Guruy ni 13

“Urngin ni Ngam Rin’ed ni Fan e Nga Nog e Sorok Riy Ngak Got”

GADAD e pi tapigpig rok Got ni kad ognaged gadad ngak, ma thingar da pininged e sorok ngak Jehovah ko urngin e thin ni gad ma yog nge urngin ban’en ni gad ma rin’. I pi’ apostal Paul e fonow faani gaar: “Demtrug e n’en ni gimed ra rin’, ndemtrug ko ngam abichgad ara ngam garbodgad, ma urngin ni ngam rin’ed ni fan e nga nog e sorok riy ngak Got.” (1 Kor. 10:31) Re n’ey e ba muun ngay ni ngad folgad ko pi motchiyel rok Jehovah, ni be dag pangin nib flont. (Kol. 3:10) Thingarda folgad rok Got ni gad e girdi’ nib thothup.​—Efe. 5:1, 2.

I tamilangnag apostal Peter e re n’ey ko pi Kristiano me gaar: “Um folgad rok Got, ma tin nib kireb ni um m’ad ni bochan ko ngiyal’ ndawor mu nanged Kristus riy e dab kum paged nge mang ir e i gagiyegnag pangimed. Machane ngam pired ni gimed ba thothup u fithik’ urngin e tin ni gimed be rin’, ni bod rogon Got nib thothup ni ir e ke piningmed. Ya be gaar e babyor nib thothup, ‘Thingar mpired ni gimed ba thothup, ya gub thothup.’ ” (1 Pet. 1:14-16) Bod rogon piyu Israel kakrom ma ba t’uf ko pi Kristiano ni ngar pared nib thothup. Ere thingara pared ni dariy e kireb rorad ma yad ba klin ya dar kirebgad ko ngongol nib kireb nge ngongol ko fayleng. Yad e piin ni ke mel’egrad Jehovah ni ngar pigpiggad ngak.​—Ex. 20:5.

Ngan fol ko pi motochiyel rok Jehovah ma ngan par nib thothup. Thin Rok Got e be tamilangnag e pi motochiyel ney. (2 Tim. 3:16) Kad filed e Thin Rok Got ma kad filed u murung’agen Jehovah ma kad chugurgad ngak. Gathi ke mus ni kad filed boch e machib ma kad taufegad u fithik’ e ran ma aram e kad manged girdien. Ya kad filed e Bible ma ke mich u wan’dad nib t’uf rodad ni ngad mon’eged Gil’ilungun Got ma ngad rin’ed e tin nib m’agan’ Jehovah ngay ni aram e n’en nth’abi ga’ fan ko yafos rodad. (Matt. 6:33; Rom. 12:2) Ere ba t’uf ni nga don’ed nga dakendad e bin biech pangiy.​—Efe. 4:22-24.

PAR NIB KLIN KO TIROK GOT BAN’EN NGE NGONGOL

Gathi ba mom ni ngan fol ko pi motochiyel rok Jehovah nib mat’aw ya kad ognaged gadad ngak. Ya An Toogor rodad ni Satan ni Moonyan’ e ba adag ni ngad paloggad ko tin riyul’. Tin nib kireb nu fayleng e be liyegdad ma gad e girdi’ ni ta denen ma aram e ma magawonnagdad. Bochan e pi n’ey ni urngin ma ba t’uf ni ngad uned ko cham nib spiritual. Be yog e Bible ngodad ni dabda gingad u nap’an ni yib e togopuluw fa gafgow ngodad. Thingarda gafgowgad ni bochan e gad be un ko tin nib mat’aw ban’en. (2 Tim. 3:12) Rayog ni ngad pared nib falfalan’ u fithik’ e gafgow ya gad manang ni gad be rin’ e tin nib m’agan’ Got ngay.​—1 Pet. 3:14-16; 4:14-16.

