Guruy Ni 9

Rogon Ni Ngan Wereg Fare Thin Nib Fel’

JI L’OG Jehovah Jesus Kristus ni nge rin’ e maruwel ma ba ga’ fan u wan’ Jesus e re n’em. I pasig i wereg fare thin nib fel’ ko Gil’ilungun Got me tay e kanawo’ ko pi gachalpen. Ke yan u fithik’ e girdi’ me non ngorad ma ke machibnagrad u tabinaw rorad ngu yu gin ni fene yoor. (Matt. 9:35; Luke 8:1) I non Jesus ngak e girdi’ ni goo yow ma ke skulnag pi gachalpen ni goo yad, ma ke non ngak e girdi’ ni yad bokum biyu’. (Matt. 13:36; Mark 4:10-13; 6:35-44; John 3:2-21) Gubin ngiyal’ ma ke guy rogon ni nge pi’ e athamgil nga laniyan’ e girdi’ me pi’ e athap ngorad. (Luke 4:16-19) Mus ko ngiyal’ ni kari magar ma ba t’uf ni nge toffan machane de pag ni dabi machibnag e girdi’ ni faanra rayog. (Mark 6:30-34; John 4:4-34) Nap’an ni gad ma bieg u murung’agen e machib ni tay Jesus ma gathi ma k’aringdad ni ngad folwokgad rok? Dabi siy, ni bod fapi apostal.​—Matt. 4:19, 20; Luke 5:27, 28; John 1:43-45.

Mu lemnag e pi n’en nrayog ni nge rin’ e pi Kristiano ko ngiyal’ ney mar uned ko fare maruwel ni tababnag Jesus Kristus 2,000 e duw faram.

MACHIB U MIT E TABINAW IYAN

Pi Mich Rok Jehovah ko ngiyal’ ney e yad manang ni bay angin riy ni ngan wereg e machib u mit e tabinaw i yan. Kar rin’ed e re n’ey nge mus rogon ni ngar weliyed e thin ko Gil’ilungun Got ko girdi’ ma aram e yad ba lingagil ni bochan. Ke yib angin ko re n’ey ma aram e mich riy ni ke felan’ Jehovah ngay me pi’ e flaab. Maku, angin ni yib ko re mit e machib ney e be dag ni bay e gonop riy ni ngan wereg e machib u mit e tabinaw i yan ni ngan non ngak bokum milyon e girdi’ u ba ngiyal’ nib ngoch. (Matt. 11:19; 24:14) Aram rogon ni gad ma dag nib t’uf Jehovah rodad nge piin buguli yoror rodad.​—Matt. 22:34-40.

Machib u mit e tabinaw i yan e gathi ban’en ni ka fini rin’ e Pi Mich Rok Jehovah. Ya kan rin’ ko ngiyal’ ni immoy e pi apostal. I weliy apostal Paul ni ke machibnag e girdi’ u tabinaw rorad. I weliy u murung’agen e machib ni tay ngak e pi piilal u Efesus ni gaar: “Chirofen ni som’on ni gu taw ko nug nu Asia. . .ndariy ban’en ni gu tel romed ni gomanga ban’en nra ayuwegmed nnap’an ni gu be machibnagmed ma gu be skulnagmed u fithik’ e girdi’ ni yoor ngu lan e tabinaw romed i yan.” Aram rogon nge ku yugu boch e kanawo’ ma “ri taareb rogon piyu Israel nge piin ni gathi yad piyu Israel nri gu ta’ chilen ngorad ni ngar pied keru’rad ko denen ni yad be ngongliy ngar sapgad ngak Got, me mich e Somol rodad ni Jesus u wun’rad.” (Acts 20:18, 20, 21) Ngiyal’ nem ma ba t’uf ni ngan wereg fare thin nib fel’ ngak urngin e girdi’ ya pi pilung nu Roma e be mon’eg e liyor ko liyos ma boor e girdi’ ni yad be “ta’ fan boch e kan.” Ba ga’ fan ni ngan gayiy “fare Got ni ir e sunumiy e fayleng nge urngin ban’en ni ba’ riy,” me Ir e be “yog ngak e girdi’ u gubin yang ni ngar pied keru’rad ko kireb ni yad be rin’.”​—Acts 17:22-31.

