Guruy ni 10

Rogon ni Ngam Mon’og Iyan ko Machib

NAP’AN ni ke taw ko ngiyal’ nra l’og Jesus pi gachalpen ngar wereged e thin ko Gil’ilungun Got me gaar ngorad: “Woldug ni ngan kunuy ngan tay nga naun e ba ga’ ni ba ga’ yang, machane piin ni ngar muruwliyed nge thap nga naun e ba lich.” Boor e maruwel ni ngan rin’ ere ki gaar: “Mu yibilgad ngak e en ni ir e suwon e re woldug nem ngki pi’ boch girdien e maruwel ngar muruwliyed e re woldug rok nem nge thap nga naun.” (Matt. 9:37, 38) I fil Jesus ko pi gachalpen rogon ni ngar machibnaged e girdi’. Ke non ngorad u fithik’ e pasig. I gaar: “Dabiyog ni gimed ra mu’nag e maruwel romed u lan gubin e binaw nu Israel u m’on ko ngiyal’ nra yib e en ni Fak e Girdi’ riy.”​—Matt. 10:23.

Maku arrogon e ngiyal’ ney ni ba t’uf e ayuw ko machib. Buchuuw e tayim ni ka bay, ma thingar ni machibnag fare thin nib fel’ ko Gil’ilungun Got u m’on nra taw ko tomur. (Mark 13:10) Thingar da wereged e machib ni taareb rogon ku Jesus nge pi gachalpen machane ngan rin’ u ga’ngin e fayleng. Maku arrogon gadad ni gad buch uw ma bay bokum bilyon e girdi’ u fayleng machane gathi ba ngochngoch pa’ Jehovah. Rayog ni nge n’igin ngan wereg fare thin nib fel’ ko Gil’ilungun Got u polo’ u fayleng. Yira machibnag fare thin nib fel’ ma ra yib e ngiyal’ ko tomur nib tayim uw rogon e schedule rok Jehovah. Ma gad ra par nib yul’yul’ ni kad rin’ed e tin nib mil fan ngodad ko machib? (Ezek. 33:8, 9) Gad ra mon’eg Gil’ilungun Got e chiney ma rayog ni ngad uned ko machib nge mus rogon? Mang boch ban’en nib theocratic ni gad be nameg?

I weliy Jesus ko mang e ba t’uf ku Jehovah ni nge rin’ e piin ni kar ognaged yad ngak, me gaar: “Thingari t’uf rom Jehovah ni ir e Got rom, u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim.” (Mark 12:30) Gad gubin ma thingarda pigpiggad ku Got u polo’ i lanin’dad. Ere rayog ni ngad daged ni gad ba yul’yul’ u daken e machib ni gad be tay nge mus rogon. (2 Tim. 2:15) Bay boor e kanawo’ nrayog ni ngad rin’ed e re n’ey nge puluw nga salpedad nge rarogodad. Mu lemnag boch ma ngam turguy ko mang e ga ra nameg ko machib.

ROGON E PIGPIG KO PUBLISHER U LAN E ULUNG

Urngin e piin ni ma un ko thin nriyul’ e bay e taw’ath rorad ni ngar machibnaged fare thin nib fel’. Aram e maruwel ni pi’ Jesus ko pi gachalpen. (Matt. 24:14; 28:19, 20) Be’ ni ir reb e gachalpen Jesus Kristus e ma tabab i weliy ko girdi’ u murung’agen fare thin nib fel’ u nap’an ni ke tamilang u wan’ ko uw fene ga’ fan. Aram rogon Andrew nge Filip nge Kornelius nge yugu boch e girdi’. (John 1:40, 41, 43-45; Acts 10:1, 2, 24; 16:14, 15, 25-34) Ere u m’on nge un be’ ko taufe ma rayog ni nge un i machibnag fare thin nib fel’? Arrogon. Ngiyal’ ni ke yog ku be’ ni nge mang reb e unbaptized publisher ko ulung ma rayog ni nge un ko machib u mit e tabinaw iyan. Maku rayog ni nge un ko yugu boch e kanawo’ ko machib u rogon nrayog rok.

