Gur Be’ ni Gab Tamra’, Fa?

1. Mini’ e ma tamra’?

¹ Dab da gingad ngay ni ngad guyed ba bitir ni ke mith nga fon e chitiningin fa chitamangin be sap ngodad. Ya aram rogon e bitir ni yad ba tamra’. Mus ngak e piilal ni ku bay boch i yad nib tamra’. Faanra gab tamra’ ma be magawonnagem ko machib, ma mang e rayog ni nim rin’?

2. Mang e rayog ni ayuweg be’ nge dabki tamra’?

² Rogon Ni Ngan Gel Ko Tamra’: Ba ga’ fan ni ngam tiyan’um nga rarogon “lanin’um.” (1 Pet. 3:4) Mu gelnag e t’ufeg rom ngak Jehovah nge piin ni yad ba migid ngom. Mu dugliy u wan’um ni bin th’abi fel’ e kanawo’ e ngam pagfam u fithik’ e t’ufeg ngam machibnag e girdi’. Mu fol Bible ma gabe un ko muulung ni gubin ngiyal’. Mu meybil ngak Jehovah ni gubin ngiyal’ ni nge ayuwegem. Ra gel e michan’ nge pagan’ rom ngak ma ra pi’ gelngim ngam ‘machibnag e thin rok Got ngak e girdi’ ndab kum tuntun ma dabkum tamdag.’​—Fil. 1:14.

3. Mang fan ni n’en ni buch ku Timothy e rayog ni pi’ e athamgil nga laniyan’ e piin ni yad be lemnag ndariy farad?

³ Mu athamgil nge dabkum lemnag ndariy fam. Ku aram e n’en nthingari rin’ Timothy. I pi’ Paul e athamgil nga laniyan’ ni nge “dabi pag be’ nge darifannag ni bochan e kab pagel,” miki puguran ngak ni “kan ni thothup ni ke pi’ Got ngodad e dar ma ngongliydad ni ngad rusgad; machane kan ni thothup rok e ma pi’ gelngidad.” (1 Tim. 4:12; 2 Tim. 1:7) I fanay Jehovah Timothy nib fel’ rogon maku ra fanayem ni faan ga ra par nib pagan’um ngak ni gubin ngiyal’.​—Ps. 56:11.

4. Mang e ayuweg reb e walag nib pin nge yog ni gel ko tamra’?

⁴ Fare thin u Matthew 10:37 e ir e ke ayuweg reb e walag nib pin nib tatamra’ maku ma rus ko pumoon rok ni ma togopluw ngak. Bochan ni ke athamgil ma aram ma ke mom rok ni nge un ko machib me munmun ma aram me adag figirngin nge chitinngin nge pi walagen ni pumoon e tin riyul’!

5. (a) Mang e rayog ni nge rin’ be’ nib tamra’ nge yog ni par nib mudugil e lem rok? (b) Mang e dabda paged talin u murung’agen e piin ni gad ma mada’nag u nap’an e machib?

⁵ Baga’ Fan Ni Ngam Fl’eg Rogom: Ra mudugilan’um nfaanra mu fl’eg rogom nib fel’ rogon u m’on ni ngam un ko machib. Mmel’eg reb e presentation ko fare babyor ni Reasoning ara Machib Rodad Ni Fan Ko Gil’ilungun Got nrayog ni ngam fanay, mag gay rogon nge mit ngom nib fel’ rogon mu um sul u daken. Dabi magafan’um ngay ya ngam par nib puluw e lem rom. Mmaruwelgad yugu boch e walag u taabang. Ma dab mu pagtalin ni boor e girdi’ ni ga ra mada’nag ni ku yad ba tamra’ ni bod gur. Gubin e girdi’ nib t’uf ni ngar rung’aged fare thin u murung’agen Gil’ilungun Got.

6. Mang e ra ayuwegdad ni ngad pirieged e felfelan’ ko machib ni gad ma tay?

⁶ Dabi mulan’um ni bochan e gab tamra’. Gara fol ko pi thin ney ma ra ayuwegem Jehovah ni ngam mang tamachib ko fare thin nib fel’ nib ga’ angin. Ma aram e rayog ni nge felfelan’um ko machib ni ga be tay.​—Prov. 10:22.