Rib chugur e tha’ u thilin Bebe nge chitamangin. Ma pi thin ney e yog reb i girdien e tabinaw rok ngak. Machane, de fal’eg e pi thin ney laniyan’ Bebe ya gelnag boch e kireban’ rok. Ere, boor yay ni i gaar u laniyan’: “Dariy fel’ngin e yam’ ni ke tay.” Boch e duw nga tomuren u nap’an ni weliy Bebe murung’agen e n’en ni buch ko chitamangin u lan ba ken e babyor, me m’ug ko thin rok ni ka be kireban’ ko n’en ni ke buch.

I tamilang u wan’ Bebe nrayog ni nge n’uw nap’an mfini war e kireban’ rok be’ u tomuren ni ke yim’ be’ nib t’uf rok. Mab ga’ ni ma buch ni aray rogon ni faanra faen ni ke yim’ e be’ nri gimew ba chugur. Be yog e Bible ni yam’ e aram e “bin th’abi tomur e toogor.” (1 Korinth 15:26) Demtrug e ngiyal’ ni ma buch e re n’ey, maku rayog ni nge kirebnag rogon e par rodad, ma dariy ban’en nrayog ni nge gel ngay. Kub ga’ ni ma buch ko ngiyal’ ndad lemnaged nra buch riy, maku ma buch rok e piin nri yad ba t’uf rodad. Dariy bagadad nder ma kireban’ u nap’an nra yim’ be’ nib t’uf rok. Ere, dab da gingad ngay, ya ka ban’en ni ma buch nnap’an nra yim’ be’ nib t’uf rodad mab mo’maw’ ni ngad nanged rogon ni ngad athamgilgad u fithik’ e kireban’ rodad.

Dabisiy ni kam lemnag e pi deer ni baaray ni be gaar: ‘Uw n’umngin nap’an mfini yag ni nge tal be’ ndab ki kireban’ u tomuren ni ke yim’ be’ nib t’uf rok? Uw rogon ni nge athamgil be’ u fithik’ e kireban’ ni be tay? Uw rogon nrayog ni nggu fal’eg laniyan’ boch e girdi’ ni ke kireban’rad ni bochan e ke yim’ be’ nib t’uf rorad? Ma gur, ka bay e athap ko piin ni yad ba t’uf rodad ni kar m’ad, fa?’

Bay ba ngiyal’ ni kam m’ar, fa? Rayog ni sana nap’an ni yib e m’ar ngom ma de n’uw nap’an nga tomuren mag gol, ma aram e da kum lemnag fare m’ar ni ke yib ngom. Machane, kireban’ ni gad ma tay e ba thil. Ya yog reb e togta ni ka nog Dr. Alan Wolfelt ngak u lan ba ken e babyor ni yoloy ni gaar: “De puluw ni ngan lemnag nra taw nga ba ngiyal’ ma ra chuw e kireban’ ni be tay be’.” Miki ulul ngay ni gaar: “Ra munmun ma ra war e kireban’ rom. Maku reb e, ra i pi’ boch e girdi’ e athamgil nga lanin’um maku rayog ni nge ayuwegem.”​—Healing a Spouse’s Grieving Heart.

Am lemnag e n’en ni buch rok Abraham u nap’an ni yim’ leengin. Be yog e Bible ni “tabab Abraham ni nge kireban’ mi i yornag Sarah.” Fare bugithin ni “tabab” e be yip’ fan nib n’uw nap’an ni i par Abraham ni be kireban’ ni bochan e ke yim’ be’ nib t’uf rok. Kum lemnag e n’en ni buch rok Jakob u nap’an nni bannag mi nog ngak ni ke li’ reb e gamanman ni maloboch Josef ni fak ke yim’. “Ba n’uw nap’an” ni i par Jakob nib kireban’, ma de yag rok chon e tabinaw rok ni ngar fal’eged laniyan’. Boch e duw nga tomuren, ma ka be par ni be lemnag e n’en ni ke buch rok Josef.​—Genesis 23:2; 37:34, 35; 42:36; 45:28.

Boor e girdi’ e ngiyal’ ney ni ke yim’ be’ nib t’uf rorad ni ku aray rogon gelngin e kireban’ ni yad ma tay. Am lemnag e n’en ni buch ko gali cha’ ni baaray.