Gur be’ ni kam un ko taufe ma dabi siy ni ga ba adag ni ngam rin’ urngin ban’en nrayog rom ni ngam ayuweg e girdi’ ngar nanged fare thin nib fel’. Piin ni pumoon nge ppin e bay rogorad ni ngar uned ko fare maruwel ni dugliy Got. Urngin e girdi’ ma susun ni ngar ted e kanawo’ mar rin’ed e tin nib mil fan ngorad ko ulung. (1 Tim. 2:9-15; Titus 2:1-10; 1 Pet. 5:5) Pi pumoon ko ulung ni be mon’og ko tirok Got ban’en ma rayog ni ngan dugliyrad mar manged ministerial servant. (1 Tim. 3:8-10, 12, 13) Pi pumoon ni aram rogon ni yad ma athamgil ni ngar manged piilal ma yad be rin’ e tin nib t’uf ku Got ni ngar rin’ed ma rayog ni ngan dugliyrad ko re n’ey. Yad ma machibnag fare ulung ni yad e pi tachugol saf. (1 Tim. 3:1-7; Titus 1:5-9) Ri gad ba taw’ath ni ngad mon’ognaged Gil’ilungun Got ni mus ni dabiyog ni ngad rin’ed boor ban’en. Rib falfalan’ e en nrayog ni nge yoor e machib ni be tay u boch e kanawo’.

NGAN PIGPIG KO GIN NIB T’UF E AYUW RIY

Sana ga be pigpig ko gin ni yima wereg e machib riy ni gubin ngiyal’ riy. Faanra er rogon ma sana ga be lemnag ni rayog ni ngam par ko gin nib t’uf e ayuw ko machib riy. (Acts 16:9) Circuit overseer rom e rayog ni nge tamilangnag ko uw rogon nrayog ni ngam ayuweg reb e ulung u lan fare circuit. Faanra ga ba adga ni ngam par u bang ko nam rom ma ngam yoloy ko branch ofis u murung’agen. Faanra gur reb e piilal ara ministerial servant ma sana bay reb e ulung ko nam rom ni ba t’uf e ayuw riy.

Ga ba adag ni ngam mon’ognag Gil’ilungin Got u yugu reb e nam? Faanra er rogon ma thingar mu fl’eg i lemnag e re n’em. Ya bay wenegan ngom nge piin nra un ngom. (Luke 14:28) Faanra gathi ga ra par u rom nib n’uw nap’an ma ffel’ ni ngam lemnag ni ngam par u bang ko nam rom.

Fare Congregation Service Committee rom e thingara pied e babyor ni letter of recommendation u m’on nra pi’ e branch ofis ko nam rom ara yugu boch e nam fithingan boch e ulung nib t’uf e ayuw rorad. Ba t’uf e re ke babyor ney ndemtrug ni gur reb e piilal ara ministerial servant ara pioneer fa publisher. Fare service committee e ra pi’ e babyor ni letter of recommendation nge babyor rom ngak fare branch ofis ko gin ni ga ba adag ni ngam man ngay.

Faanra ga ba adag ni ngam pigpig u bang nib t’uf e ayuw riy ma mang ni damu weliy ko piin piilal ko ulung rom? Rayog ni ngar ayuweged gur ngam turguy ko uw rogon ni ngam rin’ fa uw rogon nrayog ni ngam rin’ ba ngiyal’ nga m’on.

