“Gubin Ngiyal’ Nthingar Umogned e Thin Ngorad Nib Fel’ Ma Ba’ Fan”

1. Mang e be yip’ fan e pi thin ni ‘nthingar umogned e thin ngorad nib fel’ ma ba’ fan’?

¹ “Gubin ngiyal’ nthingar umogned e thin ngorad nib fel’ ma ba’ fan, ma thingar mu nanged rogon ni ngam pied e fulweg nib mat’aw ko tin ni ke fith be’ nge be’ ngomed.” (Kol. 4:6) Thin nib fel’ ma ba’ fan e be yip’ fan ni ngad mel’eged e thin nib puluw ma nga dogned u rogon ni nge fel’ u wan’ e girdi’. Rib ga’ fan ni ngad rin’ed ko ngiyal’ ni ngad uned ko machib u mit e tabinaw.

2. Uw rogon nrayog rok Jesus ni nge machibnag fare pin nu Samaria?

² Machib ni Tay Jesus: Nap’an e ngiyal’ ni i toffan Jesus u tooben e luwed, i athamgil ni nge machibnag reb e ppin nu Samaria ni ke yib ni nge ling e ran. In yay ni i weliy fare pin u murung’agen e magawon u thilin piyu Israel nge piyu Samaria. Maku i weliy nib mich u wan’ ni piyu Samaria e yad pi fak Jakob, yugu aram rogon ni ma lemnag piyu Israel ni piyu Samaria e yad e girdi’ nu yugu ba nam. De togopluw Jesus ko pi thin rok, ya i non u murung’agen e tin nib puluw. Angin ni ke yib e rayog rok ni nge machibnag u rogon ni nge ayuweg fare pin nge pi pumoon u lan e mach.​—John 4:7-15, 39.

3. Uw rogon nrayog ni ngad folwokgad rok Jesus ko ngiyal’ ni nga darod ko machib u mit e tabinaw?

³ Nap’an e ngiyal’ ni nga darod ko machib u mit e tabinaw ma susun ni dab da paged talin e n’en ni gad be nameg​—‘ngad feked i yib e thin nib fel’ ni yib rok Got.’ (Rom. 10:15) Gad baadag ni ngad machibnaged e thin nu Bible nra pug e tafinay rok e girdi’ nge ubingrad, ma dab daged ngorad ni gad be togopluw ko tin nib mich u wan’rad. Faanra weliy be’ u murung’agen ban’en nib mich u wan’ nde puluw, ma dab da togopluwgad ngak. Bay boch e thin rok nib puluw u wan’dad nrayog ni ngad pininged e magar ngak fa? Sana rayog ni ngad beeged e thin nu Bible ni ngad gaargad, “Ka amu lemnag e re n’ey bayay fa?”

4. Mang e ngad rin’ed nfaanra ri be togopluw be’ ngodad?

⁴ Faan mang e ri be togopluw be’ ngodad ara ba tamilang ni ke mus ni ba adag ni nge tugthin? Susun ni ngad daged e sumunguy nge gol ko ngongol nge thin rodad. (2 Tim. 2:24, 25) Faanra de tay facha’ fan e thin ko Gil’ilungun Got, ma kab fel’ ni ngad weniggad ngak ngad chuwgad rok.​—Matt. 7:6; 10:11-14.

5. Uw rogon ni ke yib angin nib fel’ ngak reb e walag nbochan e ke fulweg u fithik’ e munguy?

⁵ Angin nib Fel’: Nap’an e ngiyal’ ni ke guy reb e walag rogon ni nge machibnag be’ ni buguli yoror rok, ma ke puwan’ fare pin, me yog e thin nib kireb ngak. Ke fulweg fare walag u fithik’ e sumunguy ni gaar: “Wenig ngom, dagu nang aram rogon e lem rom. Ka fel’.” L’agruw e wik u tomur riy ma ke yib fare pin nga tabinaw rok fare walag me wenig ngak ko ngongol rok, me yog nra motoyil ko pi thin rok fare walag. Ba ga’ nra yib angin nib fel’ ko ngiyal’ ni ngan fulweg u fithik’ e sumunguy!​—Prov. 15:1; 25:15.

6. Mang fan ni ba ga’ fan ni nga nog e thin ni ba puluw ko girdi’ ko ngiyal’ ni ngan un ko machib u mit e tabinaw?

⁶ Nga mu guyed rogon ni ngau mogned e thin ni ba puluw ko yugu girdi’ ko ngiyal’ ni ngam wereged fare thin nib fel’. Yugu aram rogon ndabun be’ e machib, machane sana ra motoyil ko yay ni migid nra yib e Pi Mich Rok Jehovah nga tafen.