Yugu demtrug ni Jesus e be’ nib flont machane u daken e gafgow ni i tay e fil rogon riy ni ngi i fol rok Got. Dariy taab yay ni ke war me pag Satan nge wawliy fa nge lek e tin ko fayleng ban’en. (Matt. 4:1-11; John 6:15) Dariy taab yay ni ke lemnag Jesus ni dabi fol boch. Girdi’ nu fayleng e kar fanenikayed Jesus ni bochan e kanawo’ rok nib yul’yul’ machane ke par ni be fol ko pi motochiyel rok Jehovah nib mat’aw. U m’on ni yim’ me ginang Jesus pi gachalpen ni girdi’ nu fayleng e kar fanenikayed ya gathi ir bang ko fayleng maku er rogon ni yad ra fanenikayrad. Ka nap’an e ngiyal’ nem iyib ngaray ma kan gafgownag pi gachalpen Jesus Kristus machane dar rusgad ya ke gel Fak Got ko fayleng.​—John 15:19; 16:33; 17:16.

Ba t’uf ni ngad folgad ko pi motochiyel rok Got nib mat’aw ni bod rogon e Masta rodad ma aram e gad ra gel ko fayleng. Thingar dabda uned ko ngongol ko am nge fafel ko fayleng nge ngongol nde yalen. Ngad folgad ko pi thin ni bay ko James 1:21 ni be gaar: “Mu n’iged urngin e ngongol romed nib golong ni kam mechamgad riy nge urngin i pangimed nib kireb. Mpired u tan pa’ Got ma gimed be fol ko thin rok ni ke yung nga lanin’med, ya ereray e re n’en nrayog rok ni ngi i ta’med rok Got.” Ngii par e thin nriyul’ u lanin’dad ngu gum’erchadad u daken e fol babyor nge pi muulung ma aram e michan’ rodad e ra par nib gel ni mus u fithik’ e gafgow nge magawon. Pi n’en nu fayleng e ba gel rogon ni ma suwey laniyan’ e girdi’ ma thingar dabda tababgad i ar’ar’nag e tin nu fayleng ban’en. Mang fan? Ya be ginang James ni gaar: “Da mu nanged ni faanra mfagergad ko fayleng ma aram e kam manged toogor rok Got? Cha’ nra finey ni nge mang fager rok e fayleng e aram e ke tay ir ni ir e toogor rok Got.” (Jas. 4:4) Ba tamilang u wan’um ko mang fan ni be weliy e Bible e thin nib gel ni ngad folgad ko pi motochiyel rok Jehovah ma ngad pared nib dar ko fayleng?

Thin Rok Got e be ginangdad ndabda uned ko ngongol nde yalen mab tamra’. Be yog ni ‘de mat’aw ni nge un u l’ugundad e thin ko darngal ara thin nib golong, ara thin ko chogow, ni bochan e gadad girdien Got.’ Ere dabda paged lanin’dad nge lemnag e pi n’en nib puwlag ara tamra’ ara kireb, ma susun dabda uned ko sabethin u murung’agen. Thingar dabda yaliyed e kachido ni be dag yaan e ngongol ndarngal nge ngongol nde yalen. (Efe. 5:3-5) Ere gad be micheg ni gad ba adag ni ngad folgad ko pi motochiyel rok Jehovah ko ngongol nib fel’.

PAR NIB KLIN KO DOWEF

Baga’ fan ko pi Kristiano ni gathi ke mus ni ngar pared nib klin ko tin nib spiritual ban’en nge ngongol rorad ya ku dowrad. U Israel kakrom ma fare Got nib thothup e ke tay chilen ni nge par e binaw rorad nib klin. (Deut. 23:14) Par ko ngiyal’ nem e thingari puluw ko pi motochiyel rok Jehovah u rogon e par nib klin. Ku arrogon gadad e thingarda pared nib klin ya ra yaliydad Jehovah ma ‘dabi guy ban’en nde yalen u fithik’dad.’