NGAM MARUWEL GAD E ULUNG U TAABANG NI YUGU DEMTRUG KO MANG THIN

Faanra nge yoor e machib ni ngam tay ma ngam lemnag ni ngam fil e thin nu bang fa sign language. Boch e tabinaw ni bilingual ma piin ni gallabthir nge fel’ yangaren e be pigpig ko ulung ko thin nu bang ma yad be ayuweg Gil’ilungun Got. Faanra ga be nameg ni ngam fil e thin nu bang ni fan ko machib ma mang ni damu non ngak e piin piilal ara fare circuit overseer. Rayog ni ngar tamilangnaged boch ban’en ngom ara pi’ e athamil nga lanin’um. Boch e ngiyal’ ma ke yarmiy e branch ofis ni ngan tay e skul ni ngan fil e thin nu bang ko boch e circuit ni ngan ayuweg e girdi’ nu bang ni be par u rom.

PIGPIG KO PIONEER NI AYUW NGE REGULAR NGE SPECIAL PIONEER

Urngin e publisher ma susun ni yad manang ko mang e maruwel ni full-time service. Yu ngiyal’ ma be weliy ko Machib Rodad Ni Fan Ko Gil’ilungun Got boch e thin u murung’agen. Ba publisher ni pioneer e thingari tay e kanawo’ ko Kristiano ma rayog ni nge tay in e awa ni kan dugliy u gubin e pul ko machib. Fare Congregation Service Committee e ma turguy ko rayog ni nge un be’ ko pioneer ni ayuw ma fare branch ofis e ma dugliy e regular nge special pioneer.

Rayog ni ngan un ko pioneer ni ayuw ko reb e pul fa boch fa gubin e pul uw rogon nrayog. Boor e publisher e ma un ko pioneer ni ayuw ko ngiyal’ nib ga’ fan ni nap’an e ngiyal’ ko Puguran ara nap’an nra yib fare circuit overseer. Boch e girdi’ e ma un ngay u nap’an e pi pul ko vacation. Pi publisher ni kar taufegad ma yad be un ko skul ma rayog ni ngar uned ko pioneer ni ayuw ko pi pul ni kan tal ko skul. Demtrug salpem ma faanra ga be par nib fel’ e ngongol rom ma rayog ni ngam thognag e pi awa ko machib ma rayog ni ngam un ko pioneer ni ayuw ma aram ma ra felan’ e pi piilal ko ulung ni ngar feked e application rom ko re pigpig ney.

Faanra ga ba adag ni ngam un ko regular pioneer ma ba t’uf ni ngam thognag in e awa u reb e duw. Fare babyor ni Machib Rodad Ni Fan Ko Gil’ilungun Got e be dag e schedule ni ngan thognag in e awa u gubin e pul ma rayog ni ngan rin’ e re n’ey. Be’ ni regular pioneer e thingari maruwel u taabang ko ulung. Pi pioneer ni yad ba pasig e ri yad e taw’ath ko ulung ya yad ma k’aring yugu boch e girdi’ ngar pasiggad ko machib mar pied e athamgil nga laniyan’ e girdi’ ngar uned ko pioneer. Machane u m’on nra dugliyem e pi piilal ko regular pioneer ma thingari pag nel’ e pul ni kam taufe ma thingari fel’ e ngongol rom, ma thingar mu tay e kanawo’ nib fel’ ko publisher. Thingar mu fol ko schedule ni rayog ni ngam thognag e pi awa nib t’uf ko machib.

Yibe mel’eg e piin nra un ko special pioneer ko pi regular pioneer ni kar daged ni be yib angin e machib ni yad be tay ma rayog ni ngar pigpiggad ko gin ni ke turguy fare branch ofis. Baga’ ni aram e gin nib isolated ma rayog ni ngar pirieged e piin ni ba adag e machib mar fl’eged e ulung nib biech. Yu ngiyal’ ma yibe l’og e special pioneer ko pi ulung nib t’uf e ayuw ni ngan machibnag e territory rorad u gubin ngiyal’. Boch e special pioneer ni yad e piin piilal e kan l’ograd ni ngar ayuweged e pi ulung nib achig ni mus ni gathi ri ba t’uf e ayuw ko machib u lan e binaw. Yibe pi’ e ayuw ko piin special pioneer ni ngan ayuwegrad ko tin nib t’uf rorad.

