Keb ngan’um ba ngiyal’ nim dol’ u nap’an ni ka gab bitir, fa? Sana nap’an nim dol’ mag gad paam nga but’ nge math’ bang riy ara madurdur matibugum. Ka ga manang rogon ni fal’eg e nina’ rom lanin’um, fa? Rayog ni sana ke klinnag e maad’ad rom me m’ag ban’en ngay. Ba mudugil ni kam yor, machane dabisiy ni ke fel’fel’ ngom miki gamuchmuch ngom, ma aram me fel’ lanin’um. Ngiyal’ nem ni ka gab achig e gubin ngiyal’ ni bay be’ ni ma fal’eg lanin’um.

Machane, nap’an ni gad ra ilal boch, ma aram e be mo’maw’ e par rodad i yan. Ya aram e ngiyal’ ni gad ma mada’nag boch e magawon nib ga’, maku bayi n’en mab mo’maw’ ni ngad pirieged be’ nra fal’eg lanin’dad. Riyul’ ni magawon ni ma mada’nag e piin ni kar ilalgad e de taareb rogon nga bochi maad’ad ni ke tay bochi tir ni yug rayog ni nge m’ag e chitiningin ban’en ngay me gamuchmuch ngak, ma aram me fel’ laniyan’. Baaray boch e pi magawon nem.

• Bay ba ngiyal’ ni kan n’agem ko maruwel rom, fa? I yog be’ ni ka nog Julian ngak nnap’an nn’ag ko maruwel rok, mi ri kireban’. I gaar u wan’, ‘Uw rogon ni nggu pi’ e tin nib t’uf ko tabinaw rog? Mang fan ni kan lemnag ndakuriy angig ko re raba’ i maruwel ney ni yugu aram rogon urngin e duw ni kug maruwel riy ma ri gu ma tiyan’ug ko maruwel?’

• Sana rayog ni kari kireban’um ni bochan e kam wergow e en mabgol rom. I yog Raquel ni gaar: “Ragag nge meruk e pul ni ke yan ma aram me n’ageg e pumoon rog. Rib gel e kireban’ nug tay, ya gowa bod ni ke kan ban’en nga gum’irchaeg ke ruw raba’. Rib gel e amith ni tay lanin’ug, ma kub gel e m’ar nug tay ni bochan e n’en ni buch rog. Rib gel e mochuch nug tay.”

• Rayog ni sana keb ba mit e m’ar ngom nrib ubchiya’ ni ke mo’maw’ ni ngam gol riy. Sana rayog ni bay yu ngiyal’ ni ga ma lem ni bod Job ni faani gaar: “Ke mulan’ug; ke chuwan’ug ko yafos rog.” (Job 7:16, BT) Rayog ni sana ga be lem ni bod rogon reb e pumoon ni ka nog Luis ngak ni ke gaman 80 e duw rok. I yog ni gaar: “Bay yu ngiyal’ ni gu ma sonnag ni nggum’.”

• Fa reb e ba t’uf ni ngan fal’eg lanin’um ni bochan e ke yim’ be’ nib t’uf rom. I yog Robert ni gaar: “Nap’an ni yim’ ba pagel ni fakag u nap’an ni pil e sikoki, ma som’on e ba mo’maw’ ni nge riyul’ u wan’ug e re n’em. Ma aram me tabab ni ngari amith lanin’ug, ni bod rogon feni m’uth ba sayden ni ke rag ngak be’ nrogon ni be yog e Bible.”​—Luke 2:35.

Bay be’ ni yag ni nge fal’eg laniyan’ Robert, nge Luis, nge Raquel, nge Julian u fithik’ e pi magawon nra mada’naged nrib mo’maw’. Cha’nem e aram Got ni Gubin Ma Rayog Rok. Uw rogon ni ma fal’eg Got lanin’dad? Rayog ni nge fal’eg lanin’um, fa?

Be yog e Bible ni Jehovaha e ir e en ni ma “golnag laniyan’ e piin ke kireban’rad” ara en ni ma fal’eg lanin’dad u fithik’ e pi magawon ni gad ma mada’nag. (Psalm 147:3, BT) Ere, be micheg e Bible ngodad ndakuriy be’ nga bang nrayog ni nge ayuwegdad ni bod rogon Got, ma dariy ba mit e magawon ni gad ma mada’nag ni kaygi ga’ ndabiyog rok ni nge fal’eg lanin’dad riy.