Rogon ni be yog e Bible ma thothup e ba m’ag ko par nib klin. Susun, i yoloy Paul ni gaar: “Ngad pithiged gadad u urngin ban’en ni ma alitnag e dowef nge lanin’uy, ma ngad gayed rogon ni ngad pired ni gadad ba thothup, ni aram e nguud pired ni ba’ madgun Got u wun’dad. (2 Kor. 7:1) Ere tin riyul’ e Kristiano e ma athamgil ni ngar pared nib klin ma yad ma maluk ma yad ma luknag e mad rorad u gubin ngiyal’. Ba thil thil salpen e girdi’ u reb e nam nge reb, machane pi Kristiano ni pumoon nge ppin e yad ma fanay e soap nge ran ni ngar pared nib klin nge ku bitir rorad.

Gad ba lingagil u lan e binaw ya gad ma wereg e machib. Gad ma pi’ e mich u daken e naun rodad nib yaram u langgin ngu wuru’. Aram ban’en nrayog ni nge rin’ urngin e girdi’ ko tabinaw. Pi figirngiy nge matam e susun ni ngar tedan’rad ko tabinaw rorad nge lan e garor ya re n’em e be pi’ e mich ko girdi’ ni faanra ba fel’ yaan mab yaram. Pi lolugen e tabinaw e yad manang ni re n’ey nge rogon ni yad ma mon’eg e tirok Got ban’en ma be dag ni yad be ayuweg e tabinaw rorad. (1 Tim. 3:4, 12) Pi leengiy nge pi matin e ku bay boch ban’en nib mil fan ngorad ni baga’ nu lan e naun. (Titus 2:4, 5) Pi bitir ni kan fonownagrad e yad ma guy rogon nge par e singgil rorad nge dowrad nib yaram mab klin. Ere urngin e girdi’ ko tabinaw e ma maruwel u taabang ngar athamgilgad ngar pared nib klin ya aram rogon e par ko bin nib biech e fayleng u tan pa’ Gil’ilungun Got.

Boor e Pi Mich Rok Jehovah ko ngiyal’ ney ni bay e karro rorad ni nga ranod ko pi muulung nge machib. U boch e binaw ma ri ba t’uf e karro ko machib. Ma susun ni nge par nib klin mab fel’. Naun rodad nge karro rodad e susun ni be pi’ e mich ni gad girdien Jehovah nib klin mab thothup.

Rogon ni gad ma munmad nge yaadad ma susun nib puluw ko machib ko Bible. Dabda lemgad ni nga darod ngad guyed e pi tayugang ko am ma gad be chuw ko mad nde fel’. Kab ga’ fan ni ngad tedan’dad ko re n’em u nap’an ni gad be pigpig ku Jehovah ko machib fa welthin! Rogon yaan piyan lolugdad nge mad rodad e ba m’ag ko uw rogon u wan’ e girdi’ e liyor ku Jehovah. De puluw ni ngad chuwgad ko mad nde yalen ni gathi be lemnag e yug girdi’. (Mik. 6:8; 1 Kor. 10:31-33; 1 Tim. 2:9, 10) Ere nap’an ni gad be fl’eg rogon ni ngad uned ko machib ara muulung ko ulung fa circuit assembly fa convention ma susun ni ngad lemnaged ko mang e be yog e Bible u murung’agen e par nib klin ko dowef nge yaan nib yaram ya aram e gad ra n’uf Jehovah u gubin ngiyal’.

Ku aram rogon u nap’an ni ngan yan ko branch ofis ko Pi Mich Rok Jehovah. Fan fare ngochol ni “Bethel” e “Naun rok Got.” Ere rogon ni gad ma munmad nge yaan piyan lolugdad e susun ni taareb rogon ko ngiyal’ ni gad ma yan ko Kingdom Hall ko pi muulung ko liyor.

FAFEL ARA ENTERTAINMENT NIB FEL’

Ba t’uf ni ngan toffan ma ngan fafel boch. Bay biyay ni ke yog Jesus ko pi gachalpen ni nga ranod ko gin ni dariy be’ riy mar “toffangad boch.” (Mark 6:31) Fel’ ni ngan toffan boch fa ngan fafel ya ra fl’eg lanin’uy. Ma ra pi’ e toffan ngodad ma aram e rayog ni nge pi’ gelngidad ngad rin’ed e maruwel rodad.

