin’ Gil’ilungun Got? I yog Jesus ngak e piin ni ur motoyilgad ngak ni ngar meybilgad ni nge lungurad: “Ma ga par ni gur e ga be gagiyegnagmad, min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:9, 10) Yibe rin’ e n’en nib m’agan’ Got ngay u tharmiy. Ma Gil’ilungun Got e aram e n’en nra fanay Got ni nge lebguy e n’en nib m’agan’ ngay ni fan ko fayleng. Machane, som’on e bay boch ban’en nra thil u fayleng.

Mang e ra rin’ Gil’ilungun Got u fayleng? I yog Jesus nra chuweg Gil’ilungun Got e kireb ni aram e nge thang e piin ndubrad ni ngar rin’ed e tin nib fel’. (Matthew 25:31-34, 46) I yog Jesus nra sug e fayleng ko girdi’ “nib fel’ lanin’rad,” ma yad ba mat’aw, ma yad ba murunguy, ma ba “machalbog lanin’rad,” ma yad ba gapas.​—Matthew 5:5-9.

Ra par e miti girdi’ ney ko re fayleng ney nib alit, fa? Danga’, ya ke micheg Jesus nra beechnag Gil’ilungun Got e re fayleng ney. Nap’an nni li’ Jesus ngem’ ma immoy be’ nib moon u tooben ni gaar: “Jesus, dab mu pagtilig u nap’an ni ga ra yan nga gil’ilungum.” Me fulweg ni gaar: “Nggog ngom e daba’, ni ga ra moy rog u Paradis.” (Luke 23:42, 43, NW) Arrogon, Gil’ilungun Got e ra thilyeg e re fayleng ney nge mang paradis me sul nge bod rogon fare milay’ nu Eden.

Ku mang e ra rin’ Gil’ilungun Got ni fan ko girdi’? Gathi kemus ni micheg Jesus e n’en nra rin’ Gil’ilungun Got ya ki dag rogon. Boor e girdi’ ni golnagrad ko m’ar ni be dag e n’en nra rin’ boch nga m’on u nap’an nra gagiyegnag Gil’ilungun Got e fayleng. Bay ko Gospel murung’agen Jesus ni gaar: “Me yan Jesus nga gubin yang u Galile, ni be machibnag u lan tafen e muulung rorad e Thin Nib Fel’ ni murung’agen e gagiyeg rok Got, ma be golnag e girdi’ u urngin mit e liliy nge m’ar.”​—Matthew 4:23.

Boor mit e m’ar ni golnag Jesus. Immoy bayay ni ‘ngongliy owchen be’ nni gargeleg ma mmalmit nge guy ban’en.’ (John 9:1-7, 32, 33) Immoy bayay ni math ngak be’ nib daraw me gol. (Mark 1:40-42) Ma nap’an ni fek boch e girdi’ “be’ nib moon i yib ngak nib biling ma ba tagan e thin u l’ugun,” me golnag ya be dag ni mus ko “piin ni biling” ma rayog ni nge golnagrad ngar rung’aged ban’en, ma “piin nib tagan e thin u l’ugunrad” e rayog ni nge yal’uweg e thin u l’ugunrad.​—Mark 7:31-37.

Mus ko yam’ ma ki yog rok ni nge faseg. Dalip yay ni be yog e Bible ni faseg e yam’ ni aram e faseg ba pagel ni fak be’ nib pin ni kem’ figirngin, nge reb e buliyel ni 12 e duw rok, nge fager rok i Lazarus.​—Luke 7:11-15; 8:41-55; John 11:38-44.

I weliy Jesus u daken apostal John murung’agen e n’en ni bay nga m’on ni fan ko piin ni yad ra par u tan Gil’ilungun Got ni gaar: “Chiney e keb i par tafen Got nga fithik’ e girdi’! Bayi par rorad, ma bay ra manged girdien. Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Revelation 1:1; 21:3, 4) Aygum lemnag ni susun e ga bay u bang ndariy e kireban’ riy, nge amith, nge yam’! Ere n’en ni bay ko fare kenggin e meybil e ra riyul’. Yira rin’ e n’en nib m’agan’ Got ngay u roy u but’ ni bod ni yibe rin’ u tharmiy.

Wuin e ra yib Gil’ilungun Got? I yog Jesus nra tabab e gagiyeg rok ko ngiyal’ ni “bay.” I yiiynag Jesus murung’agen e ngiyal’ ni bay ni be gagiyeg ni ke pilung. Pow riy ni ke tabab ko gagiyeg e ra gel e mahl, uyungol, durru’, m’ar nib machreg ni ma af, nge girdi’ ndakir fol ko motochiyel. (Matthew 24:3, 7-12; Luke 21:10, 11) Pi n’ey nge ku boch ban’en ni yog Jesus nib muun ko fare pow e ke gagiyel ni ka nap’an e 1914 ni aram e ngiyal’ nni tay e Bin Som’on e Mahl ko Fayleng. Ere chiney e be gagiyeg Jesus nib Pilung ma dabki n’uw nap’an ma ra gagiyeg Gil’ilungun Got u fayleng me rin’ e tin nib m’agan’ ngay.b

Mang angin Gil’ilungun Got nra yib ngom? Binem e be yan u rogon ni ga ra motoyil ko thin rok Jesus.