Machane faanra nge fal’eg Got lanin’dad, ma bay ban’en nthingar da rin’ed. Uw rogon nrayog ni nge tafalaynagdad reb e togta ni faanra dad weliyed u m’on riy? I fith Amos ni profet ni gaar: “Gur rayog ni nge milekag l’agruw ni’ u taabang ndar weliyew ni ngar chaggow?” (Amos 3:3, BT) Ere, aram fan ni be gaar e Bible: “Mu chugurgad ngak Got, me chugur ngomed.”​—James 4:8.

Mang fan ni gad manang nra chugur Got ngodad? Som’on e, boor yay ni ke yog ngodad ni baadag ni nge ayuwegdad. (Mu guy e thin ni bay u lan e kahol.) Ma bin migid e, bochan ni boor e girdi’ ni kar micheged ni ke yag ni nge fal’eg Got lanin’rad. Boch e pi girdi’ nem e ur moyed kakrom ma boch e yad bay e ngiyal’ ney.

David ni Pilung e ir be’ ni boor e magawon ni i mada’nag ma i wenig ngak Got ni nge ayuweg ni bod rogon ni ma rin’ boor e girdi’ e ngiyal’ ney. Immoy bayay ni wenig ngak Jehovah ni gaar: “Mu rung’ag lungug u nap’an ni gu ra man ayuw ngom.” Ere gur, i fulweg Got taban e meybil rok? Arrogon, ya ki ulul ngay ni gaar: “Ma pi’ e ayuw nge felfelan’ ngog.”​—Psalm 28:2, 7, BT.

ROGON NI MA FAL’EG JESUS LANIYAN’ E PIIN KE KIREBAN’RAD

Ba m’agan’ Got ngay ni nge fal’eg Jesus laniyan’ e girdi’. Boor e maruwel ni ke pi’ ngak Jesus ni nge rin’, ma reb riy e aram e nga i “fal’eg laniyan’ e piin ni ke kireban’rad.” (Isaiah 61:1, 2) Ere, i ayuweg Jesus e piin ni ‘ke aw parowrad i fek e n’en nib tomal ni yad be fek’ ni bod rogon nni yiiynag u m’on riy.​—Matthew 11:28-30.

I pi’ Jesus boch e fonow nib manigil ni i fal’eg laniyan’ e girdi’, ma be dag e ngongol nib fel’ ngorad, maku immoy yu ngiyal’ ni i golnag e m’ar ko girdi’. Immoy bayay ni yib be’ nib moon nib daraw i wenig ngak ni gaar: “Faanra mm’agan’um ngay ni ngam chuweg e daraw rog ma ga chuweg, ya rayog rom.” Ma aram me runguy Jesus fare moon me gaar ngak: “Mm’agan’ug ngay, ere nge chuw e daraw rom!” (Mark 1:40, 41) Ma aram me chuw e daraw ko fare moon.

Ngiyal’ ney e daki moy Fak Got u fayleng nrayog ni nga i fal’eg laniyan’ e girdi’ ni bod ni i rin’ kakrom. Machane, Jehovah ni Chitamangin ni ir fare Got ni ma “golnag laniyan’ e piin ke kireban’rad” e ka be ulul ni nga i ayuweg e piin nib t’uf e ayuw rorad. (Psalm 147:3, BT) Am lemnag aningeg ban’en ni ma fanay Got ni nge fal’eg lanin’dad.

• Bible. “Urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.”​—Roma 15:4.

• Gelngin Got nib Thothup. De n’uw nap’an nga tomuren ni yim’ Jesus, ma bay ba ngiyal’ ni yag ni nge par e ulung ni Kristiano u fithik’ e gapas. Mang fan? Ya i “ayuweg fare Kan ni Thothup [“gelngin Got nib thothup,” NW] girdien” e ulung. (Acts 9:31) Gelngin Got nib thothup, ara gelngin ni ma maruwel ngay e ban’en nrib gel. Rayog ni nge fanay Got e re n’ey ni nge fal’eg laniyan’ be’ ndemtrug e re miti magawon ni be yan facha’ u fithik’.