Boor mit e fafel ni ba’ me ere ba t’uf ko pi Kristiano ni ngar turguyed e n’en ni ngar rin’ed u fithik’ e gonop. Bay rogon ni ngan fafel machane gathi aram e n’en nth’abi ga’ fan ko yafos. Kan ginangdad ni nap’an e “tin tomren e rran” ma girdi’ e “bayi t’uf e fafel rorad me tomur Got u wan’rad.” (2 Tim. 3:1, 4) Ngiyal’ ney ma boor ban’en ni yibe rin’ ko “fafel” ara “entertainment” e de puluw ko piin ni ba adag ni ngar folgad ko pi motochiyel nib mat’aw rok Jehovah.

Thingari athamgil e tin som’on e Kristiano ni dabra uned ko fafel nde yalen ni be rin’ e girdi’ nu fayleng. Nap’an fare circus nu Roma ma ba adag e girdi’ ni ngar guyed e girdi’ ni yibe gafgownagrad. Fafel ko ngiyal’ nem e ba l’ag ko cham, nge li’ e girdi’ ngar m’ad, nge ngongol ndarngal, machane i palog e tin som’on e Kristiano ko pi n’en nem. Ku aram rogon e ngiyal’ ney ma entertainment ko fayleng e ba l’ag ko pi n’en nib kireb. Ba t’uf ni ngad ‘ayuwgad u rogon e ngongol rodad’ ma ngad paloggad ko entertainment nde yalen. (Efe. 5:15, 16; Ps. 11:5) Ma mus ni dariy e kireb ko mit e entertainment machane girdi’ ni be un ngay e ba kireb.​—1 Pet. 4:1-4.

Boor mit e fafel nge entertainment nib fel’ ko pi Kristiano ni ra ayuwegrad ngar toffangad boch me sul gelngirad min fl’eg laniyan’rad. Ke yib angin boor i yad ya kar folgad ko fonow ko Bible nge pi babyor ko Pi Mich Rok Jehovah.

Yu ngiyal’ ma ma yan e Kristiano nga reb e tabinaw ko fafel. Fa yibe pining e pi walag ni pumoon nge ppin ngar uned ko madenom ko mabgol fa yugu reb e ban’en. (John 2:2) Piin ni be tay e pi madenom nem e mmil fan ngorad e n’en ni yibe rin’. Ere pi Kristiano e ra lemnag u fithik’ e gonop ni dabi yoor e girdi’ nra un ngay. Faanra ngan unum e alkul ma susun ni ngan rin’ ndabi pag rogon. (Fil. 4:5) Faanra ngan athamgil ni ngan tay e mur fa madenom nib puluw ko Kristiano ma ra fl’eg laniyan’ e girdi’ ko tirok Got ban’en, ma n’en nth’abi ga’ fan e gathi fare ggan nge garbod.

Ba t’uf e ayuw u nap’an nra muulung e girdi’ ni pire’ u taabang. Ya ra falfalan’ e girdi’ ma yad be toffan me ere boch e girdi’ e ra pag e ngongol ko Kristiano mar paged rogon e abich nge garbod fa yugu boch ban’en nib gel e kireb riy.

Ffel’ ni ngan gol ko girdi’. (1 Pet. 4:9) Nap’an ni ngad pininged e girdi’ ngar bad nga tafendad ko abich, nge garbod, nge fafel’, nge sabethin, ma dabda paged talin e piin nib gafgow. (Luke 14:12-14) Faanra gad ra yan nga tafen be’ ma susun nge puluw e ngongol rodad ko Mark 12:31. Ffel’ ni ngan pining e magar ko piin ni kar golgad ngodad.

