Guruy Ni 8

Organized to Do Jehovah’s Will

NGAN REPORTNAG ROGON NI BE MON’OG IYAN E MACHIB

Boor e duw ma kan pi’ e athamgil nga laniyan’ girdien Jehovah ni bochan e pi report ko machib ni be mon’og iyan e bin machalbog e liyor. Ka nap’an fa yay nsom’on ni yog Jesus ko pi gachalpen ni yira wereg fare thin nib fel’ u ga’ngin e fayleng, ma tin riyul’ e Kristiano e kar adaged ni ngar nanged ko uw rogon nra lebug e re n’em.​—Matt. 28:19, 20; Mark 13:10; Acts 1:8.

Tin som’on pi gachalpen Jesus Kristus e kar tedan’rad ko pi report ko uw rogon ni be mon’og iyan e maruwel ko machib. (Mark 6:30) Fare babyor ko Acts e be weliy ni immoy 120 e girdi’ u nap’an ni kan puog e kan ni thothup u daken pi gachalpen ko Pentekost. De n’uw nap’an u tomren ma ke yoor pi gachalpen ko 3,000 nge yan i taw ko 5,000. Kan pi’ e report nib fel’ ni “gubin e rran ni be puthuy Jehovah ko re ulung rorad nem e piin ni ka fin ra thapgad ngak Got” ma “boor e prist ni pig lanin’rad nge mich Jesus u wun’rad.” (Acts 1:14, 15; 2:5-11, 41, 47; 4:4; 6:7) Dabi siy ni nap’an ni kan weliy ko pi gachalpen ni be yoor iyan e girdi’ ni be un ko machib ma kan pi’ e athamgil nga lanin’rad! Pi report ney e dabi siy ni ke k’aringrad ni ngar athamgilgad ni ngar mon’eged fare maruwel ni yog Got ni ngar rin’ed, ni yugu aram rogon ni pi tayugang ko teliw nu Jew e kar gafgownaged yad!

Sogonapan 60-61 C.E., me reportnag Paul ko babyor ni yoloy ngak yu Kolose ni fare thin nib fel’ e “be yib wenegan nib fel’ ngak e girdi’ ma be wer u fayleng i yan” ma “kan machibnag ngak urngin e girdi’ u fayleng.” (Kol. 1:5, 6, 23) Tin som’on e Kristiano e ur folgad rok fare Thin ma kan ni thothup e ke pi gelngirad ni ngar wereged e machib u ga’ngin e fayleng u m’on ko ngiyal’ ntomren fare m’ag ko yu Jew ko 70 C.E. Kan rin’ e maruwel ni be m’ug riy ndabiyog ni ngan rin’. Dabi siy ni kan pi’ e athamgil nga laniyan’ e pi tamaruwel ni Kristiano nib yul’yul’ ya kan weliy e pi report ko n’en ni kan rin’!

Ku arrogon e pi tapigpig rok Jehovah ko ngiyal’ ney ni yad ma guy rogon ni ngar yoloyed nga but’ u murung’agen e maruwel ko machib ni yibe rin’ ni be lebuguy fare thin ko Matthew 24:14, ni be gaar: “Ma re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” Bay e maruwel nib ga’ fan ni thingarda rin’ed ya gad e pi tapigpig rok Got ni kad ognaged gadad ngak. Ra bagadad ma thingarda guyed rogon ni ra lebug e re maruwel nem nge mus rogon u m’on nra taw ko tomur. Jehovah e ra guy rogon nran rin’ e re maruwel nem nge m’ay, ma faanra gad be un ngay, ma ra felan’ Jehovah ngodad.

REPORT ROM KO MACHIB NI KAM TAY

Mang e thingarda yoloyed ko report rodad? Fare babyor ni Field Service Report ko ulung e be weliy ko mang e ngan tay ko report rom, ma baaray boch e thin nra tamilangnag boch ban’en nge ku yu ngiyal’ ma yibe weliy boch ban’en ko Machib Rodad Ni Fan Ko Gil’ilungun Got.

Bay ko re babyor ney e pi column ni “Books,” “Booklets & Brochures,” nge “Individual Magazines,” ma ga ra tay riy urngin e pi babyor ney ni kam wereg ko girdi’ ni dawora uned ko taufe.