• Meybil. Be fonownagdad e Bible ni gaar: “Dariy ban’en ni nge magafan’med ngay.” Ya be gaar: “[Mmeybilgad] ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed.”​—Filippi 4:6, 7. 

• Pi Walagdad ni Kristiano e aram e tin riyul’ e fager nrayog ni ngar fal’eged lanin’dad u nap’an ni kad mada’naged boch e magawon nrib mo’maw’. I yog Paul ni pi walagen u lan e ulung e yad e “ri ba ga’ e ayuw ni ur pied ngak” u nap’an ni i mada’nag e “togopluw nge gafgow.”​—Kolose 4:11; 1 Thessalonika 3:7.

Machane, sana rayog ni ga be lemnag ko uw rogon nrayog ni ngam pirieg e pi ayuw ney. Chiney e ngad weliyed murung’agen boch e girdi’ ni kar mada’naged fapi magawon ni kad weliyed murung’agen ko fa bin som’on e article, ya rayog ni ngam nang riy ni ka ma rin’ Got e n’en ni ke micheg ni ke gaar: “Bay gu fal’eg lanin’med, . . . ni bod e matin ni be fal’eg laniyan’ fak.”​—Isaiah 66:13, BT.

NAP’AN NI YIRA TALEG BE’ KO MARUWEL

I yog Setha ni gaar: “Taabangiyal’ nni talegmow e ppin rog ko maruwel romow. Ere, l’agruw e duw ni kemus ni yigoo salpiy ni ayuw ni ma pi’ e am ko pi tabinaw nib gafgow nge nochi maruwel nib achig ni gamow ma rin’ e ir e ug abichgad e tabinaw romow riy. Bochan e re n’ey, ma aram mi ri kireban’ Priscilla ni ppin rog, mu ug par ni gu be lemnag ndakuriy ban’en ni gub fel’ ngay.”

“Mang e ayuwegmow? I par Priscilla ni be puguran ngan’ fapi thin ni yog Jesus ni bay ko Matthew 6:34. I yog nsusun e dabi magafan’dad nga rarogodad gabul, ya ra reb e rran mab gaman e tin nra magafan’uy ngay ni bay riy. Maku reb e, meybil ni i tay e ku aram e n’en ni ki ayuweg ni nge athamgil. Me gag e ayuwegeg fare thin ni bay ko Psalm 55:22. Gu folwok rok faen ni yoloy e psalm ni aram e gu pag fan urngin e gilab rog ngak Jehovah, ma aram me ayuwegeg. Yugu aram rogon ni kug pirieg e maruwel e chiney, machane ka gamad ma fol e tabinaw rog ko fare fonow ni pi’ Jesus ni bay ko Matthew 6:20-22. Ma bin th’abi ga’ fan riy e kug chugurgad ngak Got ma kki chugur e tha’ u thilmad u lan e tabinaw.”

I yog Jonathan ni gaar: “Ri magafan’ug nga rarogon e par ko tabinaw rog boch nga m’on u nap’an nug taleg e siyobay rog ya dakuriy e salpiy riy. Nap’an ni buchuuw e salpiy ko nam, me yan i aw nib m’ay fan e maruwel ni kug tay u lan 20 e duw. Tomuren e re n’ey ma aram mu ug parew e ppin rog ni yug gamow be tugthinnag murung’agen e salpiy. Mus ko credit card ni immoy romow ni kug dabuyew ni nggu fanayew ni nggu chuw’iyew boch ban’en ni bochan e gamow be magarnag nrin siyeg.

“Machane, Thin rok Got nge gelngin nib thothup e aram e n’en ni ayuwegmow ni nggu dugliyew boch ban’en nib fel’ rogon. Gu tay ngan’ug ndemtrug rogon feni sobut’ puluwon reb e maruwel ma thingari m’agan’ug ni nggu un ngay, mu kug lichnagew urngin e pi n’en ni gamow ma n’ag e salpiy ngay. Maku reb e, bochan ni gamow l’agruw e Pi Mich Rok Jehovah ma kub gel e ayuw ni i pi’ e piin taareb e michan’ romad ngomow. Ra pied e athamgil nga lanin’mow, mu ur ayuweged gamow ko ngiyal’ ni kari t’uf e ayuw romow.”

