n’ey? Be yog e Bible ni gaar: “Faanra yim’ be’ ma ke chuw u fithik’ i gelngin e denen.” (Roma 6:7) Piin ni yira fasegrad ko yam’ e kan n’ag fan urngin e denen ni ur rin’ed u m’on ndawor ra m’ad. Ere, yu ke babyor nem e yugu boch e motochiyel ni bay fini pi’ Got. Faanra baadag e piin ni yad ra magey ni yad ba fas u tomuren e Armageddon nge piin ni yira fasegrad ko yam’ ni ngar pared ni manemus ma thingar ra folgad ko motochiyel rok Got, ni kub muun ngay e pi motochiyel ni bay fini pi’ Got u lan fare biyu’ i duw. Ere, pufthin ni yira tay ngak gubin e girdi’ e ra yan u rogon e n’en yad ra rin’ u nap’an fare Rran ko Pufthin.

Nap’an fare Rran ko Pufthin e aram e ngiyal’ nra fil bokum bilyon e girdi’ murung’agen e tin nib m’agan’ Got ngay mar folgad riy. Ere, ngiyal’ nem e boor ban’en ni yira fil. Maku yira nang ko “mang e ba mat’aw.” (Isaiah 26:9) Machane, gathi gubin e girdi’ nra fol. Be gaar e Isaiah 26:10 (BT): “Yugu aram rogon ni gab gol ko piin nib kireb, ma darir nanged rogon i rin’ e tin nib mat’aw. Mus u roy u lan e nam ko girdi’ nib mat’aw ma ka yad be ngongol nde mat’aw; yad be siyeg ni ngar nanged feni sorom.” Piin ndab ra folgad e yira thangrad u nap’an fare Rran ko Pufthin.​—Isaiah 65:20.

U tungun fare Rran ko Pufthin e fin rayog ni nge par e girdi’ nib ‘fos’ ni manemus ni kar flontgad. (Revelation 20:5) Ya nap’an fare Rran ko Pufthin e aram e ngiyal’ ni yira sulweg e girdi’ nga rogon ni bod ko tabolngin. (1 Korinth 15:24-28) Ngemu’ mfini yib e bin tomur e skeng ni aram e yira pag Satan u kalbus nib ngoch nap’an ni ngki guy rogon ni nge bannag e girdi’. (Revelation 20:3, 7-10) Ma piin ni yad ra fol e ri yad ra felfelan’ u nap’an ni yad ra guy ni ke lebug fare yiiy u Bible ni gaar: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Arrogon, yira tow’athnag e piin nib yul’yul’ u nap’an fare Rran ko Pufthin!

BA CHUGUR ko 40 e duw u m’on ko 1914 me yog e piin ma fil e Bible ni bay boch ban’en nib ga’ fan nra buch ko duw ni 1914. Mang e pi n’em, ma mang e be micheg ni 1914 e reb e duw nrib ga’ fan?

Rogon e thin rok Jesus ko Luke 21:24 e gaar: ‘Bay nthang e fan rorad ko sayden, min fekrad ni kalbus nga urngin e nam, ma piin ni gathi yad piyu Israel e bay ur yot’ed daken yu Jerusalem nge mada’ ko ngiyal’ ni ngar musgad riy.’ Fare nam nu Jerusalem e immoy ni tochuch u Israel, ma aram e gin ni i gagiyeg fapi pilung riy nra bad ko tabinaw rok David. (Psalm 48:1, 2) Pi pilung nem e yugu yad ba thil ko pilung ko pi nam i yan. Ya ur gagiyeggad u “daken fare chiya ko pilung” ni ke tay Jehovah, ni kar manged e piin ni owchen Got. (1 Kronicles 29:23) Ere, fare nam nu Jerusalem e be dag rogon e gagiyeg rok Jehovah.