Rogon ni ngan reportnag e “Return Visit” ma ngan theeg urngin yay ni kan sul ngak e girdi’ ni fan ni ngan ayuweg e piin ni yad ba adag e machib ma gathi yad e Pi Mich ni kar taufegad. Rayog ni ngan nog return visit ni faanra kan non ngak be’ ni ke dag ni ba adag e machib faram. Faanra yog reb e piilal ni ir bang ko Congregation Service Committe ni ngam conductnag e Bible study ku be’ ni reb e walag ni ke tal ko machib ma susun ni ngam tay ko report rom ni aram e return visit. Ku rayog ni ngam tay ko report rom e return visit ko Bible study rom ni ka fini un ko taufe ma ba t’uf ni ngan ayuweg. Rayog ni ngan tay e return visit ni ngam sul ngak be’ u tafen, fa ngam yoloy e babyor ngak, fa ngam telefonnag, fa ngam pi’ boch e babyor ngak ni bod e tin biech e magazine. Ra yay ni kan conductnag e Bible study ma aram e return visit.

Yibe conductnag e Bible study taab yay u gubin e wik, machane ke mus ni taab yay ni ngan reportnag u gubin e pul. Boch e binaw ma yibe fanay fare babyor ni Study Report ma susun ni nge reportnag e pi publisher ra reb e Bible stuy ni kan conductnag nap’an reb e pul ngak e girdi’ ni dawora uned ko taufe ma gathi yad e Pi Mich fa yugu boch e girdi’ ni ran weliy u murung’agen ko bin migid e paragraph. Tomren ni kan fl’eg ra reb e babyor nib fel’ rogon ma ngan yoloy urngin e Bible study nib thil u lan fare kahol ni bay u but’ u ba’ ni mat’aw ko re ke babyor nem ni Field Service Report. Fare namba ni kam tay ko Field Service Report nge urngin e babyor ni Study Report ni kam fl’eg e susun ni taareb rogon.

Rib ga’ fan ni ngam pi’ e report ko “Hours of Field Service.” Aram urngin e tayim ni kam tay ko machib u mit e tabinaw iyan nge machib u kanawo’, nge tayim ni kam tay ko return visit, nge Bible study, nge machib u fithik’ e sabethin ni kam tay ko girdi’ ni dawora uned ko taufe ni gathi yad e Pi Mich. Ku rayog ni ngam tay e Bible study ni kam conductnag ko reb e walag ni ke tal ko machib ma reb e piilal ko Congregation Service Committee e kam mog ni ngam studygow. Maku, rayog ni ngam reportnag e tayim ni kam conductnag e study ku be’ ni ka fini un ko taufe ma ba t’uf ni nguun ayuweg ko tirok Got ban’en. Faanra be machib reb e publisher u bang ni de fel’ ni nge yan ni goo ir me ere ba t’uf ni nge un reb e publisher ngak, ma yow l’agruw e ra tay e tayim ni faanra yow ra weliy e machib. Bay boch ban’en ni yibe rin’ ni fan ko machib machane dabni tay e re tayim nem ko report, ni aram e tayim ni yibe tay ni ngan fl’eg rogon ko machib, ma nap’an ni ngan un ko muulung ko machib, nge ngiyal’ ni ngan milekag ni ngan yan nga bang ko machib.

Susun ni nge tabab e tayim rom ko machib u nap’an ni ngam tabab ko maruwel ko machib ma ngan tal ko ngiyal’ ni kam mu’ ko machib. Dabni tay e ngiyal’ ni kan tal ni ngan unum ban’en ara ngan abich. Piin ni auxiliary pioneer nge regular pioneer nge special pioneer nge pi missionary e kan dugliy ko in e awa ni ngar thognaged. Ma yibe pining e pi publisher ko ulung ni ngar m’oneged Gil’ilungun Got ma ngar athamgilgad ko machib mar rin’ed urngin ban’en nrayog rorad. Urngin e pi tapigpig rok Jehovah e yad ma athamgil ni ngar uned ko machib u polo’ i lanin’rad. (Kol. 3:23) Piin ni ma pi’ e public talk e rayog ni ngar ted e tayim ni kar welthingad ma rayog ko reb e gallabthir ni nge tay taareb e awa u reb e wik ko fol babyor ko bitir rok ni dawora taufegad.