NAP’AN NRA WER BE’ NGE EN MABGOL ROK

I yog Raquel ni gaar: “Nap’an ni n’ageg e pumoon rog, mi ri kireban’ug mu kug damumuw. Ug par ni gubin ngiyal’ nib kireb e tafinay rog. Machane, gu athamgil ni ngari chugur e tha’ u thilmow Got, ma aram me fal’eg lanin’ug. Gubin e rran ni gu ma meybil ngak, ma gapas rok e aram e n’en ni i ayuweg lanin’ug. Ir e ke golnag lanin’ug.

“Maku bochan e Thin rok u Bible, ma aram e n’en ni ayuwegeg ni nge war e damumuw rog ma da kug tay u lanin’ug e kireb ni kan rin’ ngog. I ayuwegeg fapi thin ni yog apostal Paul u Roma 12:21 ni gaar: ‘Dab mu digey e kireb nge gel ngom; machane ngam ngongliy e ngongol nib fel’ ngam gel ngak e kireb.’

“Bay reb e fager rog ni ayuwegeg ni nggu nang nib t’uf ni nge dab kug lemnag e pi n’en ni ke thumur. I dag fare thin ngog ni bay ko Eklesiastes 3:6 (NW) me yog ngog ni bay ‘ngal’an ni ngan pag ban’en.’ Ba gel e fonow ni pi’ ngog, machane aram e n’en nib t’uf rog. Chiney e gu be lemnag yugu boch ban’en nib thil.”

I yog Elizabeth ni gaar: “Nap’an nra kireb e mabgol rom, mab t’uf be’ ni nge ayuwegem. Immoy reb e fager rog ni aram e n’en ni i rin’ ngog ni gubin e rran. Ma un ngog ngaug yorgow u taabang, ma be fal’eg lanin’ug, miki dag ngog ni gub t’uf rok ni yugu aram rogon ni kan n’ageg. Kari mich u wan’ug ni aram e cha’ ni fanay Jehovah ni nge golnag lanin’ug.”

NAP’AN NRA M’AR BE’ ARA KE PILIBTHIR

Luis ni faan kan weliy murung’agen ko bin som’on e article e ba m’ar ko gum’ircha’ rok, ma l’agruw yay ni chugur ni nge yim’. Chiney e ra reb e rran ma 16 e awa nib t’uf ni nge fanay e gas riy. I yog ni gaar: “Gubin ngiyal’ ni gu ma meybil ngak Jehovah. Machane, tomuren ni gu ra mu’ ko meybil ma gu ma thamiy gelngin nib thothup ni ke pi’ gelngig. Meybil e aram e n’en ni ke ayuwegeg ni nggu athamgil ni bochan e ba mich Got u wan’ug ma gu manang ni ma lemnageg.”

Petra ni ke pag 80 e duw rok e yog ni gaar: “Boor ban’en ni gu baadag ni nggu rin’, machane dabkiyog. Ri be kireban’ug ni gu be guy ni gu be war i yan. Gubin ngiyal’ ni gu ma par ni gub tomal ma thingar gu par ni gu be unum e falay. Ba ga’ ni gu ma lemnag fa ngiyal’ nem ni yog Jesus ngak e Chitamangin ni nge chuweg u fithik’ reb e magawon ni mada’nag. Machane, i pi’ Jehovah gelngin Jesus ni nge athamgil, maku arrogog ni ma pi’ gelngig. Meybil e aram e falay rog ni gubin e rran. Ri ma baud lanin’ug u tomuren ni kug non ngak Got.”​—Matthew 26:39.