Machane, uw rogon ni ‘yot’ e piin ni gathi yad piyu Israel daken’ e gagiyeg rok Got ni be yip’ fan ban’en? I buch e re n’ey ko duw ni 607 B.C.E. u nap’an ni kol piyu Babylon e nam nu Jerusalem. Ngiyal’ nem e par “fare chiya ko pilung” ni ke tay Jehovah ndariy be’ riy ma aram e dakuriy be’ ko tabinaw rok David ni mang pilung. (2 Kings 25:1-26) Ere gur, ra par ni aram rogon ndab ki thil? Danga’, ya yog reb e engel rok Got ni Gabriel fithingan ngak Maria ni Jesus e ir e yira “pilungnag, ni bod rogon David ni ir e ga’ rok.” (Luke 1:32, 33) Ere, nap’an nra pilung Jesus mfin aram e ngiyal’ nra tal e pi nam i ‘yot’’ daken yu Jerusalem.

Wuin e ra buch e re n’em nib ga’ fan? I tamilangnag Jesus ni bay n’umngin nap’an nra gagiyeg e piin ni gathi yad piyu Israel. Fapi thin ko Daniel ko guruy ni 4 e ba’ riy n’umngin nap’an e re ngiyal’ i n’em. Kan weliy u rom murung’agen ba lik’ay ni tay Nebukadnezzar ni Pilung nu Babylon ni bay rogon ko thin ni yog e profet. I guy ba ke gek’iy nrib ga’ ken ni kan toy nga but’. Ma ley ni ke magey u fithik’ e but’ e dabkiyog ni ngki tugul bayay ni bochan e kan longobiy bangi wasey nga kenggin ni kan ngongliy ko yugu wasey nge wasey ni bronze, ma ra par ni aram rogon u lan “medlip e duw.”​—Daniel 4:10-16.

Yu ngiyal’ e yima weliy murung’agen e gek’iy u Bible ni nge yip’ fan e gagiyeg. (Ezekiel 17:22-24; 31:2-5) Ere, fare ke gek’iy ntoy nga but’ e be dag rogon ni yira magawonnag e gagiyeg ni i tay fapi pilung nu Jerusalem. Machane, ba tamilang nib mudugil n’umngin nap’an ni yira ‘yot’ daken yu Jerusalem,’ ni aram e “medlip e duw.” Re n’ey e gathi ri medlip e duw, ya aram rogon e duw ni ma theeg e pi profet kakrom. Uw n’umngin nap’an e re ngiyal’ i n’em?

Be yog e Revelation 12:6, 14 ni dalip e duw e “ragag nge l’agruw mir’ay nge nel’ i ragag e rran” nrogon ni ma theeg e profet. Ere, ra “medlip e duw” ma 2,520 e rran. Tomuren ni war yu Jerusalem ma de tal e pi nam i ‘yot’’ daken yu Jerusalem u lan 2,520 e rran. Ere, ba tamilang nre yiiy ney e ba n’uw nap’an mfini lebug. Rogon ni bay ko Numbers 14:34 nge Ezekiel 4:6 e ra “reb e rran ma fen reb e duw.” Ma faanra aram rogon ma re “medlip e duw” nem e 2,520 e duw.

Fare 2,520 e duw e tabab u nap’an ni kol piyu Babylon fare nam nu Jerusalem ko October 607 B.C.E.a me mul fare chiya ko pilung u pa’ e tabinaw ku David. Re ngiyal’ i n’em e yan i mus ko October 1914 maku aram e ngiyal’ ni tal e pi nam i yot’ daken yu Jerusalem me pilung Jesus Kristus u Gil’ilungun Got u tharmiy.b​—Psalm 2:1-6; Daniel 7:13, 14.

I yog Jesus nnap’an nra mang Pilung u tharmiy ma boor ban’en nra buch u fayleng ni bod e mahl, uyungol, durru’ nge m’ar nib machreg ni ma af. Ma rriyul’ ni aram rogon ni be buch. Gubin e pi n’ey e be dag ni 1914 e aram e ngiyal’ ni tabab Jesus i gagiyegnag Gil’ilungun Got u tharmiy maku aram e ngiyal’ ni tabab e “tin tomren e rran” ko re m’ag nib kireb ney.​—2 Timothy 3:1-5.

GATHI ri boor yay ni ma weliy e Bible murung’agen fare engel ni Mikael fithingan. Machane, nap’an nra weliy e Bible murung’agen Mikael ma bay ban’en ni be rin’. U lan e babyor rok Daniel e kan weliy murung’agen Mikael riy ni be cham ngak e pi kan nib kireb; mu lan e babyor