Dan Nog e Thin ma Kan Pi’ e Mich
1 De t’uf ni nge yog Jehovah e thin ya tin ni ke sunumiy e ma tamilangnag felngin ndanir guy nga owchey. (Ps. 19:1-3; Rom. 1:20) Ku arrogon e ngongol rodad nib fel’ nge rarogon e Kristiano, nge rogon yaadad nib yaram, ma aram e ma pi’ e mich ni de t’uf ni ngan nog e thin. (1 Pet. 2:12; 3:1-4) Susun ni ngad adaged ni ngad “girngiyed e fel’ ko machib ni murung’agen Got ni ir e ma thapegdad ngak” u daken e ngongol rodad.—Titus 2:10.
2 Uw rogon nrayog ko girdi’ nde flont ni ngar ayuweged e machib ko Bible? Ke mus ni rayog e re n’em u daken e fonow ko Thin Rok Got nge gelngin fare kan ni thothup. (Ps. 119:105; 143:10) Thin rok Got e “ba fos ma ba’ gelngin ni ma maruwel. Ya kub m’uth nga bangi sayden ni ruw raba’ ma mm’uth.” (Heb. 4:12) Ma taw nga fithik’dad ma ma n’igin nrayog ni ngad don’ed nga dakendad fa bin biech pangiy. (Kol. 3:9, 10) Kan ni thothup e ma n’igin nge yib u fithik’dad e pi felngin ni gol, nge fel’, nge munguy, nge t’ar laniyan’. (Gal. 5:22, 23) Gad be pag ni nge maruwel ko yafos rodad e Thin rok Got nge kan ni thothup rok?—Efe. 4:30; 1 Thess. 2:13.
3 Ma Guy e Girdi’: Nap’an ni gad ma fol ko thin rok Jehovah ma gad ma athamgil ni ngad daged pi felngin Got ko ngongol rodad, ma ma guy e girdi’ e re n’em. Susun, bay reb e pumoon nib ngochngoch ma girdi’ u tabon e maruwel rok e ur moningnaged. Bay reb e walag ni ppin ni ma maruwel u rom ma gubin ngiyal’ ma ba fel’ e ngongol rok ngak ma ma tay fan fare moon. Ere kan k’aring fare pumoon ni nge fith fare ppin ko mang fan ni ba thil e ngongol rok. Ke weliy fare ppin ni ba fel’ e ngongol rok ya be fol ko thin ko Bible. Miki weliy ngak u murung’agen fare athap ko Gil’ilungun Got. Ke tabab fare moon ni nge fil e Bible me mon’og iyan me un ko taufe. Nap’an ni ke sul nga binaw rok, ma girdi’ rok e kar gingad ko ngongol rok nib fel’ ma boch i yad e kar uned ko thin nriyul’.
4 U tabon e maruwel, nge skul, nge rogon ni ngan ngongol ngak e girdi’ rodad nge piin buguli yoror rodad, ma rayog ni ngad k’aringed e girdi’ ngar pininged e sorok ku Got ni bochan e ngongol rodad nib fel’ nge machib ni gad ma tay.—Matt. 5:16.