Ma falfalan’ e pi Kristiano ko pi flaab ni ma pi’ Got ma ngar ‘abichgad ma yad garbod nge felan’rad ko tin ni kar maruweliyed.’ (Ekl. 3:12, 13) Piin ni ma tay e pi fafel ney e ra guy rogon ni ngan rin’ uw rogon ni be n’uf Got, ma urngin e girdi’ ni kar uned ngay e ra fl’eg laniyan’rad ko tirok Got ban’en ma dariy ban’en nra methan’rad ngay.

PI N’EN NI YIBE RIN’ U SKUL

Bitir ko Pi Mich Rok Jehovah e ma yib angin ngorad ni ngar uned ko skul. Nap’an ni yad bay u skul ma yad be athamgil ni ngar filed e yol mar bieged e babyor nib fel’ rogon. Maku yibe fil boch ban’en nra ayuweg e piin fel’ yangaren ni be mon’eg e tirok Got ban’en. Nap’an ni yad be un ko skul ma yad ba adag ni ngar ‘lemnaged e en ni sunumiyrad’ mar mon’eged e tirok Got ban’en.​—Ekl. 12:1.

Faanra gur reb e fel’ yangaren ni Kristiano ni be un ko skul, ma ba t’uf ni ngam ayuw riy. Nap’an nra un e piin fel’ yangaren ko ngongol nib kireb ma thingar dab mu un ngorad. (2 Tim. 3:1, 2) Boor ban’en nrayog ni ngam rin’ ni ngam palog ko pi n’en ko fayleng. Ke pi’ Jehovah e pi n’en nib t’uf ni ngad paloggad ko pi n’en nib kireb nra yib ngodad. (Ps. 23:4; 91:1, 2) Ere ngam fol ko pi n’en ni be pi’ Jehovah ya ra ayuwegem.​—Ps. 23:5.

Pi Mich ni fel’ yangaren e ra par nib dar ko fayleng u nap’an ni yad be un ko skul ma ba fel’ ni ngar lemnaged e riya’ ni ngar uned ko boch ban’en ni extracurricular activities. Pi classmate nge sensey ma gathi gubin ngiyal’ ni ra tamilangan’rad ko mang fan ni dabmu un ko boch ban’en. Machane, n’en nib ga’ fan e ngam felan’nag Got. Ere thingar mu fol ko pi n’en ni kam fil ko Bible ma ngam par nib mudugil ni dabmu un ko tagenging ara ngongol ko am, ya ba togopuluw ko motochiyel ko Bible. (Gal. 5:19, 26) Gimed e piin fel’ yangaren, rayog ni ngam folgad ko pi motochiyel rok Jehovah ni faanra ngam motoyil ko fonow ko Bible ni be yog e gallabthir romed ma ngam un ko pi walag u lan e ulung ngam folgad ngorad.

MARUWEL NGE GIRDI’ U TABON E MARUWEL

Pi lolugen e tabinaw e thingara folgad ko Bible ni ngar ayuweged e tabinaw rorad ko tin nib t’uf rorad. (1 Tim. 5:8) Machane yad e tapigpig rok Got ma yad manang ni maruwel e ba tomur ko tirok Got ban’en. (Matt. 6:33; Rom. 11:13) Yad ra yul’yul’ ku Got mar pared nib falfalan’ ko tin nib t’uf rorad, ma aram e dabi magafan’rad ko chugum nge par nib fel’ rogon ni goo be lek e girdi’ nu fayleng.​—1 Tim. 6:6-10.

Gathi ke mus ni pi lolugen e tabinaw ya ku urngin e Kristiano ni kar ognaged yad ku Got ma yad be maruwel u bang ma susun ni ngar lemnaged e pi thin ko Bible. Ngad rin’ed e n’en nib t’uf ni nge yog ngodad e tin nib t’uf rodad machane gad ra par nib yul’yul’ me ere dabda uned ko pi n’en nra th’ab e motochiyel rok Got nge motochiyel ko am. (Rom. 13:1, 2; 1 Kor. 6:9, 10) Maku ba t’uf ni ngad ayuwgad riy ndabda chaggad ko girdi’ nu fayleng. Gad e pi salthaw rok Kristus me ere dabda uned ko pi n’en nra yog e salpiy ngodad ni faanra de puluw ko Kristiano fa dabi ayuwegdad ko tirok Got ban’en. (2 Tim. 2:4) Ma daba uned ko pi n’en nib l’ag ko toogor rok Got ni “Babylon nib Gilbuguwan.”​—Rev. 18:2, 4; 2 Kor. 6:14-17.