MINISTERIAL TRAINING SCHOOL

Be yoor iyan e ulung nib biech u gubin e duw ma aram e mich riy ni be flaabnag Jehovah e athamgil ni be tay e girdi’ rok ni ngar wereged fare thin nib fel’ ko Gil’ilungun Got. (Acts 16:5) Be yoor e ulung ere ba t’uf e piin piilal nge pi ministerial servant. Pi walag ni dar mabgolgad ma ke bung rogorad ma yibe piningrad ni ngar pied yad ko re maruwel ney mi yad gaar ku Jehovah: “Bay gu wan! Mu l’ugeg!” (Isa. 6:8) Boor e girdi’ ma kar folgad ko re n’ey mar uned ko fare Ministerial Training School ni fan ko pi ministerial servant nge pi piilal ni dawora uned ko mabgol ma kar ognaged yad ni ngar pigpiggad ko gin nib t’uf e ayuw. Girdi’ ni aram rogon e rayog ni ngar filed u murung’agen e requirement u nap’an e pi muulung ni fan ko pi walag ni yad ba adag ni ngar uned ko fare Ministerial Training School ma yibe tay e pi muulung ney u nap’an e circuit assembly.

Re skul ney e ma fil rogon ni ngan weliy e thin ko Bible nge rogon e yaram ko ulung ma aram e rayog ko pi pumoon ni ngar rin’ed e tin nib mil fan ngak e pi tachugol saf ko ulung. (Jer. 23:4) Tomren ni un e pi pumoon ko re skul nem ma yibe l’ograd ngar pigpiggad u gin nib t’uf e ayuw u lan e nam rorad ma boch e girdi’ e ra yan ko yugu reb e nam. Ma yibe l’og boch i yad ngar sulod ko ulung rorad ni ngar ayuweged e pi walag ni pumoon nge ppin ko binaw rorad. Piin ni kan skulnagrad ni aram rogon e rayog ni ngar ayuweged e girdi’ rok Got ko tirok Got ban’en nge yaram ko ulung.​—2 Tim. 3:16, 17.

PIGPIG KO MISSIONARY

Thingarni machibnag fare thin nib fel’ ko Gil’ilungun Got “nge yan i mada’ ko yungi n’en ni yan i mus e fayleng ngay” u m’on nra taw ko tomur, ere ba t’uf ni ngan l’og e pi missionary ko boch e binaw. (Acts 1:8; Matt. 24:14) Aram ma kan bing e kanawo’ ko bokum biyu’ e Pi Mich Rok Jehovah ni ngar pigpiggad, ni piin ni yad ba pasig ko machib u polo’ i lanin’rad, ma ma yib angin e machib ni yad ma tay. Yibe pining e girdi’ ni ngar uned ko missionary ma yibe skulnagrad ko Watchtower Bible School of Gilead.

Be’ ni ra un ko missionary ma susun ni ir be’ nib fel’ fithik’ i dow, mab gel gelngin, ya yibe l’og boor e missionary ko pi nam nib mo’maw e par riy. Ba t’uf ko missionary ni nge thiliyeg e par rok nge yalen ma boor mit e baiking nge m’ar nrayog ni nge yib ngak.

Faanra ga be un ko machib nib full-time ma ga ba adag ni ngam un ko missionary, ma rayog ni ngam fil u murung’agen ko pi muulung ni fan ko piin ni ba adag ni ngar uned ko missionary u nap’an e district convention. Maku rayog ni nge weliy fare circuit overseer rom boch ban’en u murung’agen. Faanra ke bung rogom ma rayog ni ngam un ko re pigpig ney ni ke ayuweg nge wer iyan e bin riyul’ e liyor.

