Reb e Llowan’ nib Fel’

IMMOY dalip e pagal u Central Africa ni yad baadag ni ngar uned ko district convention ni ngan tay u bang nib chugur boch ko binaw rorad. Uw rogon ma rayog ni ngar uned ko re muulung nem? Ya ba chugur i 60 e mayel nga orel ko binaw rorad, mab kireb e kanawo’, ma dariy e maaf rorad. Mar lemnaged ni ngar ninged dalip e rat ma dar pirieged dalip nib fel’.

Ma bay reb e piilal ko ulung rorad ni nang e magawon rorad me yog ngorad ni rayog ni ngar feked e rat rok ni ke n’uw nap’an machane ku rayog e yan riy. Me weliy ngorad e n’en ura rin’ed boch e girdi’ kafram me yog ni ra uned nga reb e pi muulung nem. I yog fare piilal ngorad ni rayog ni nga ranod u taareb e rat. Ban’en nib mom machane ba t’uf ni ngan lemnag nib fel’ rogon. Uw rogon ni nge yan dalip e girdi’ u taareb e rat?

Ra tababgad ko milekag rorad ni rib kakadbul ni bochan e kab munguy e yal’. Ra tayed e chugum rorad nga daken e rat me af bagayad nga daken nge yan, me yan l’agruw i yad u but’ nguur lekew. Gonap’an 580 e yard ni ke yan fa cha’ u rat me tal nge girieg fare rat nga ba ke gek’iy u tooben e kanawo’ ni rayog ni nge guy fa gali cha’ mab mo’maw’ ni nge “iring” be’ me yan u but’.

Nap’an ni taw fa gali cha’ ko fare rat, me af bagayow nga daken miki yan bagayow u but’ ni ku gonap’an 580 e yard mfeni taw ko tayim rok ni nge yan u rat. Bochan ni kar lemnaged nib fel’ rogon ma ke yog ni ranod u but’ nib ngoch yang ni ra bagayad ma ke mus ni 40 e mayel ni ke yan riy. Ba ga’ angin e maruwel nib gel ni kar ted. Kar felfelan’gad ya kar mada’gad pi walagrad ma ke yog ni ngar uned ko convention. (Deut. 31:12) Rayog ni ngam athamgil u rogon ni rayog rom ngam un ko bin nib chugur ngom e convention ko biney e duw?