Ngan Ayuweg e Tin Beech e Girdi’ Ngar Ilalgad ko Tirok Got Ban’en
1 Ba t’uf e ayuw rok e tin beech e Kristiano ere ba t’uf ni nge ayuwegrad e piin nib gel e michan’ rorad. (Rom. 15:1) Arfan ni tamilangnag Paul rogon ni ngan ilal ko tirok Got ban’en ngak piyu Hebrew. Mang e pi n’em ni yog ma uw rogon nrayog ni ngan pi’ e ayuw ko tin nib t’uf rorad?
2 Fol Babyor: Ra nge fol be’ ko pi thin rok Paul ma thingari fil e Thin rok Got nib fel’ rogon, mi i sul nga daken, me fanay e “ggan nib el” ni be pi’ e ulung rok Jehovah. (Heb. 5:13, 14) Rayog ni ngam ayuwegrad ngar nanged rogon e fol Bible nge rogon ni ngar fal’eged i gay murung’agen Got. Yu ngiyal’ ma rayog ni ngam pining be’ nib beech ni nge un ngom ko fol Bible ara nge un ngak girdien e tabinaw rom ngam filed e Bible u taabang.
3 Ngan Un ko Urngin e Muulung: Ngongol rom nib yul’yul’ nge thin e ma pi’ e athamgil nga lanin’uy e ra ayuweg e tin nib beech e girdi’ ko ulung ngar siyeged ban’en ni i weliy Paul murung’agen—“ni be rin’ boch e girdi’” ni ngar paged e muulung ko pi Kristiano. (Heb. 10:24, 25) Nga mu ayuwegrad ngar ted fan e pi muulung ya aram ban’en nib ga’ fan ya ra ayuweg e yafas rorad. Nga mu athamgil ni ngam gol ngorad ya nge yog ni ngar lemnaged ni yad bang ko ulung.
4 Meybil: Ra ngad gelgad ko tin ni gad ba meewar riy, ma thingar da meybilgad ngak Jehovah, ma ngad weliyed ngak e tin ni bay u lanin’dad nge tin ni be magafan’dad ngay. Thingari tamilang u wan’ e girdi’ nib beech ni faan yad ra yibilay e ayuw rok Jehovah, ni bod rogon ni i yog Paul, ma dabi mulan’rad. (Heb. 4:15, 16; 10:22) Faan ga ra weliy murung’agen e pi n’en ni buch rom ma ra ayuweg e en nib beech ni nge mich u wan’ ni ma rung’ag Jehovah e pi meybil.
5 Machib u Mit e Tabinaw: I dag Paul ni “nguud pininged e magar ngak Got ni gubin ngiyal’ nge mang maligach rodad,” ma ra gelnagdad ko tirok Got ban’en. (Heb. 13:15) Rayog rom ni ngam pining reb e publisher nib beech ni nge un ngom ko ngiyal’ ni ngam un ko machib u mit e tabinaw? Sana rayog ni ngam fal’egew rogomew ko machib u mit e tabinaw ara boch e kanawo’ nrayog ni ngam machibgow riy.
6 Gad ma felfelan’ ko urngin e girdi’ nib beech ni yad be un ngodad. Rayog ni ngad ayuweged e tin beech e girdi’ ko ulung nge yog e michan’ nib gel ngorad ngar ‘thapgad ngak Got’ ni faan gad ra athamgil ni ngad filed rogon ngorad.—Heb. 3:12, 13; 10:39.