PIGPIG U BETHEL

Bay boor e naun ko Bethel u ga’ngin e fayleng ma ngan pigpig riy e aram ba taw’th. Fare ngochol ni Bethel e sor fan ko “Naun rok Got” ma rib puluw e re n’em ya pi naun ney e aram e gin ni yibe maruwel ko tirok Got ban’en. Pi walag ni pumoon nge ppin ni ma un ko pigpig ko Bethel e yad be rin’ e maruwel nib ga’ fan ya yad ma fl’eg ma yad ma wereg e pi babyor ni ma fanay e Pi Mich Rok Jehovah u ga’ngin e fayleng. Fare Governing Body e bay u Brooklyn Bethel ma yad ma ayuweg e pi ulung u polo’ u fayleng.

Maruwel u Bethel e ba mo’maw. Ere piin nra un ngay e yad e pi walag ni pumoon ni kar ognaged yad ma gathi yad pillibthir, ma fel’ fithik’ i dowrad, ma ba gel gelngirad. Faanra ba t’uf e ayuw ko nam rom ma ga ba adag ni ngam pigpig u Bethel ma nap’an e pi district convention ma rayog ni ngam fil u murung’agen ko pi muulung ni fan ko piin ni ba adag ni ngar uned ko Bethel. Ma circuit overseer rom e rayog ni nge weliy boch ngom.

MARUWEL NI NGAN TOY E KINGDOM HALL

Fare maruwel ni ngan toy e Kingdom Hall nge Assembly Hall e aram ba pigpig nib thothup, ni bod rogon e ngiyal’ ni kan toy fare tempel rok Solomon. (1 Ki. 8:13-18) Boor e walag ni pumoon nge ppin e yad be dag ni yad ba pasig ko ulung rok Jehovah ya yad be pi’ e tayim nge tirorad ban’en ni ngar uned ko re maruwel ney.

Rayog ni ngam un ko re pigpig ney nib thothup? Faanra gur reb e walag ni pumoon ara ppin ni kam taufe mab fel’ e ngongol rom ma kam un ko maruwel ko dimow naun faram ma fare Regional Building Committee e ra felan’ ni ngam pi’ e ayuw. Boch e girdi’ ma kar ognaged yad ni ngar uned ko maruwel ni ngan toy e Kingdom Hall nge Assembly Hall u yugu boch e nam. Faanra dawor mu un ko maruwel ko dimow naun fa dawor mu un ko taufe machane gab reb e publisher nib fel’ ko ulung, ma rayog ni ngam un i toy e Kingdom Hall ko binaw rom. Mang ni damu weliy ko pi piilal nge circuit overseer ni ga ba adag ni ngam un ko maruwel?

MANG E GA BE NAMEG KO TIROK GOT BAN’EN?

Faanra kam ognagem ku Jehovah ma ga ba adag ni ngam pigpig ngak Jehovah ndariy n’umngin nap’an. Machane mang e ga be nameg e chiney? Ga ra nameg boch ban’en ko tirok Got ban’en ma ra ayuwegem ngam fanay gelngim u fithik’ e gonop. (1 Kor. 9:26) Ma ga be nameg ban’en ni bay fan. Ma aram e ra ayuwegem ngam mon’og iyan ko tirok Got ban’en ma ra ayuwegem ngam tiyan’um ko tin nib ga’ fan ya ga be athamgil ni nge yoor e pigpig ni ga be tay.​—Fil. 1:10; 1 Tim. 4:15, 16.