• “I yim’ Robert ni pumoon rog ko rofen ni July 9, 2008. Rofen nem ni yim’ riy e ku bod e yu rran. Tomuren ni kug mu’gow ko abich ni kakadbul, ma gamow faray owchemow, ma gamow gamuchmuch, ma ra bagamow me yog ngak bagamow nib t’uf rok. N’en ni gu rin’ew e ka bod rogon e n’en ni gamow ma rin’ ni gubin e rran. Ere, nel’ e duw nga tomuren ni yim’, ma yug gu ma par nib kireban’ug. Da gur lemnag ni bay ba ngiyal’ nra taw ngay ma dab ki kireban’ug ko n’en ni ke buch rok Rob.”​—Gail ni 60 e duw rok.

• “Yugu aram rogon ni ke pag 18 e duw ni ke yim’ leengig, machane ri ka be kireban’ug. Nap’an ni gu ra guy reb e woldug ara yugu ban’en nib fel’ yaan, ma ma yib ngan’ug leengig, ma kug ma lemnag rogon gelngin e felfelan’ nra tay ni faan gomanga ka bay ni be guy e re n’em.”​—Etienne ni 84 e duw rok.

Ba tamilang ni ka ban’en ni aram rogon nnap’an nra yim’ be’ nib t’uf rodad mab n’uw nap’an ni ma par nib kireban’dad. Machane, ra be’ ma rogon e kireban’ ni ma tay. Ere, de fel’ ni ngad turguyed e kireb nga daken be’ ni bochan rogon ni be dag rogon e kireban’ ni ke tay u nap’an ni ke yim’ be’ nib t’uf rok. Maku reb e, dab da lemnaged nib kireb ni be kireban’dad nib gel ni bochan e ke yim’ be’ nrib t’uf rodad. Ere, uw rogon ni ngad athamgilgad u fithik’ e kireban’?

Boor e fonow ni ma pi’ e girdi’ u murung’agen e re n’ey. Machane, gathi gubin e pi fonow ney nra yib angin. Bod ni sana bay boch e girdi’ ni yad ma yog ngom nde fel’ ni ngam yor, ara ngam dag, ara mu weliy e pi n’en ni bay u lanin’um. Ma boch e girdi’ e sana yad ma towasariyem ni ngam yor, ara ngam dag, ara mu weliy urngin ban’en ni bay u lanin’um. Machane, ba thil rogon e n’en ni be yog e Bible, ma pi n’en ni be yog e kub puluw ko pi n’en ni ke pirieg e piin llowan’.

Rogon e yalen u boch e nam e faanra yor reb e pumoon ma aram e ba meewar. Machane gur, ba puluw ni ngad tamra’gad ni ngaud yorgad ni ki mada’ ko ngiyal’ ni gad bay u fithik’ e girdi’? Piin ni boor ban’en ni yad manang u murung’agen rogon ni ma lem e girdi’ e ka rogned ni meyor ni ma tay e girdi’ e ka aram bang ko kireban’ ni yad ma tay. Ma kireban’ ni ga be tay e rayog ni nge ayuwegem ni nge munmun me war i lemnag rom facha’ nib t’uf rom ni ke yim’. Machane, faanra yigi elmerin ni ga be guy rogon ni nge war e kireban’ rom, ma rayog ni ngki k’aring boch e magawon ngom. Der yog e Bible ni faanra yor reb e pumoon u nap’an ni ke kireban’ ma aram e ba meewar, maku der yog nib kireb ni ngan yor u nap’an ni ke kireban’uy. Am lemnag e n’en ni buch rok Jesus, ya yugu aram rogon ni bay gelngin nrayog ni nge faseg e piin ni kar m’ad, machane ki yor u nap’an ni yim’ Lazarus ni fager rok!​—John 11:33-35.