Ngiyal’ ney ma kab ga’ fan ni ngan weliy fare thin nib fel’ ngak urngin e girdi’. Ya be chugur i yan ko ngiyal’ nra m’ay e re m’ag ney. Yafos ko urngin e girdi’ e ba l’ag ngay. Ere ba t’uf ni ngan gelnag e athamgil ni gad be tay u m’on nra taw ko tomur. Ba tamilang e re n’ey u wan’dad me ere gad be guy rogon ni nge yoor e machib ni gad be tay u mit e tabinaw i yan, ya gad manang ni aram e bin th’abi fel’ e kanawo’ ni ngan non ko piin ni yad be gayiy e thin nriyul’. Ma yib angin e re n’em e chiney ni taareb rogon ko ngiyal’ u nap’an Jesus nge pi apostal.​—Mark 13:10.

Ga be un ko machib u mit e tabinaw i yan uw rogon nrayog rom? Faanra ga be rin’ nge mus rogon, ma gad manang ni be yib e falfalan’ ngom ko pigpig ni ga be tay ku Got.​—Ezek. 9:11; Acts 20:35. Sana mo’maw’ rom ni ngam un ko machib u mit e tabinaw i yan. Sana gab m’ar ara ga bay u bang ni boor e girdi’ ma dubrad e machib. Ma sana bay e magawon ko am ni be togopuluw. Ma bochan pangim ma sana ba mo’maw’ ni ngam tababnag e sabethin ko girdi’ ni da mu nang me ere thingar mu gel ko magafan’ u gubin ngiyal’ ni ngam un ko machib u mit e tabinaw i yan. Dabi mulan’med ngay. (Ex. 4:10-12) Ya aram rogon e pi walagmed u yu yang.

I micheg Jesus ko pi gachalpen ni ra ayuwegrad “nge yan i mada’ nga tomren e fayleng.” (Matt. 28:20) Pi thin nem e ma pi’ e athamgil nga laniyan’ pi gachalpen ko ngiyal’ ney ma ma pi’ gelngirad ngar uned ko maruwel ko machib. Thingar dab da rusgad ma nge pagan’dad ni bod Paul ni ke weliy e thin ko Filippi 4:13. I gaar: “Demtrug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.” Ngam fol ko yaram ko ulung u gubin e wik ni fan ko machib u mit e tabinaw i yan. Ga ra un ko yugu boch e girdi’ ma ra pi’ e athamgil nga lanin’um ni ngam welthin ko girdi’ nib fel’ rogon ma ngam wereg e pi babyor ko Bible. Ngam meybil ku Got nge ayuwegem ngam gel ko pi n’en ni be magawonnagem, ma ngam athamgil nge mus rogon ni ngam wereg fare thin nib fel’.​—Luke 17:5.

Nap’an ni ngam weliy fare thin nib fel’ ko girdi’ ma ga ra weliy ko mang fan ni ke l’agan’um ngay ma aram e ra mudugil e athap rom. (1 Pet. 3:15) Ra tamilang u wan’um nib math keru’ e piin ni bay fare athap ko Gil’ilungun Got nge piin ni dariy e athap rorad. Ga ra pirieg e piin ni bay rogon ni ngar rung’aged fare thin ko Gil’ilungun Got ma ga ra guy ko uw rogon e piin ni dariy rogon rorad ma aram ma ga ra nang fan e n’en ni yog Jesus ko pi gachalpen ko Matthew 10:11-14. Ra felan’um ngay ni kam fol ko motochiyel rok Jesus ni “nge gal ramaem” ma sana ga ra flaab ya ga ra ayuweg e girdi’ ngar nanged e thin riyul’ ni ma pow’iy i yan ko yafos ni manemus.​—Matt. 5:16; John 17:3; 1 Tim. 4:16.

