Guruy ni 7

Mu Chuchugur ku Got u Fithik’ e Meybil

Mang fan nib ga’ fan ni ngan meybil ni gubin ngiyal’? (1)

Mini’ e susun ngad meybilgad ngak, ma uw rogon? (2, 3)

Mang boch ban’en nib puluw ni ngan yibilay? (4)

Mang ngiyal’ e susun ngam meybil? (5, 6)

Ma motoyil Got ko urngin e meybil fa? (7)

1. Meybil e ngan non ku Got u fithik’ e sobut’an’. Susun ngam meybil ku Got ni gubin ngiyal’. Ma aram ma ga ra nang ni kam chuchugur ngak ni bod reb e fager. Jehovah e ir e th’abi ga’ mab gel gelngin, machane ra motoyil ko meybil rodad! Ga ma meybil ku Got ni gubin ngiyal’ fa?—Psalm 65:2; 1 Thessalonika 5:17.

2. Meybil e bang ko liyor rodad. Ere susun kari mus ni goo Jehovah Got e ngad meybilgad ngak. Nap’an ni immoy Jesus u fayleng, ma yigoo Chitamangin e ma meybil ngak ma gathi yugu be’. Ere susun nga kud yodoromgad. (Matthew 4:10; 6:9) Ma yug aram rogon, ma susun meybil rodad e nga nog u daken fithingan Jesus. Re n’ey e be dag ni ri gad be ta’ fan e liw ku Jesus ma ke michan’dad ko fare biyul’ ni maligach ni pi’.—John 14:6; 1 John 2:1, 2.

3. Nap’an ni gad ra meybil ma susun ngad nonad ku Got ko thin ni bay u gumercha’dad. Susun gathi tin ke mit ngodad e meybil e nga udogned fa ngad bieged e tin bay u babyoren e meybil. (Matthew 6:7, 8) Rayog ni uda meybilgad u fithik’ e ta’ fan ni yug demtrug rogon ni gad be par, maku demtrug ngalan’ nge gin’en ni gad bay riy. Mus ko meybil u laniyan’dad ma ra rung’ag Got. (1 Samuel 1:12, 13) Ma kub manigil ni ngan gay bang ndariy lingan ban’en riy ma dariy e girdi’ riy ngad meybilgad ni goo gad.—Mark 1:35.

4. Mang boch ban’en nrayog ni ngam yibilay? Yug boch ban’en ni ba’ rogon nga thilmew Got ni demtrug ko mang. (Filippi 4:6, 7) Fare meybil rok Somol e ma dag ni susun ngad yibilayed fithingan Jehovah nge tin ba m’agan’ ngay. Ku rayog ni ngad ninged e tin ba t’uf ko par rodad, me n’ag fan e denen rodad, me ayuwegdad nge dabda awgad ko tin ra wawliydad ko kireb. (Matthew 6:9-13) Meybil rodad e susun dariy e lem riy nib siin. Ma ke mus ni goo tin ba m’agan’ Got ngay e ngad yibilayed.—1 John 5:14.

5. Rayog ni ngam meybil ko ngiyal’ ni be yog lanin’um ngom ni ngam mog e magar ku Got ara ngam og e sorok ngak. (1 Kronikles 29:10-13) Susun ngam meybil ko ngiyal’ ni ke yib e magawon ngom fa kan skengnag e michan’ rom. (Psalm 55:22; 120:1) Rib puluw ni ngam meybil u m’on ni ngam abich. (Matthew 14:19) Ma piningdad Jehovah ni ngad meybilgad ngak u “gubin e ngiyal’.”—Efesus 6:18.

6. Rib t’uf e meybil ko ngiyal’ ni faanra kad rin’ed reb e denen nib ubchiya. Aram e ngiyal’ ni ngad wenignaged ku Jehovah nge runguydad nge n’ag fan. Ma faan gad ra weliy e denen rodad ngak ma gad athamgil nge dab kud rin’ed biyay, ma ra yog ni “n’ag Got fan rodad nib gur.”—Psalm 86:5; Proverbs 28:13.

7. Ke mus ni meybil ko piin mmat’aw e ra motoyil Got ngay. Ra nge motoyil Got ko meybil rom, ma thingar mu athamgil nge mus rogom ni ngam par ni ga be fol ko pi motochiyel rok. (Proverbs 15:29; 28:9) Thingar mu sobutan’nagem u nap’an ni ga ra meybil. (Luke 18:9-14) Ma ba t’uf ni ngam maruweliy e n’en ni ga be yibilay. Ma faanra aram rogon ma ga be micheg ni riyul’ ni ke mich u wan’um ma gab yul’yul’ ko tin ni ga be yog. Ma kari mus ni aram rogon ma ra sulweg Jehovah taban e meybil rom.—Hebrews 11:6.