Ngan par ni yib damumuw e ku aram bang ko kireban’ ni gad ma tay, nib ga’ ni faanra ba tomgin e yam’ ni ke tay faen nib t’uf rodad. Boor fan nrayog ni nga i par faen ni ka nim’ rok nib damumuw, nib ga’ ni faanra yog be’ nib chugur ngak facha’ boch ban’en nde lem u m’on riy ara de puluw. I yog reb e pumoon ni ma par u South Africa ni ka nog Mike ngak ni gaar: “Nap’an ni yim’ e chitamag ma ka fini gaman 14 e duw rog. Ma nap’an ni gu warod ko gum’eyag, me yog reb e tamachib ko fare teliw ni Anglican ngog nib t’uf boch e girdi’ nib fel’ rok Got u tharmiy. Ere, aram fan ni ma fekrad ndawori taw nga nap’an ni ngar m’ad.a Re n’ey e ri k’aring e damumuw ngog ni bochan e rib t’uf e ayuw ko chitamangimad romad. Yugu aram rogon ni ke pag 63 e duw nap’an ni ke buch e re n’ey, ma ka ma kireban’ug ngay.”

Ma uw rogon e bin baaray ni ngad lemnaged ni bay boch ban’en ni ke buch ni gadad e kireb rodad? Ba ga’ nnap’an nra yim’ be’ nib tomgin, ma rayog ni nge gaar faen ni ka nim’ rok u wan’, ‘Faan gomanga gu rin’ e biney fa gu rin’ e binem ma dabi buch e re n’ey.’ Fa reb e kam tugthingow facha’ u m’on ni nge yim’. Re n’ey e rayog ni nge k’aringem ni ngam lemnag ni fare n’em ni ke buch e gur e kireb rom.

Faanra ga be lemnag ni n’en ni ke buch e gur e kireb rom ara ga be par ni gab damumuw, ma ngam guy rogon ndab mu tay e pi n’ey u lanin’um. Mu weliy lanin’um ngak reb e fager rom nra motoyil ngom ma rayog ni nge ayuwegem ni ngam nang ni pi n’ey ni ga be lemnag e aram boch ban’en nib ga’ ni ma lemnag e piin ni ke kireban’rad ni bochan e ke yim’ be’ nib t’uf rorad. Be puguran e Bible ngodad ni gaar: “Pi tafager e gubin ngiyal’ ni yad ma dag e t’ufeg rorad. Mang gam’engin e walag ni faanra dab ra puruy’naged e gafgow rorad?”​—Proverbs 17:17, BT.

Bin th’abi fel’ e Fager nrayog ni nge yag ngak be’ ni ka nim’ rok e aram Jehovah Got ni ir e En ni Ke Sunmiydad. Ere, mu weliy lanin’um ngak u daken e meybil ni bochan e ‘be lemnag rogom.’ (1 Peter 5:7) Maku reb e, ke micheg ni urngin e piin ni yad ra rin’ e re n’ey e rayog ni nge fel’ lanin’rad nge tafinay rorad ni bochan e ra pi’ e gapas rok ngorad “ndabi chuchugur ni nge nang e girdi’ fan.” (Filippi 4:6, 7) Kub t’uf ni ngam pag Got ni nge fal’eg lanin’um u daken e Thin rok ni aram e Bible. Ere, mu yoloy boch e thin nu Bible nga but’ ni ga ra beeg ma ma fal’eg lanin’um. (Mu guy e kahol.) Kub fel’ ni ngam guy rogon ni ngam sul u daken boch e pi thin nu Bible nem ya nge yag ni mit ngom. Ya ireray e pi thin nrayog ni ngaum fal’eg i lemnag u nap’an ni goo gur nnep’ ni be mo’maw’ rogon ni ngam mol.​—Isaiah 57:15.

Dawori n’uw nap’an ma immoy reb e pumoon ni Jack fithingan ni 40 e duw rok ni yim’ e ppin rok ko cancer. I yog Jack ni bay yu ngiyal’ nrib gel e kireban’ ni ma tay ni bochan e yigoo ir. Machane, rib ga’ angin e meybil ni ma tay. I weliy ni gaar: “Nap’an ni gu ra meybil ngak Jehovah, ma ma ayuwegeg ni nge dab kug lemnag ni yigoo gag ndakuriy be’ rog. Ba ga’ ni gu ma od ni lukngun e nep’ ndabkiyog ni nggu mol. Machane, tomuren ni gu ra beeg boch e thin nu Bible ni ma fal’eg lanin’ug mug fal’eg i lemnag e n’en ni be yog, mug meybil ngak Got, ma aram e gu ma thamiy ni ke gapas lanin’ug, ma aram me yag ni ngkug sul nggu mol bayay.”