Bay e yaram ni ngan un ko machib u mit e tabinaw i yan ko weekend nge nap’an e week. Bay boch e binaw ma dariy be’ u tabinaw nrran, me ere boch e ulung e ma yarmiy ni ngan un ko machib ko balayal’. Ma kar pirieged ni kab fel’ u wan’ e girdi’ ni ngar nonad ko girdi’ ko mathigyal’ ara balayal’ ma gathi kakadabul. Maku, bay mit e machib ni ra yibnag angin ko binaw rom.

NGAN GAYIY E PIIN NI BAY ROGORAD

I yog Jesus ko pi gachalpen ni ngar “gayiyed” e piin ni bay rogon. (Matt. 10:11) Ma rogon ni ngan pirieg e piin ni ba adag e machib e gathi ke mus u daken e machib u mit e tabinaw i yan. Ya ke machibnag e girdi’ u gubin ngiyal’ nib puluw, ngu fithik’ e sabethin. (Luke 8:1; John 4:7-15) Maku arrogon e pi apostal ni kar machibnaged e girdi’ u gubin ngiyal’.​—Acts 17:17; 28:16, 23, 30, 31.

Ku arrogon e ngiyal’ ney ma gad be nameg ni ngad wereged fare thin ko Gil’ilungun Got ngak urngin e girdi’ nrayog. Ere thingar da folgad rok Jesus nge pi gachalpen uw rogon ni kar wereged e machib maku thingar da rin’ed nib m’ag ko ngiyal’ ney ni be thil thil iyan ma be thilthil salpen e girdi’ u lan e binaw.​—1 Kor. 7:31.

Thingar da gayiyed e girdi’ u gubin yang ma gathi ke mus u mit e tabinaw i yan. Ke yib angin ko pi publisher ni kar ranod u tabon e maruwel ko girdi’. Maku machib u kanawo’ e ke yibnag angin ko girdi’ u boor e binaw, nge machib u yu gin ni fan ko fafel, nge parking lot, nge public transportation, nge yu gin ni bay e girdi’ riy. Ma aram rogon ni kan wereg fare thin nib fel’ ko girdi’ ni dar moyed u tabinaw u nap’an ni yib e pi publisher nga taferad.

Ma yib angin ko girdi’ ni ngan machibnagrad u daken fare Wulyang Ntagil’e Damit nge Awake! Ngan non nib gol ko girdi’ ma ngan weliy u murung’agen ban’en nib m’ag ni bay ko pi magazine. Ma rayog ni ngan pi’ yugu boch e babyor ngak e piin ni ba adag ma ngan yarmiy ni ngan non ngorad u taferad. Yu ngiyal’ ma fare babyor ni Machib Rodad ni Fan ko Gil’ilungun Got e be weliy u murung’agen e re n’ey ma be pining e girdi’ ngar uned ko urngin mit e machib.

Ga ra pirieg ni rayog ni nge yoor e machib ni ngan tay ni faan ga ra machibnag e girdi’ u yu gin ni fen e yoor. Machane gathi ke mus ni ngan ginang e girdi’ min wereg fare thin nib fel’ ni aram e n’en nthingari rin’ e pi Kristiano ko ngiyal’ ney. Faanra ga ba adag ni ngam ayuweg e girdi’ nge yog ngorad fare thin nriyul’ ni ma pow’iy i yan ko yafos ni manemus ma ba t’uf ni ngam sul ngorad u gubin ngiyal’ ni ngar mon’oggad i yan mar manged e pi Kristiano nib ilal.

NGAN SUL KO GIRDI’

I yog Jesus ku pi gachalpen ni gaar: “Gimed weliy murung’ageg u lan yu Jerusalem . . . nge yan i mada’ ko yungi n’en ni yan i mus e fayleng ngay.” (Acts 1:8) Machane ki gaar ngorad: “Mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matt. 28:19, 20) Bay e falfalan’ riy ko pigpig ku Jehovah ni ngan sul ngak e girdi’. Girdi’ ni kar adaged fare thin nib fel’ ko yay nsom’on ni kam weliy boch e thin nu Bible ngorad ma sana ra gel e michan’ rorad ku Got ma ra tamilang u wan’rad nib t’uf rorad e tirok Got ban’en. Ngam yarmiy ni ngam sul u ba ngiyal’ nib puluw ma ngam fl’eg rogon, ma sana ga ra tababnag e Bible study. Susun ni aram e n’en ni ngam nameg u nap’an ni ngam sul ko girdi’. Gathi ke mus ni gad ra ‘yung’ awochngin fare thin nib fel’ ya ku gad ma ‘puog e ran’ ngay.​—1 Kor. 3:6.