Rogon ni ngan reportnag e tayim ni kan tay ko machib e reb e awa ni polo’. Ke mus ni piin ni kar pillibthirgad ara dabiyog ni ngar ranod nga bayang ma de t’uf ni ngar rin’ed ni aram rogon. Ba publisher ni aram rogon e rayog ni nge reportnag e tayim rok ko machib ni 15 minit. Faanra ke mus ni 15 minit ni ke tay ko machib u reb e pul ma susun ni nge reportnag ma aram e yira tay ni ir e regular publisher ko Gil’ilungun Got. Re yaram ney e ku ba m’ag ko publisher ni ke m’ar ba ngiyal’ ma dabiyog ni nge yan nga bang reb e pul fa boch. Machane re yaram ney e fan ko piin ni ri buch uw ban’en nrayog ni ngar rin’ed. Fare Congregation Service Committee e ra turguy ni faanra rayog ni nge un be’ ko re yaram ney.

BABYOR NI CONGREGATION’S PUBLISHER RECORD

Yibe tay e report rom ko machib u gubin e pul ko babyor ni Congregation’s Publisher Record, ni bay ko congregation files. Pi babyor ney e gathi ra be’ ma tirok e babyor. Faanra ga ra yan i par u bang ko yugu reb e ulung ma ngam mog ko pi piilal. Fa en ni secretary ko bin biech e ulung rom e ra ning ni ngan pi’ e Congregation’s Publisher Record rom ngak. Faanra fa en ni secretary ko bin kafram e ulung rom e manang fithingan fare ulung ni kam man ngay ma rayog ni nge pi’ fare babyor ni record card nge reb e babyor ni letter of introduction. Ma aram ma pi piilal ko bin biech e ulung rom e rayog ni ngar fl’eged rogon ni ngar ayuweged gur ko tirok Got ban’en. Faanra dabi pag dalip e pul ni ngam par u bayang ma nguum pi’ e report rom ko machib ko ulung rom.

FAN NI GAD MA PI’ E REPORT KO MACHIB NI GAD MA TAY

Yu ngiyal’ ma ga ma pag talin ni ngam pi’ e report rom ko machib? Dariy e maruwar riy ni gad gubin ma ba t’uf ni ngan puguran ngodad yu ngiyal’. Machane faanra ba yal’uw e lem rodad ma ba tamilang u wan’dad ko mang fan ni baga’ fan e re n’ey ma ra mom rodad ni ngad pied e report rodad nib tayim.

Boch e girdi’ e ur fithed: “Manang Jehovah ko mang e gu be rin’ ko machib, ere mang fan nib t’uf ni ngan pi’ e report ko ulung?” Rriyul’ manang Jehovah ko mang e gad be rin’ ma rayog ni nge guy ni faanra gad be pigpig ngak u polo’ i lanin’dad fa rayog ni ngad athamgilgad boch. Machane dab mu pag talin ni i tay Jehovah nga babyor ko uw urngin e rran ni i par Noah u lan fare arke nge uw urngin e duw ni i milekag yu Israel u daken e ted. I tay Got nga laniyan’ ko uw urngin e piin ni kar pared nib yul’yul’ ngak nge piin ni dar folgad. I tay nga babyor rogon ni kan gel ngak yu Kanaan nge pi n’en ni rin’ e pi tafpufthin nu Israel ni yad ba yul’yul’. Arrogon, i guy rogon ni ngan yoloy nga but’ e pi n’en ni rin’ e pi tapigpig rok. I n’igin ni ngan yoloy nga but’ e pi n’en ni buch me tamilangnag ngodad ko uw fene ga’ fan ni ngan tay boch ban’en nga babyor.

Chep nu Bible e be dag ni rib puluw e pi report ni fl’eg girdien Jehovah. Boor yay ma dabiyog ni ngari tamilang u wan’ e thin ko Bible ni faanra dan reportnag ko uw urngin boch ban’en. Ngan lemnag e pi thin ni baaray: Genesis 46:27 nge Exodus 12:37; Judges 7:7; 2 Kings 19:35; 2 Kronicles 14:9-13; John 6:10; 21:11; Acts 2:41; 19:19.

Boor fan ni gad ma reportnag e machib ko ngiyal’ ney. Pi report ney e gathi be uneg urngin e pigpig ni gad ma tay ku Jehovah, machane n’en ni yibe reportnag e ma ayuweg urngin e girdi’ ko ulung rok Jehovah nib muun ngay e pi piilal.

Yu ngiyal’ ma ma tamilangnag e pi report ni ba t’uf ni ngad tedan’dad ko boch ban’en. Sana be dag e pi namba ni kan mon’og ko boch ban’en machane kan sagaal ko yugu boch ban’en. Sana ba t’uf ni ngan pi’ e athamgil nga laniyan’ e girdi’ ara ngan pithig boch e magawon. Pi piilal e ra tiyan’ ko pi report ma yad ra guy rogon ni ngan yal’uweg e n’en ni be magawonnag e mon’og ko girdi’ fa ulung.