Ku bay reb e ppin ni ka nog Vanessa ngak ni ki yim’ e chitiningin ko m’ar. Kub ga’ angin e meybil ni i tay e re ppin ney. I yog ni gaar: “Nap’an ni gu ra thamiy ndabkiyog ni nggu athamgil, ma aram mug pining fithingan Got, mug tabab ko meyor. Ma motoyil Jehovah ko meybil rog ma gubin ngiyal’ ni ma pi’ gelngig.”

Bay boch e girdi’ ni yad ma ayuweg e piin ni ke kireban’rad ni yad ma yog ko pi girdi’ nem nib fel’ ni ngar rin’ed boch e maruwel u lan e binaw rorad ni fan ngak yugu boch e girdi’. Ya faan yad ra rin’ ni aram rogon ma rayog ni ngar felfelan’gad me war e kireban’ rorad. (Acts 20:35) Ere, boor e Kristiano ni ka nim’ rorad ni kar pirieged ni faanra ur rin’ed boch e maruwel ni ngar ayuweged boch e girdi’, ma ri ma fal’eg e re n’ey lanin’rad.​—2 Korinth 1:3, 4.

Bay ba ngiyal’ ni kam guy be’ nib chugur ngom ni kari kireban’ ni bochan e ke yim’ be’ nib t’uf rok ma dam nang ko uw rogon ni ngam ayuweg? Bay yu ngiyal’ ndad nanged e n’en ni nga dogned ara ngad rin’ed ngorad. Ere, bayi n’en ma gad par ndariy ban’en ni nga dogned ara da rin’ed ni fan ngorad. Machane bin riyul’ riy e, bay boch e ayuw nrayog ni ngad pied ko pi girdi’ ney.

Ba ga’ ni kemus ni n’en nib t’uf ko pi girdi’ ney e aram e ngar guyed gur ara nge lungum ngorad, “Kari kireban’ug ngom.” Boor e nam e faan ga ra gumuchmuch ngak facha’ ara mu kol pa’ ma aram e ga be dag ngak ni ga be lemnag. Faanra baadag facha’ ni nge non, mag motoyil ngak nib fel’ rogon. Ma n’en nth’abi fel’ nrayog ni ngam rin’ e ngam ayuweg ko pi n’en nib t’uf ni ngan rin’ u tabinaw rok. Bod ni faanra kam guy ni bay boch e maruwel u tabinaw ndawori m’ag rok ni nge rin’ ni bod rogon e lum, ara boch ban’en nib t’uf ni ngan rin’ ko bitir ko fare tabinaw, ara boch ban’en nib t’uf ni ngan rin’ ni bay rogon ko fare magawon, ma faanra baadag ma rayog ni ngam pi’ e ayuw ko pi n’ey. Ya kab ga’ angin e ayuw ni ga ra pi’ ko thin ni ga ra yog.

Sana ra munmun ma ga ra adag ni ngam weliy boch ban’en u murung’agen facha’ ni ke yim’, ni bod rogon boch i fel’ngin nrib manigil nge boch ban’en ni i rin’ u nap’an ni kab fas ni um felfelan’gow ngay. Gimew ra weliy faen ni ka nim’ rok murung’agen e pi n’ey ma rayog ni nge fel’ boch laniyan’. Pam e ke gaman nel’ e duw nap’an ni ke yim’ Ian ni pumoon rok. I yog ni gaar: “Bay yu ngiyal’ ni ma yog e girdi’ boch ban’en nib fel’ ngog ni i rin’ Ian u nap’an ni kab fos. Ma bay boch ko pi n’em nda gu nang murung’agen, ma pi n’ey e ma fal’eg lanin’ug.”

Ke pirieg e piin ni yad ma fil murung’agen boch ban’en nib ga’ nnap’an ni bayi yim’ be’ mab gel e ayuw ni yima pi’ ngak girdien e tabinaw rok, machane nap’an nra m’ay fare magawon ma ra be’ miki sul ngki rin’ e n’en ni ma rin’, ma aram e dab kun lemnag fapi cha’. Ere, nap’an nra m’ay fare magawon mab t’uf ni ngam guy rogon ni ngaum nonow facha’ ni ka nim’ rok ni gubin ngiyal’.a Boor e girdi’ ni yad baadag ni yima rin’ e re n’ey ngorad ni bochan e ma ayuwegrad ni nge dab ku yugu ra pared nib kireban’rad.

