Ngan Ayuweg e Girdi’ Ngar Manged Pi Fager rok Got
1 Ngiyal’ ney ma yibe fil e kanawo’ rok Jehovah ngak e girdi’ u gubin e nam. (Isa. 2:2, 3) Machane ba t’uf ni nge t’uf Jehovah rorad ni aram e “nguur folgad rok me par rorad nge yib wom’engirad.” (Luke 8:15; Mark 12:30) Ya faanra dariy e t’ufeg ni aram rogon ma dariy gelngin ni ngar togopuluwgad ko pi n’en nib kireb ni ra suwey lanin’rad ma dabiyog ni ngar pared ni dar rusgad ni ngar rin’ed e tin nib mat’aw. Reb e kanawo’ ni ngad ayuweged e girdi’ nge fel’ thilrad Jehovah e aram e ngan n’igin ngar ted fan pi felngin Got. Ngan piningrad ngar bieged e Bible u gubin e rran ma ngar fl’eged i lemnag ko uw rogon ni be m’ug pi fel’ngin.
2 Ngam Tay e Kanawo’: Ngongol rom e rayog ni nge k’aring gum’erchaen e pi Bible student. Nap’an ni yad ra guy ni ga ma chaariy rogon nib fel’ thilmew Jehovah ma yad ma guy ko uw rogon nib l’ag ko yafos rom, ma aram e ra k’aringrad ni ngar athamgilgad nge fel’ thilrad Jehovah. (Luke 6:40) Arrogon, kanawo’ ni gad ma tay e kab gel ko thin ni gad ma yog.
3 U daken e kanawo’ ni yad ma tay ma ma fil e pi gallabthir ko bitir rorad ni nge t’uf Jehovah rorad. (Deut. 6:4-9) Ba adag ba wu’ i mabgol ni ngar chugliyew e bitir rorow ko thin nriyul’ me ere kar fithew e pi gallabthir ni kar rin’ed e re n’em ni ngar pied e fonow ngorow. Yog fa en ni figirngin ni gaar: “Urngin e gallabthir ni kug non ngak e ke yog ni thingari tay e gallabthir e kanawo’ ko ngongol rok.” Ere u daken e par ko yafos rorad ma ma dag e pi gallabthir ko bitir rorad ko uw rogon ni ngan mang “fager rok Jehovah.—Jas. 2:23.
4 Ngam Meybil u Gum’erchaem: Rayog ni ngam ayuweg e girdi’ nge fel’ thilrad Jehovah ya ngam fil rogon ngorad ni ngar meybilgad ngak u gum’ercharad. Ngam tamilangnag fare meybil ni tay Jesus nge yugu boch e meybil ni bay ko Bible. (Matt. 6:9, 10) Rayog ni ngam fil ko bitir rom nge pi Bible study ko uw rogon ni ngan meybil u daken e meybil ni ga ma tay. Nap’an ni yad ra rung’ag e meybil ni ga ma tay ni yib u gum’erchaem, ma yad ra nang ko uw rogon thilmew Jehovah. Ngam piningrad ni ngar “meybilgad ni gubin ngiyal’” u nap’an ni ma yib e magawon ngorad. (Rom. 12:12) Yad ra guy ni be ayuwegrad Jehovah ko ngiyal’ nib t’uf ma aram ma yad ra pagan’ ngak ma ra t’uf Jehovah rorad ni bod be’ ni fager nriyul’.—Ps. 34:8; Fil. 4:6, 7.