Faanra gad be fol ko pi motochiyel rok Got ma dabda fanayed e girdi’ ko ulung ni ngan mon’ognag e tirodad ban’en ni fan ko business fa yugu ban’en. Fan ni gad ma chag ko girdi’ ko ulung u nap’an e pi muulung ko Kristiano nge circuit assembly, nge convention e ngan liyor ku Jehovah ma ngan abich ko tebel rok nib spiritual ma ra bagadad e nge pi’ e athamgil nga laniyan’ bagadad. (Rom. 1:11, 12; Heb. 10:24, 25) Susun ni ngad pared e pi walag u taabang ni fan ko tirok Got ban’en.

NGE PAR E KRISTIANO NI YAD TAAB GIRDI’

Pi motochiyel rok Jehovah e be tay chilen ko girdi’ rok ni “nguur pired ni yad taab girdi’ ni fare kan ni thothup e ke pi’ ngorad u daken fare gapas ni ir e ke m’agrad nga taabang.” (Efe. 4:1-3) Ra be’ ma dabi lemnag ni nge felan’nag ir ya ra guy rogon ni nge rin’ e tin nib fel’ ngak e girdi’. Dabi siy ni aram rogon ni kam guy u lan e ulung ko Kristiano. Demtrug e nam rodad ara rogon fene yoor e salpiy rodad fa rogon e skul ni kad ted ma gad gubin e taareb e motochiyel ni gad ma fol riy. Mus ni girdi’ nu fayleng ma kar guyed e re n’ey ko girdi’ rok Jehovah.​—1 Pet. 2:12.

I tamilangnag apostal Paul ko mang fan ni gad taab girdi’ ni gaar: “Taareb e dowef ni bay ma taareb e Kan ni Thothup, ni bod rogon nri taareb e l’agan’ ni bay ni ir e ke piningmed Got ngay. Ya taareb e Somol ni bay, ma go ir e ke mich u wun’dad, ma taareb e taufe; ma ri taareb e Got ni bay ni ir e Chitamangidad ni gadad gubin, ni ir e Somol rodad ni gadad gubin, ma be maruwel u pa’dad ni gadad gubin, ma bay u fithik’dad ni gadad gubin.” (Efe. 4:4-6) Rib gel rogon ni be piningdad nge taab lanin’ad ko machib ko Bible nge tin ni kan fil ngodad ya aram e be dag ni gad be fol rok Jehovah ni ir e ani ga’ rodad! Rriyul’ ke pi’ Jehovah ko girdi’ rok e thin nib machalbog ni thin nriyul’ ni rayog ni ngar pigpiggad u taabang.​—Zef. 3:9.

Rogon ni be par e ulung ko Kristiano ko ngiyal’ ney u fithik’ e gapas ni yad taab girdi’ e be pi’ e toffan ko urngin e piin ni ma liyor ku Jehovah. Kad guyed ni ke lebug e n’en ni micheg Jehovah ni gaar: “Bay gu kunuymed nga taabang ngam pired ni gimed bod e saf ni bay u lan ba sum.” (Mik. 2:12) Gad ba adag ni ngad pared ni gad taab girdi’ u nap’an e par rodad nib thothup u reb e rran nge reb ni gad be fol ko pi motochiyel rok Jehovah.

Be felan’ e piin ni be un ko ulung nib klin rok Jehovah! Ngan pining e ngochol rok Jehovah ngodad ma bay rogon ni ngad paged fadad. Nguud pared nib fel’ thildad Jehovah ma ngad athamgilgad ni ngad folgad ko pi motochiyel rok nib mat’aw ma ngad pininged e yug girdi’ ni ngar rin’ed.​—2 Kor. 3:18.