Am lemnag e n’en ni buch rok reb e ppin u Sapan ni ka nog Kaori ngak. Rib gel e kireban’ ni tay u nap’an ni yim’ e chitiningin ngemu’, ma 15 e pul nga tomuren miki yim’ reb e ppin ni walagen nib ilal ngak. Machane, rib ga’ e ayuw ni i pi’ e pi fager rok ngak. Bay bagayad e pi fager rok nem ni ka nog Ritsuko ngak nib ilal ngak Kaori nib palog e duw u thilrow. Ere, yog ngak Kaori ni baadag ni ngar fagergow. I yog Kaori ni gaar: “Bin riyul’ riy e, dabug e re n’em ni yog ngog. Ya dabug ni nge yon’ be’ lon e nina’ rog, ma kug be lemnag ndariy be’ nrayog ni nge yon’ lon. Machane, bochan ni gu baadag rogon ni ma ngongol Mama Ritsuko ngog, ma aram mug thamiy rog ni ke chugur e tha’ u thilmow. Gubin e wik ni gamow ma yan ko machib nge muulung u taabang. Bayi n’en me piningeg ni nggu warow nga bang ni nggu unumew e tea, maku ma yib i pi’ boch e ggan ni nggu way, maku boor yay ni i yoloy boch e babyor nga i pi’ ngog. Rib ga’ angin e n’en ni rin’ Mama Ritsuko ngog.”

Ke pag ragag nge l’agruw e duw ni ke yim’ e chitiningin Kaori, ma chiney e yow ma pigpig e pumoon rok u polo’ e tayim rorow ni yow l’agruw e tamachib. I yog Kaori ni gaar: “Ka ma dag Mama Ritsuko ngog ni ma lemnageg. Nap’an ni gu ra yan ko binaw rog, mab ga’ ni gu ma yan gguy ma gu ma felfelan’ ni bochan e ma pi’ e athamgil nga lanin’ug.”

Poli ni ir reb e Pi Mich Rok Jehovah ni ma par u Cyprus e kub ga’ angin e ayuw ni i pi’ e pi tafager rok ngak. Pumoon ku Poli ni ka nog Sozos ngak e ir be’ nrib gol, ma ir reb e piilal u lan e ulung ni boor ban’en ni ma rin’ nib manigil ya ba ga’ ni ma pining boch e bitir nder ma un e gallabthir rorad ko tin riyul’ nge boch e walag nib pin ni ke yim’ figirngirad nga tabinaw rorow leengin ni ngar rin’ed boch ban’en mi yad abich u taabang. (James 1:27) Machane, rib gel e kireban’ riy ni bochan e nap’an ni gaman 53 e duw rok Sozos me yib e cancer ko man’ey rok, ma aram me yim’. I yog Poli ni gaar: “Ke yim’ e pumoon rog ni ir be’ nrib yul’yul’ ni ke gaman 33 e duw ni kug mabgolgow.”

Tomuren nni k’eyag e pumoon ku Poli, ma aram ma ranow Daniel ni fak ni 15 e duw rok ra parew nga Canada. Nap’an nranow ngaram ma aram mu ur unew nga reb e ulung ko Pi Mich Rok Jehovah ni bay u rom. I yog Poli ni gaar: “Dariy reb e walag ko re ulung nem ni manang e n’en ni ke buch romow nge rogon e magawon ni gamow be mada’nag. Yugu aram rogon ma ur guyed rogon ni ngar nonad ngomow, ma u rogned boch e thin ngomow u fithik’ e sumunguy, mu ur ayuweged gamow u boch ban’en nib t’uf romow. Rib ga’ angin e pi ayuw nem ngomow ya aram e ngiyal’ nrib t’uf be’ ni nge ayuweg fakag ni bod rogon e chitamangin! Ere, i athamgil e piin piilal u lan e ulung ni ngar daged ngak Daniel ni yad be lemnag. Ma bay bagayad nnap’an ni yad ra yog boch e walag boch ban’en ni ngar rin’ed u taabang ara nga ranod ko bat, ma ma guy rogon ni nge pining Daniel ni nge un ngorad.” Chiney e ke fel’ rogon e re matin ney nge re pagel ni fak ney.