Ku aray rogon e lem rok be’ ni ka nog Julian ngak ni ke chugur ni nge gaman 30 e duw ni ke yib ba mit e m’ar ngak ni ka nog e multiple sclerosis ngay. I gaar: “Kafram e ug moy u reb e liw nib tolang u tabon barba’ e maruwel ma chiney e kug par nga wheelchair. Yugu aram rogon ma fin chiney e ke yib fan e yafos rog ni bochan e gu ma rin’ boch ban’en ni fan ngak yugu boch e girdi’. Faanra um rin’ boch ban’en ni fan ngak yugu boch e girdi’ ma rayog ni nge warnag e kireban’ rom, ma gubin ngiyal’ ni ma rin’ Jehovah e n’en ni ke micheg ni aram e ra pi’ gelngidad ko ngiyal’ ni ke t’uf e ayuw rodad. Rayog ni nggog nriyul’ fapi thin ni yog apostal Paul ni faani gaar: ‘Demturug e mit i n’en ni gu ra mada’nag ma ba’ gelngig ni ke pi’ [Got] nrayog ni gu par riy.’”​—Filippi 4:13.

NAP’AN NI KE YIM’ BE’ NIB T’UF ROM

I yog Antonio ni gaar: “Nap’an ni aw e karrow ko chitamag nge yim’, ma gu ra lemnag e n’en ni ke buch rok ma gowa ban’en nde mat’aw, ya kemus ni yugu be yan u kanawo’ me aw e karrow ngak. Machane, dariy ban’en nrayog ni nggu rin’ ngay. Lal e rran ni mol nde od, ma nga tomuren ma aram me yim’. Gu ma guy rogon ndab gu yor u nap’an ni bay e nina’ rog u toobeg, machane faanra yigoo gag ma ri gu ma yor nib gel. Gubin ngiyal’ ni ma lungug, ‘Mang fan? Mang fan?’

“Nap’an e pi rran nem e ug par ni gu be wenig ngak Jehovah ni nge ayuwegeg me pi’ e gapas nga lanin’ug. Munmun ma aram me yag ni nge gapas lanin’ug. I yib ngan’ug fare thin ni be yog e Bible ni bay yu ngiyal’ ni ma buch boch ban’en ‘ndan lemnag.’ Ma pi n’ey e demtrug be’ nrayog ni nge buch rok. Dabiyog ni nge ban Got. Ere, ba mich u wan’ug ni kug ra mada’nag e chitamag bayay u nap’an ni yira faseg e piin ni kar m’ad.”​—Eklesiastes 9:11, NW; John 11:25; Titus 1:2.

Ireray e n’en ni lemnag Robert ni faan kan weliy murung’agen ko bin som’on e article. I gaar: “Ke yag ni nggu piriegew e ppin rog e gapas laniyan’ ni kan weliy murung’agen ko Filippi 4:6, 7. I yag ni nge gapas lanin’mow ni bochan e ug meybilgow ngak Jehovah. Re gapas laniyan’ ney e ayuwegmow ni nggu weliyew ngak girdien e news murung’agen e athap romow ko fos ko yam’. Yugu aram rogon ni ke yim’ fakmow ko re sikoki nem, machane boor ban’en ni ug rin’ed u m’on ni nge yim’ ni ug felfelan’gad riy ni ke par u lanin’mow. Ma aram e pi n’en ni gamow ma guy rogon ni ngaug lemnagew ni gubin ngiyal’.

Nap’an ni yog boch e Pi Mich Rok Jehovah ngomow ni kar guyed yaamow u TV ni kug weliyew e michan’ romow nib fel’ rogon ndag rusgow, ma aram ma gamow yog ngorad ndariy e maruwar riy ni ke yag ni nggu rin’ew e re n’em ni bochan urngin e pi walag ni kar pied e meybil ni fan ngomow. Riyul’ ni kari mich u wan’ug ni ke fal’eg Jehovah lanin’mow ko pi n’en nib fel’ ni unog ngomow.”

Ere, ba tamilang ko pi n’en ni kad weliyed nrayog ni nge fal’eg Got laniyan’ e girdi’ ni yugu aram rogon nib thilthil e pi magawon ni yad ma mada’nag. Ma uw rogom? Demtrug e re miti magawon ni ga ra mada’nag, ma bay be’ nrayog ni nge fal’eg lanin’um u fithik’ e pi magawon rom.b Ere, mu sap ngak Jehovah ni nge ayuwegem, ya ir fare Got ni ma “golnag laniyan’ e piin ke kireban’rad.”​—Psalm 147:3, BT.