Uw Rogon ni Ngad Ayuweged e Piin ni Kar Uned ko Puguran?

1. Mang ban’en nrib gel gelngin nra guy e girdi’ ko March 22, 2008?

¹ Rorran ni March 22, 2008 e ra guy e girdi’ ban’en nib gel gelngin. Piin ni yad ra un ko fare Puguran e yad ra rung’ag murung’agen e t’ufeg nib gel ni ke dag Jehovah u daken bbiyul ni ke pi’ ni fan ngak e girdi’. (John 3:16) Yad ra fil murung’agen Gil’ilungun Got nge rogon nra fanay Jehovah ere n’em ni nge lebguy e tin nib m’agan’ ngay. (Matt. 6:9, 10) Yad ra guy e t’ufeg nge runguy u thilin e girdi’ rok Got mu kur guyed gelngin fene yad ba gol.​—Ps. 133:1.

2. Uw rogon nrayog ni ngad ayuweged e pi Bible study rodad ni kar uned ko fare Puguran?

² Pi Bible Study: Boch ko piin ni yad ra un ko fare Puguran e kafin ra tababgad i fil e Bible. Mu fekrad ngar mada’naged e pi walag. Mu weliy ngorad murung’agen e pi muulung ni yima tay u gubin e wik, mag fekrad ngar guyed yu yang u lan e Kingdom Hall. Nap’an e welthin ma yira pi’ e athamgil nga laniyan’ e pi girdi’ ney ni ngar ululgad ngar mon’oggad i yan ko tirok Got ban’en. Rayog ni ngam sul nga daken e n’en ni kanog ko fare welthin nge yog nim pi’ e athamgil nga laniyan’ e piin ni gabe fil e Bible ngorad.

3. Mang e rayog ni ngan rin’ ngan pi’ e athamgil ngak e pi publisher ni yad ba inactive ni kar uned ko fare Puguran?

³ Piin Ndakurir Uned ko Muulung nge Machib ara Inactive: Boch e girdi’ ni yad ra un ko fare Puguran e aram e pi publisher ni yad ba inactive. Mman ngam mada’nagrad. Dab mu fith boch e deer ara mog boch e thin nra k’aring e tamra’ ngorad. In e rran nga tomren fare Puguran, ma susun ni nge yan e piin piilal ngar guyed e pi publisher ney nib inactive ni kar uned ko fare Puguran ngar pininged e magar ngorad ni kar bad, mar pininged yad ngar uned ko bin migid e muulung.

4. Uw rogon nrayog ni nge bagadad me ayuweg e piin ni kar uned ko fare Puguran?

⁴ Yug Girdi’ ni Ke Un: Boch e piin ni yad ra un e sana gamanangrad ara girdi’ u tabinaw rom. Ma boch, e girdi’ ni kan piningrad u nap’an ni yibe wereg e babyor ni fan ko Puguran. Faanra kam guy be’ ndam nang owchen, magan mu guy ngam non mag pining e magar ngak. Dabisiy ndawor ra uned ko muulung bayay. Nap’an ni gimew be sabethin ma rayog ni ngam guy rogon ngam nang e gin ni ma par riy ara telefon namba rok. Ma in e rran nga tomren ma rayog ni ngam dengwanag ara man mu guy nga tafen mag ayuweg ni nge adag e thin riyul’ ma gguy rogon ni ngam tababnagew e fol Bible.

5. Mang e rayog ni nga dogned ma gad tababnag e fol Bible?

⁵ Rayog ni ngan fanay e n’en ni kanog ko fare welthin u nap’an e Puguran ko ngiyal’ ni yira pi’ fare babyor ni Rayog ni Ngam Par ni Manemus u nap’an e return visit. Bod ni, faen ni be pi’ e welthin ko fare Puguran e ra beeg ara weliy e thin ni bay ko Isaiah 65:21-23. Nap’an ni kam sul ngak facha’, ma rayog ni ngam sul nga daken fare welthin mag gaar, “Gu ba adag ni ngkug dag ngom yugu boch e flaab nrayog ni nge yog ngodad u daken fare biyul.” Mi gimew weliy e thin ko paragraph 1-4 ko guruy ni 18. Ara rayog ni ngam gaar, “Boor e girdi’ ni ma lemnag ko wuin e ra lebug fare yiiy ku Isaiah.” Mi gimew weliy e thin ko paragraph 1-4 ko guruy 18. Ma reb e rayog ni nga mog boch e thin ni ke weliy faen ni pi’ e welthin u nap’an e Puguran, ma ga pi’ fare babyor ni Rayog ni Ngam Par ni Manemus ngak, mag dag rogon e fol Bible.

6. Mang kanawo’ e ke mab ngodad u nap’an ni gad be fol ko n’en ni ke tay Jesus chilen ni aram e nguud madnomnaged e yam’ ni tay?

⁶ Manga yigi bagadad me tiyan’ nge ayuweg e pi Bible study, nge pi publisher ni inactive, nge yug girdi’ ni kar uned ko fare Puguran. (Luke 22:19) Rib mudugil nra flaabnag Jehovah e maruwel ni gad ra tay ni fan ko Gil’ilungun.

Thin ni Ngan Nog u Murung’agen e Pi Magazine

The Watchtower Mar. 1

“Gubin e rran ni gad ma rung’ag murung’agen e gafgow, liliy, nge yam’. Ka am lemnag ko rayog ni ngan ayuwegdad ko pi n’ey, fa? [Mu pag ni nge fulweg.] Re thin ko Bible ney e ke pi’ e athap ngak bokum milyon e girdi’. [Mu beeg e John 3:16.] Kenggin e re magazine ney e ‘Rogon Nra Ayuwegem e Yam’ ni Tay Jesus’.”

Awake! Mar.

“Uw rogon u wan’um, bay e riya’ ko superstition fa dariy? [Mu pag ni nge fulweg.] Bible e be yog e pi thin ni baaray. [Mu beeg e Isaiah 65:11] Re article ney e be tamilangnag ko ba puluw e supersition ko Kristiano fa danga’.” Mu dag e article ni bay ko page 10.

Fare Wulyang Ntagol’ E Damit March 2008

“Ngiyal’ ney e boor e magawon rodad, ere uw rogon u wan’um, rayog ni ngad pired nib gapas lanin’dad fa? [Mu pag ni nge fulweg.] Boor e girdi’ ni ke ayuwegrad fare athap ko par boch nga m’on ni be weliy e Bible murung’agen. [Mu beeg reb e thin nu Bible ni bay u lan e article ni ga ra dag ngak e girdi’.] Re magazine ney e be dag e n’en ni be yog e Bible u murung’agen e gin ni kad bad riy, nge fan e yafos, nge n’en ni bay boch nga m’on. Re maruwel ney ni yibe tay u ga’ngin e fayleng e ba maruwel ni ma pi’ e girdi’ e ayuw ngay nrogon nib m’ag u wan’rad. Faanra ga baadag ni ngam pi’ boch e ayuw, ma ra felfelan’ug ngay ni nggu fek nggu pi’ ko ulung.”