Boor e kanawo’ nrayog ni ngad ayuweged e piin ni ke kireban’rad riy ma gad fal’eg lanin’rad. Ku be weliy e Bible murung’agen boch ban’en nrayog ni ngad athapeged ni fan ko gabul nge langlath nra fal’eg lanin’dad.

Sana ra yib ngan’um Gail ni faan kad weliyed murung’agen. Ma maruwar u wan’ ko bay ba ngiyal’ nra taw ngay ma ra war e kireban’ ni be tay ko yam’ ni ke tay Rob ni figirngin fa danga’. Yugu aram rogon, ma be sonnag e ngiyal’ ni yow ra mada’ bayay u lan e bin nib beech e fayleng ni ke micheg Got. I yog ni gaar: “Revelation 21:3, 4 e aram e re thin nu Bible nri gu baadag. Ya be gaar: ‘Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.’”

Ki ulul Gail ngay ni gaar: “Rib puluw e n’en ni be yog e re thin ney. Be kireban’ug ngak e piin ni ke yim’ be’ nib t’uf rorad, machane dar nanged ni ka bay e athap rorad nrayog ni ngkur guyed yad bayay.” Ba puluw e ngongol rok Gail ko n’en nib mich u wan’ ni bochan e ke ognag ir ni nge mang reb e tamachib ni ma machib u polo’ e tayim rok, ma ma weliy ko girdi’ murung’agen e n’en ni ke micheg Got ni fan ngodad boch nga m’on ko ngiyal’ ni “dab ku unim’.”

Machane, sana ra lungum, ‘Dabi mich e re n’ey u wan’ug!’ Machane, am lemnag e n’en ni buch rok be’ ni ka nog Job ngak. Ba gel e m’ar ni yib ngak Job. (Job 2:7) Yugu aram rogon ni i athapeg Job ni manga yigi yim’, machane ba mich u wan’ ni bay gelngin Got nrayog ni ngki faseg bayay me par u fayleng. Aram fan ni yog ni gaar: “Gu be athapeg ni yigum mithageg u lan e fayleng ko yam’ . . . Ma aram e bay mu pong, mu gu fulweg, ma bay gu fel’ u wan’um, i gag e en ni mu sunmiyeg.” (Job 14:13, 15, BT) Ere, ba pagan’ Job nnap’an nra yim’ ma dabi pag Got talin ma ra i athapeg ni nge taw ko ngiyal’ ni nge faseg ko yam’.

Ra boch nga m’on u nap’an ni yira fal’eg e re fayleng ney nge mang paradis, ma ra faseg Got Job nge ku boch e girdi’ ko yam’. (Luke 23:42, 43) Be micheg e Bible ko Acts 24:15 ni gaar: ‘Bayi faseg e girdi’ ko yam’.’ Ki micheg Jesus ni gaar: “Dab mu gingad ko re bugithin ney; ya ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.” (John 5:28, 29) Ra guy Job e re thin ney ni ke lebug. Nap’an ni yira faseg ko yam’ ma ke “pagel bayay” ma ke “sul gelngin” nga rogon, ma ra par ni aram rogon ndariy n’umngin nap’an. (Job 33:24, 25) Ku arrogon e n’en nra buch rok e piin ni yad ra fol rok Got u tomuren ni ke fasegrad ko yam’ mi yad par u fayleng.

Faanra bay be’ ni ke yim’ nrib t’uf rom, ma fapi n’en ni kad weliyed e sana dabi chuweg gubin e kireban’ rom. Machane, faan ga ra fal’eg i lemnag e pi n’en ni ke micheg Got u lan e Bible ma rayog ni nge yag e bin riyul’ e athap ngom, miki pi’ gelngim ni nge yag nim athamgil u fithik’ e kireban’ rom.​—1 Thessalonika 4:13.

Ga baadag ni ngkum nang boch rogon ni ngam athamgil u fithik’ e kireban’ rom, fa? Gur, ga ma lemnag boch e deer ni bod rogon e re deer ni baaray ni be gaar, “Mang fan ni ke pag Got e kireb nge gafgow”? Rayog ni ngam man ko website romad ni jw.org, mag guy boch e fulweg riy ni be pi’ e Bible nrayog ni nge fal’eg lanin’um.