Mo’maw’ ko boch e girdi’ ni ngar sulod ko girdi’. Sana gab chag i weliy fare thin nib fel’ u mit e tabinaw i yan, ma ri ga ba adag e re n’em. Machane sana nap’an ni ngam lemnag ni thingar mu sul ngak e girdi’ ma ngam weliy boch e thin ko Bible, ma ga be lemnag ni dabiyog rom. De t’uf ni ngam lemnag ni aram rogon. Ba ga’ ni kam pi’ boch e babyor ngak be’ ni ba adag e machib ko yay ni som’on ni kam mada’gow. Mang ni da mu weliy boch e thin ni bay ko re ke babyor nem? Rayog ni ngam fl’eg rogon u m’on riy. Faanra ga be lemnag ni dabiyog rom ma ngam yarmiy ni nge un reb e publisher ngom.

Ulung rok Jehovah e ma pi’ e ayuw ni ngam salap i sul ko girdi’. Ngam guy rogon ni ngam mon’og i fil e thin ko Bible. Mu pagan’um ngak Jehovah ma ngam fol ko pi walag ni pumoon nge ppin ni yad ba salap ko machib. Faanra er rogon ma ga ra mon’og i sul ko girdi’ ma ra gel e falfalan’ rom ko machib.

NGAN CONDUCTNAG E BIBLE STUDY

I machibnag Filip reb e pumoon ni ba adag e thin rok Got me fith ni gaar: “Mog, ga be nang fan e pi n’ir ni ga be bieg?” Me fulweg fare moon ni gaar: “Uw rogon mu gu nang fan ni faanra dabi weliy be’ fan ngog?” Ma be weliy e thin ko Bible ko Acts guruy ni 8 ni ke tabab Filip ni nge weliy e pi thin ko Bible ni be bieg facha’ me “weliy ngak faanem fare thin nib fel’ ni murung’agen Jesus.” (Acts 8:26-36) Dada nanged ko uw n’umngin nap’an ni i par Filip ku facha’ ma i weliy Filip fare thin nib fel’ ngak ma aram me mich u wan’ fare moon ma ba adag ni nge un ko taufe. Ke mang reb e gachalpen Jesus Kristus.

Ngiyal’ ney ma sana a adag be’ e machib machane dawori fil e thin ko Bible, me ere ba t’uf ni ngan sul ngak in yay min fil e Bible ngak u boch e wik ara pul ara reb e duw fa boch ma aram ma ra mich u wan’ ma rayog ni nge un ko taufe. Ma ra yib e flaab ngom ko ayuw ni kam pi’ u fithik’ e munguy ni ngam ayuweg e piin nib yul’yul’ ngar manged pi gachalpen Jesus ya ke gaar: “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.”​—Acts 20:35.

Dabi siy ni ga ra pirieg nib mom ni ngam conductnag e Bible study u daken reb e babyor ko Pi Mich Rok Jehovah ni fan ko re n’em. Ngam fol rok fa en ni ke fil e Bible ngom fa yugu boch e girdi’ u lan e ulung, ma rayog ni ngam salap i conductnag e Bible study, ma ngam ayuweg e girdi’ ngar manged pi gachalpen Jesus Kristus.

