Baadag Got ni ngad pared u paradis u fayleng u fithik’ e gapas nge felfelan’ ni manemus!

Sana ga ra lemnag ko, ‘Uw rogon nrayog ni nge buch e re n’ey?’ Be yog e Bible nra yibnag Gil’ilungun Got e pi n’ey, mab m’agan’ ngay ni nge fil gubin e girdi’ murung’agen Gil’ilungun nge n’en nib m’agan’ ngay ni fan ngodad.​—Psalm 37:11, 29; Isaiah 9:7.

Baadag Got ni nge fel’ rogodad.

Baadag Got ni ngad felfelan’gad ni dariy n’umngin nap’an ni bod rogon reb e matam nib fel’ ni baadag e n’en nth’abi fel’ ni fan ngak pi fak. (Isaiah 48:17, 18) Ke micheg ni ‘en nra rin’ e tin nib m’agan’ ngay e ra par nib fos ndariy n’umngin nap’an.’​—1 John 2:17.

Baadag Got ni nge turguy e kanawo’ ni nga darod riy.

Be yog e Bible ni baadag en ni Sunmiydad ni “ngad filed e n’en ni ba adag ni ngad rin’ed” ya nge yog ni nga “darod ko yu pa’ i kanawo’ ni ke turguy ni nga darod riy.” (Isaiah 2:2, 3) Ke yarmiy boch ‘e girdi’ ni ngar manged girdien’ ni ngar machibnaged e n’en nib m’agan’ ngay u ga’ngin yang e fayleng.​—Acts 15:14.

Baadag Got ni ngad pigpiggad ngak nib taareban’dad.

Bin riyul’ e liyor ni yima tay ngak Jehovah e ma taarebnag laniyan’ e girdi’ u fithik’ e t’ufeg ma der ma ruw raba’nagdad. (John 13:35) Chon mini’ e ngiyal’ ney e yad be fil ngak gubin e girdi’ u ga’ngin yang e fayleng rogon ni ngar pigpiggad ngak Got nib taareban’rad? Gamad be pi’ e athamgil nga lanin’um ni ngam gay murung’agen e pi n’ey u lan e re ke babyor ney.

Uw urngin e Pi Mich Rok Jehovah ni ga manang? Boch i gamad e buguli yoror rom, ara piin ni gimed ma maruwel u taabang, ara piin ni gimed nga skul. Fa reb e kug weliyed e thin nu Bible ngom. Ere, uw rarogomad, ma mang fan ni gamad ma weliy ko girdi’ e n’en nib mich u wan’mad?

Taareb rogomad ko yug girdi’. Gamad gubin nib thilthil rarogomad. Boch i gamad e i un nga reb e teliw nib thil kafram, ma boch i gamad e immoy nde mich Got u wan’. U m’on ni nggu manged e Pi Mich Rok Jehovah, ma kug filed e machib nu Bible nib fel’ rogon. (Acts 17:11) Ke m’agan’mad ko pi n’en ni kug filed, ma kug dugliyed ni nggu pigpiggad ngak Jehovah Got.

Ma yib angin ngomad e fol Bible ni gamad ma tay. Taareb rogomad ngak urngin e girdi’ ni ma yib e magawon ngomad yu ngiyal’, maku bay boch ban’en ni gamad ba meewar riy. Machane, bochan ni gamad ma athamgil ni nggu folgad ko pi kenggin e motochiyel nu Bible, ma ke yag ni nge fel’ rogon e par romad. (Psalm 128:1, 2) Aram reb i fan ni gamad ma weliy ko girdi’ e pi n’en nib fel’ ni kug filed u Bible.