Maku pi report e ma tamilangnag e yu gin n’en nib t’uf e ayuw riy. Tin ngan e binaw ni be yib angin riy? Tin ngan ni dariy e mon’og? Mang boch e babyor nib t’uf ni ngan ayuweg e girdi’ ngar nanged e thin nriyul’? Pi report e ma ayuweg e ulung ngar nanged ko mang babyor nib t’uf u yu yang u fayleng ma ngar fl’eged nib gaman ma dabi lich e Bible ara babyor nib t’uf ko machib.

Pi report e ma pi’ e athamgil nga lanin’dad. Gathi gad ba falfalan’ u nap’an ni gad ma rung’ag u murung’agen e machib ni be tay e pi walagdad ni yad be wereg e thin nib fel’ u ga’ngin e fayleng? Pi report u murung’agen e pi publisher ni be yoor iyan e ma tamilangnag rogon ni be mon’og iyan e ulung rok Jehovah. Pi experience ko girdi’ e ma taw nga gum’erchadad ma ma k’aringdad ni ngad pasiggad i un ko machib. (Acts 15:3) Ere baga’ fan ni ngad ayuweged e ulung ma ngad pied e report rodad ma be dag ni gad be lemnag e pi walag u gubin yang. Aram rogon ma gad be dag ni gad ma fol ko yaram ko ulung rok Jehovah.​—Matt. 24:45-47.

NGAN NAMEG BAN’EN

Dariy fan ni ngad taarebnaged e machib ni gad ma tay ko yugu be’. (Gal. 5:26; 6:4) Ra be’ ma ba thil thil salpen me ere de gonop ni ngan taarebnag. Machane rayog ni nge yib angin ngodad ni ngad nameged boch ban’en nib m’ag ngodad. Ya aram rogon nrayog ni ngad nanged ni gad be mon’og ko machib fa danga’. Maku faan gad ra nameg boch ban’en nge puluw ngodad ma nap’an ni ngad tawgad ngay ma ra yib e falfalan’ ngodad.

NGAM UN KO BIN TOMUR E REPORT

Kan weliy u murung’agen e maruwel ni be yip’ fan e machib ni gad be tay ko ngiyal’ ney ma nap’an ni kan mu’ i rin’ ma kan pi’ e report. I pig i changar Ezekiel me guy nel’ e pumoon ni bay talin e cham u pa’rad ni yad be yan ni ngar pufthinnaged yu Jerusalem ni yad e apostate. Ma ki guy e bin medlip e pumoon ni be yib. Ma ir e tayol ma kan gaar ngak: “Mman nga lan e re mach nem u Jerusalem ma ga tay e pow nga peri’ e pi moon ni be yor ni bochan e pi n’en nib kireb ni yibe rin’ u rom.” Tomren ni ke mu’ i tay e pow ko piin ndabni li’rad ko talin e cham ma fa en ni tayol e ke sul me pi’ e report ni gaar: “Kug rin’ urngin ban’en ni mu tay chilen ngog.”​—Ezek. 9:1-11.

Dad nanged ko uw rogon e bin tomur e report nra yog Jehovah ni ngan pi’ u murung’agen e maruwel ko machib ni be lebuguy e thin ko Matthew 24:14. Machane rayog ni ngad daged ni gad ma tay fan e n’en ni gad be rin’ ko machib ma ngad pied e report rodad ko machib u gubin e pul. Urngin e publisher ko fare thin nib fel’ e susun ni ngar pied e report rorad nib tayim u tomren ra reb e pul. Ra felan’ e pi walag nib mil fan ngorad ni ngar pied e report ko ulung ngak fare branch ofis.

Ba tamilang ni be gurnag Jehovah e maruwel ni ngan kunuy u taabang e piin nra magay nib fos u fithik’ fare “gafgow nib baga’.” Gad be par ko ngiyal’ ni be lebug e thin ni yiiynag Isaiah ni profet ni gaar: “Mus ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni ba ga’ ma ba gel. Bayi taw nga nap’an mu gu gagiyegnag ni nge doro’ nib gur. Yi gag Jehovah!” (Rev. 7:9, 14; Isa. 60:22) Gad bang ko ulung nib mil fan ngodad ni ngad wereged e machib ma gad ba adag ni ngad pied e report ni bod fa en ni tayol ni ke gaar: “Kug rin’ urngin ban’en ni mu tay chilen ngog.”