Ga Ra Tababnag e Bible Study ko Pul ni October, Fa?
1. Mang babyor e gad ra wereg ko October?
1 Gad ra wereg e Wulyang Ntagil’ E Damit ko October. Yibe pi’ e athamgil nga lanin’dad ni ngad wereged fare tract ni Ga Baadag ni Ngam Nang e Tin Nriyul’? u nap’an ni ngad sulod ngak e girdi’ ni fan e ngad tababnaged e Bible study. Uw rogon ni ngad rin’ed e re n’ey?
2. Uw rogon ni ngad fanayed fare tract ni Ga Baadag ni Ngam Nang e Tin Nriyul’? ni ngad tababnaged e fol Bible ngak be’ ni ke fek e magazine ko ngiyal’ ni kad sulod ngak?
2 Rogon ni Ngan Fanay e Tract: Rayog ni nga dogned ni nge lungudad: “Fapi magazine ni kug pi’ ngom e ke pi’ e athamgil nga laniyan’ e girdi’ ko pi nam nge teliw ni ngar yaliyed e Bible rorad. [Mu pi’ fare tract ngak ni Ga Baadag ni Ngam Nang e Tin Nriyul’?, ma ga dag e pi deer ni bay riy.] Be pi’ e Bible e fulweg ko pi deer ni baaray. Kaam lemnag murung’agen e pi deer ney biyay fa?” Tomren ni ke pi’ fa cha’ e fulweg, mi gimew beeg e fulweg ni bay ko fare tract, ma ga beeg reb e thin nu Bible ni bay riy. Ngam weliy ni ireray reb e machib ni bay u Bible, ma aram ma ga pi’ fare babyor ni Mang e Ri Be Fil e Bible? ngak. Rayog ni ngam weliyew e pi paragraph ni bay ko guruy ni ke mel’eg ko table of contents. Fa rayog ni ngam weliyew e thin ni bay u lan fare babyor ni ba m’ag ko thin ni kam weliyew u lan fare tract. Baaray boch e thin nra ayuwegem:
● Ma lemnagdad Got, fa? (guruy 1, pars. 6-10)
● Ra m’ay e mahl nge gafgow, fa? (guruy 1, pars. 12-13)
● Mang e ma buch rodad u nap’an kad m’ad? (guruy 6, pars. 7-8)
● Bay e athap ko piin kar m’ad, fa? (guruy 7, pars. 13-15)
● Uw rogon ni nggu meybil me rung’ag Got? (guruy 17, pars. 5-8)
● Uw rogon ni nggu pirieg e bin riyul’ e felfelan’ ko yafas? (guruy 1, pars. 4-5)
3. Uw rogon ni ngad thilyeged rogon ni ngad machibgad ni faanra dabiyog ni ngad tababnaged e fol Bible ko ngiyal’ ni kad sulod ngak be’?
3 Faanra ba magawon rogon ni ngan tababnag e fol Bible ngak be’ ko yay ni som’on ni kam sul ni ga be fanay fare babyor ni Mang e Ri Be Fil e Bible? ko ngiyal’ ni ngad sulod ngak e girdi’, ma rayog ni ngad dugliyed yugu ba ngiyal’ ni ngad sulod ngak. Faanra ba adag be’ ni nge nang e fulweg ko pi deer nem, ma rayog ni ngad sulod ko yay ni migid ngad weliyed e fulweg ko pi deer nem u m’on ni ngad pied fare babyor ngak. Ere ngad wereged e re tract ney ni ba ga’ fan u nap’an e pul ni October ya nge yog ni ngad tababnaged e fol Bible ngak be’ ma gad ayuweg e piin ni yad ba yul’yul’ ngar “nanged e tin riyul’.”—John 8:31, 32.