Faanra ba t’uf rom e ayuw ni ngam tababnag ma ngam conductnag e Bible study, ma ngam weliy ko reb e piilal ara reb e Mich nib salap i conductnag e Bible study. Rayog ni ngan ayuwegem ngam fol ko pi thin ni bay ko Machib Rodad Ni Fan Ko Gil’ilungun Got ma kan demonstratnag ko Service Meeting. Nge pagan’um ngak Jehovah ma ngam meybil ma ra yib angin. (1 John 3:22) Ere ngam un i ayuweg e girdi’ ngar manged pi gachalpen Jesus ma faanra rayog ma ngam nameg ni ngam conductnag reb e Bible study ni gathi ke mus fare study ko tabinaw rom. Ngam conductnag e Bible study ma ra gel e falfalan’ rom ko machib.

NGAN POW’IY E GIRDI’ KO ULUNG ROK JEHOVAH

Nap’an ni gad ma conductnag e Bible study ma gad ma ayuweg e girdi’ ngar manged pi gachalpen Jesus Kristus, ma yad ra nang ko mini’ Jehovah Got mar uned ko ulung. Kan yarmiy e pi ulung u rogon nib theocratic ni ngan rin’ e tin nib m’agan’ Jehovah ngay. Ra mon’og i yan e pi Bible student ko tirok Got ban’en ni faan gad ra ayuwegrad ngar ted fan e ulung rok Jehovah mar uned ngay. Ba ga’ fan ni ngan skulnagrad ko uw rogon ni ngan rin’.

Rayog ni ngam dag e pi video nge brochure ni fan ko re n’ey. Bay boch e thin ko Guruy ni 4 ko re ke babyor ney ni be weliy u murung’agen.

U tabolngin e ngiyal’ ni ngam conductnag e Bible study, ma ngam ayuweg e girdi’ nge tamilang u wan’rad ni be fanay Jehovah ba ulung u fayleng ni ngan rin’ e tin nib m’agan’ ngay. Ngan tamilangnag ko uw fene ga’ fan e pi babyor ni ma fanay e Pi Mich Rok Jehovah ma ngan weliy ko uw rogon ni yibe fl’eg ma yibe wereg e pi n’en ney u daken e girdi’ ni kar ognaged yad ku Got. Ngam pining e pi Bible study ni ngar uned ngom ko muulung ni Congregation Book Study. Ngam fekrad ngar mada’gad e pi walag, ma ngam weliy ko uw rogon ni yibe conductnag e muulung u Kingdom Hall. Ngam piningrad ngar uned ngay. Ngam ayuwegrad ngar mada’gad yugu boch e Pi Mich ko pi circuit assembly nge district convention. Aram boch e ngiyal’ nrayog ko piin nib biech ni ngar guyed ko uw rogon ni be dag e pi tapigpig rok Jehovah ni yad e tin riyul’ e Kristiano ya bay e t’ufeg u fithik’rad. (John 13:35) Piin ni ba adag e machib e ra gel i yan rogon ni yad ma tay fan e ulung rok Jehovah ma yad ra mon’og i nang Jehovah.

NGAN FANAY E PI BABYOR KO BIBLE

Tin som’on e Kristiano e kar pasiggad i tamilangnag fare Thin Rok Got. Kar fl’eged boch e babyor ko Thin Rok Got ni ngar fanayed ma ngar filed ko muulung ko ulung. Ma kar weliyed fare thin riyul’ ko Thin Rok Got ngak yugu boch e girdi’. Pi thin ni kar yoloyed nga but’ e buch uw ma kar chaariyed. (Kol. 4:16; 2 Tim. 2:15; 3:14-17; 4:13; 1 Pet. 1:1) Pi Mich Rok Jehovah ko ngiyal’ ney e ma fanay boch e masin ni ngar fl’eged e babyor, ma yad ma fl’eg bokum milyon ken e Bible nge bokum milyon e babyor ko Bible​—ni bod e pi tract, nge brochure, nge babyor, nge magazine—​u boor mit e thin.

Nap’an ni ngam weliy fare thin nib fel’ ngak e girdi’ ma ngam fanay e pi babyor ko Bible ni fl’eg “fare tapigpig nib yul’yul’ mab gonop.” (Matt. 24:45) Fare babyor ni Machib Rodad Ni Fan Ko Gil’ilungun Got e be yog ko tin ngan e babyor ni ngan wereg ko machib u ra reb e pul. Maku rayog ni ngam un i wereg e pi magazine u boch e ngiyal’ u reb e pul nge reb nib muun ngay e pi rran ni magazine day.