I weliy Jesus e fanathin u murung’agen be’ ni be yung e awoch me tamilangnag ni but’ ni yong’ol ni ma yibnag wom’engin nib thilthil. I gaar: “Ma awochngin e woldug ni wer nga daken e but’ ni yong’ol e be yip’ fan e piin nrung’aged e thin rok Got mi yad nang fan: mi yad k’uf, ni boch i yad e man e raay wom’engin, ma boch i yad e nel’ i ragag, ma boch i yad e guyey.” (Matt. 13:23) Faanra ke taw nga gum’erchadad e thin rok Got ma gathi susun ni nge yib wom’engidad ni ngan pining e sorok ku Jehovah? Gathi gad ba adag ni nge yib wom’engin ko Gil’ilungun Got u nap’an ni gad ma pasig un ko machib? Ma gathi gad ba adag ni nge yib wom’engin e kan ni thothup rok Got ko yafos rodad u gubin e rran? (John 15:2, 3; Gal. 5:22, 23) Rayog ni ngad rin’ed urngin e pi n’en nem ni faanra gad ra nameg boch ban’en ko tirok Got ban’en.

I tay apostal Paul e kanawo’ ni ngad leked ko pigpig ku Got. (1 Kor. 11:1) I athamgil Paul nge mus rogon ko pigpig ku Jehovah. Ba tamilang u wan’ ni boor rogon ni ngan pigpig ku Jehovah. I weliy Paul ko pi walag nu Korinth ni gaar: “Ba mab e kanawo’ ngog u roy nrayog ni gu ngongliy e maruwel riy ni ba ga’ ma ra yib fan.” Gathi ku aram rogodad? Gathi boor rogon ni ngad pigpiggad ku Jehovah u daken e ulung, nib muun ngay e maruwel ni ngan machibnag fare thin nib fel’ ko Gil’ilungun Got? Bod rogon Paul ma thingarda lemnaged ni re “kanawo’” nem e ba l’ag ko ngan gel ko “girdi’ ni be togopuluw.” (1 Kor. 16:9) I m’agan’ Paul ngay ni nge fol ko motochiyel ni bod rogon be’ ni ma un ko gosgos ni fan e nge yog nteeliyawnag nga ba teeliyaw ni gathi bayi par ndabi kireb. Mu tiyan’um ko n’en ni yog Paul ni gaar: “Kug gelnag dowag ko tug ni be aw ngay ke yan i par ni be fol rog.” (1 Kor. 9:24-27) Ku aram rogodad?

Boor e girdi’ ma yad be un ko missionary e chiney ya gallabthir rorad nge yugu boch e girdi’ e kar pied e athamgil nga lanin’rad, ma aram mar nameged ni ngar uned ko skul ko Gilead ko maruwel ko missionary ni mus ko ngiyal’ ni ka yad bitir. Ma boor e piin ni be maruwel u Bethel e chiney e kar nameged ni ngar pigpiggad u Bethel u nap’an ni ka yad bitir fa nap’an e ngiyal’ ni kar nanged fare thin nib fel’ mar filed u murung’agen e re pigpig ney.

Ra be’ ma ba thilthil salpen nge rarogon, ma yibe pining urngin e girdi’ ni ngar nameged boch ban’en nib theocratic. Boch ban’en ni ngan nameg e ngan un ko machib u gubin e wik, ngan tababnag e Bible study, ngan fl’eg rogon ko pi muulung ko ulung, ngan un ko pioneer ni ayuw ara regular pioneer, ngan pigpig u bang nib t’uf e ayuw riy, ngan un i toy e Kingdom Hall nge Assembly Hall, ngan pigpig u Bethel ara missionary. Ma nap’an e pi muulung ko ulung nge convention, ngu lan e pi babyor ko Pi Mich Rok Jehovah ma be tamilangnag boch ban’en nib theocratic nrayog ni ngam nameg nib m’ag ngom. Bin nib ga’ fan e ngam par nib mudugil ma ngam rin’ e tin nib mil fan ngom. Faanra ngam rin’ ma ga ra n’uf Got ma ga ra taw ko bin th’abi ga’ e n’en ni gad be nameg ni aram e ngad pigpiggad ku Jehovah ndariy n’umngin nap’an.​—Luke 13:24; 1 Tim. 4:7, 8.