Pi n’en nib ga’ fan u wan’ Got e aram e pi n’en ni kub ga’ fan u wan’mad. Pi n’ey ni bay u lan e Bible e ba ga’ fan ko par romad, maku ma fil ngomad rogon ni ngaug ted fan boch e girdi’, nge rogon ni nga i m’ug boch i fel’ngimad ni bod rogon e yul’yul’ nge gol. Pi n’ey e ma ayuweg e girdi’ ni ngar pared nib fel’ fithik’ i dowrad, mab fel’ e ngongol rorad. Ku ma ayuweg chon e tabinaw ni ngar pared nib taareban’rad mab fel’ e ngongol rorad. Ba mich u wan’mad ni “gubin e girdi’ ma taareb rogorad u wan’ Got,” ere aram fan ni gamad bang u ba ulung i walag u ga’ngin yang e fayleng ni yugu aram rogon nib thilthil e nam nge am romad. Yugu aram rogon nib taareb rogomad ko yug girdi’, machane bay ban’en ko ngongol romad nib thil.​—Acts 4:13; 10:34, 35.

• Mang e taareb rogon ko Pi Mich Rok Jehovah nge yugu boch e girdi’?

• Mang boch ban’en nib ga’ fan ni ke fil e Pi Mich Rok Jehovah ko fol Bible ni yad ma tay?

Boor e girdi’ ni yad ma lemnag ni Pi Mich Rok Jehovah e fithingan reb e teliw ni kab beech. Machane, sogonap’an 2,700 e duw ni ke yan ma yima pining e pi “mich” ko pi tapigpig ko bin riyul’ e Got. (Isaiah 43:10-12) Un pining e Bible Students ara Piin ni Yad Ma Fil e Bible ngomad nge yan i mada’ ko duw ni 1931. Ere, mang fan ni kug mel’eged ni ngaun pining e Pi Mich Rok Jehovah ngomad?

Re ngachal ney e be gagiyelnag e Got romad. Bokum biyu’ yay ni immoy fithingan Jehovah u lan e pi babyor ko Bible kakrom. Boor ken e Bible ni kan piliyeg nga boor mit e thin ni kan chuweg e re ngachal ney riy kan tay boch e liw nga lon ni bod rogon e Somol ara Got. Machane, bin riyul’ e Got e ke tamilangnag ngak Moses ko ir mini’ u daken fithingan ni aram Jehovah, me yog ni gaar: “Ereray fithingag ni bay i par ndariy n’umngin nap’an.” (Exodus 3:15)a Ereray e kanawo’ ni ke gagiyelnag ir riy nib thil ngak yugu boch e got ni googsur. Gamad ba felfelan’ ni ngaug weliyed murung’agen fithingan Got nib thothup.

Re ngachal ney e be tamilangnag e maruwel nib milfan ngomad. Boor e girdi’ kakrom ni tabab rok Abel, nib mich Jehovah u wan’rad ma yad ba yul’yul’ ni ur weliyed ko girdi’ e pi n’en ni ke mich u wan’rad. U lan e pi chibog ni ke yan ma Noah, nge Abraham, nge Sarah, nge Moses, nge David, nge ku boch e girdi’ e kur manged boch e “pi girdi’ nem.” (Hebrews 11:4–12:1) Kug dugliyed ni nggu weliyed e tin riyul’ u murung’agen Got ngan nang ni bod rogon be’ ni ke yan nga kort ni nge micheg e n’en ni ke yog be’ nde kireb e rok.

Gamad be folwok rok Jesus. Be yog e Bible ni ir e “mich nib yul’yul’ ma ba riyul’.” (Revelation 3:14) I yog Jesus ni ir e ke ‘weliy murung’agen’ fithingan Got kan nang maku ir e ke ‘weliy e tin riyul’’ u murung’agen Got. (John 17:26; 18:37) Ere, tin riyul’ i gachalpen Jesus e thingar ra machibnaged fithingan Jehovah ngan nang. Ireray e n’en ni be rin’ e Pi Mich Rok Jehovah.

• Mang fan ni mel’eg e Piin ni Yad Ma Fil e Bible ni ngaun pining e Pi Mich Rok Jehovah ngorad?

• Ke uw n’umngin nap’an ni bay e pi mich rok Jehovah u fayleng?

• Mini’ e bin th’abi fel’ e Mich rok Jehovah?