Tabinaw nib Gel ko Tirok Got Ban’en​—Uw Rogon?

¹ Yibe pining e magar ko pi tabinaw ko Kristiano ni yad ma ‘ngongliy e maruwel rorad nrogon e maruwel ni ma tay girdien Kristus.’ (1 Tim. 5:4) Machane boor e tin nib kireb ni be wawliydad nrayog ni nge warnag e michan’ rodad, ere girdien e tabinaw e thingara maruwelgad nib elmirin nge yog nra pared nib gel ko tirok Got ban’en. Uw rogon nrayog ni ngan rin’ ere n’ey?

² Piin Lolugen e Tabinaw e Ngar Boded Kristus: Ba t’uf rok e piin lolugen e tabinaw ni ngar folwokgad rok Jesus Kristus u rogon ni yad ma rin’ e tin nib milfan ngorad ni ngar gelnaged e tabinaw rorad ko tirok Got ban’en. Gathi kemus ni pi’ Jesus e pogofan rok nib maligach ni fan ngodad ya ku “ma duruw’iy ma ma ayuweg” e ulung. (Efe. 5:25-29) Piin gallabthir e yad ma fol ko re n’ey maku yad ma guy rogon ni ngar ayuweged e tabinaw rorad ko tirok Got ban’en u gubin e rran. Ba muun ngay ni ngan tay e fol babyor ni fan ko tabinaw u gubin e wik.​—Deut. 6:6, 7.

³ Nap’an e Machib: Gubin girdien e tabinaw ni susun e nge fel’ u wan’rad ni fare maruwel ni ngan machibnag e girdi’ u murung’agen Jehovah nge tin nib m’agan’ ngay e aram bang ko liyor rodad nib ga’ fan. (Isa. 43:10-12) Gimed e piin gallabthir, e faanra gimed ba adag ni nge mang pi fakmed boch e Pi Mich Rok Jehovah ni yad ba yul’yul’ ma thingar mu tababgad i ayuweged yad u nap’an ni ka yad bbitir. Ngam weliyed fan nib t’uf ni ngan pagfay ni fan ko machib nge fan nib t’uf ni ngan un ko machib u gubin e wik. (Matt. 22:37-39) Mi gimed yarmiy ni ngaur uned ngomed ko machib ni gubin ngiyal’.

⁴ Mu ayuweged pi fakmed ni nge fel’ u wan’rad fare maruwel ni machib ni aram e nguum ted boch e tayim u nap’an e fol Bible u tabinaw u gubin e wik ni ngam fl’eged rogorad mi gimed yan u daken e n’en ni ngam mogned ngak be’ u nap’an e machib. Mu skulniged pi fakmed u rogon e machib ni ta taabagayad, mi gimed ayuweged yad nrogon nib puluw nga yangarrad nge tin nrayog rorad. Ma tomren ni kam marod ko machib u taabang, mi gimed weliy rogon ni kar guyed felngin Jehovah. Ra gel rogon nra “limlimiy” girdien e tabinaw feni gol Jehovah ma aram e yad ra chugur ngak me yog nra gelgad u “urngin mit e kireb.”​—1 Pet. 2:1-3.

⁵ Nap’an e Pi Muulung: Rib fel’ nfaanra girdien e tabinaw e nguur ayuweged yad nguur uned nga urngin e muulung ko Kristiano ni mus nfaanra ke magar bagayad fa ke mulan’ ara ke tomal laniyan’! Reb e walag nib pin nib fel’ yangaren e gaar: “Nap’an nra sul e chitamag ko maruwel ma kari magar. Machane gu ma weliy ngak ban’en nib fel’ ni yira weliy u nap’an e muulung, ma ma yibnag e athamgil nga laniyan’ ni nge un ko yan. Ma faanra gag e kug magar ma ir e ma pi’ e athamgil nga lanin’ug ni nggu un ko muulung.”​—Heb. 10:24, 25.

⁶ Ngan Rin’ Boch Ban’en u Taabang: Girdien e tabinaw e susun ni nguur rin’ed boch ban’en u taabang, ni bod rogon e maruwel u tabinaw. Ma susun ni ngkun tay yu ngiyal’ ni fan ko fafel nib fel’. Ba gel e falfalan’ riy nfaan yad ra yan nga bang ko abich ara hiking, ara gosgos ara nga ranod ra guyed pi be’ rorad ara fager rorad.​—Ekl. 3:4.

⁷ Tabinaw ko Kristiano nib gel e rayog ni ngar gelgad ko pi n’en ni be magawonnagey ko tirok Got u reb e rran ngu reb. Yad ra chugur ngak Jehovah ma yad ra guy ni ma pi’ gelngiy ngan par ni yib gel.​—Efe. 6:10.