Babyor Ni Ke Yib Ko Fare Governing Body

Ngak e Piin ni Gamad ni Pi Mich Rok Jehovah:

Gubin ngiyal’ ni ke mab e kanawo’ ngak Paul ma ke tamilangnag rogon feni t’uf pi walagen rok. I yol ngak e pi Kristiano nu Roma ni gaar: “Nggu pining e magar ngak e Got rog u daken Jesus Kristus ni bochmed ni gimed gubin; ya re fayleng ney ni polo’ e yad be rung’ag e michan’ romed.” (Rom. 1:8) Arrogon, ba gagiyel e pi Kristiano u ga’ngin yang u Roma ko bin som’on e chibog ni bochan e ba gel e michan’ rorad ma ya ba pasig ko machib. (1 Thess. 1:8) Aram fan ni i t’ufegrad Paul!

Bod Paul, gubin ngiyal’ ni gamad ra lemnagmed ma gamad ma pining e magar ku Jehovah. Ri gimed ba t’uf romad! Maku thingar mu nanged ni gimed gubin ma gimed ba t’uf rok Jehovah. Boch i gimed e rib gel e togopuluw ni be yib ngak machane ki gimed be ulul ko machib. Rib mudugil ni be felfelan’ Jehovah ni bochan e gimed be dag ndamur rusgad!​—Prov. 27:11.

Nap’an ni gimed be beeg mi gimed be fl’eg i lemnag e “Pi N’en ni Be Rin’ e Pi Mich Rok Jehovah e Ngiyal’ Ney” ni bay ko re Yearbook ney nrayog ni nge gelnag e michan’ romed, ma rayog ni ngam guyed e mich riy ni be yan Somol Jesus Kristus “nrogon be’ ni ma gel ko mahl ni be yan ko mahl nge gel”, ma demtrug ere mit i talin e cham ni be fanay e girdi’ ngar togopuluwgad riy ngak e piin ni yad be lek Kristus ma dabi gel.​—Rev. 6:2; Isa. 54:17.

I yol Paul ngak e pi Kristiano nu Filippi ni gaar: “Gu ma pining e magar ngak e Got rog . . . ni bochan e kam ayuweged gag kam uned ngog i wereg ngak e girdi’ i yan e Thin Nib Fel’.” (Fil. 1:3-5) Ku arogomed u wan’mad girdien fare Governing Body. Nap’an e service year ko 2007 ma bay 6,691,790 e publisher ni kar fanayed 1,431,761,554 e awa kar wereged fare thin nib fel’ riy u lan 236 e nam u fayleng. Ri gimed be ayuweg i wereg iyan fare thin nib fel’! Am lemnaged urngin biyu’ e girdi’ ni kan ayuwegrad u daken e athamgil ni kad ted ni be n’uf Jehovah!

Bay bayay ni ke dag Paul ni be runguy e pi walag. I yol ngak piyu Thessalonika ni gaar: “Der m’ay u wun’mad u p’eowchen e Got rodad ni ir e Chitamangidad . . . rogon ni kari l’agan’med ngak e Somol rodad i Jesus Kristus.” (1 Thess. 1:2, 3) Arrogon, boor e magawon ni gad be mada’nag u lan e yafas rodad. Machane ba ga’ fan ni ngad k’adedan’dad. Bmiti mang magawon e ga be mada’nag? Ke chalbam ni bochan e gab m’ar ma dakiryog ni ngam rin’ boor ban’en ni fan ko pigpig rom ngak Jehovah, fa? Kem’ e ani mabgol rom ni kam mabgolgow ni ke yan boor e duw, fa? (Prov. 30:15, 16) Ga baadag ni ngam un ko mabgol ma dawor mu pirieg be’ ni kub t’uf Jehovah rok ni wod guy, ma ga be athamgil ni ngam fol ko Bible ni ngan mabgol u lan e ulung, fa? (1 Kor. 7:39) Ga be athamgil ni ngam chuguliy e bitir rom nib fel’ rogon ni yugu aram rogon ni ga be magawon ko salpiy, fa? Yugu aram rogon ni bay e magawon rom ma faanra mu m’oneg e tirok Got ban’en ma rayog ni nge pagan’um ndabi pag Jehovah ‘talin e maruwel ni kam ngongliy, nge t’ufeg ni kam dag nga fithingan.’ Pi walagmad ni pumoon nge ppin, wenig ngomed “dabi chalbamed i ngongliy e ngongol nib fel’”!​—Heb. 6:10; Gal. 6:9.

Mang e ra ayuwegmed ni ngam k’adedan’med? Aram e “rogon ni kari l’agan’med ngak e Somol rodad i Jesus Kristus” ni bod rogon piyu Thessalonika. Ba puluw, ya i taarebnag Paul e “tin ni be l’agan’dad ngay” ngab urwach nrayog ni nge ayuweg e Kristiano ndabi yib ngan’ e lem nib kireb ara maruwaran’.​—1 Thess. 5:8.

Riyul’ ni faanra mu athamgilgad u fithik’ e falfalan’ ma aram e gimed be pi’ e fulweg ko moning ni be tay Satan ngak Got u murung’agen en ni bay mat’awun ni nge gagiyegnag e palpalth’ib. Be yog Satan ni pi tapigpig rok Got e yad ba laniyan’ ma yad ra pigpig ku Got ni bay n’umngin nap’an ya faanra yib e magawon ngorad fa kayigi n’uw nap’an nra par e re m’ag ney ma yad ra tal ko pigpig ngak Got. Gimed ba tow’ath ya rayog ni ngam tamilangnaged ni Moonyan’ e ir faen ni ma lifith l’igin! Gubin e rran ni be thumur u lan e yafos romed ma gimed be guy riy ni be chugur i yib e n’en ni ke l’agan’med ngay.

Gamad be pining e magar ngomed ma ngkum nanged ni gimed ba t’uf romad ntaareb rogon ku Paul ni i guy rogon ni nge pining e magar ngak pi walagen ni bochan e michan’ rorad nib gel nge ayuw ni ur pied ko maruwel ko machib, nge rogon e athamgil ni ur tayed. Mu ululgad ko maruwel nib fel’ ni gimed be rin’!

Manga yigi yoor e flaab ko tirok Got ban’en ko re duw ney. Gamad be athapeg e tin nib fel’ ni fan ngomed,

Pi walagmed,

Governing Body ko Pi Mich Rok Jehovah