Bin th’abi ga’ fan e maruwel ko ‘fare tapigpig nib yul’yul’ mab gonop’ e ngar pied e ggan nib spiritual ko ngiyal’ nib puluw ko tabinaw rok Got, machane re “tapigpig” nem e kar folgad rok Jehovah Got mar golgad ya yad ma pi’ e ggan nib spiritual ko urngin e piin ni ba adag ni ngar nanged Got. Bochan ni ke yib angin ngom ya kam bieg ma kam fil e pi babyor ko Pi Mich Rok Jehovah, ma dabi siy ni ga ba adag ni ngam weliy ko girdi’ e pi n’en ni kam fil. (Heb. 13:15, 16) Ra fanay e tin biech e girdi’ e pi babyor ney ma rayog ni nge yib angin u nap’an ni ngar wereged fare thin nib fel’.

MACHIB U FITHIK’ E SABETHIN

I yog Jesus ko girdi’ ni be tiyan’ ngak ni gaar: “Gimed bod e tamilang ngak e girdi’ nu fayleng. . .nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.” (Matt. 5:14-16) Pi gachalpen ney e susun ni ngar tamilangnaged e kanawo’ rok Got mar folgad rok Jesus Kristus ni ke gaar: “I gag e tamilang ko girdi’ nu fayleng.” I tay Jesus e kanawo’ ko pi Kristiano ni ngan pag “fare tamilang ko yafos” nge gal ramaen ni fan ko urngin e piin ni ra motoyil ngay.​—John 8:12.

Ku arrogon fare apostal Paul ni ke tay e kanawo’ ni ngad leked. (1 Kor. 4:16; 11:1) Nap’an ni bay u Athens ma gubin e rran ma ke machibnag e girdi’ u gin ni bay e kantin riy. (Acts 17:17) Pi Kristiano u Filippi e kar folgad rok ma ke yog ni be ‘gal ramaerad u fithik’ e girdi’ nu fayleng, ni bod e t’uf ni be gal’ lan e lang.’ (Fil. 2:15) Ku arrogon gadad ma rayog ni ngad tamilangnaged fare thin riyul’ ko Gil’ilungun Got u daken e thin rodad nge ngongol rodad u gubin ngiyal’ nrayog ni ngad wereged fare thin nib fel’. Rriyul’ ma ngongol rodad nib fel’ mab yul’yul’ mab mat’aw e rayog ni nge tamilangnag ni gad ba lingagil u fithik’ e girdi’ nu fayleng. Machane faanra gad ra weliy fare thin nib fel’ ko girdi’ ni ma guy e ngongol rodad, ma yad ra nang ko mang fan ni gad ba thil ko tin ni ka bay e girdi’.

Boor e Pi Mich Rok Jehovah e ma wereg fare thin nib fel’ ko girdi’ ni yad ma mada’ u gubin e rran u tabon e maruwel rorad, fa skul, fa nap’an ni yad be rin’ e pi n’en ni yugu yima rin’ ko par. Nap’an ni gad be milekag, ma rayog ni ngad nonad ko girdi’. Ra bagadad ma thingarda tedan’dad ko ngiyal’ nrayog ni ngad weliyed e machib u fithik’ e sabethin ma ngad fl’eged rogon ni ngad wereged e machib u gubin ngiyal’.

Gad ra adag ni ngad wereged fare thin nib fel’ ko girdi’ ni faan dab da paged talin ni nap’an ni gad ra rin’ ma gad be pining e sorok ngak fa Ani sunumiydad ma gad be tay fan fithingan. Maku rayog ni ngad ayuweged e piin nib yul’yul’ ni ngar nanged Jehovah ma aram ma rayog ni ngar pigpiggad ngak mar athapeged e yafos u daken e michan’ rorad ngak Jesus Kristus. Urngin e pi n’ey ma aram e pigpig nib thothup, ma ma felan’ Got ngay.​—Heb. 12:28; Rev. 7:9, 10.